১৪১. পৰারণাঠপনং

২৩৫. তেন খো পন সমযেন ছব্বগ্গিযা ভিক্খূ সাপত্তিকা পৰারেন্তি. ভগৰতো এতমত্থং আরোচেসুং. ন, ভিক্খৰে, সাপত্তিকেন পৰারেতব্বং. যো পৰারেয্য, আপত্তি দুক্কটস্স. অনুজানামি, ভিক্খৰে, যো সাপত্তিকো পৰারেতি, তস্স ওকাসং কারাপেত্ৰা আপত্তিযা চোদেতুন্তি.

তেন খো পন সমযেন ছব্বগ্গিযা ভিক্খূ ওকাসং কারাপিযমানা ন ইচ্ছন্তি ওকাসং কাতুং. ভগৰতো এতমত্থং আরোচেসুং. অনুজানামি, ভিক্খৰে, ওকাসং অকরোন্তস্স পৰারণং ঠপেতুং. এৰঞ্চ পন, ভিক্খৰে, ঠপেতব্বা. তদহু পৰারণায চাতুদ্দসে ৰা পন্নরসে ৰা তস্মিং পুগ্গলে সম্মুখীভূতে সঙ্ঘমজ্ঝে উদাহরিতব্বং – ‘‘সুণাতু মে, ভন্তে, সঙ্ঘো. ইত্থন্নামো পুগ্গলো সাপত্তিকো. তস্স পৰারণং ঠপেমি. ন তস্মিং সম্মুখীভূতে পৰারেতব্ব’’ন্তি. ঠপিতা হোতি পৰারণাতি.

তেন খো পন সমযেন ছব্বগ্গিযা ভিক্খূ – পুরম্হাকং পেসলা ভিক্খূ পৰারণং ঠপেন্তীতি – পটিকচ্চেৰ সুদ্ধানং ভিক্খূনং অনাপত্তিকানং অৰত্থুস্মিং অকারণে পৰারণং ঠপেন্তি, পৰারিতানম্পি পৰারণং ঠপেন্তি. ভগৰতো এতমত্থং আরোচেসুং. ন, ভিক্খৰে, সুদ্ধানং ভিক্খূনং অনাপত্তিকানং অৰত্থুস্মিং অকারণে পৰারণা ঠপেতব্বা. যো ঠপেয্য, আপত্তি দুক্কটস্স. ন, ভিক্খৰে, পৰারিতানম্পি পৰারণা ঠপেতব্বা. যো ঠপেয্য, আপত্তি দুক্কটস্স.

২৩৬. এৰং খো, ভিক্খৰে, ঠপিতা হোতি পৰারণা, এৰং অট্ঠপিতা. কথঞ্চ, ভিক্খৰে, অট্ঠপিতা হোতি পৰারণা? তেৰাচিকায চে, ভিক্খৰে, পৰারণায ভাসিতায লপিতায পরিযোসিতায পৰারণং ঠপেতি, অট্ঠপিতা হোতি পৰারণা. দ্ৰেৰাচিকায চে, ভিক্খৰে,… একৰাচিকায চে, ভিক্খৰে,… সমানৰস্সিকায চে, ভিক্খৰে, পৰারণায ভাসিতায লপিতায পরিযোসিতায পৰারণং ঠপেতি, অট্ঠপিতা হোতি পৰারণা. এৰং খো, ভিক্খৰে, অট্ঠপিতা হোতি পৰারণা.

কথঞ্চ, ভিক্খৰে, ঠপিতা হোতি পৰারণা? তেৰাচিকায, চে, ভিক্খৰে, পৰারণায ভাসিতায লপিতায অপরিযোসিতায পৰারণং ঠপেতি, ঠপিতা হোতি পৰারণা. দ্ৰেৰাচিকায চে, ভিক্খৰে,… একৰাচিকায চে, ভিক্খৰে,… সমানৰস্সিকায চে, ভিক্খৰে, পৰারণায ভাসিতায লপিতায অপরিযোসিতায পৰারণং ঠপেতি, ঠপিতা হোতি পৰারণা. এৰং খো, ভিক্খৰে, ঠপিতা হোতি পৰারণা.

২৩৭. ইধ পন, ভিক্খৰে, তদহু পৰারণায ভিক্খু ভিক্খুস্স পৰারণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা অপরিসুদ্ধকাযসমাচারো, অপরিসুদ্ধৰচীসমাচারো, অপরিসুদ্ধাজীৰো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৰিগ্গহং, মা ৰিৰাদ’ন্তি ওমদ্দিত্ৰা সঙ্ঘেন পৰারেতব্বং.

ইধ পন, ভিক্খৰে, তদহু পৰারণায ভিক্খু ভিক্খুস্স পৰারণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পরিসুদ্ধকাযসমাচারো, অপরিসুদ্ধৰচীসমাচারো, অপরিসুদ্ধাজীৰো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৰিগ্গহং, মা ৰিৰাদ’ন্তি ওমদ্দিত্ৰা সঙ্ঘেন পৰারেতব্বং.

ইধ পন, ভিক্খৰে, তদহু পৰারণায ভিক্খু ভিক্খুস্স পৰারণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পরিসুদ্ধকাযসমাচারো, পরিসুদ্ধৰচীসমাচারো, অপরিসুদ্ধাজীৰো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৰিগ্গহং, মা ৰিৰাদ’ন্তি ওমদ্দিত্ৰা সঙ্ঘেন পৰারেতব্বং.

ইধ পন, ভিক্খৰে, তদহু পৰারণায ভিক্খু ভিক্খুস্স পৰারণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পরিসুদ্ধকাযসমাচারো, পরিসুদ্ধৰচীসমাচারো, পরিসুদ্ধাজীৰো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৰিগ্গহং, মা ৰিৰাদ’ন্তি ওমদ্দিত্ৰা সঙ্ঘেন পৰারেতব্বং.

ইধ পন, ভিক্খৰে, তদহু পৰারণায ভিক্খু ভিক্খুস্স পৰারণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পরিসুদ্ধকাযসমাচারো, পরিসুদ্ধৰচীসমাচারো, পরিসুদ্ধাজীৰো, পণ্ডিতো, ব্যত্তো, পটিবলো অনুযুঞ্জীযমানো অনুযোগং দাতু’’ন্তি, সো এৰমস্স ৰচনীযো, ‘‘যং খো ত্ৰং, আৰুসো, ইমস্স ভিক্খুনো পৰারণং ঠপেসি, কিম্হি নং ঠপেসি, সীলৰিপত্তিযা ৰা ঠপেসি, আচারৰিপত্তিযা ৰা ঠপেসি, দিট্ঠিৰিপত্তিযা ৰা ঠপেসী’’তি? সো চে এৰং ৰদেয্য – ‘‘সীলৰিপত্তিযা ৰা ঠপেমি, আচারৰিপত্তিযা ৰা ঠপেমি, দিট্ঠিৰিপত্তিযা ৰা ঠপেমী’’তি, সো এৰমস্স ৰচনীযো – ‘‘জানাসি পনাযস্মা সীলৰিপত্তিং, জানাসি আচারৰিপত্তিং, জানাসি দিট্ঠিৰিপত্তি’’ন্তি? সো চে এৰং ৰদেয্য – ‘‘জানামি খো অহং, আৰুসো, সীলৰিপত্তিং, জানামি আচারৰিপত্তিং, জানামি দিট্ঠিৰিপত্তি’’ন্তি, সো এৰমস্স ৰচনীযো – ‘‘কতমা পনাৰুসো, সীলৰিপত্তি, কতমা আচারৰিপত্তি, কতমা দিট্ঠিৰিপত্তী’’তি? সো চে এৰং ৰদেয্য – ‘‘চত্তারি পারাজিকানি, তেরস সঙ্ঘাদিসেসা, অযং সীলৰিপত্তি; থুল্লচ্চযং, পাচিত্তিযং, পাটিদেসনীযং, দুক্কটং, দুব্ভাসিতং, অযং আচারৰিপত্তি; মিচ্ছাদিট্ঠি, অন্তগ্গাহিকাদিট্ঠি, অযং দিট্ঠিৰিপত্তী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো পৰারণং ঠপেসি, দিট্ঠেন ৰা ঠপেসি, সুতেন ৰা ঠপেসি, পরিসঙ্কায ৰা ঠপেসী’’তি? সো চে এৰং ৰদেয্য – ‘‘দিট্ঠেন ৰা ঠপেমি, সুতেন ৰা ঠপেমি, পরিসঙ্কায ৰা ঠপেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো দিট্ঠেন পৰারণং ঠপেসি, কিং তে দিট্ঠং, কিন্তি তে দিট্ঠং, কদা তে দিট্ঠং, কত্থ তে দিট্ঠং, পারাজিকং অজ্ঝাপজ্জন্তো দিট্ঠো, সঙ্ঘাদিসেসং অজ্ঝাপজ্জন্তো দিট্ঠো, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো, কত্থ চ ত্ৰং অহোসি, কত্থ চাযং ভিক্খু অহোসি, কিঞ্চ ত্ৰং করোসি, কিঞ্চাযং ভিক্খু করোতী’’তি? সো চে এৰং ৰদেয্য – ‘‘ন খো অহং, আৰুসো, ইমস্স ভিক্খুনো দিট্ঠেন পৰারণং ঠপেমি, অপিচ সুতেন পৰারণং ঠপেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো সুতেন পৰারণং ঠপেসি, কিং তে সুতং, কিন্তি তে সুতং, কদা তে সুতং, কত্থ তে সুতং, পারাজিকং অজ্ঝাপন্নোতি সুতং, সঙ্ঘাদিসেসং অজ্ঝাপন্নোতি সুতং, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি সুতং, ভিক্খুস্স সুতং, ভিক্খুনিযা সুতং, সিক্খমানায সুতং, সামণেরস্স সুতং, সামণেরিযা সুতং, উপাসকস্স সুতং, উপাসিকায সুতং, রাজূনং সুতং, রাজমহামত্তানং সুতং, তিত্থিযানং সুতং, তিত্থিযসাৰকানং সুত’’ন্তি? সো চে এৰং ৰদেয্য – ‘‘ন খো অহং, আৰুসো, ইমস্স ভিক্খুনো সুতেন পৰারণং ঠপেমি, অপিচ পরিসঙ্কায পৰারণং ঠপেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমস্স ভিক্খুনো পরিসঙ্কায পৰারণং ঠপেসি, কিং পরিসঙ্কসি, কিন্তি পরিসঙ্কসি, কদা পরিসঙ্কসি, কত্থ পরিসঙ্কসি, পারাজিকং অজ্ঝাপন্নোতি পরিসঙ্কসি, সঙ্ঘাদিসেসং অজ্ঝাপন্নোতি পরিসঙ্কসি, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি পরিসঙ্কসি, ভিক্খুস্স সুত্ৰা পরিসঙ্কসি, ভিক্খুনিযা সুত্ৰা পরিসঙ্কসি, সিক্খমানায সুত্ৰা পরিসঙ্কসি, সামণেরস্স সুত্ৰা পরিসঙ্কসি, সামণেরিযা সুত্ৰা পরিসঙ্কসি, উপাসকস্স সুত্ৰা পরিসঙ্কসি, উপাসিকায সুত্ৰা পরিসঙ্কসি, রাজূনং সুত্ৰা পরিসঙ্কসি, রাজমহামত্তানং সুত্ৰা পরিসঙ্কসি, তিত্থিযানং সুত্ৰা পরিসঙ্কসি, তিত্থিযসাৰকানং সুত্ৰা পরিসঙ্কসী’’তি? সো চে এৰং ৰদেয্য – ‘‘ন খো অহং, আৰুসো, ইমস্স ভিক্খুনো পরিসঙ্কায পৰারণং ঠপেমি, অপি চ অহম্পি ন জানামি কেন পনাহং ইমস্স ভিক্খুনো পৰারণং ঠপেমী’’তি. সো চে, ভিক্খৰে, চোদকো ভিক্খু অনুযোগেন ৰিঞ্ঞূনং সব্রহ্মচারীনং চিত্তং ন আরাধেতি, অননুৰাদো চুদিতো ভিক্খূতি অলং ৰচনায. সো চে, ভিক্খৰে, চোদকো ভিক্খু অনুযোগেন ৰিঞ্ঞূনং সব্রহ্মচারীনং চিত্তং আরাধেতি, সানুৰাদো চুদিতো ভিক্খূতি অলং ৰচনায. সো চে, ভিক্খৰে, চোদকো ভিক্খু অমূলকেন পারাজিকেন অনুদ্ধংসিতং পটিজানাতি, সঙ্ঘাদিসেসং আরোপেত্ৰা সঙ্ঘেন পৰারেতব্বং. সো চে, ভিক্খৰে, চোদকো ভিক্খু অমূলকেন সঙ্ঘাদিসেসেন অনুদ্ধংসিতং পটিজানাতি, যথাধম্মং কারাপেত্ৰা সঙ্ঘেন পৰারেতব্বং. সো চে, ভিক্খৰে, চোদকো, ভিক্খু অমূলকেন থুল্লচ্চযেন… পাচিত্তিযেন… পাটিদেসনীযেন… দুক্কটেন… দুব্ভাসিতেন অনুদ্ধংসিতং পটিজানাতি, যথাধম্মং কারাপেত্ৰা সঙ্ঘেন পৰারেতব্বং. সো চে, ভিক্খৰে, চুদিতো ভিক্খু পারাজিকং অজ্ঝাপন্নোতি পটিজানাতি, নাসেত্ৰা সঙ্ঘেন পৰারেতব্বং. সো চে, ভিক্খৰে, চুদিতো ভিক্খু সঙ্ঘাদিসেসং অজ্ঝাপন্নোতি পটিজানাতি, সঙ্ঘাদিসেসং আরোপেত্ৰা সঙ্ঘেন পৰারেতব্বং. সো চে, ভিক্খৰে, চুদিতো ভিক্খু থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি পটিজানাতি, যথাধম্মং কারাপেত্ৰা সঙ্ঘেন পৰারেতব্বং.

পৰারণাঠপনং নিট্ঠিতং.