১৪২. থুল্লচ্চযৰত্থুকাদি

২৩৮. ইধ পন, ভিক্খৰে, ভিক্খু তদহু পৰারণায থুল্লচ্চযং অজ্ঝাপন্নো হোতি. একচ্চে ভিক্খূ থুল্লচ্চযদিট্ঠিনো হোন্তি, একচ্চে ভিক্খূ সঙ্ঘাদিসেসদিট্ঠিনো হোন্তি. যে তে, ভিক্খৰে, ভিক্খূ থুল্লচ্চযদিট্ঠিনো, তেহি সো, ভিক্খৰে, ভিক্খু একমন্তং অপনেত্ৰা যথাধম্মং কারাপেত্ৰা সঙ্ঘং উপসঙ্কমিত্ৰা এৰমস্স ৰচনীযো – ‘‘যং খো সো, আৰুসো, ভিক্খু আপত্তিং আপন্নো, সাস্স যথাধম্মং পটিকতা. যদি সঙ্ঘস্স পত্তকল্লং, সঙ্ঘো পৰারেয্যা’’তি.

ইধ পন, ভিক্খৰে, ভিক্খু তদহু পৰারণায থুল্লচ্চযং অজ্ঝাপন্নো হোতি. একচ্চে ভিক্খূ থুল্লচ্চযদিট্ঠিনো হোন্তি, একচ্চে ভিক্খূ পাচিত্তিযদিট্ঠিনো হোন্তি…পে… একচ্চে ভিক্খূ থুল্লচ্চযদিট্ঠিনো হোন্তি, একচ্চে ভিক্খূ পাটিদেসনীযদিট্ঠিনো হোন্তি… একচ্চে ভিক্খূ থুল্লচ্চযদিট্ঠিনো হোন্তি, একচ্চে ভিক্খূ দুক্কটদিট্ঠিনো হোন্তি… একচ্চে ভিক্খূ থুল্লচ্চযদিট্ঠিনো হোন্তি, একচ্চে ভিক্খূ দুব্ভাসিতদিট্ঠিনো হোন্তি. যে তে, ভিক্খৰে, ভিক্খূ থুল্লচ্চযদিট্ঠিনো, তেহি সো, ভিক্খৰে, ভিক্খু একমন্তং অপনেত্ৰা যথাধম্মং কারাপেত্ৰা সঙ্ঘং উপসঙ্কমিত্ৰা এৰমস্স ৰচনীযো – ‘‘যং খো সো, আৰুসো, ভিক্খু আপত্তিং আপন্নো, সাস্স যথাধম্মং পটিকতা. যদি সঙ্ঘস্স পত্তকল্লং, সঙ্ঘো পৰারেয্যা’’তি.

ইধ পন, ভিক্খৰে, ভিক্খু তদহু পৰারণায পাচিত্তিযং অজ্ঝাপন্নো হোতি…পে… পাটিদেসনীযং অজ্ঝাপন্নো হোতি… দুক্কটং অজ্ঝাপন্নো হোতি… দুব্ভাসিতং অজ্ঝাপন্নো হোতি. একচ্চে ভিক্খূ দুব্ভাসিতদিট্ঠিনো হোন্তি, একচ্চে ভিক্খূ সঙ্ঘাদিসেসদিট্ঠিনো হোন্তি. যে তে, ভিক্খৰে, ভিক্খূ দুব্ভাসিতদিট্ঠিনো, তেহি সো, ভিক্খৰে, ভিক্খু একমন্তং অপনেত্ৰা যথাধম্মং কারাপেত্ৰা সঙ্ঘং উপসঙ্কমিত্ৰা এৰমস্স ৰচনীযো – ‘‘যং খো সো, আৰুসো, ভিক্খু আপত্তিং আপন্নো, সাস্স যথাধম্মং পটিকতা. যদি সঙ্ঘস্স পত্তকল্লং, সঙ্ঘো পৰারেয্যা’’তি.

ইধ পন, ভিক্খৰে, ভিক্খু তদহু পৰারণায দুব্ভাসিতং অজ্ঝাপন্নো হোতি. একচ্চে ভিক্খূ দুব্ভাসিতদিট্ঠিনো হোন্তি, একচ্চে ভিক্খূ থুল্লচ্চযদিট্ঠিনো হোন্তি…পে… একচ্চে ভিক্খূ দুব্ভাসিতদিট্ঠিনো হোন্তি, একচ্চে ভিক্খূ পাচিত্তিযদিট্ঠিনো হোন্তি… একচ্চে ভিক্খূ দুব্ভাসিতদিট্ঠিনো হোন্তি, একচ্চে ভিক্খূ পাটিদেসনীযদিট্ঠিনো হোন্তি… একচ্চে ভিক্খূ দুব্ভাসিতদিট্ঠিনো হোন্তি, একচ্চে ভিক্খূ দুক্কটদিট্ঠিনো হোন্তি. যে তে, ভিক্খৰে, ভিক্খূ দুব্ভাসিতদিট্ঠিনো, তেহি সো, ভিক্খৰে, ভিক্খু একমন্তং অপনেত্ৰা যথাধম্মং কারাপেত্ৰা সঙ্ঘং উপসঙ্কমিত্ৰা এৰমস্স ৰচনীযো – ‘‘যং খো সো, আৰুসো, ভিক্খু আপত্তিং আপন্নো, সাস্স যথাধম্মং পটিকতা. যদি সঙ্ঘস্স পত্তকল্লং, সঙ্ঘো পৰারেয্যা’’তি.

থুল্লচ্চযৰত্থুকাদি নিট্ঠিতা.