৪৭. পণ্ডকৰত্থু

১০৯. তেন খো পন সমযেন অঞ্ঞতরো পণ্ডকো ভিক্খূসু পব্বজিতো হোতি. সো দহরে দহরে ভিক্খূ উপসঙ্কমিত্ৰা এৰং ৰদেতি – ‘‘এথ, মং আযস্মন্তো দূসেথা’’তি. ভিক্খূ অপসাদেন্তি – ‘‘নস্স, পণ্ডক, ৰিনস্স, পণ্ডক, কো তযা অত্থো’’তি. সো ভিক্খূহি অপসাদিতো মহন্তে মহন্তে মোল়িগল্লে সামণেরে উপসঙ্কমিত্ৰা এৰং ৰদেতি – ‘‘এথ, মং আৰুসো দূসেথা’’তি. সামণেরা অপসাদেন্তি – ‘‘নস্স, পণ্ডক, ৰিনস্স, পণ্ডক, কো তযা অত্থো’’তি. সো সামণেরেহি অপসাদিতো হত্থিভণ্ডে অস্সভণ্ডে উপসঙ্কমিত্ৰা এৰং ৰদেতি – ‘‘এথ, মং, আৰুসো, দূসেথা’’তি. হত্থিভণ্ডা অস্সভণ্ডা দূসেসুং. তে উজ্ঝাযন্তি খিয্যন্তি ৰিপাচেন্তি – ‘‘পণ্ডকা ইমে সমণা সক্যপুত্তিযা. যেপি ইমেসং ন পণ্ডকা, তেপি ইমে পণ্ডকে দূসেন্তি. এৰং ইমে সব্বেৰ অব্রহ্মচারিনো’’তি. অস্সোসুং খো ভিক্খূ তেসং হত্থিভণ্ডানং অস্সভণ্ডানং উজ্ঝাযন্তানং খিয্যন্তানং ৰিপাচেন্তানং. অথ খো তে ভিক্খূ ভগৰতো এতমত্থং আরোচেসুং. পণ্ডকো, ভিক্খৰে, অনুপসম্পন্নো ন উপসম্পাদেতব্বো, উপসম্পন্নো নাসেতব্বোতি.