২১. বালঅব্যত্তৰত্থু

৮২. তেন খো পন সমযেন ভিক্খূ, দসৰস্সম্হা দসৰস্সম্হাতি, বালা অব্যত্তা নিস্সযং দেন্তি. দিস্সন্তি আচরিযা বালা, অন্তেৰাসিকা পণ্ডিতা. দিস্সন্তি আচরিযা অব্যত্তা, অন্তেৰাসিকা ব্যত্তা. দিস্সন্তি আচরিযা অপ্পস্সুতা, অন্তেৰাসিকা বহুস্সুতা. দিস্সন্তি আচরিযা দুপ্পঞ্ঞা, অন্তেৰাসিকা পঞ্ঞৰন্তো. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ, দসৰস্সম্হা দসৰস্সম্হাতি, বালা অব্যত্তা নিস্সযং দস্সন্তি. দিস্সন্তি আচরিযা বালা অন্তেৰাসিকা পণ্ডিতা, দিস্সন্তি আচরিযা অব্যত্তা অন্তেৰাসিকা ব্যত্তা, দিস্সন্তি আচরিযা অপ্পস্সুতা অন্তেৰাসিকা বহুস্সুতা, দিস্সন্তি আচরিযা দুপ্পঞ্ঞা অন্তেৰাসিকা পঞ্ঞৰন্তো’’তি. অথ খো তে ভিক্খূ ভগৰতো এতমত্থং আরোচেসুং…পে… সচ্চং কির, ভিক্খৰে, ভিক্খূ, দসৰস্সম্হা দসৰস্সম্হাতি, বালা অব্যত্তা নিস্সযং দেন্তি…পে… সচ্চং, ভগৰাতি. ৰিগরহি বুদ্ধো ভগৰা…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, বালেন অব্যত্তেন নিস্সযো দাতব্বো. যো দদেয্য, আপত্তি দুক্কটস্স. অনুজানামি, ভিক্খৰে, ব্যত্তেন ভিক্খুনা পটিবলেন দসৰস্সেন ৰা অতিরেকদসৰস্সেন ৰা নিস্সযং দাতু’’ন্তি.

বালঅব্যত্তৰত্থু নিট্ঠিতং.