১২. লোহিচ্চসুত্তৰণ্ণনা

লোহিচ্চব্রাহ্মণৰত্থুৰণ্ণনা

৫০১. এৰং কেৰট্টসুত্তং সংৰণ্ণেত্ৰা ইদানি লোহিচ্চসুত্তং সংৰণ্ণেন্তো যথানুপুব্বং সংৰণ্ণনোকাসস্স পত্তভাৰং ৰিভাৰেতুং, কেৰট্টসুত্তস্সানন্তরং সঙ্গীতস্স সুত্তস্স লোহিচ্চসুত্তভাৰং ৰা পকাসেতুং ‘‘এৰং মে সুতং…পে… কোসলেসূতি লোহিচ্চসুত্ত’’ন্তি আহ. সালৰতিকাতি কারণমন্তরেন ইত্থিলিঙ্গৰসেন তস্স গামস্স নামং. গামণিকাভাৰেনাতি কেচি. ৰতিযাতি কণ্টকসাখাদিৰতিযা. লোহিতো নাম তস্স কুলে পুব্বপুরিসো, তব্বংসৰসেন লোহিতস্স অপচ্চং লোহিচ্চোতি ব্রাহ্মণস্স গোত্ততো আগতনামং.

৫০২. ‘‘কিঞ্হি পরো পরস্স করিস্সতী’’তি পরানুকম্পা ৰিরহিতত্তা লামকং. ন তু উচ্ছেদসস্সতানং অঞ্ঞতরস্সাতি আহ ‘‘ন পনা’’তিআদি. দিট্ঠিগতন্তি হি লদ্ধিমত্তং অধিপ্পেতং, অঞ্ঞথা উচ্ছেদসস্সতগ্গাহৰিনিমুত্তো কোচি দিট্ঠিগ্গাহো নাম নত্থীতি তেসমঞ্ঞতরং সিযা. ‘‘উপ্পন্নং হোতী’’তি ইদং মনসি, ৰচসি চ উপ্পন্নতাসাধারণৰচনন্তি দস্সেতি ‘‘ন কেৰলঞ্চা’’তিআদিনা. সো কির…পে… ভাসতিযেৰাতি চ তস্সা লদ্ধিযা লোকে পাকটভাৰং ৰদতি. যস্মা পন অত্ততো অঞ্ঞো পরো হোতি, তস্মা যথা অনুসাসকতো অনুসাসিতব্বো পরো, এৰং অনুসাসিতব্বতোপি অনুসাসকোতি দস্সেতুং ‘‘পরো’’তিআদি ৰুত্তং. কিং-সদ্দাপেক্খায চেত্থ ‘‘করিস্সতী’’তি অনাগতকালৰচনং, অনাগতেপি ৰা তেন তস্স কাতব্বং নত্থীতি দস্সনত্থং. কুসলং ধম্মন্তি অনৰজ্জধম্মং নিক্কিলেসধম্মং, ৰিমোক্খধম্মন্তি অত্থো. ‘‘পরেসং ধম্মং কথেস্সামী’’তি তেহি অত্তানং পরিৰারাপেত্ৰা ৰিচরণং কিমত্থিযং, আসযৰুদ্ধস্সপি অনুরোধেন ৰিনা তং ন হোতি, তস্মা অত্তনা…পে… ৰিহাতব্বন্তি ৰদতি. তেনাহ ‘‘এৰংসম্পদমিদং পাপকং লোভধম্মং ৰদামী’’তি.

৫০৪. ‘‘ইত্থিলিঙ্গৰসেনা’’তি ইমিনা পুল্লিঙ্গিকস্সপি অত্থস্স ইত্থিলিঙ্গসমঞ্ঞাতি দস্সেতি. সোতি লোহিচ্চব্রাহ্মণো. ভারোতি ভগৰতো পরিসবাহুল্লত্তা, অত্তনো চ বহুকিচ্চকরণীযত্তা গরু দুক্করং.

৫০৮. কথাফাসুকত্থন্তি কথাসুখত্থং, সুখেন কথং কথেতুঞ্চেৰ সোতুঞ্চাতি অত্থো. অযং উপাসকোতি রোসিকন্হাপিতং আহ. অপ্পেৰ নাম সিযাতি এত্থ পীতিৰসেন আমেডিতং দট্ঠব্বং. তথা হি তং ‘‘বুদ্ধগজ্জিত’’ন্তি ৰুচ্চতি. ভগৰা হি ঈদিসেসু ঠানেসু ৰিসেসতো পীতিসোমনস্সজাতো হোতি, তস্মা পীতিৰসেন পঠমং গজ্জতি, দুতিযম্পি অনুগজ্জতি. কিং ৰিসেসং গজ্জনমনুগজ্জনন্তি ৰুত্তং ‘‘অয’’ন্তিআদি. আদো ভাসনং অল্লাপো, সঞ্ঞোগে পরে রস্সো. তদুত্তরি সহ ভাসনং সল্লাপো.

লোহিচ্চব্রাহ্মণানুযোগৰণ্ণনা

৫০৯. সমুদযসঞ্জাতীতি আযুপ্পাদোতি আহ ‘‘ভোগুপ্পাদো’’তি. ততোতি সালৰতিকায. লাভন্তরাযকরোতি ধনধঞ্ঞলাভস্স অন্তরাযকরো. অনুপুব্বো কপি-সদ্দো আকঙ্খনত্থোতি দস্সেতি ‘‘ইচ্ছতী’’তি ইমিনা. অযং অট্ঠকথাতো অপরো নযো – সাতিসযেন হিতেন অনুকম্পকো অনুগ্গণ্হনকো হিতানুকম্পীতি. সম্পজ্জতীতি আসেৰনলাভেন নিপ্পজ্জতি, বলৰতী হোতি অৰগ্গহাতি অত্থো. তেন ৰুত্তং ‘‘নিযতা হোতী’’তি.

৫১০-৫১১. দুতিযং উপপত্তিন্তি ‘‘ননু রাজা পসেনদিকোসলো’’তিআদিনা ৰুত্তং দুতিযং উপপত্তিং ঠানং যুত্তিং. কারণঞ্হি ভগৰা উপমামুখেন দস্সেতি, ইমায চ উপপত্তিযা তুম্হে চেৰ অঞ্ঞে চাতি লোহিচ্চম্পি অন্তোকত্ৰা সংৰেজনং কতং হোতি. যে চ ইমে কুলপুত্তা দিব্বা গব্ভা পরিপাচেন্তীতি যোজনা. উপনিস্সযসম্পত্তিযা, ঞাণপরিপাকস্স ৰা অভাৰেন অসক্কোন্তা. কম্মপদেন অতুল্যাধিকরণত্তা পরিপাচেন্তি কিরিযায ৰিভত্তিৰিপল্লাসেন উপযোগত্থে পচ্চত্তৰচনং. যে পন ‘‘পরিপচ্চন্তী’’তি কম্মরূপেন পঠন্তি, তেসং মতে ৰিভত্তিৰিপল্লাসেন পযোজনং নত্থি কম্মকত্তুভাৰতো, অত্থো পনস্স দুতিযৰিকপ্পে ৰুত্তনযেন দানাদিপুঞ্ঞৰিসেসো ৰেদিতব্বো. অহিতানুকম্পাদিতা চ তস্স তংসমঙ্গীসত্তৰসেন হোতি. দিৰি ভৰাতি দিব্বা. গব্ভেন্তি পরিপচ্চনৰসেন অত্তনি পবন্ধেন্তীতি গব্ভা, দেৰলোকা. ‘‘ছন্নং দেৰলোকান’’ন্তি নিদস্সনৰচনমেতং. ব্রহ্মলোকস্সাপি হি দিব্বগব্ভভাৰো লব্ভতেৰ দিব্বৰিহারহেতুকত্তা. এৰঞ্চ কত্ৰা ‘‘ভাৰনং ভাৰযমানা’’তি ইদম্পি ৰচনং সমত্থিতং হোতি. ‘‘দেৰলোকগামিনিং পটিপদং পূরযমানা’’তি ৰত্ৰা তং পটিপদং সরূপতো দস্সেতুং ‘‘দানং দদমানা’’তিআদি ৰুত্তং. ভৰন্তি এত্থ যথারুচি সুখসমপ্পিতাতি ভৰা, ৰিমানানি. দেৰভাৰাৰহত্তা দিব্বা. ৰুত্তনযেনেৰ গব্ভা.দানাদযো দেৰলোকসংৰত্তনিক পুঞ্ঞৰিসেসা. দিব্বা ভৰাতি ইধ দেৰলোকপরিযাপন্না উপপত্তিভৰা অধিপ্পেতা. তদাৰহো হি কম্মভৰো পুব্বে গহিতোতি আহ ‘‘দেৰলোকে ৰিপাকক্খন্ধা’’তি.

তযোচোদনারহৰণ্ণনা

৫১৩. অনিযামিতেনেৰাতি অনিযমিতেনেৰ, ‘‘ত্ৰং এৰং দিট্ঠিকো, এৰং সত্তানং অনত্থস্স কারকো’’তি এৰং অনুদ্দেসিকেনেৰ. সব্বলোকপত্থটায লদ্ধিযা সমুপ্পজ্জনতো যাৰ ভৰগ্গা উগ্গতং. মানন্তি ‘‘অহমেতং জানামি, অহমেতং পস্সামী’’তি এৰং পৰত্তং পণ্ডিতমানং. ভিন্দিত্ৰাতি ৰিধমেত্ৰা, জহাপেত্ৰাতি অত্থো. তযো সত্থারেতি অসম্পাদিতঅত্তহিতো অনোৰাদকরসাৰকো চ অসম্পাদিতঅত্তহিতো ওৰাদকরসাৰকো চ সম্পাদিতঅত্তহিতো অনোৰাদকরসাৰকো চেতি ইমে তযো সত্থারে. চতুত্থো পন সম্মাসম্বুদ্ধো ন চোদনারহো, তস্মা ‘‘তং তেন পুচ্ছিতো এৰ কথেস্সামী’’তি চোদনারহেৰ তযো সত্থারে পঠমং দস্সেতি, পচ্ছা চতুত্থং সত্থারং. কামঞ্চেত্থ চতুত্থো সত্থা একো অদুতিযো অনঞ্ঞসাধারণো, তথাপি সো যেসং উত্তরিমনুস্সধম্মানং ৰসেন ‘‘ধম্মমযো কাযো’’তি ৰুচ্চতি, তেসং সমুদাযভূতোপি তে গুণাৰযৰে সত্থুট্ঠানিযে কত্ৰা দস্সেন্তো ভগৰা ‘‘অযম্পি খো লোহিচ্চ সত্থা’’তি অভাসি.

অঞ্ঞাতি য-কারলোপনিদ্দেসো ‘‘সযং অভিঞ্ঞা’’তিআদীসু (দী. নি. ১.২৮, ৩৭; ম. নি. ১.১৫৪, ৪৪৪) ৰিয, তদত্থে চেতং সম্পদানৰচনন্তি দস্সেতি ‘‘অঞ্ঞাযা’’তিআদিনা. সাৰকত্তং পটিজানিত্ৰা ঠিতত্তা একদেসেনস্স সাসনং করোন্তীতি আহ ‘‘নিরন্তরং তস্স সাসনং অকত্ৰা’’তি. উক্কমিত্ৰা উক্কমিত্ৰাতি কদাচি তথা করণং, কদাচি তথা অকরণঞ্চ সন্ধায ৰিচ্ছাৰচনং, যদিচ্ছিতং করোন্তীতি অধিপ্পাযো. পটিক্কমন্তিযাতি অনভিরতিযা অগারৰেন অপগচ্ছন্তিযা. তেন ৰুত্তং ‘‘অনিচ্ছন্তিযা’’তিআদি. একাযাতি অদুতিযায ইত্থিযা, সম্পযোগন্তি মেথুনধম্মসমাযোগং. একো ইচ্ছেয্যাতি অদুতিযো পুরিসো সম্পযোগং ইচ্ছেয্যাতি আনেত্ৰা সম্বন্ধো. ওসক্কনাদিমুখেন ইত্থিপুরিসসম্বন্ধনিদস্সনং গেহস্সিতাগেহস্সিতঅপেক্খৰসেন তস্স সত্থুনো সাৰকেসু পটিপত্তিদস্সনত্থং. অতিৰিরত্তভাৰতো দট্ঠুম্পি অনিচ্ছমানং পরম্মুখিং ঠিতং ইত্থিং. লোভেনাতি পরিৰারং নিস্সায উপ্পজ্জনকলাভসক্কারলোভেন. ঈদিসোতি এৰংসভাৰো সত্থা. যেনাতি লোভধম্মেন. তত্থ সম্পাদেহীতি তস্মিং পটিপত্তিধম্মে পতিট্ঠিতং কত্ৰা সম্পাদেহি. কাযৰঙ্কাদিৰিগমেন উজুং করোহি.

৫১৪. সস্সরূপকানি তিণানীতি সস্সসদিসানি নীৰারাদিতিণানি.

৫১৫. এৰং চোদনং অরহতীতি ৰুত্তনযেন সাৰকেসু অপ্পোস্সুক্কভাৰাপাদনে নিযোজনৰসেন চোদনং অরহতি, ন পঠমো ৰিয ‘‘এৰরূপো তৰ লোভধম্মো’’তিআদিনা, ন চ দুতিযো ৰিয ‘‘অত্তানমেৰ তাৰ তত্থ সম্পাদেহী’’তিআদিনা. কস্মা? সম্পাদিতঅত্তহিততায ততিযস্স.

নচোদনারহসত্থুৰণ্ণনা

৫১৬. ন চোদনারহোতি এত্থ যস্মা চোদনারহতা নাম সত্থুৰিপ্পটিপত্তিযা ৰা সাৰকৰিপ্পটিপত্তিযা ৰা উভযৰিপ্পটিপত্তিযা ৰা হোতি, তযিদং সব্বম্পি ইমস্মিং সত্থরি নত্থি, তস্মা ন চোদনারহোতি ইমমত্থং দস্সেতুং ‘‘অযঞ্হী’’তিআদি ৰুত্তং. অস্সৰাতি পটিস্সৰা.

৫১৭. মযা গহিতায দিট্ঠিযাতি সব্বসো অনৰজ্জে অনুপৰজ্জে সম্মাপটিপন্নে, পরেসঞ্চ সম্মদেৰ সম্মাপটিপত্তিং দস্সেন্তে সত্থরি অভূতদোসারোপনৰসেন মিচ্ছাগহিতায নিরযগামিনিযা পাপদিট্ঠিযা. নরকপপাতন্তি নরকসঙ্খাতং মহাপপাতং. পপতন্তি এত্থাতি হি পপাতো. ধম্মদেসনাহত্থেনাতি ধম্মদেসনাসঙ্খাতেন হত্থেন. সগ্গমগ্গথলেতি সগ্গগামিমগ্গভূতে পুঞ্ঞধম্মথলে, চাতুমহারাজিকাদিসগ্গসোতাপত্তিআদিমগ্গসঙ্খাতে ৰা থলে. সেসং সুৰিঞ্ঞেয্যমেৰ.

ইতি সুমঙ্গলৰিলাসিনিযা দীঘনিকাযট্ঠকথায পরমসুখুমগম্ভীরদুরনুবোধত্থপরিদীপনায সুৰিমলৰিপুলপঞ্ঞাৰেয্যত্তিযজননায সাধুৰিলাসিনিযা নাম লীনত্থপকাসনিযা লোহিচ্চসুত্তৰণ্ণনায লীনত্থপকাসনা.

লোহিচ্চসুত্তৰণ্ণনা নিট্ঠিতা.