২০. পণামনা খমাপনা

৮০. তেন খো পন সমযেন অন্তেৰাসিকা আচরিযেসু ন সম্মা ৰত্তন্তি…পে… ভগৰতো এতমত্থং আরোচেসুং…পে… ন, ভিক্খৰে, অন্তেৰাসিকেন আচরিযম্হি ন সম্মা ৰত্তিতব্বং. যো ন সম্মা ৰত্তেয্য, আপত্তি দুক্কটস্সাতি. নেৰ সম্মা ৰত্তন্তি. ভগৰতো এতমত্থং আরোচেসুং…পে… অনুজানামি, ভিক্খৰে, অসম্মাৰত্তন্তং পণামেতুং. এৰঞ্চ পন, ভিক্খৰে, পণামেতব্বো – পণামেমি তন্তি ৰা, মাযিধ পটিক্কমীতি ৰা, নীহর তে পত্তচীৰরন্তি ৰা, নাহং তযা উপট্ঠাতব্বোতি ৰা. কাযেন ৰিঞ্ঞাপেতি, ৰাচায ৰিঞ্ঞাপেতি, কাযেন ৰাচায ৰিঞ্ঞাপেতি, পণামিতো হোতি অন্তেৰাসিকো; ন কাযেন ৰিঞ্ঞাপেতি, ন ৰাচায ৰিঞ্ঞাপেতি, ন কাযেন ৰাচায ৰিঞ্ঞাপেতি, ন পণামিতো হোতি অন্তেৰাসিকোতি.

তেন খো পন সমযেন অন্তেৰাসিকা পণামিতা ন খমাপেন্তি. ভগৰতো এতমত্থং আরোচেসুং. অনুজানামি, ভিক্খৰে, খমাপেতুন্তি. নেৰ খমাপেন্তি. ভগৰতো এতমত্থং আরোচেসুং. ন, ভিক্খৰে, পণামিতেন ন খমাপেতব্বো. যো ন খমাপেয্য, আপত্তি দুক্কটস্সাতি.

তেন খো পন সমযেন আচরিযা খমাপিযমানা ন খমন্তি. ভগৰতো এতমত্থং আরোচেসুং. অনুজানামি, ভিক্খৰে, খমিতুন্তি. নেৰ খমন্তি. অন্তেৰাসিকা পক্কমন্তিপি ৰিব্ভমন্তিপি তিত্থিযেসুপি সঙ্কমন্তি. ভগৰতো এতমত্থং আরোচেসুং. ন, ভিক্খৰে, খমাপিযমানেন ন খমিতব্বং. যো ন খমেয্য, আপত্তি দুক্কটস্সাতি.

তেন খো পন সমযেন আচরিযা সম্মাৰত্তন্তং পণামেন্তি, অসম্মাৰত্তন্তং ন পণামেন্তি. ভগৰতো এতমত্থং আরোচেসুং. ন, ভিক্খৰে, সম্মাৰত্তন্তো পণামেতব্বো. যো পণামেয্য, আপত্তি দুক্কটস্স. ন চ, ভিক্খৰে, অসম্মাৰত্তন্তো ন পণামেতব্বো. যো ন পণামেয্য, আপত্তি দুক্কটস্স.

৮১. ‘‘পঞ্চহি, ভিক্খৰে, অঙ্গেহি সমন্নাগতো অন্তেৰাসিকো পণামেতব্বো. আচরিযম্হি নাধিমত্তং পেমং হোতি, নাধিমত্তো পসাদো হোতি, নাধিমত্তা হিরী হোতি, নাধিমত্তো গারৰো হোতি, নাধিমত্তা ভাৰনা হোতি – ইমেহি খো, ভিক্খৰে, পঞ্চহঙ্গেহি সমন্নাগতো অন্তেৰাসিকো পণামেতব্বো.

‘‘পঞ্চহি, ভিক্খৰে, অঙ্গেহি সমন্নাগতো অন্তেৰাসিকো ন পণামেতব্বো. আচরিযম্হি অধিমত্তং পেমং হোতি, অধিমত্তো পসাদো হোতি, অধিমত্তা হিরী হোতি, অধিমত্তো গারৰো হোতি, অধিমত্তা ভাৰনা হোতি – ইমেহি খো, ভিক্খৰে, পঞ্চহঙ্গেহি সমন্নাগতো অন্তেৰাসিকো ন পণামেতব্বো.

‘‘পঞ্চহি, ভিক্খৰে, অঙ্গেহি সমন্নাগতো অন্তেৰাসিকো অলং পণামেতুং. আচরিযম্হি নাধিমত্তং পেমং হোতি, নাধিমত্তো পসাদো হোতি, নাধিমত্তা হিরী হোতি, নাধিমত্তো গারৰো হোতি, নাধিমত্তা ভাৰনা হোতি – ইমেহি খো, ভিক্খৰে, পঞ্চহঙ্গেহি সমন্নাগতো অন্তেৰাসিকো অলং পণামেতুং.

‘‘পঞ্চহি, ভিক্খৰে, অঙ্গেহি সমন্নাগতো অন্তেৰাসিকো নালং পণামেতুং. আচরিযম্হি অধিমত্তং পেমং হোতি, অধিমত্তো পসাদো হোতি, অধিমত্তা হিরী হোতি, অধিমত্তো গারৰো হোতি, অধিমত্তা ভাৰনা হোতি – ইমেহি খো, ভিক্খৰে, পঞ্চহঙ্গেহি সমন্নাগতো অন্তেৰাসিকো নালং পণামেতুং.

‘‘পঞ্চহি, ভিক্খৰে, অঙ্গেহি সমন্নাগতং অন্তেৰাসিকং অপ্পণামেন্তো আচরিযো সাতিসারো হোতি, পণামেন্তো অনতিসারো হোতি. আচরিযম্হি নাধিমত্তং পেমং হোতি, নাধিমত্তো পসাদো হোতি, নাধিমত্তা হিরী হোতি, নাধিমত্তো গারৰো হোতি, নাধিমত্তা ভাৰনা হোতি – ইমেহি খো, ভিক্খৰে, পঞ্চহঙ্গেহি সমন্নাগতং অন্তেৰাসিকং অপ্পণামেন্তো আচরিযো সাতিসারো হোতি, পণামেন্তো অনতিসারো হোতি.

‘‘পঞ্চহি, ভিক্খৰে, অঙ্গেহি সমন্নাগতং অন্তেৰাসিকং পণামেন্তো আচরিযো সাতিসারো হোতি, অপ্পণামেন্তো অনতিসারো হোতি. আচরিযম্হি অধিমত্তং পেমং হোতি, অধিমত্তো পসাদো হোতি, অধিমত্তা হিরী হোতি, অধিমত্তো গারৰো হোতি, অধিমত্তা ভাৰনা হোতি – ইমেহি খো, ভিক্খৰে, পঞ্চহঙ্গেহি সমন্নাগতং অন্তেৰাসিকং পণামেন্তো আচরিযো সাতিসারো হোতি, অপ্পণামেন্তো অনতিসারো হোতী’’তি.

পণামনা খমাপনা নিট্ঠিতা.