১২৬. আপত্তিআৰিকরণৰিধি

২২০. তেন খো পন সমযেন অঞ্ঞতরো ভিক্খু পৰারযমানো আপত্তিং সরতি. অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘ন সাপত্তিকেন পৰারেতব্ব’ন্তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং.

ইধ পন, ভিক্খৰে, ভিক্খু পৰারযমানো আপত্তিং সরতি. তেন, ভিক্খৰে, ভিক্খুনা সামন্তো ভিক্খু এৰমস্স ৰচনীযো – ‘‘অহং, আৰুসো, ইত্থন্নামং আপত্তিং আপন্নো. ইতো ৰুট্ঠহিত্ৰা তং আপত্তিং পটিকরিস্সামী’’তি ৰত্ৰা পৰারেতব্বং; ন ত্ৰেৰ তপ্পচ্চযা পৰারণায অন্তরাযো কাতব্বো.

ইধ পন, ভিক্খৰে, ভিক্খু পৰারযমানো আপত্তিযা ৰেমতিকো হোতি. তেন, ভিক্খৰে,

ভিক্খুনা সামন্তো ভিক্খু এৰমস্স ৰচনীযো – ‘‘অহং, আৰুসো, ইত্থন্নামায আপত্তিযা ৰেমতিকো; যদা নিব্বেমতিকো ভৰিস্সামি তদা তং আপত্তিং পটিকরিস্সামী’’তি ৰত্ৰা পৰারেতব্বং; ন ত্ৰেৰ তপ্পচ্চযা পৰারণায অন্তরাযো কাতব্বোতি.

আপত্তি আৰিকরণৰিধি নিট্ঠিতা.