১২৪. সঙ্ঘপৰারণাদিপ্পভেদা

২১৫. তেন খো পন সমযেন অঞ্ঞতরস্মিং আৰাসে তদহু পৰারণায পঞ্চ ভিক্খূ ৰিহরন্তি. অথ খো তেসং ভিক্খূনং এতদহোসি – ‘‘ভগৰতা পঞ্ঞত্তং ‘সঙ্ঘেন পৰারেতব্ব’ন্তি. মযঞ্চম্হা পঞ্চ জনা. কথং নু খো অম্হেহি পৰারেতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, পঞ্চন্নং সঙ্ঘে পৰারেতুন্তি.

২১৬. তেন খো পন সমযেন অঞ্ঞতরস্মিং আৰাসে তদহু পৰারণায চত্তারো ভিক্খূ ৰিহরন্তি. অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুন্তি. মযঞ্চম্হা চত্তারো জনা. কথং নু খো অম্হেহি পৰারেতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, চতুন্নং অঞ্ঞমঞ্ঞং পৰারেতুং. এৰঞ্চ পন, ভিক্খৰে, পৰারেতব্বং. ব্যত্তেন ভিক্খুনা পটিবলেন তে ভিক্খূ ঞাপেতব্বা –

‘‘সুণন্তু মে আযস্মন্তো. অজ্জ পৰারণা. যদাযস্মন্তানং পত্তকল্লং, মযং অঞ্ঞমঞ্ঞং পৰারেয্যামা’’তি.

থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামি. দুতিযম্পি…পে… ততিযম্পি অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামী’’তি.

নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামি. দুতিযম্পি…পে… ততিযম্পি অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামী’’তি.

তেন খো পন সমযেন অঞ্ঞতরস্মিং আৰাসে তদহু পৰারণায তযো ভিক্খূ ৰিহরন্তি. অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুং, চতুন্নং অঞ্ঞমঞ্ঞং পৰারেতুং. মযঞ্চম্হা তযো জনা. কথং নু খো অম্হেহি পৰারেতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, তিণ্ণং অঞ্ঞমঞ্ঞং পৰারেতুং. এৰঞ্চ পন, ভিক্খৰে, পৰারেতব্বং. ব্যত্তেন ভিক্খুনা পটিবলেন তে ভিক্খূ ঞাপেতব্বা –

‘‘সুণন্তু মে আযস্মন্তা. অজ্জ পৰারণা. যদাযস্মন্তানং পত্তকল্লং, মযং অঞ্ঞমঞ্ঞং পৰারেয্যামা’’তি.

থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তা অনুকম্পং উপাদায. পস্সন্তো পটিকরিস্সামি. দুতিযম্পি…পে… ততিযম্পি অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তা অনুকম্পং উপাদায. পস্সন্তো পটিকরিস্সামী’’তি.

নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তা অনুকম্পং উপাদায. পস্সন্তো পটিকরিস্সামি. দুতিযম্পি…পে… ততিযম্পি অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তা অনুকম্পং উপাদায. পস্সন্তো পটিকরিস্সামী’’তি.

২১৭. তেন খো পন সমযেন অঞ্ঞতরস্মিং আৰাসে তদহু পৰারণায দ্ৰে ভিক্খূ ৰিহরন্তি. অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুং, চতুন্নং অঞ্ঞমঞ্ঞং পৰারেতুং, তিণ্ণং অঞ্ঞমঞ্ঞং পৰারেতুং. মযঞ্চম্হা দ্ৰে জনা. কথং নু খো অম্হেহি পৰারেতব্ব’’ন্তি. ভগৰতো এতমত্থং আরোচেসুং. অনুজানামি, ভিক্খৰে, দ্ৰিন্নং অঞ্ঞমঞ্ঞং পৰারেতুং. এৰঞ্চ পন, ভিক্খৰে, পৰারেতব্বং. থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা নৰো ভিক্খু এৰমস্স ৰচনীযো – ‘‘অহং, আৰুসো, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা. ৰদতু মং আযস্মা অনুকম্পং উপাদায. পস্সন্তো পটিকরিস্সামি. দুতিযম্পি…পে… ততিযম্পি অহং, আৰুসো, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা. ৰদতু মং আযস্মা অনুকম্পং উপাদায. পস্সন্তো পটিকরিস্সামী’’তি.

নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা থেরো ভিক্খু এৰমস্স ৰচনীযো – ‘‘অহং, ভন্তে, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা. ৰদতু মং আযস্মা অনুকম্পং উপাদায. পস্সন্তো পটিকরিস্সামি. দুতিযম্পি…পে… ততিযম্পি অহং, ভন্তে, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা. ৰদতু মং আযস্মা অনুকম্পং উপাদায. পস্সন্তো পটিকরিস্সামী’’তি.

২১৮. তেন খো পন সমযেন অঞ্ঞতরস্মিং আৰাসে তদহু পৰারণায একো ভিক্খু ৰিহরতি. অথ খো তস্স ভিক্খুনো এতদহোসি – ‘‘ভগৰতা অনুঞ্ঞাতং পঞ্চন্নং সঙ্ঘে পৰারেতুং, চতুন্নং অঞ্ঞমঞ্ঞং পৰারেতুং, তিণ্ণং অঞ্ঞমঞ্ঞং পৰারেতুং, দ্ৰিন্নং অঞ্ঞমঞ্ঞং পৰারেতুং. অহঞ্চম্হি এককো. কথং নু খো মযা পৰারেতব্ব’’ন্তি? ভগৰতো এতমত্থং আরোচেসুং.

ইধ পন, ভিক্খৰে, অঞ্ঞতরস্মিং আৰাসে তদহু পৰারণায একো ভিক্খু ৰিহরতি. তেন, ভিক্খৰে, ভিক্খুনা যত্থ ভিক্খূ পটিক্কমন্তি উপট্ঠানসালায ৰা মণ্ডপে ৰা রুক্খমূলে ৰা, সো দেসো সম্মজ্জিত্ৰা পানীযং পরিভোজনীযং উপট্ঠাপেত্ৰা আসনং পঞ্ঞপেত্ৰা পদীপং কত্ৰা নিসীদিতব্বং. সচে অঞ্ঞে ভিক্খূ আগচ্ছন্তি, তেহি সদ্ধিং পৰারেতব্বং; নো চে আগচ্ছন্তি, ‘অজ্জ মে পৰারণা’তি অধিট্ঠাতব্বং. নো চে অধিট্ঠেয্য, আপত্তি দুক্কটস্স.

তত্র, ভিক্খৰে, যত্থ পঞ্চ ভিক্খূ ৰিহরন্তি, ন একস্স পৰারণং আহরিত্ৰা

চতূহি সঙ্ঘে পৰারেতব্বং. পৰারেয্যুং চে, আপত্তি দুক্কটস্স. তত্র, ভিক্খৰে, যত্থ চত্তারো ভিক্খূ ৰিহরন্তি, ন একস্স পৰারণং আহরিত্ৰা তীহি অঞ্ঞমঞ্ঞং পৰারেতব্বং. পৰারেয্যুং চে, আপত্তি দুক্কটস্স. তত্র, ভিক্খৰে, যত্থ তযো ভিক্খূ ৰিহরন্তি, ন একস্স পৰারণং আহরিত্ৰা দ্ৰীহি অঞ্ঞমঞ্ঞং পৰারেতব্বং. পৰারেয্যুং চে, আপত্তি দুক্কটস্স. তত্র, ভিক্খৰে, যত্থ দ্ৰে ভিক্খূ ৰিহরন্তি, ন একস্স পৰারণং আহরিত্ৰা একেন অধিট্ঠাতব্বং. অধিট্ঠেয্য চে, আপত্তি দুক্কটস্সাতি.

সঙ্ঘপৰারণাদিপ্পভেদা নিট্ঠিতা.