১৬. সমারোপনহারৰিভঙ্গৰিভাৰনা

৫০. যেন যেন সংৰণ্ণনাৰিসেসভূতেন পরিক্খারহারৰিভঙ্গেন সুত্তত্থানং হেতুপচ্চযো ৰিভত্তো, সো…পে… ৰিভঙ্গো পরিপুণ্ণো, ‘‘কতমো সমারোপনহারৰিভঙ্গো’’তি পুচ্ছিতব্বত্তা ‘‘তত্থ কতমো সমারোপনো হারো’’তিআদি ৰুত্তং. তত্থ তেসু নিদ্দিট্ঠেসু সোল়সসু দেসনাহারাদীসু কতমো সংৰণ্ণনাৰিসেসো সমারোপনো হারো সমারোপনহারৰিভঙ্গো নামাতি পুচ্ছতি. ‘‘যে ধম্মা যংমূলা’’তিআদিনিদ্দেসস্স ইদানি মযা ৰুচ্চমানো ‘‘একস্মিং পদট্ঠানে যত্তকানি পদট্ঠানানি ওতরন্তী’’তিআদিকো ৰিত্থারসংৰণ্ণনাৰিসেসো সমারোপনহারৰিভঙ্গো নাম.

‘‘কিত্তকে পদট্ঠানে সুত্তে ৰুত্তে কিত্তকানি পদট্ঠানানি সমারোপযিতব্বানী’’তি পুচ্ছিতব্বত্তা ‘‘একস্মিং পদট্ঠানে’’তিআদি ৰুত্তং. একস্মিং পদট্ঠানে সুত্তে ৰুত্তে সতি অৰুত্তানি যত্তকানি পদট্ঠানানি ওতরন্তি সমোসরন্তি, সব্বানি তানি অৰুত্তানি পদট্ঠানানি সুত্তে ৰুত্তানি ৰিয নিদ্ধারণৰসেন আনেত্ৰা দেসনায আরোপযিতব্বানি. ‘‘কানি ৰিয সমারোপযিতব্বানী’’তি ৰত্তব্বত্তা ‘‘যথা আৰট্টে’’তিআদি ৰুত্তং. আৰট্টে হারে একস্মিং পদট্ঠানে সুত্তে ৰুত্তে সতি সুত্তে অৰুত্তানি বহুকানি পদট্ঠানানি ওতরন্তি, তানি বহুকানি পদট্ঠানানি পরিযেসিতব্বানি যথা, এৰং সমারোপনে হারেপি বহুকানি পদট্ঠানানি দেসনায সমারোপযিতব্বানীতি অত্থো.

‘‘কেৰলং পন পদট্ঠানৰসেনেৰ সমারোপনা কাতব্বা কিং, উদাহু অঞ্ঞৰসেনাপি সমারোপনা কাতব্বা কি’’ন্তি ৰত্তব্বত্তা অঞ্ঞৰসেনাপি সমারোপনা কাতব্বা; তস্মা সমারোপনা চতুব্বিধা কাতব্বাতি দস্সেন্তো ‘‘তত্থ সমারোপনা চতুব্বিধা’’তিআদিমাহ. তত্থ তত্থাতি তাসু সমারোপযিতব্বসমারোপনাসু পদট্ঠানং পদট্ঠানসমারোপনা, ৰেৰচনং ৰেৰচনসমারোপনা, ভাৰনা ভাৰনাসমারোপনা, পহানং পহানসমারোপনা, ইতি ইমিনা পভেদেন সমারোপনা চতুব্বিধা কাতব্বা.

‘‘তাসু চতুব্বিধাসু সমারোপনাসু কতমা পদট্ঠানসমারোপনা’’তি পুচ্ছিতব্বত্তা তথা পুচ্ছিত্ৰা পদট্ঠানসমারোপনং দস্সেতুং ‘‘তত্থ কতমা’’তিআদি ৰুত্তং. সুত্তে ৰুত্তেন পদট্ঠানেন সুত্তে অৰুত্তানং পদট্ঠানানং সমারোপনা কতমাতি পুচ্ছতি.

সব্বপাপস্স অকুসলস্স যং অকরণং অকরণহেতু সাসনং অত্থি, এতং সাসনং বুদ্ধানং সাসনং ওৰাদো হোতি, অথ ৰা অকরণং অকরণত্থায যং সাসনং অত্থি, এতং বুদ্ধানং সাসনং ওৰাদো হোতি, ন যস্স কস্সচি সাসনন্তি অত্থো. অকরণন্তি হি সম্পদানত্থে পৰত্তং পচ্চত্তৰচনং যথা ‘‘কিস্স অত্থায কিমত্থ’’ন্তি. কুসলস্স সম্পদা সম্পদায যং সাসনং অত্থি, এতং বুদ্ধানং সাসনং. সচিত্তপরিযোদাপনং সচিত্তপরিযোদাপনত্থং যং সাসনং অত্থি, এতং বুদ্ধানং সাসনং হোতি.

ইতি এৰংপকারেন ৰুত্তস্স তস্স সাসনস্স কিং পদট্ঠানন্তি ৰিসেসস্স ৰিসেসপদট্ঠানং পুন পুচ্ছতি. ইদং সুচরিতত্তযং সাসনস্স ওৰাদস্স পদট্ঠানং সুচরিতত্তযেন হেতুনা সাসনত্তাতি দট্ঠব্বং যথা ‘‘অন্নেন ৰসতী’’তিআদি. ‘‘সুচরিতত্তযে পদট্ঠানে ৰুত্তে কতমং পদট্ঠানং সমারোপযিতব্ব’’ন্তি পুচ্ছিতব্বত্তা ‘‘তত্থ যং কাযিকঞ্চা’’তিআদি ৰুত্তং. ইদং খন্ধত্তযং সাসনস্স পদট্ঠানং সমারোপযিতব্বং, ‘‘খন্ধত্তযে পদট্ঠানে সমারোপযিতে কতমং সমারোপযিতব্ব’’ন্তি পুচ্ছিতব্বত্তা ‘‘তত্থ সীলক্খন্ধো চা’’তিআদি ৰুত্তং. ইদং সমথৰিপস্সনাদ্ৰযং সাসনস্স পদট্ঠানং সমারোপযিতব্বং. ‘‘সমথৰিপস্সনাদ্ৰযে পদট্ঠানে সমারোপযিতে কতমং পদট্ঠানং সমারোপযিতব্ব’’ন্তি পুচ্ছিতব্বত্তা ‘‘তত্থ সমথস্স ফল’’ন্তিআদি ৰুত্তং. ইদং ফলদ্ৰযং সাসনস্স পদট্ঠানং সমারোপযিতব্বং.

সাসনস্স পদট্ঠানানি সমারোপযিতব্বানীতি আচরিযেন নিদ্ধারেত্ৰা ৰিভত্তানি, অম্হেহি চ ঞাতানি, ‘‘ইদানি কতমস্স কতমং পদট্ঠানং সমারোপযিতব্ব’’ন্তি পুচ্ছিতব্বত্তা ‘‘ৰনং ৰনথস্সা’’তিআদি ৰুত্তং. ইদং কামগুণপঞ্চকং ৰনং তণ্হাভূতস্স ৰনথস্স পদট্ঠানং তণ্হাৰত্থুভাৰতো, ‘‘ইত্থী’’তি ৰা ‘‘পুরিসো’’তি ৰা নিমিত্তগ্গাহসঙ্খাতং ইদং ৰনং ‘‘অহো চক্খু, অহো সোতং, অহো ঘানং, অহো জিৰ্হা, অহো কাযো’’তি তেসং তেসং অঙ্গপচ্চঙ্গানং অনুব্যঞ্জনগ্গাহসঙ্খাতস্স ৰনথস্স পদট্ঠানং সমারোপযিতব্বং. অপরিঞ্ঞাতং দ্ৰাদসাযতনসঙ্খাতং ইদং ৰনং সংযোজনসঙ্খাতস্স ৰনথস্স পদট্ঠানং সমারোপযিতব্বং, আযতনং পটিচ্চ সংযোজনুপ্পজ্জনতো অনুসযসঙ্খাতং ইদং ৰনং পরিযুট্ঠানসঙ্খাতস্স ৰনথস্স পদট্ঠানং সমারোপযিতব্বং. ‘‘পঞ্চকামগুণাদীনং ৰনভাৰো চ তণ্হাদীনং ৰনথভাৰো চ কেন অম্হেহি সদ্দহিতব্বো’’তি ৰত্তব্বত্তা ‘‘তেনাহ ভগৰা’’তিআদি ৰুত্তং. তেন পঞ্চকামগুণাদীনং ৰনভাৰেন চ তণ্হাদীনং ৰনথভাৰেন চ ভগৰা ‘‘ছেত্ৰা ৰনঞ্চ ৰনথঞ্চা’’তি যং ৰচনং আহ, তেন ভগৰতো ৰচনেন ৰচনানুসারেন সদ্দহিতব্বোতি. অযন্তি অযং ‘‘একস্মিং পদট্ঠানে’’তিআদিসংৰণ্ণনা. পদট্ঠানেনাতি একেকেন পদট্ঠানেন. সমারোপনাতি তদঞ্ঞপদট্ঠানানং সমারোপনা. সমারোপেন্তি সমারোপযিতব্বানি এতায সংৰণ্ণনাযাতি সমারোপনাতি ৰিগ্গহোতি. (১)

৫১. পদট্ঠানেন সমারোপনা আচরিযেন নিদ্দিট্ঠা, অম্হেহি চ ঞাতা, ‘‘কতমা ৰেৰচনেন সমারোপনা’’তি পুচ্ছিতব্বত্তা ‘‘তত্থ কতমা ৰেৰচনেনা’’তিআদি ৰুত্তং. তত্থাতি তাসু চতূসু পদট্ঠানসমারোপনাদীসু সমারোপনাসু ৰেৰচনেন একেকেন রোতদঞ্ঞৰেৰচনানং সমারোপনা কতমাতি পুচ্ছতি. ‘‘রাগৰিরাগা’’তি চ ‘‘চেতোৰিমুত্তী’’তি চ ‘‘সেক্খফল’’ন্তি চ ইদং ৰচনত্তযং অনাগামিফলত্থত্তা অনাগামিফলস্স ৰেৰচনং. ‘‘অৰিজ্জাৰিরাগা’’তি চ ‘‘পঞ্ঞাৰিমুত্তী’’তি চ ‘‘অসেক্খফল’’ন্তি চ ইদং ৰচনত্তযং অরহত্তফলত্থত্তা অরহত্তফলস্স ৰেৰচনং. ইমিনা নযেন সেসেসু যোজনা কাতব্বা. (২)

ৰেৰচনেন সমারোপনা আচরিযেন নিদ্দিট্ঠা, অম্হেহি চ ঞাতা, ‘‘কতমা ভাৰনায সমারোপনা’’তি পুচ্ছিতব্বত্তা ‘‘তত্থ কতমা ভাৰনাযা’’তিআদি ৰুত্তং. তত্থাতি তাসু চতূসু পদট্ঠানসমারোপনাদীসু কতমায দেসিতায ভাৰনায কতমেসানং অদেসিতানং ভাৰনারোপনা কতমাতি পুচ্ছতি. যথা যেন পকারেন যং ভাৰনং ভগৰা ‘‘তস্মাতিহ, ত্ৰং ভিক্খু, কাযে কাযানুপস্সী ৰিহরতি, আতাপী সম্পজানো সতিমা ৰিনেয্য লোকে অভিজ্ঝাদোমনস্স’’ন্তি (সং. নি. ৫.৩৬৯, ৩৭১, ৩৯৫, ৪১৫) আহ, তথা তেন পকারেন তায ভাৰনায তদঞ্ঞভাৰনাপি সমারোপযিতব্বাতি অত্থো.

‘‘তস্মাতিহা’’তিআদিপাঠে ‘‘কিং ভাৰনং ভগৰা আহা’’তি পুচ্ছিতব্বত্তা ‘‘আতাপী’’তিআদি ৰুত্তং. ‘‘আতাপী’’তি ৰচনেন ৰীরিযিন্দ্রিযং ভগৰা আহ. ‘‘সম্পজানো’’তি ৰচনেন পঞ্ঞিন্দ্রিযং ভগৰা আহ. ‘‘সতিমা’’তি ৰচনেন সতিন্দ্রিযং আহ. ‘‘ৰিনেয্য লোকে অভিজ্ঝাদোমনস্স’’ন্তি ৰচনেন সমাধিন্দ্রিযং আহ. ‘‘এৰং ৰুত্তে কতমা ভাৰনা সমারোপযিতব্বা’’তি পুচ্ছিতব্বত্তা ‘‘এৰং কাযে কাযানুপস্সিনো ৰিহরতো চত্তারো সতিপট্ঠানা ভাৰনাপারিপূরিং গচ্ছন্তী’’তি ৰুত্তং. এৰং ৰুত্তায ৰীরিযিন্দ্রিযাদিভাৰনায চত্তারো সতিপট্ঠানা সমারোপযিতব্বাতি অত্থো. কেন কারণেন ভাৰনাপারিপূরিং গচ্ছন্তীতি পুচ্ছতি. চতুন্নং ইন্দ্রিযানং ইন্দ্রিযভাৰেন, ভাৰেতব্বভাৰেন ৰা একলক্খণত্তা ভাৰনাপারিপূরিং গচ্ছন্তীতি ৰিস্সজ্জেতি. ‘‘তেসু সমারোপিতেসু কতমে সমারোপযিতব্বা’’তি পুচ্ছিতব্বত্তা ‘‘চতূসূ’’তিআদি ৰুত্তং. চতূসু সতিপট্ঠানেসু ভাৰিযমানেসু সমারোপযিতব্বেসু চত্তারো সম্মপ্পধানা ভাৰনাপারিপূরিং গচ্ছন্তীতি সমারোপযিতব্বাতি অত্থো. সেসেসুপি এৰমেৰ সমারোপযিতব্বা.

ভাৰনায সমারোপনা আচরিযেন ৰিভত্তা, অম্হেহি চ ঞাতা, ‘‘কতমা পহানেন সমারোপনা’’তি পুচ্ছিতব্বত্তা ‘‘তত্থ কতমা’’তিআদি ৰুত্তং. তত্থাতি তাসু চতূসু পদট্ঠানসমারোপনাদীসু কতমেন দেসিতেন পহানেন কতমেসং অদেসিতানং পহানানং কতমা সমারোপনাতি পুচ্ছতি. ‘‘কাযে কাযানুপস্সী ৰিহরন্তো অসুভে ‘সুভ’ন্তি ৰিপল্লাসং পজহতী’’তি দেসিতেন ‘‘সুভ’’ন্তি ৰিপল্লাসপ্পহানেন কবল়ীকারাহারপরিঞ্ঞায পরিবন্ধকিলেসকামুপাদানপ্পহানাদযোপি সমারোপযিতব্বা.

‘‘ৰেদনাসু ৰেদনানুপস্সী ৰিহরন্তো দুক্খে ‘সুখ’ন্তি ৰিপল্লাসং পজহতী’’তি দেসিতেন ‘‘সুখ’’ন্তি ৰিপল্লাসপ্পহানেন ফস্সাহারপরিঞ্ঞায পরিবন্ধকিলেসভৰুপাদানপ্পহানাদযোপি সমারোপযিতব্বা.

‘‘চিত্তে চিত্তানুপস্সী ৰিহরন্তো অনিচ্চে ‘নিচ্চ’ন্তি ৰিপল্লাসং পজহতী’’তি দেসিতেন ‘‘নিচ্চ’’ন্তি ৰিপল্লাসপ্পহানেন ৰিঞ্ঞাণাহারপরিঞ্ঞায পরিবন্ধকিলেসদিট্ঠুপাদানপ্পহানাদযোপি সমারোপযিতব্বা.

‘‘ধম্মেসু ধম্মানুপস্সী ৰিহরন্তো অনত্তনি ‘অত্তা’তি ৰিপল্লাসং পজহতী’’তি দেসিতেন ‘‘অত্তা’’তি ৰিপল্লাসপ্পহানেন মনোসঞ্চেতনাহারপরিঞ্ঞায? মনোসঞ্চেতনাহারপরিঞ্ঞায পরিবন্ধকিলেসঅত্তৰাদুপাদানপ্পহানাদযোপি সমারোপযিতব্বাতি অধিপ্পাযো. (৪)

পহানহারো পন লক্খণহারৰিভঙ্গৰণ্ণনাযং ৰুত্তোযেৰাতি ইধ ন ৰদাম.

‘‘সুত্তে দেসিতেন একেকেন পদট্ঠানাদিকেন অদেসিতানং পদট্ঠানাদীনং সমারোপনভাৰো কেন অম্হেহি ৰিজানিতব্বো সদ্দহিতব্বো’’তি ৰত্তব্বত্তা ‘‘তেনাহ আযস্মা’’তিআদিমাহ. তেন তথা সমারোপনভাৰেন আযস্মা মহাকচ্চানো –

‘‘যে ধম্মা যংমূলা, যে চেকত্থা পকাসিতা মুনিনা;

তে সমারোপযিতব্বা, এস সমারোপনো হারো’’তি –

যং ৰচনং আহ, তেন ৰচনেন ৰচনানুসারেন তথা সমারোপনভাৰো তুম্হেহি ৰিজানিতব্বো সদ্দহিতব্বোতি ৰুত্তং হোতি.

‘‘কিং পন এত্তাৰতা সমারোপনো হারো পরিপুণ্ণো, অঞ্ঞো নিযুত্তো নত্থী’’তি ৰত্তব্বত্তা ‘‘নিযুত্তো সমারোপনো হারো’’তি ৰুত্তং. সুত্তে দেসিতেন নযেন পদট্ঠানাদিকেন অদেসিতানি পদট্ঠানানি সমারোপযিতব্বানি ভৰন্তি, তেন তেন পদট্ঠানাদিকেন অদেসিতানং পদট্ঠানাদীনং সমারোপনো হারো নিযুত্তো নিদ্ধারেত্ৰা যুঞ্জিতব্বোতি অত্থো দট্ঠব্বো.

ইতি সমারোপনহারৰিভঙ্গে সত্তিবলানুরূপা রচিতা

ৰিভাৰনা নিট্ঠিতা.

পণ্ডিতেহি পন অট্ঠকথাটীকানুসারেন গম্ভীরত্থো ৰিত্থারতো ৰিভজিত্ৰা গহেতব্বো.

ইমে যথাৰুত্তা সোল়স সংৰণ্ণনাৰিসেসা সংৰণ্ণেতব্বত্থেসু অঞ্ঞাণসংসযানং হরণতো অপনযনতো হারা নামাতি.

নিট্ঠিতা হারৰিভঙ্গৰারৰিভাৰনা.