১৪০. দ্ৰেৰাচিকাদিপৰারণা

২৩৪. তেন খো পন সমযেন কোসলেসু জনপদে অঞ্ঞতরস্মিং আৰাসে তদহু পৰারণায সৰরভযং অহোসি. ভিক্খূ নাসক্খিংসু তেৰাচিকং পৰারেতুং. ভগৰতো এতমত্থং আরোচেসুং. অনুজানামি, ভিক্খৰে, দ্ৰেৰাচিকং পৰারেতুন্তি.

বাল়্হতরং সৰরভযং অহোসি. ভিক্খূ নাসক্খিংসু দ্ৰেৰাচিকং পৰারেতুং. ভগৰতো এতমত্থং আরোচেসুং. অনুজানামি, ভিক্খৰে, একৰাচিকং পৰারেতুন্তি.

বাল়্হতরং সৰরভযং অহোসি. ভিক্খূ নাসক্খিংসু একৰাচিকং পৰারেতুং. ভগৰতো এতমত্থং আরোচেসুং. অনুজানামি, ভিক্খৰে, সমানৰস্সিকং পৰারেতুন্তি.

তেন খো পন সমযেন অঞ্ঞতরস্মিং আৰাসে তদহু পৰারণায মনুস্সেহি দানং দেন্তেহি যেভুয্যেন রত্তি খেপিতা হোতি. অথ খো তেসং ভিক্খূনং এতদহোসি – ‘‘মনুস্সেহি দানং দেন্তেহি যেভুয্যেন রত্তি খেপিতা. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং রত্তি ৰিভাযিস্সতি. কথং নু খো অম্হেহি পটিপজ্জিতব্ব’’ন্তি? ভগৰতো এতমত্থং আরোচেসুং. ইধ পন, ভিক্খৰে, অঞ্ঞতরস্মিং আৰাসে তদহু পৰারণায মনুস্সেহি দানং দেন্তেহি যেভুয্যেন রত্তি খেপিতা হোতি. তত্র চে, ভিক্খৰে, ভিক্খূনং এৰং হোতি – ‘‘মনুস্সেহি দানং দেন্তেহি যেভুয্যেন রত্তি খেপিতা. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং রত্তি ৰিভাযিস্সতী’’তি, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. মনুস্সেহি দানং দেন্তেহি যেভুয্যেন রত্তি খেপিতা. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং রত্তি ৰিভাযিস্সতি. যদি সঙ্ঘস্স পত্তকল্লং, সঙ্ঘো দ্ৰেৰাচিকং, একৰাচিকং, সমানৰস্সিকং পৰারেয্যা’’তি.

ইধ পন, ভিক্খৰে, অঞ্ঞতরস্মিং আৰাসে তদহু পৰারণায ভিক্খূহি ধম্মং ভণন্তেহি…পে… সুত্তন্তিকেহি সুত্তন্তং সঙ্গাযন্তেহি… ৰিনযধরেহি ৰিনযং ৰিনিচ্ছিনন্তেহি… ধম্মকথিকেহি ধম্মং সাকচ্ছন্তেহি… ভিক্খূহি কলহং করোন্তেহি যেভুয্যেন রত্তি খেপিতা হোতি. তত্র চে ভিক্খূনং এৰং হোতি – ‘‘ভিক্খূহি কলহং করোন্তেহি যেভুয্যেন রত্তি খেপিতা. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং রত্তি ৰিভাযিস্সতী’’তি, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. ভিক্খূহি কলহং করোন্তেহি যেভুয্যেন রত্তি খেপিতা. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং রত্তি ৰিভাযিস্সতি. যদি সঙ্ঘস্স পত্তকল্লং, সঙ্ঘো দ্ৰেৰাচিকং, একৰাচিকং, সমানৰস্সিকং পৰারেয্যা’’তি.

তেন খো পন সমযেন কোসলেসু জনপদে অঞ্ঞতরস্মিং আৰাসে তদহু পৰারণায মহাভিক্খুসঙ্ঘো সন্নিপতিতো হোতি, পরিত্তঞ্চ অনোৰস্সিকং [অনোৰস্সকং (ক.)] হোতি, মহা চ মেঘো উগ্গতো হোতি. অথ খো তেসং ভিক্খূনং এতদহোসি – ‘‘অযং খো মহাভিক্খুসঙ্ঘো সন্নিপতিতো, পরিত্তঞ্চ অনোৰস্সিকং, মহা চ মেঘো উগ্গতো. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং মেঘো পৰস্সিস্সতি. কথং নু খো অম্হেহি পটিপজ্জিতব্ব’’ন্তি? ভগৰতো এতমত্থং আরোচেসুং. ইধ পন, ভিক্খৰে, অঞ্ঞতরস্মিং আৰাসে তদহু পৰারণায মহাভিক্খুসঙ্ঘো সন্নিপতিতো হোতি, পরিত্তঞ্চ অনোৰস্সিকং হোতি, মহা চ মেঘো উগ্গতো হোতি. তত্র চে ভিক্খূনং এৰং হোতি – ‘‘অযং খো মহাভিক্খুসঙ্ঘো সন্নিপতিতো, পরিত্তঞ্চ অনোৰস্সিকং, মহা চ মেঘো উগ্গতো. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং মেঘো পৰস্সিস্সতী’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং মহাভিক্খুসঙ্ঘো সন্নিপতিতো, পরিত্তঞ্চ অনোৰস্সিকং, মহা চ মেঘো উগ্গতো. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং মেঘো পৰস্সিস্সতি. যদি সঙ্ঘস্স পত্তকল্লং, সঙ্ঘো দ্ৰেৰাচিকং, একৰাচিকং, সমানৰস্সিকং পৰারেয্যা’’তি.

ইধ পন, ভিক্খৰে, অঞ্ঞতরস্মিং আৰাসে তদহু পৰারণায রাজন্তরাযো হোতি…পে… চোরন্তরাযো হোতি… অগ্যন্তরাযো হোতি… উদকন্তরাযো হোতি… মনুস্সন্তরাযো হোতি… অমনুস্সন্তরাযো হোতি… ৰাল়ন্তরাযো হোতি… সরীসপন্তরাযো হোতি… জীৰিতন্তরাযো হোতি… ব্রহ্মচরিযন্তরাযো হোতি. তত্র চে ভিক্খূনং এৰং হোতি – ‘‘অযং খো, ব্রহ্মচরিযন্তরাযো. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং ব্রহ্মচরিযন্তরাযো ভৰিস্সতী’’তি, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ব্রহ্মচরিযন্তরাযো. সচে সঙ্ঘো তেৰাচিকং পৰারেস্সতি, অপ্পৰারিতোৰ সঙ্ঘো ভৰিস্সতি, অথাযং ব্রহ্মচরিযন্তরাযো ভৰিস্সতি. যদি সঙ্ঘস্স পত্তকল্লং, সঙ্ঘো দ্ৰেৰাচিকং, একৰাচিকং, সমানৰস্সিকং পৰারেয্যা’’তি.

দ্ৰেৰাচিকাদিপৰারণা নিট্ঠিতা.