১২. ওতরণহারৰিভঙ্গৰিভাৰনা

৪২. যেন যেন সংৰণ্ণনাৰিসেসভূতেন পঞ্ঞত্তিহারৰিভঙ্গেন পঞ্ঞত্তিযো ৰিভত্তা, সো সংৰণ্ণনাৰিসেসভূতো ৰিভঙ্গো পরিপুণ্ণো, ‘‘কতমো ওতরণো হারৰিভঙ্গো’’তি পুচ্ছিতব্বত্তা ‘‘তত্থ কতমো ওতরণো হারো’’তিআদি ৰুত্তং. তত্থ তত্থাতি তেসু নিদ্দিট্ঠেসু সোল়সসু দেসনাহারাদীসু কতমো সংৰণ্ণনাৰিসেসো ওতরণো হারো ওতরণহারৰিভঙ্গো নামাতি পুচ্ছতি. ‘‘যো চ পটিচ্চুপ্পাদো’’তিআদিনিদ্দেসস্স ইদানি মযা ৰুচ্চমানো ‘‘উদ্ধং অধো সব্বধি ৰিপ্পমুত্তো’’তিআদিকো ৰিত্থারসংৰণ্ণনাৰিসেসো ওতরণো হারো ওতরণহারৰিভঙ্গো নামাতি গহেতব্বো.

তত্থ পাঠে ‘‘কতমে পটিচ্চসমুপ্পাদাদযো নিদ্ধারেত্ৰা কতমেহি নিদ্ধারিতেহি ধম্মেহি ওতরতী’’তি পুচ্ছিতব্বত্তা ইমস্মিং পাঠে ইমে পটিচ্চসমুপ্পাদাদযো নিদ্ধারেত্ৰা ইমেহি নিদ্ধারিতেহি ধম্মেহি ওতরতীতি দস্সেতুং ‘‘উদ্ধং অধো সব্বধি ৰিপ্পমুত্তো’’তিআদি ৰুত্তং. তত্থ উদ্ধন্তি কামধাতুতো উদ্ধং উপরিভাগে পৰত্তায রূপধাতুঅরূপধাতুযা. অধোতি রূপধাতুতো হেট্ঠাভাগে পৰত্তায কামধাতুযা. সব্বধীতি সব্বস্মিং কামরূপঅরূপধাতুম্হি. ৰিপ্পমুত্তোতি পটিসন্ধিৰসেন অপ্পৰত্তনতো ৰিপ্পমুত্তো অসেক্খো. অযং সেক্খো দস্সনমগ্গেন সক্কাযদিট্ঠিযা সমুগ্ঘাতত্তা ‘‘অহং অস্মী’’তি অনানুপস্সী ৰিহরতি. এৰং সেক্খায ৰিমুত্তিযা চেৰ অসেক্খায ৰিমুত্তিযা চ সেক্খো চেৰ অসেক্খো চ অতিণ্ণপুব্বং ওঘং অপুনব্ভৰায ৰিমুত্তো উদতারীতি গাথাত্থো গহেতব্বো.

তস্মিং গাথাপাঠে ‘‘কতমে নিদ্ধারেত্ৰা কতমেহি ওতরতী’’তি পুচ্ছিতব্বত্তা ‘‘উদ্ধন্তি রূপধাতূ’’তিআদি ৰুত্তং. উদ্ধন্তি মনুস্সলোকতো উদ্ধং চাতুমহারাজিকাদযোপি গহিতাতি অত্থসম্ভৰতো তং নিৰত্তেতুং ‘‘রূপধাতু অরূপধাতূ’’তি ৰুত্তং. অধোতি মনুস্সভৰতো অধো চত্তারো অপাযভূমিযো চ গহিতাতি অত্থসম্ভৰতো তং নিৰত্তেতুং ‘‘কামধাতূ’’তি ৰুত্তং. সব্বধীতি চতুভূমিকেতি অত্থসম্ভৰতো ‘‘তেধাতুকে’’তি ৰুত্তং. অযং অসেক্খা ৰিমুত্তীতি ৰিমুত্তস্স অসেক্খস্স যা ৰিরাগতা অত্থি, অযম্পি ৰিরাগতা অসেক্খফলৰিমুত্তি. ‘‘উদ্ধং অধো সব্বধি ৰিপ্পমুত্তো’’তি পাঠে ৰুত্তপ্পকারা অযং অসেক্খা ৰিমুত্তি নিদ্ধারিতাতি অত্থো. নিদ্ধারিতায অসেক্খায ৰিমুত্তিযা যানি সদ্ধাদিপঞ্চিন্দ্রিযানি নিদ্ধারিতানি, তানিযেৰ অসেক্খানি পঞ্চিন্দ্রিযানি ভৰন্তি. অযং ৰুত্তপ্পকারা ওতরণা ইন্দ্রিযেহি ৰিমুত্তিযা ওতরণা নাম পৰেসনা নাম.

তানিযেৰ অসেক্খানি পঞ্চিন্দ্রিযানি ৰিজ্জায উপকারকত্তা, পঞ্ঞাপদট্ঠানত্তা ৰা ৰিজ্জা ভৰন্তি. ৰিজ্জুপ্পাদা তাদিসায ৰিজ্জায উপ্পাদা উপ্পাদহেতুতো অৰিজ্জানিরোধো অৰিজ্জায নিরোধো হোতি…পে… দুক্খক্খন্ধস্স নিরোধো হোতি, অযং ৰুত্তপ্পকারা ওতরণা পটিচ্চসমুপ্পাদেহি ওতরণা নাম.

তানিযেৰ অসেক্খানি পঞ্চিন্দ্রিযানি তীহি খন্ধেহি সঙ্গহিতানি সদ্ধাৰীরিযেহি সীলসম্ভৰতো, সতিযা চ পঞ্ঞানুৰত্তকত্তা. সেসা ৰুত্তনযানুসারেন ৰেদিতব্বা.

‘‘উদ্ধং অধো সব্বধি ৰিপ্পমুত্তো’’তি পাঠে নিদ্ধারেত্ৰা ওতরণা আচরিযেন ৰিভত্তা, অম্হেহি চ ঞাতা, ‘‘অযং অহস্মীতি অনানুপস্সী’’তি পাঠে ‘‘কতমে নিদ্ধারেত্ৰা কতমেহি ওতরণেহি ওতরতী’’তি ৰত্তব্বত্তা ‘‘অযং অহস্মীতি অনানুপস্সীতি অযং সক্কাযদিট্ঠিযা’’তিআদি ৰুত্তং. যো অযং সেক্খো ‘‘অহমস্মী’’তি নানুপস্সী, তস্স সেক্খস্স সক্কাযদিট্ঠিযা যো সমুগ্ঘাতো অত্থি, যা সমুগ্ঘাতসঙ্খাতা সমুগ্ঘাতৰিমুত্তি সেক্খা ৰিমুত্তি হোতি, তস্সা সেক্খায ৰিমুত্তিযা যানি সদ্ধাদিপঞ্চিন্দ্রিযানি নিদ্ধারিতানি, তানিযেৰ সেক্খানি পঞ্চিন্দ্রিযানি ভৰন্তি. অযং ৰুত্তপ্পকারা ওতরণা ইন্দ্রিযেহি ওতরণা নাম. সেসা ৰুত্তনযানুসারেন ৰেদিতব্বা.

৪৩. ‘‘উদ্ধং অধো’’তিআদিগাথাযং ওতরণা আচরিযেন ৰিভত্তা, অম্হেহি চ ঞাতা, ‘‘নিস্সিতস্স চলিত’’ন্তিআদিপাঠে ‘‘কতমে নিদ্ধারেত্ৰা কতমেহি ওতরতী’’তি পুচ্ছিতব্বত্তা ‘‘নিস্সিতস্স চলিতং, অনিস্সিতস্স চলিতং নত্থী’’তিআদি ৰুত্তং. নিস্সিতস্স পুগ্গলস্স চলিতং চলনং অত্থি, অনিস্সিতস্স পুগ্গলস্স চলিতং চলনং নত্থি. চলিতে চলনে অসতি পস্সদ্ধি ভৰতি, পস্সদ্ধিযা সতি ৰিজ্জমানায নতি ন হোতি, নতিযা অসতি অৰিজ্জমানায আগতিগতি ন হোতি, আগতিগতিযা অসতি অৰিজ্জমানায চুতূপপাতো ন হোতি, চুতূপপাতে অসতি অৰিজ্জমানে ইধ ছসু অজ্ঝত্তিকাযতনেসু অত্তানং নেৰ পস্সতি, হুরং ৰা ছসু বাহিরাযতনেসু অত্তানং ন পস্সতি, উভযং অন্তরেন ৰজ্জেত্ৰা ফস্সাদিসমুদাযেসু ধম্মেসু অত্তানং ন পস্সতি, এসোৰ পটিচ্চসমুপ্পাদো ‘‘অৰিজ্জানিরোধা’’তিআদিকো দুক্খস্স অন্তো অৰসানং করোতীতি অত্থো.

নিস্সিতস্স চলিতন্তি এত্থ ‘‘নিস্সযো কতিৰিধো’’তি পুচ্ছিতব্বত্তা ‘‘নিস্সিতস্স চলিতন্তি নিস্সযো নামা’’তিআদি ৰুত্তং. তত্থাতি তেসু দুৰিধেসু তণ্হানিস্সযদিট্ঠিনিস্সযেসু যা চেতনা রত্তস্স পুগ্গলস্স নিদ্ধারিতা, অযং চেতনাধম্মো তণ্হানিস্সযো নাম. যা চেতনা মূল়্হস্স পুগ্গলস্স নিদ্ধারিতা. অযং চেতনাধম্মো দিট্ঠিনিস্সযো নাম. সা দুৰিধা চেতনা পন সঙ্খারা নাম. সঙ্খারপচ্চযা ৰিঞ্ঞাণং…পে… সব্বো পটিচ্চসমুপ্পাদো নিদ্ধারিতো. অযং ৰুত্তপ্পকারা ওতরণা পটিচ্চসমুপ্পাদেহি ওতরণা নাম.

তত্থাতি তস্মিং তণ্হানিস্সযদিট্ঠিনিস্সযে যা ৰেদনা রত্তস্স পুগ্গলস্স নিদ্ধারিতা, অযং সুখা ৰেদনা. যা চেতনা সম্মূল়্হস্স পুগ্গলস্স নিদ্ধারিতা, অযং অদুক্খমসুখা ৰেদনা. যেভুয্যেন সেসা ৰুত্তনযানুসারেন ৰেদিতব্বা.

৪৪. ‘‘নিস্সিতস্স চলিত’’ন্তিআদিপাঠে ওতরণা আচরিযেন ৰিভত্তা, অম্হেহি চ ঞাতা.

‘‘যে কেচি সোকা পরিদেৰিতা ৰা…পে…

পিযং ন কযিরাথ কুহিঞ্চি লোকে’’তি. –

গাথাপাঠে ‘‘কতমে নিদ্ধারেত্ৰা কতমেহি ওতরতী’’তি পুচ্ছিতব্বত্তা ‘‘যে কেচি সোকা’’তিআদি ৰুত্তং. যে কেচি সোকা ৰা যা কাচি পরিদেৰিতা ৰা অনেকরূপা যা কাচি দুক্খা ৰা লোকস্মিং সম্ভৰন্তি. এতে সোকাদযো পিযং পটিচ্চ পভৰন্তি, পিযে অসন্তে এতে সোকাদযো ন ভৰন্তি. তস্মা পিযে অসন্তে সোকাদীনং অভাৰতো যেসং ৰীতসোকানং কুহিঞ্চি লোকেপি নত্থি, তে ৰীতসোকা সুখিনো ভৰন্তি. তস্মা ৰীতসোকানং সুখসম্পন্নত্তা অসোকং ৰিরজং পত্থযানো সপ্পুরিসো কুহিঞ্চি লোকে পিযং ন কযিরাথাতি গাথাত্থো.

‘‘যে কেচি সোকা পরিদেৰিতা ৰা, দুক্খা চ লোকস্মিমনেকরূপা পিযং পটিচ্চ পভৰন্তি এতে’’তি এত্থ পাঠে যা ৰেদনা নিদ্ধারিতা, অযং দুক্খা ৰেদনা. সেসা ৰুত্তনযানুসারেন ৰেদিতব্বা.

‘‘যে কেচি সোকা’’তিআদিগাথাপাঠে ওতরণা আচরিযেন ৰিভত্তা, অম্হেহি চ ঞাতা, ‘‘কামং কামযমানস্সা’’তিআদিগাথাপাঠে ‘‘কতমে নিদ্ধারেত্ৰা কতমেহি ওতরতী’’তি ৰত্তব্বত্তা ‘‘কামং কামযমানস্সা’’তিআদি ৰুত্তং. তস্সং গাথাযং অত্থো হেট্ঠা ৰুত্তোৰ.

তত্থাতি তস্মিং ‘‘পীতিমনো হোতী’’তি পাঠে যা পীতিমনতা ৰুত্তা নিদ্ধারিতা, অযং পীতিমনতা অনুনযো হোতি. ‘‘সল্লৰিদ্ধোৰ রুপ্পতী’’তি পাঠে যং রুপ্পনং আহ, ইদং রুপ্পনং পটিঘং হোতি, অনুনযো চ পটিঘঞ্চ নিদ্ধারিতাতি অত্থো.

‘‘অনুনযে চ পটিঘে চ নিদ্ধারিতে কতমো ধম্মো নিদ্ধারিতো’’তি ৰত্তব্বত্তা ‘‘অনুনযো পটিঘঞ্চ পন তণ্হাপক্খো’’তি ৰুত্তং. তণ্হাপক্খোতি তণ্হাপক্খত্তা তণ্হা নিদ্ধারিতা. ‘‘অনুনযো তণ্হাপক্খো হোতু, পটিঘং পন তণ্হাপক্খং ন সিযা’’তি চে ৰদেয্য? পটিঘস্স অত্তসিনেহৰসেন পৰত্তনতো পটিঘম্পি তণ্হাপক্খং হোতি. ‘‘তণ্হায নিদ্ধারিতায কতমো নিদ্ধারিতো’’তি ৰত্তব্বত্তা ‘‘তণ্হায চ পনা’’তিআদি ৰুত্তং. দসন্নং রূপাযতনানং তণ্হায পদট্ঠানত্তা দস রূপানি আযতনানি নিদ্ধারিতানি. অযং ৰুত্তপ্পকারা ওতরণা আযতনেহি ওতরণা নাম. সুত্তে আগতা পটিচ্চসমুপ্পাদাদযো তেন সংৰণ্ণনাৰিসেসেন নযেন নিদ্ধারিতা, সুত্তত্থমুখেন ৰা নিদ্ধারিতা, তেন…পে… নযেন নিদ্ধারিতেসু পটিচ্চসমুপ্পাদাদীসু যো সংৰণ্ণনানযৰিসেসো তদত্থৰাচকৰসেন ৰা তদত্থঞাপকৰসেন ৰা ওতরতি পৰিসতি সমোসরতি, সো সংৰণ্ণনানযৰিসেসো ওতরণো হারো নামাতি অধিপ্পাযো দট্ঠব্বো. সেসেসুপি ৰুত্তনযানুসারেন ওতরণা গহেতব্বা. ‘‘তেনাহ আযস্মা’’তিআদ্যানুসন্ধ্যাদিঅত্থো চেৰ ‘‘নিযুত্তো ওতরণো হারো’’তি অনুসন্ধ্যাদিঅত্থো চ ৰুত্তনযানুসারেন ৰেদিতব্বো.

ইতি ওতরণহারৰিভঙ্গে সত্তিবলানুরূপা রচিতা

ৰিভাৰনা নিট্ঠিতা.

পণ্ডিতেহি পন অট্ঠকথাটীকানুসারেন গম্ভীরত্থো ৰিত্থারতো ৰিভজিত্ৰা গহেতব্বোতি.