৭. আৰট্টহারসম্পাতৰিভাৰনা

৬৯. যেন যেন চতুব্যূহহারসম্পাতেন নিরুত্যাধিপ্পাযনিদানপুব্বাপরানুসন্ধযো ৰিভত্তা, সো চতুব্যূহহারসম্পাতো পরিপুণ্ণো, ‘‘কতমো আৰট্টহারসম্পাতো’’তি পুচ্ছিতব্বত্তা ‘‘তত্থ কতমো আৰট্টো হারসম্পাতো’’তিআদি ৰুত্তং. তত্থ কতমো সংৰণ্ণনাৰিসেসো আৰট্টহারসম্পাতো নামাতি পুচ্ছতি.

‘‘কতমে সুত্তত্থা কথং আৰট্টেতব্বা’’তি পুচ্ছিতব্বত্তা ‘‘তস্মা’’তিআদি ৰুত্তং. নেক্খম্মসঙ্কপ্পসঙ্খাতসম্মাসঙ্কপ্পবহুলো কসিণাদিৰসেন, অৰিহিংসাসঙ্কপ্পসঙ্খাতসম্মাসঙ্কপ্পবহুলো মেত্তাদিৰসেন অধিগতায চিত্তেকগ্গতায চিত্তং ঠপেন্তো সংকিলেসতো রক্খিতচিত্তো নাম হোতি, ‘‘তস্মা রক্খিতচিত্তস্স, সম্মাসঙ্কপ্পগোচরো’’তি ইমিনা রক্খিতচিত্তে ৰুত্তে সতি যা একগ্গতা আৰট্টেতব্বা, সা অযং একগ্গতা সমথো. ‘‘সম্মাদিট্ঠিপুরেক্খারো’’তি ইমিনা সম্মাদিট্ঠিপুরেক্খারে ৰুত্তে সতি যা পঞ্ঞা আৰট্টেতব্বা, সা অযং পঞ্ঞা ৰিপস্সনা. ‘‘ঞত্ৰান উদযব্বয’’ন্তি ইমিনা উদযব্বযঞাণসমন্নাগতে ৰুত্তে সতি যা দুক্খপরিজাননা আৰট্টেতব্বা, সা অযং দুক্খপরিজাননা দুক্খপরিঞ্ঞা. ‘‘থিনমিদ্ধাভিভূ ভিক্খূ’’তি ইমিনা পুগ্গলাধিট্ঠানেন যং থিনমিদ্ধাভিভৰনং ৰুত্তং, ইদং থিনমিদ্ধাভিভৰনং সমুদযপ্পহানং. ‘‘সম্মা দুগ্গতিযো জহে’’তি ইমিনা যো সব্বদুগ্গতিজহনসঙ্খাতো অনুপ্পাদো ৰুত্তো, সো অযং অনুপ্পাদো নিরোধো. ইতি দুক্খপরিঞ্ঞায পরিঞ্ঞেতব্বং দুক্খসচ্চং আৰট্টেতব্বং, সমুদযপ্পহানেন পহাতব্বং সমুদযসচ্চং আৰট্টেতব্বং, নিরোধেন নিরোধসচ্চং আৰট্টেতব্বং, সমথৰিপস্সনাহি মগ্গসচ্চং আৰট্টেতব্বন্তি ইমানি চত্তারি সচ্চানি আৰট্টেতব্বানীতি.

‘‘এত্তকোৰ আৰট্টো হারসম্পাতো পরিপুণ্ণো’’তি ৰত্তব্বত্তা ‘‘নিযুত্তো আৰট্টো হারসম্পাতো’’তি ৰুত্তং. যেন যেন সংৰণ্ণনাৰিসেসভূতেন আৰট্টহারসম্পাতেন সমথাদযো আৰট্টেতব্বা, সো সো সংৰণ্ণনাৰিসেসভূতো আৰট্টহারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বোতি.

ইতি আৰট্টহারসম্পাতে সত্তিবলানুরূপা রচিতা

ৰিভাৰনা নিট্ঠিতা.

পণ্ডিতেহি পন…পে… গহেতব্বোতি.