৭৬. গামসীমাদি

১৪৭. অসম্মতায, ভিক্খৰে, সীমায অট্ঠপিতায, যং গামং ৰা নিগমং ৰা উপনিস্সায ৰিহরতি, যা তস্স ৰা গামস্স গামসীমা, নিগমস্স ৰা নিগমসীমা, অযং তত্থ সমানসংৰাসা একুপোসথা. অগামকে চে, ভিক্খৰে, অরঞ্ঞে সমন্তা সত্তব্ভন্তরা, অযং তত্থ সমানসংৰাসা একুপোসথা. সব্বা, ভিক্খৰে, নদী অসীমা; সব্বো সমুদ্দো অসীমো; সব্বো জাতস্সরো অসীমো. নদিযা ৰা, ভিক্খৰে, সমুদ্দে ৰা জাতস্সরে ৰা যং মজ্ঝিমস্স পুরিসস্স সমন্তা উদকুক্খেপা, অযং তত্থ সমানসংৰাসা একুপোসথাতি.

১৪৮. তেন খো পন সমযেন ছব্বগ্গিযা ভিক্খূ সীমায সীমং সম্ভিন্দন্তি. ভগৰতো এতমত্থং আরোচেসুং. যেসং, ভিক্খৰে, সীমা পঠমং সম্মতা তেসং তং কম্মং ধম্মিকং অকুপ্পং ঠানারহং. যেসং, ভিক্খৰে, সীমা পচ্ছা সম্মতা তেসং তং কম্মং অধম্মিকং কুপ্পং অট্ঠানারহং. ন, ভিক্খৰে, সীমায সীমা সম্ভিন্দিতব্বা. যো সম্ভিন্দেয্য, আপত্তি দুক্কটস্সাতি.

তেন খো পন সমযেন ছব্বগ্গিযা ভিক্খূ সীমায সীমং অজ্ঝোত্থরন্তি. ভগৰতো এতমত্থং আরোচেসুং. যেসং, ভিক্খৰে, সীমা পঠমং সম্মতা তেসং তং কম্মং ধম্মিকং অকুপ্পং ঠানারহং. যেসং, ভিক্খৰে, সীমা পচ্ছা সম্মতা তেসং তং কম্মং অধম্মিকং কুপ্পং অট্ঠানারহং. ন, ভিক্খৰে, সীমায সীমা অজ্ঝোত্থরিতব্বা. যো অজ্ঝোত্থরেয্য, আপত্তি দুক্কটস্সাতি. অনুজানামি, ভিক্খৰে, সীমং সম্মন্নন্তেন সীমন্তরিকং ঠপেত্ৰা সীমং সম্মন্নিতুন্তি.