১২৩. ঞাতকাদিগ্গহণকথা

২১৪. তেন খো পন সমযেন অঞ্ঞতরং ভিক্খুং তদহু পৰারণায ঞাতকা গণ্হিংসু. ভগৰতো এতমত্থং আরোচেসুং. ইধ পন, ভিক্খৰে, ভিক্খুং তদহু পৰারণায ঞাতকা গণ্হন্তি. তে ঞাতকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৰাযং ভিক্খু পৰারেতী’’তি. এৰঞ্চেতং লভেথ, ইচ্চেতং কুসলং. নো চে লভেথ, তে ঞাতকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৰাযং ভিক্খু পৰারণং দেতী’’তি. এৰঞ্চেতং লভেথ, ইচ্চেতং কুসলং. নো চে লভেথ, তে ঞাতকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৰ সঙ্ঘো পৰারেতী’’তি. এৰঞ্চেতং লভেথ, ইচ্চেতং কুসলং. নো চে লভেথ, ন ত্ৰেৰ ৰগ্গেন সঙ্ঘেন পৰারেতব্বং. পৰারেয্য চে, আপত্তি দুক্কটস্স.

ইধ পন, ভিক্খৰে, ভিক্খুং তদহু পৰারণায রাজানো গণ্হন্তি…পে… চোরা গণ্হন্তি … ধুত্তা গণ্হন্তি… ভিক্খুপচ্চত্থিকা গণ্হন্তি. তে ভিক্খুপচ্চত্থিকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৰাযং ভিক্খু পৰারেতী’’তি. এৰঞ্চেতং লভেথ, ইচ্চেতং কুসলং. নো চে লভেথ, তে ভিক্খুপচ্চত্থিকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৰাযং ভিক্খু পৰারণং দেতী’’তি. এৰঞ্চেতং লভেথ, ইচ্চেতং কুসলং. নো চে লভেথ, তে ভিক্খুপচ্চত্থিকা ভিক্খূহি এৰমস্সু ৰচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৰ সঙ্ঘো পৰারেতী’’তি. এৰঞ্চেতং লভেথ, ইচ্চেতং কুসলং. নো চে লভেথ, ন ত্ৰেৰ ৰগ্গেন সঙ্ঘেন পৰারেতব্বং. পৰারেয্য চে, আপত্তি দুক্কটস্সাতি.

ঞাতকাদিগ্গহণকথা নিট্ঠিতা.