১২৭. সভাগাপত্তিপটিকম্মৰিধি

২২১. তেন খো পন সমযেন অঞ্ঞতরস্মিং আৰাসে তদহু পৰারণায সব্বো সঙ্ঘো সভাগং আপত্তিং আপন্নো হোতি. অথ খো তেসং ভিক্খূনং এতদহোসি – ‘‘ভগৰতা পঞ্ঞত্তং ‘ন সভাগা আপত্তি দেসেতব্বা, ন সভাগা আপত্তি পটিগ্গহেতব্বা’তি. অযঞ্চ সব্বো সঙ্ঘো সভাগং আপত্তিং আপন্নো. কথং নু খো অম্হেহি পটিপজ্জিতব্ব’’ন্তি? ভগৰতো এতমত্থং আরোচেসুং.

ইধ পন, ভিক্খৰে, অঞ্ঞতরস্মিং আৰাসে তদহু পৰারণায সব্বো সঙ্ঘো সভাগং আপত্তিং আপন্নো হোতি. তেহি, ভিক্খৰে, ভিক্খূহি একো ভিক্খু সামন্তা আৰাসা সজ্জুকং পাহেতব্বো – গচ্ছাৰুসো, তং আপত্তিং পটিকরিত্ৰা আগচ্ছ, মযং তে সন্তিকে তং আপত্তিং পটিকরিস্সামাতি. এৰঞ্চেতং লভেথ, ইচ্চেতং কুসলং. নো চে লভেথ, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগং আপত্তিং আপন্নো. যদা অঞ্ঞং ভিক্খুং সুদ্ধং অনাপত্তিকং পস্সিস্সতি তদা তস্স সন্তিকে তং আপত্তিং পটিকরিস্সতী’’তি ৰত্ৰা পৰারেতব্বং; ন ত্ৰেৰ তপ্পচ্চযা পৰারণায অন্তরাযো কাতব্বো.

ইধ পন, ভিক্খৰে, অঞ্ঞতরস্মিং আৰাসে তদহু পৰারণায সব্বো সঙ্ঘো সভাগায আপত্তিযা ৰেমতিকো হোতি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগায আপত্তিযা ৰেমতিকো. যদা নিব্বেমতিকো ভৰিস্সতি তদা তং আপত্তিং পটিকরিস্সতী’’তি ৰত্ৰা, পৰারেতব্বং, ন ত্ৰেৰ তপ্পচ্চযা পৰারণায অন্তরাযো কাতব্বোতি.

সভাগাপত্তিপটিকম্মৰিধি নিট্ঠিতা.

পঠমভাণৰারো নিট্ঠিতো.