১২১. পৰারণাভেদা

২১২. অথ খো ভিক্খূনং এতদহোসি – ‘‘কতি নু খো পৰারণা’’তি? ভগৰতো এতমত্থং আরোচেসুং. দ্ৰেমা, ভিক্খৰে, পৰারণা – চাতুদ্দসিকা চ পন্নরসিকা চ. ইমা খো, ভিক্খৰে, দ্ৰে পৰারণাতি.

অথ খো ভিক্খূনং এতদহোসি – ‘‘কতি নু খো পৰারণকম্মানী’’তি? [পৰারণাকম্মানীতি (স্যা.)] ভগৰতো এতমত্থং আরোচেসুং. চত্তারিমানি, ভিক্খৰে, পৰারণকম্মানি – অধম্মেন ৰগ্গং পৰারণকম্মং, অধম্মেন সমগ্গং পৰারণকম্মং, ধম্মেন ৰগ্গং পৰারণকম্মং, ধম্মেন সমগ্গং পৰারণকম্মং. তত্র, ভিক্খৰে, যদিদং অধম্মেন ৰগ্গং পৰারণকম্মং, ন, ভিক্খৰে, এৰরূপং পৰারণকম্মং কাতব্বং; ন চ মযা এৰরূপং পৰারণকম্মং অনুঞ্ঞাতং. তত্র, ভিক্খৰে, যদিদং অধম্মেন সমগ্গং পৰারণকম্মং, ন, ভিক্খৰে, এৰরূপং পৰারণকম্মং কাতব্বং; ন চ মযা এৰরূপং পৰারণকম্মং অনুঞ্ঞাতং. তত্র, ভিক্খৰে, যদিদং ধম্মেন ৰগ্গং পৰারণকম্মং, ন, ভিক্খৰে, এৰরূপং পৰারণকম্মং কাতব্বং; ন চ মযা এৰরূপং পৰারণকম্মং অনুঞ্ঞাতং. তত্র, ভিক্খৰে, যদিদং ধম্মেন সমগ্গং পৰারণকম্মং, এৰরূপং, ভিক্খৰে, পৰারণকম্মং কাতব্বং; এৰরূপঞ্চ মযা পৰারণকম্মং অনুঞ্ঞাতং. তস্মাতিহ, ভিক্খৰে, এৰরূপং পৰারণকম্মং করিস্সাম যদিদং ধম্মেন সমগ্গন্তি, এৰঞ্হি ৰো, ভিক্খৰে, সিক্খিতব্বন্তি.

পৰারণাভেদা নিট্ঠিতা.