১২০. অফাসুকৰিহারো

২০৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতরস্মিং আৰাসে ৰস্সং উপগচ্ছিংসু. অথ খো তেসং ভিক্খূনং এতদহোসি – ‘‘কেন নু খো মযং উপাযেন সমগ্গা সম্মোদমানা অৰিৰদমানা ফাসুকং ৰস্সং ৰসেয্যাম, ন চ পিণ্ডকেন কিলমেয্যামা’’তি. অথ খো তেসং ভিক্খূনং এতদহোসি – ‘‘সচে খো মযং অঞ্ঞমঞ্ঞং নেৰ আলপেয্যাম ন সল্লপেয্যাম – যো পঠমং গামতো পিণ্ডায পটিক্কমেয্য সো আসনং পঞ্ঞপেয্য, পাদোদকং পাদপীঠং পাদকথলিকং উপনিক্খিপেয্য, অৰক্কারপাতিং ধোৰিত্ৰা উপট্ঠাপেয্য, পানীযং পরিভোজনীযং উপট্ঠাপেয্য; যো পচ্ছা গামতো পিণ্ডায পটিক্কমেয্য, সচস্স ভুত্তাৰসেসো, সচে আকঙ্খেয্য ভুঞ্জেয্য, নো চে আকঙ্খেয্য অপ্পহরিতে ৰা ছড্ডেয্য, অপ্পাণকে ৰা উদকে ওপিলাপেয্য; সো আসনং উদ্ধরেয্য, পাদোদকং পাদপীঠং পাদকথলিকং পটিসামেয্য, অৰক্কারপাতিং ধোৰিত্ৰা পটিসামেয্য, পানীযং পরিভোজনীযং পটিসামেয্য, ভত্তগ্গং সম্মজ্জেয্য; যো পস্সেয্য পানীযঘটং ৰা পরিভোজনীযঘটং ৰা ৰচ্চঘটং ৰা রিত্তং তুচ্ছং সো উপট্ঠাপেয্য; সচস্স হোতি অৰিসয্হং, হত্থৰিকারেন দুতিযং আমন্তেত্ৰা হত্থৰিলঙ্ঘকেন উপট্ঠাপেয্য; ন ত্ৰেৰ তপ্পচ্চযা ৰাচং ভিন্দেয্য – এৰং খো মযং সমগ্গা সম্মোদমানা অৰিৰদমানা ফাসুকং ৰস্সং ৰসেয্যাম, ন চ পিণ্ডকেন কিলমেয্যামা’’তি. অথ খো তে ভিক্খূ অঞ্ঞমঞ্ঞং নেৰ আলপিংসু, ন সল্লপিংসু. যো পঠমং গামতো পিণ্ডায পটিক্কমতি, সো আসনং পঞ্ঞপেতি, পাদোদকং পাদপীঠং পাদকথলিকং উপনিক্খিপতি, অৰক্কারপাতিং ধোৰিত্ৰা উপট্ঠাপেতি, পানীযং পরিভোজনীযং উপট্ঠাপেতি. যো পচ্ছা গামতো পিণ্ডায পটিক্কমতি, সচে হোতি ভুত্তাৰসেসো, সচে আকঙ্খতি ভুঞ্জতি, নো চে আকঙ্খতি অপ্পহরিতে ৰা ছড্ডেতি, অপ্পাণকে ৰা উদকে ওপিলাপেতি; সো আসনং উদ্ধরতি, পাদোদকং পাদপীঠং পাদকথলিকং পটিসামেতি, অৰক্কারপাতিং ধোৰিত্ৰা পটিসামেতি, পানীযং পরিভোজনীযং পটিসামেতি, ভত্তগ্গং সম্মজ্জতি. যো পস্সতি পানীযঘটং ৰা পরিভোজনীযঘটং ৰা ৰচ্চঘটং ৰা রিত্তং তুচ্ছং সো উপট্ঠাপেতি. সচস্স হোতি অৰিসয্হং, হত্থৰিকারেন দুতিযং আমন্তেত্ৰা হত্থৰিলঙ্ঘকেন উপট্ঠাপেতি, ন ত্ৰেৰ তপ্পচ্চযা ৰাচং ভিন্দতি.

আচিণ্ণং খো পনেতং ৰস্সংৰুট্ঠানং ভিক্খূনং ভগৰন্তং দস্সনায উপসঙ্কমিতুং. অথ খো তে ভিক্খূ ৰস্সংৰুট্ঠা তেমাসচ্চযেন সেনাসনং সংসামেত্ৰা পত্তচীৰরমাদায যেন সাৰত্থি তেন পক্কমিংসু. অনুপুব্বেন যেন সাৰত্থি জেতৰনং অনাথপিণ্ডিকস্স আরামো যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. আচিণ্ণং খো পনেতং বুদ্ধানং ভগৰন্তানং আগন্তুকেহি ভিক্খূহি সদ্ধিং পটিসম্মোদিতুং. অথ খো ভগৰা তে ভিক্খূ এতদৰোচ – ‘‘কচ্চি, ভিক্খৰে, খমনীযং, কচ্চি যাপনীযং, কচ্চি সমগ্গা সম্মোদমানা অৰিৰদমানা ফাসুকং ৰস্সং ৰসিত্থ, ন চ পিণ্ডকেন কিলমিত্থা’’তি? ‘‘খমনীযং ভগৰা, যাপনীযং ভগৰা. সমগ্গা চ মযং, ভন্তে, সম্মোদমানা অৰিৰদমানা ফাসুকং ৰস্সং ৰসিম্হা, ন চ পিণ্ডকেন কিলমিম্হা’’তি. জানন্তাপি তথাগতা পুচ্ছন্তি, জানন্তাপি ন পুচ্ছন্তি. কালং ৰিদিত্ৰা পুচ্ছন্তি, কালং ৰিদিত্ৰা ন পুচ্ছন্তি. অত্থসংহিতং তথাগতা পুচ্ছন্তি, নো অনত্থসংহিতং. অনত্থসংহিতে সেতুঘাতো তথাগতানং. দ্ৰীহাকারেহি বুদ্ধা ভগৰন্তো ভিক্খূ পটিপুচ্ছন্তি – ধম্মং ৰা দেসেস্সাম, সাৰকানং ৰা সিক্খাপদং পঞ্ঞপেস্সামাতি. অথ খো ভগৰা তে ভিক্খূ এতদৰোচ – ‘‘যথাকথং পন তুম্হে, ভিক্খৰে, সমগ্গা সম্মোদমানা অৰিৰদমানা ফাসুকং ৰস্সং ৰসিত্থ, ন চ পিণ্ডকেন কিলমিত্থা’’তি.

ইধ মযং, ভন্তে, সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতরস্মিং আৰাসে ৰস্সং উপগচ্ছিম্হা. তেসং নো, ভন্তে, অম্হাকং এতদহোসি – ‘‘কেন নু খো মযং উপাযেন সমগ্গা সম্মোদমানা অৰিৰদমানা ফাসুকং ৰস্সং ৰসেয্যাম, ন চ পিণ্ডকেন কিলমেয্যামা’’তি. তেসং নো, ভন্তে, অম্হাকং এতদহোসি – ‘‘সচে খো মযং অঞ্ঞমঞ্ঞং নেৰ আলপেয্যাম ন সল্লপেয্যাম – যো পঠমং গামতো পিণ্ডায পটিক্কমেয্য সো আসনং পঞ্ঞপেয্য, পাদোদকং পাদপীঠং পাদকথলিকং উপনিক্খিপেয্য, অৰক্কারপাতিং ধোৰিত্ৰা উপট্ঠাপেয্য, পানীযং পরিভোজনীযং উপট্ঠাপেয্য; যো পচ্ছা গামতো পিণ্ডায পটিক্কমেয্য, সচস্স ভুত্তাৰসেসো, সচে আকঙ্খেয্য ভুঞ্জেয্য, নো চে আকঙ্খেয্য অপ্পহরিতে ৰা ছড্ডেয্য, অপ্পাণকে ৰা উদকে ওপিলাপেয্য; সো আসনং উদ্ধরেয্য, পাদোদকং পাদপীঠং পাদকথলিকং পটিসামেয্য, অৰক্কারপাতিং ধোৰিত্ৰা পটিসামেয্য, পানীযং পরিভোজনীযং পটিসামেয্য, ভত্তগ্গং সম্মজ্জেয্য; যো পস্সেয্য পানীযঘটং ৰা পরিভোজনীযঘটং ৰা ৰচ্চঘটং ৰা রিত্তং তুচ্ছং সো উপট্ঠাপেয্য; সচস্স হোতি অৰিসয্হং, হত্থৰিকারেন দুতিযং আমন্তেত্ৰা হত্থৰিলঙ্ঘকেন উপট্ঠাপেয্য; ন ত্ৰেৰ তপ্পচ্চযা ৰাচং ভিন্দেয্য – এৰং খো মযং সমগ্গা সম্মোদমানা অৰিৰদমানা ফাসুকং ৰস্সং ৰসেয্যাম, ন চ পিণ্ডকেন কিলমেয্যামা’’তি. অথ খো মযং, ভন্তে, অঞ্ঞমঞ্ঞং নেৰ আলপিম্হা ন সল্লৰিম্হা. যো পঠমং গামতো পিণ্ডায পটিক্কমতি সো আসনং পঞ্ঞপেতি, পাদোদকং পাদপীঠং পাদকথলিকং উপনিক্খিপতি, অৰক্কারপাতিং ধোৰিত্ৰা উপট্ঠাপেতি, পানীযং পরিভোজনীযং উপট্ঠাপেতি. যো পচ্ছা গামতো পিণ্ডায পটিক্কমতি, সচে হোতি ভুত্তাৰসেসো, সচে আকঙ্খতি ভুঞ্জতি, নো চে আকঙ্খতি অপ্পহরিতে ৰা ছড্ডেতি, অপ্পাণকে ৰা উদকে ওপিলাপেতি, সো আসনং উদ্ধরতি, পাদোদকং পাদপীঠং পাদকথলিকং পটিসামেতি, অৰক্কারপাতিং ধোৰিত্ৰা পটিসামেতি, পানীযং পরিভোজনীযং পটিসামেতি, ভত্তগ্গং সম্মজ্জতি. যো পস্সতি পানীযঘটং ৰা পরিভোজনীযঘটং ৰা ৰচ্চঘটং ৰা রিত্তং তুচ্ছং সো উপট্ঠাপেতি. সচস্স হোতি অৰিসয্হং, হত্থৰিকারেন দুতিযং আমন্তেত্ৰা হত্থৰিলঙ্ঘকেন উপট্ঠাপেতি, ন ত্ৰেৰ তপ্পচ্চযা ৰাচং ভিন্দতি. এৰং খো মযং, ভন্তে, সমগ্গা সম্মোদমানা অৰিৰদমানা ফাসুকং ৰস্সং ৰসিম্হা, ন চ পিণ্ডকেন কিলমিম্হাতি.

অথ খো ভগৰা ভিক্খূ আমন্তেসি – ‘‘অফাসুঞ্ঞেৰ [অফাসুকঞ্ঞেৰ (সী.)] কিরমে [কিরিমে (ক.)], ভিক্খৰে, মোঘপুরিসা ৰুট্ঠা [ৰুত্থা (ক.)] সমানা ফাসুম্হা [ফাসুকম্হা (সী.)] ৰুট্ঠাতি পটিজানন্তি. পসুসংৰাসঞ্ঞেৰ কিরমে, ভিক্খৰে, মোঘপুরিসা ৰুট্ঠা সমানা ফাসুম্হা ৰুট্ঠাতি পটিজানন্তি. এল়কসংৰাসঞ্ঞেৰ কিরমে, ভিক্খৰে, মোঘপুরিসা ৰুট্ঠা সমানা ফাসুম্হা ৰুট্ঠাতি পটিজানন্তি. সপত্তসংৰাসঞ্ঞেৰ কিরমে, ভিক্খৰে, মোঘপুরিসা ৰুট্ঠা সমানা ফাসুম্হা ৰুট্ঠাতি পটিজানন্তি. কথঞ্হি নামিমে, ভিক্খৰে, মোঘপুরিসা মূগব্বতং তিত্থিযসমাদানং সমাদিযিস্স’’ন্তি. নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা ধম্মিং কথং কত্ৰা ভিক্খূ আমন্তেসি – ন, ভিক্খৰে, মূগব্বতং তিত্থিযসমাদানং সমাদিযিতব্বং. যো সমাদিযেয্য, আপত্তি দুক্কটস্স. অনুজানামি, ভিক্খৰে, ৰস্সংৰুট্ঠানং ভিক্খূনং তীহি ঠানেহি পৰারেতুং – দিট্ঠেন ৰা সুতেন ৰা পরিসঙ্কায ৰা. সা ৰো ভৰিস্সতি অঞ্ঞমঞ্ঞানুলোমতা আপত্তিৰুট্ঠানতা ৰিনযপুরেক্খারতা. এৰঞ্চ পন, ভিক্খৰে, পৰারেতব্বং. ব্যত্তেন ভিক্খুনা পটিবলেন সঙ্ঘো ঞাপেতব্বো –

২১০. ‘‘সুণাতু মে, ভন্তে, সঙ্ঘো. অজ্জ পৰারণা. যদি সঙ্ঘস্স পত্তকল্লং, সঙ্ঘো পৰারেয্যা’’তি.

থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘সঙ্ঘং, আৰুসো, পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামি. দুতিযম্পি, আৰুসো, সঙ্ঘং পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামি. ততিযম্পি, আৰুসো, সঙ্ঘং পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামী’’তি.

নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘সঙ্ঘং, ভন্তে, পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামি. দুতিযম্পি, ভন্তে, সঙ্ঘং…পে… ততিযম্পি, ভন্তে, সঙ্ঘং পৰারেমি দিট্ঠেন ৰা সুতেন ৰা পরিসঙ্কায ৰা. ৰদন্তু মং আযস্মন্তো অনুকম্পং উপাদায. পস্সন্তো পটিকরিস্সামী’’তি.

২১১. তেন খো পন সমযেন ছব্বগ্গিযা ভিক্খূ থেরেসু ভিক্খূসু উক্কুটিকং নিসিন্নেসু পৰারযমানেসু আসনেসু অচ্ছন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ থেরেসু ভিক্খূসু উক্কুটিকং নিসিন্নেসু পৰারযমানেসু আসনেসু অচ্ছিস্সন্তী’’তি. অথ খো তে ভিক্খূ ভগৰতো এতমত্থং আরোচেসুং…পে… ‘‘সচ্চং কির, ভিক্খৰে, ছব্বগ্গিযা ভিক্খূ থেরেসু ভিক্খূসু উক্কুটিকং নিসিন্নেসু পৰারযমানেসু আসনেসু অচ্ছন্তী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… ‘‘কথঞ্হি নাম তে, ভিক্খৰে, মোঘপুরিসা থেরেসু ভিক্খূসু উক্কুটিকং নিসিন্নেসু পৰারযমানেসু আসনেসু অচ্ছিস্স’’ন্তি. নেতং, ভিক্খৰে, অপ্পসন্নানং ৰা পসাদায, পসন্নানং ৰা ভিয্যোভাৰায…পে… ৰিগরহিত্ৰা ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, থেরেসু ভিক্খূসু উক্কুটিকং নিসিন্নেসু পৰারযমানেসু আসনেসু অচ্ছিতব্বং. যো অচ্ছেয্য, আপত্তি দুক্কটস্স. অনুজানামি, ভিক্খৰে, সব্বেহেৰ উক্কুটিকং নিসিন্নেহি পৰারেতু’’ন্তি.

তেন খো পন সমযেন অঞ্ঞতরো থেরো জরাদুব্বলো যাৰ সব্বে পৰারেন্তীতি [যাৰ সব্বে পৰারেন্তি (স্যা.)] উক্কুটিকং নিসিন্নো আগমযমানো মুচ্ছিতো পপতি. ভগৰতো এতমত্থং আরোচেসুং. অনুজানামি, ভিক্খৰে, তদমন্তরা উক্কুটিকং নিসীদিতুং যাৰ পৰারেতি, পৰারেত্ৰা আসনে নিসীদিতুন্তি.

অফাসুকৰিহারো নিট্ঠিতো.