২৫. অঞ্ঞতিত্থিযপুব্বকথা

৮৬. তেন খো পন সমযেন যো সো অঞ্ঞতিত্থিযপুব্বো [যো সো পসুরপরিব্বাজকো অঞ্ঞতিত্থিযপুব্বো (ক.)] পজ্ঝাযেন সহধম্মিকং ৰুচ্চমানো উপজ্ঝাযস্স ৰাদং আরোপেত্ৰা তংযেৰ তিত্থাযতনং সঙ্কমি. সো পুন পচ্চাগন্ত্ৰা ভিক্খূ উপসম্পদং যাচি. ভিক্খূ ভগৰতো এতমত্থং আরোচেসুং. যো সো, ভিক্খৰে, অঞ্ঞতিত্থিযপুব্বো উপজ্ঝাযেন সহধম্মিকং ৰুচ্চমানো উপজ্ঝাযস্স ৰাদং আরোপেত্ৰা তংযেৰ তিত্থাযতনং সঙ্কন্তো, সো আগতো ন উপসম্পাদেতব্বো. যো সো, ভিক্খৰে, অঞ্ঞোপি অঞ্ঞতিত্থিযপুব্বো ইমস্মিং ধম্মৰিনযে আকঙ্খতি পব্বজ্জং, আকঙ্খতি উপসম্পদং, তস্স চত্তারো মাসে পরিৰাসো দাতব্বো. এৰঞ্চ পন, ভিক্খৰে, দাতব্বো – পঠমং কেসমস্সুং ওহারাপেত্ৰা কাসাযানি ৰত্থানি অচ্ছাদাপেত্ৰা একংসং উত্তরাসঙ্গং কারাপেত্ৰা ভিক্খূনং পাদে ৰন্দাপেত্ৰা উক্কুটিকং নিসীদাপেত্ৰা অঞ্জলিং পগ্গণ্হাপেত্ৰা এৰং ৰদেহীতি ৰত্তব্বো – ‘‘বুদ্ধং সরণং গচ্ছামি, ধম্মং সরণং গচ্ছামি, সঙ্ঘং সরণং গচ্ছামি; দুতিযম্পি বুদ্ধং সরণং গচ্ছামি, দুতিযম্পি ধম্মং সরণং গচ্ছামি, দুতিযম্পি সঙ্ঘং সরণং গচ্ছামি; ততিযম্পি বুদ্ধং সরণং গচ্ছামি, ততিযম্পি ধম্মং সরণং গচ্ছামি, ততিযম্পি সঙ্ঘং সরণং গচ্ছামী’’তি.

তেন, ভিক্খৰে, অঞ্ঞতিত্থিযপুব্বেন সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, ভন্তে, অঞ্ঞতিত্থিযপুব্বো ইমস্মিং ধম্মৰিনযে আকঙ্খামি উপসম্পদং. সোহং, ভন্তে, সঙ্ঘং চত্তারো মাসে পরিৰাসং যাচামী’’তি. দুতিযম্পি যাচিতব্বো. ততিযম্পি যাচিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ইত্থন্নামো অঞ্ঞতিত্থিযপুব্বো ইমস্মিং ধম্মৰিনযে আকঙ্খতি উপসম্পদং. সো সঙ্ঘং চত্তারো মাসে পরিৰাসং যাচতি. যদি সঙ্ঘস্স পত্তকল্লং সঙ্ঘো ইত্থন্নামস্স অঞ্ঞতিত্থিযপুব্বস্স চত্তারো মাসে পরিৰাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো অঞ্ঞতিত্থিযপুব্বো ইমস্মিং ধম্মৰিনযে আকঙ্খতি উপসম্পদং. সো সঙ্ঘং চত্তারো মাসে পরিৰাসং যাচতি. সঙ্ঘো ইত্থন্নামস্স অঞ্ঞতিত্থিযপুব্বস্স চত্তারো মাসে পরিৰাসং দেতি. যস্সাযস্মতো খমতি ইত্থন্নামস্স অঞ্ঞতিত্থিযপুব্বস্স চত্তারো মাসে পরিৰাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দিন্নো সঙ্ঘেন ইত্থন্নামস্স অঞ্ঞতিত্থিযপুব্বস্স চত্তারো মাসে পরিৰাসো. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৮৭. ‘‘এৰং খো, ভিক্খৰে, অঞ্ঞতিত্থিযপুব্বো আরাধকো হোতি, এৰং অনারাধকো. কথঞ্চ, ভিক্খৰে, অঞ্ঞতিত্থিযপুব্বো অনারাধকো হোতি? ইধ, ভিক্খৰে, অঞ্ঞতিত্থিযপুব্বো অতিকালেন গামং পৰিসতি, অতিদিৰা পটিক্কমতি. এৰম্পি, ভিক্খৰে, অঞ্ঞতিত্থিযপুব্বো অনারাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো ৰেসিযাগোচরো ৰা হোতি, ৰিধৰাগোচরো ৰা হোতি, থুল্লকুমারিকাগোচরো ৰা হোতি, পণ্ডকগোচরো ৰা হোতি, ভিক্খুনিগোচরো ৰা হোতি. এৰম্পি, ভিক্খৰে, অঞ্ঞতিত্থিযপুব্বো অনারাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো যানি তানি সব্রহ্মচারীনং উচ্চাৰচানি করণীযানি, তত্থ ন দক্খো হোতি, ন অনলসো, ন তত্রুপাযায ৰীমংসায সমন্নাগতো, ন অলং কাতুং, ন অলং সংৰিধাতুং. এৰম্পি, ভিক্খৰে, অঞ্ঞতিত্থিযপুব্বো অনারাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো ন তিব্বচ্ছন্দো হোতি উদ্দেসে, পরিপুচ্ছায, অধিসীলে, অধিচিত্তে, অধিপঞ্ঞায. এৰম্পি, ভিক্খৰে, অঞ্ঞতিত্থিযপুব্বো অনারাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো যস্স তিত্থাযতনা সঙ্কন্তো হোতি, তস্স সত্থুনো তস্স দিট্ঠিযা তস্স খন্তিযা তস্স রুচিযা তস্স আদাযস্স অৰণ্ণে ভঞ্ঞমানে কুপিতো হোতি অনত্তমনো অনভিরদ্ধো, বুদ্ধস্স ৰা ধম্মস্স ৰা সঙ্ঘস্স ৰা অৰণ্ণে ভঞ্ঞমানে অত্তমনো হোতি উদগ্গো অভিরদ্ধো. যস্স ৰা পন তিত্থাযতনা সঙ্কন্তো হোতি, তস্স সত্থুনো তস্স দিট্ঠিযা তস্স খন্তিযা তস্স রুচিযা তস্স আদাযস্স ৰণ্ণে ভঞ্ঞমানে অত্তমনো হোতি উদগ্গো অভিরদ্ধো, বুদ্ধস্স ৰা ধম্মস্স ৰা সঙ্ঘস্স ৰা ৰণ্ণে ভঞ্ঞমানে কুপিতো হোতি অনত্তমনো অনভিরদ্ধো. ইদং, ভিক্খৰে, সঙ্ঘাতনিকং অঞ্ঞতিত্থিযপুব্বস্স অনারাধনীযস্মিং. এৰম্পি খো, ভিক্খৰে, অঞ্ঞতিত্থিযপুব্বো অনারাধকো হোতি. এৰং অনারাধকো খো, ভিক্খৰে, অঞ্ঞতিত্থিযপুব্বো আগতো ন উপসম্পাদেতব্বো.

‘‘কথঞ্চ, ভিক্খৰে, অঞ্ঞতিত্থিযপুব্বো আরাধকো হোতি? ইধ, ভিক্খৰে, অঞ্ঞতিত্থিযপুব্বো নাতিকালেন গামং পৰিসতি নাতিদিৰা পটিক্কমতি. এৰম্পি, ভিক্খৰে, অঞ্ঞতিত্থিযপুব্বো আরাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো ন ৰেসিযাগোচরো হোতি, ন ৰিধৰাগোচরো হোতি, ন থুল্লকুমারিকাগোচরো হোতি, ন পণ্ডকগোচরো হোতি, ন ভিক্খুনিগোচরো হোতি. এৰম্পি, ভিক্খৰে, অঞ্ঞতিত্থিযপুব্বো আরাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো যানি তানি সব্রহ্মচারীনং উচ্চাৰচানি করণীযানি, তত্থ দক্খো হোতি, অনলসো, তত্রুপাযায ৰীমংসায সমন্নাগতো, অলং কাতুং, অলং সংৰিধাতুং. এৰম্পি, ভিক্খৰে, অঞ্ঞতিত্থিযপুব্বো আরাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো তিব্বচ্ছন্দো হোতি উদ্দেসে, পরিপুচ্ছায, অধিসীলে, অধিচিত্তে, অধিপঞ্ঞায. এৰম্পি, ভিক্খৰে, অঞ্ঞতিত্থিযপুব্বো আরাধকো হোতি.

‘‘পুন চপরং, ভিক্খৰে, অঞ্ঞতিত্থিযপুব্বো যস্স তিত্থাযতনা সঙ্কন্তো হোতি, তস্স সত্থুনো তস্স দিট্ঠিযা তস্স খন্তিযা তস্স রুচিযা তস্স আদাযস্স অৰণ্ণে ভঞ্ঞমানে অত্তমনো হোতি উদগ্গো অভিরদ্ধো, বুদ্ধস্স ৰা ধম্মস্স ৰা সঙ্ঘস্স ৰা অৰণ্ণে ভঞ্ঞমানে কুপিতো হোতি অনত্তমনো অনভিরদ্ধো. যস্স ৰা পন তিত্থাযতনা সঙ্কন্তো হোতি, তস্স সত্থুনো তস্স দিট্ঠিযা তস্স খন্তিযা তস্স রুচিযা তস্স আদাযস্স ৰণ্ণে ভঞ্ঞমানে কুপিতো হোতি অনত্তমনো অনভিরদ্ধো, বুদ্ধস্স ৰা ধম্মস্স ৰা সঙ্ঘস্স ৰা ৰণ্ণে ভঞ্ঞমানে অত্তমনো হোতি উদগ্গো অভিরদ্ধো. ইদং, ভিক্খৰে, সঙ্ঘাতনিকং অঞ্ঞতিত্থিযপুব্বস্স আরাধনীযস্মিং. এৰম্পি খো, ভিক্খৰে, অঞ্ঞতিত্থিযপুব্বো আরাধকো হোতি. এৰং আরাধকো খো, ভিক্খৰে, অঞ্ঞতিত্থিযপুব্বো আগতো উপসম্পাদেতব্বো.

‘‘সচে, ভিক্খৰে, অঞ্ঞতিত্থিযপুব্বো নগ্গো আগচ্ছতি, উপজ্ঝাযমূলকং চীৰরং পরিযেসিতব্বং. সচে অচ্ছিন্নকেসো আগচ্ছতি, সঙ্ঘো অপলোকেতব্বো ভণ্ডুকম্মায. যে তে, ভিক্খৰে, অগ্গিকা জটিলকা, তে আগতা উপসম্পাদেতব্বা, ন তেসং পরিৰাসো দাতব্বো. তং কিস্স হেতু? কম্মৰাদিনো এতে, ভিক্খৰে, কিরিযৰাদিনো. সচে, ভিক্খৰে, জাতিযা সাকিযো অঞ্ঞতিত্থিযপুব্বো আগচ্ছতি, সো আগতো উপসম্পাদেতব্বো, ন তস্স পরিৰাসো দাতব্বো. ইমাহং, ভিক্খৰে, ঞাতীনং আৰেণিকং পরিহারং দম্মী’’তি.

অঞ্ঞতিত্থিযপুব্বকথা নিট্ঠিতা.

সত্তমভাণৰারো.