১০. সুভসুত্তৰণ্ণনা

সুভমাণৰকৰত্থুৰণ্ণনা

৪৪৪. এৰং পোট্ঠপাদসুত্তং সংৰণ্ণেত্ৰা ইদানি সুভসুত্তং সংৰণ্ণেন্তো যথানুপুব্বং সংৰণ্ণনোকাসস্স পত্তভাৰং ৰিভাৰেতুং, পোট্ঠপাদসুত্তস্সানন্তরং সঙ্গীতস্স সুত্তস্স সুভসুত্তভাৰং ৰা পকাসেতুং ‘‘এৰং মে সুতং…পে… সাৰত্থিযন্তি সুভসুত্ত’’ন্তি আহ. অনুনাসিকলোপেন ‘‘অচির পরিনিব্বুতে’’তি ৰুত্তন্তি দস্সেতি ‘‘অচিরং পরিনিব্বুতে’’তি ইমিনা যথা পোট্ঠপাদসুত্তে ‘‘অপ্পাটিহীরক তং ভাসিতং সম্পজ্জতী’’তি, অচিরং পরিনিব্বুতস্স অস্সাতি ৰা অচিরপরিনিব্বুতো যথা ‘‘অচিরপক্কন্তো, মাসজাতো’’তি. অত্থমত্তং পন দস্সেতুং এৰং ৰুত্তং. অচিরপরিনিব্বুতেতি চ সত্থু পরিনিব্বুতভাৰস্স চিরকালতাপটিক্খেপেন আসন্নতামত্তং দস্সিতং, কালপরিচ্ছেদো পন ন দস্সিতোতি তং দস্সেন্তো ‘‘পরিনিব্বানতো’’তিআদিমাহ. ৰিসাখপুণ্ণমিতো উদ্ধং যাৰ জেট্ঠপুণ্ণমী, তাৰ কালং সন্ধায ‘‘মাসমত্তে’’তি ৰুত্তং. মত্তসদ্দেন পন তস্স কালস্স কিঞ্চি অসম্পুণ্ণতং জোতেতি. তুদিসঞ্ঞিতো গামো নিৰাসো এতস্সাতি তোদেয্যো. তং পনেস যস্মা সোণদণ্ডো (দী. নি. ১.৩০০) ৰিয চম্পং, কূটদন্তো (দী. নি. ১.৩২৩) ৰিয চ খাণুমতং অজ্ঝাৰসতি, তস্মা ৰুত্তং ‘‘তস্স অধিপতিত্তা’’তি, ইস্সরভাৰতোতি অত্থো. অযম্পি হি রঞ্ঞো পসেনদিকোসলস্স পুরোহিতব্রাহ্মণো. পুত্তম্পি আহাতি সুভং মাণৰম্পি ওৰদন্তো আহ.

অঞ্জনানন্তি অক্খিঅঞ্জনত্থায ঘংসিতঅঞ্জনানং. ৰম্মিকানন্তি কিমিসমাহটৰম্মিকানং সঞ্চযং দিস্ৰাতি সম্বন্ধো. মধূনন্তি মক্খিকমধূনং. সমাহারন্তি মকরন্দসন্নিচযং. পণ্ডিতো ঘরমাৰসেতি যস্মা অপ্পতরপ্পতরেপি গয্হমানে ভোগা খীযন্তি, অপ্পতরপ্পতরেপি চ সঞ্চিযমানে ৰড্ঢন্তি, তস্মা যথাৰুত্তমুপমত্তযং পঞ্ঞায দিস্ৰা ৰিঞ্ঞুজাতিকো কিঞ্চিপি ৰযমকত্ৰা আযমেৰ উপ্পাদেন্তো ঘরেৰসে ঘরাৰাসমনুতিট্ঠেয্যাতি লোভাদেসিতপটিপত্তিং উপদিসতি.

অদানমেৰ সিক্খাপেত্ৰা সিক্খাপনহেতু লোভাভিভূততায তস্মিংযেৰ ঘরে সুনখো হুত্ৰা নিব্বত্তি. লোভৰসিকস্স হি দুগ্গতি পাটিকঙ্খা, ‘‘জনৰসভো নাম যক্খো হুত্ৰা নিব্বত্তী’’তি (দী. নি. অট্ঠ. ১.১৫০) এত্থ ৰুত্তনযেন অত্থো ৰেদিতব্বো. পুব্বপরিচযেন অতিৰিয পিযাযতি. ৰুত্তঞ্হি ‘‘পুব্বেৰ সন্নিৰাসেনা’’তিআদি (জা. ১.২.১৭৪). নিক্খন্তেতি কেনচিদেৰ করণীযেন বহি নিগ্গতে. সুভং মাণৰং অনুগ্গণ্হিতুকামো এককোৰ ভগৰা পিণ্ডায পাৰিসি. ভুক্কারন্তি ‘‘ভু ভূ’’তি সুনখসদ্দকরণং. ‘‘ভো ভো’’তি ব্রাহ্মণসমুদাচারেন পরিভৰিত্ৰা পরিভৰনহেতু. ‘‘ভোৰাদি নাম সো হোতি, সচে হোতি সকিঞ্চনো’’তি (ধ. প. ৩৯৬; সু. নি. ৬২৫) হি ৰুত্তং. ননু চ হেট্ঠা ‘‘অদানমেৰ সিক্খাপেত্ৰা সুনখো হুত্ৰা নিব্বত্তো’’তি আহ, কস্মা পনেত্থ ‘‘পুব্বেপি মং ‘ভো ভো’তি পরিভৰিত্ৰা সুনখো জাতো’’তি ৰদতীতি? তথা নিব্বত্তিযা তদুভযসাধারণফলত্তা. আনিসংসফলঞ্হি সাধারণকম্মেনপি জাতং, ন ৰিপাকফলং ৰিয এককম্মেনেৰাতি দট্ঠব্বং. অৰীচিং গমিস্সসি কতোকাসস্স কম্মস্স পটিবাহিতুমসক্কুণেয্যভাৰতো. ‘‘জানাতি মং সমণো গোতমো’’তি ৰিপ্পটিসারী হুত্ৰা. উদ্ধনন্তরেতি চুল্লিকন্তরে. নন্তি সুনখং.

তং পৰত্তিন্তি ভগৰতা যথাৰুত্তকারণং. ব্রাহ্মণচারিত্তস্স অপরিহাপিততং সন্ধায, তথা পিতরং উক্কংসেন্তো ‘‘ব্রহ্মলোকে নিব্বত্তো’’তি আহ. মুখারুল়্হন্তি সযংপটিভানৰসেন মুখমারুল়্হং. তং পৰত্তিং পুচ্ছীতি ‘‘সুতমেতং ভো গোতম ময্হং পিতা সুনখো হুত্ৰা নিব্বত্তো’’তি তুম্হেহি ৰুত্তং, ‘‘কিমিদং সচ্চং ৰা অসচ্চং ৰা’’তি পুচ্ছি. তথেৰ ৰত্ৰাতি যথা পুব্বে সুনখস্স ৰুত্তং, তথেৰ ৰত্ৰা. অৰিসংৰাদনত্থন্তি সচ্চাপনত্থং, ‘‘তোদেয্যব্রাহ্মণো সুনখো হুত্ৰা নিব্বত্তো’’তি ৰচনস্স অৰিসংৰাদনেন অত্তনো অৰিসংৰাদিভাৰদস্সনত্থন্তি ৰুত্তং হোতি. অপ্পোদকন্তি অপ্পকেন উদকেন সম্পাদিতং. মধুপাযাসন্তি সাদুরসং, মধুযোজিতং ৰা পাযাসং. তথা অকাসি, যথা ভগৰতা ৰুত্তং. ‘‘সব্বং দস্সেসীতি বুদ্ধানুভাৰেন সো সুনখো তং সব্বং নেত্ৰা দস্সেসি, ন জাতিস্সরতায. ভগৰন্তং দিস্ৰা ভুক্করণং পন পুরিমজাতিসিদ্ধৰাসনাৰসেনা’’তি (দী. নি. টী. ১.৪৪৪) এৰং আচরিযেন ৰুত্তং. উপরিপণ্ণাসকে পন চূল়কম্মৰিভঙ্গসুত্তট্ঠকথাযং ‘‘সুনখো ‘ঞাতোম্হি ইমিনা’তি রোদিত্ৰা ‘হুং হু’ন্তি করোন্তো ধননিধানট্ঠানং গন্ত্ৰা পাদেন পথৰিং খণিত্ৰা সঞ্ঞং অদাসী’’তি (ম. নি. অট্ঠ. ৩.২৮৯) জাতিস্সরাকারমাহ, ৰীমংসিত্ৰা গহেতব্বং.

‘‘ভৰপটিচ্ছন্নং নাম এৰরূপং সুনখপটিসন্ধিঅন্তরং পাকটং সমণস্স গোতমস্স, অদ্ধা এস সব্বঞ্ঞূ’’তি ভগৰতি পসন্নচিত্তো. অঙ্গৰিজ্জাপাঠকো কিরেস. তেনস্স এতদহোসি ‘‘ইমং ধম্মপণ্ণাকারং কত্ৰা সমণং গোতমং পঞ্হং পুচ্ছিস্সামী’’তি, ততো সো চুদ্দস পঞ্হে অভিসঙ্খরিত্ৰা ভগৰন্তং পুচ্ছি. তেন ৰুত্তং ‘‘চুদ্দস পঞ্হে পুচ্ছিত্ৰা’’তি. তত্থ চুদ্দস পঞ্হেতি ‘‘দিস্সন্তি হি ভো গোতম মনুস্সা অপ্পাযুকা, দিস্সন্তি দীঘাযুকা. দিস্সন্তি বৰ্হাবাধা, অপ্পাবাধা. দুব্বণ্ণা, ৰণ্ণৰন্তো. অপ্পেসক্খা, মহেসক্খা. অপ্পভোগা, মহাভোগা. নীচকুলীনা, উচ্চাকুলীনা. দিস্সন্তি দুপ্পঞ্ঞা, দিস্সন্তি পঞ্ঞৰন্তো. কো নু খো ভো গোতম হেতু কো পচ্চযো, যেন মনুস্সানংযেৰ সতং মনুস্সভূতানং দিস্সন্তি হীনপণীততা’’তি (ম. নি. ৩.২৮৯) ইমে চূল়কম্মৰিভঙ্গসুত্তে আগতে চুদ্দস পঞ্হে. ‘‘কম্মস্সকা মাণৰ সত্তা কম্মদাযাদা’’তিআদিনা (ম. নি. ৩.২৮৯) সঙ্খেপতো, ৰিত্থারতো চ ৰিস্সজ্জনপরিযোসানে ভগৰন্তং সরণং গতো. অঙ্গসুভতায ‘‘সুভো’’ তিস্স নামং. মাণৰোতি পন মহল্লককালেপি তরুণৰোহারেন নং ৰোহরতি. অত্তনো ভোগগামতোতি তুদিগামতো আগন্ত্ৰা তঙ্খণিকং ৰসতি. তেনেৰ পাল়িযং ‘‘কেনচিদেৰ করণীযেনা’’তি ৰুত্তং.

৪৪৫. ‘‘একা চ মে কঙ্খা অত্থী’’তি ইমিনা উপরি পুচ্ছিযমানস্স পঞ্হস্স পগেৰ তেন অভিসঙ্খতভাৰং দস্সেতি. মাণৰকন্তি খুদ্দকমাণৰং ‘‘একপুত্তকো, (ম. নি. ২.২৯৬, ৩৫৩; পারা. ২৬) পিযপুত্তকো’’তিআদীসু ৰিয ক-সদ্দস্স খুদ্দকত্থে পৰত্তনতো. ৰিসভাগৰেদনাতি দুক্খৰেদনা. সা হি কুসলকম্মনিব্বত্তে অত্তভাৰে উপ্পজ্জনকসুখৰেদনাপটিপক্খভাৰতো ‘‘ৰিসভাগৰেদনা’’তি চ কাযং গাল়্হা হুত্ৰা বাধনতো পীল়নতো ‘‘আবাধো’’তি চ ৰুচ্চতি. কীদিসা পন সাতি আহ ‘‘যা একদেসে’’তিআদি. একদেসে উপ্পজ্জিত্ৰাতি সরীরেকদেসে উট্ঠহিত্ৰাপি অপরিৰত্তিভাৰকরণতো অযপট্টেন আবন্ধিত্ৰা ৰিয গণ্হাতি, ইমিনা বলৰরোগো আবাধো নামাতি দস্সেতি. কিচ্ছজীৰিতকরোতি অসুখজীৰিতাৰহো, ইমিনা দুব্বলো অপ্পমত্তকো রোগো আতঙ্কো নামাতি দস্সেতি. উট্ঠানন্তি সযননিসজ্জাদিতো উট্ঠহনং, তেন যথা তথা অপরাপরং সরীরস্স পরিৰত্তনং ৰদতি. গরুকন্তি ভারিযং অকিচ্চসিদ্ধিকং. গিলানস্সেৰ কাযে বলং ন হোতীতি সম্বন্ধো. লহুট্ঠানেন চেত্থ গেলঞ্ঞাভাৰো পুচ্ছিতো. হেট্ঠা চতূহি পদেহি অফাসুৰিহারাভাৰং পুচ্ছিত্ৰাপি ইদানি পুন ফাসুৰিহারভাৰং পুচ্ছতি, তেন সৰিসেসো এত্থ ফাসুৰিহারো পুচ্ছিতোতি ৰিঞ্ঞাযতি. অসতিপি হি অতিসযত্থজোতনে সদ্দে অত্থাপত্তিতো অতিসযত্থো লব্ভতেৰ যথা ‘‘অভিরূপস্স কঞ্ঞা দাতব্বা’’তি. তেনাহ ‘‘গমনট্ঠানা’’তিআদি. পুরিমং আণাপনৰচনং, ইদং পন পুচ্ছিতব্বাকারদস্সনন্তি অযমিমেসং ৰিসেসোতি দস্সেতি ‘‘অথস্সা’’তিআদিনা.

৪৪৭. কালো নাম উপসঙ্কমনস্স যুত্তপত্তকালো, সমযো নাম তস্সেৰ পচ্চযসামগ্গী, অত্থতো পনেস তজ্জং সরীরবলঞ্চেৰ তপ্পচ্চযপরিস্সযাভাৰো চ. উপাদানং নাম ঞাণেন তেসং গহণং সল্লক্খণন্তি আহ ‘‘পঞ্ঞাযা’’তিআদি. ‘‘স্ৰে গমনকালো ভৰিস্সতী’’তি ইমিনা কালং, ‘‘কাযে’’তিআদিনা সমযঞ্চ সরূপতো দস্সেতি. ফরিস্সতীতি ফরণৰসেন ঠস্সতি.

৪৪৮. চেতিযরট্ঠেতি চেতিরট্ঠে. য-কারেন হি পদং ৰড্ঢেত্ৰা এৰং ৰুত্তং. ‘‘চেতিরট্ঠতো অঞ্ঞং ৰিসুংযেৰেকং রট্ঠ’’ন্তিপি ৰদন্তি. ‘‘যস্মা মরণং নাম তাদিসানং দসবলানং রোগৰসেনেৰ হোতি, তস্মা যেন রোগেন তং জাতং, তস্স সরূপপুচ্ছা, কারণপুচ্ছা, মরণহেতুকচিত্তসন্তাপপুচ্ছা, তস্স চ সন্তাপস্স সব্বলোকসাধারণতা, তথা মরণস্স চ অপ্পটিকরণতা’’তি এৰমাদিনা মরণপটিসঞ্ঞুত্তং সম্মোদনীযং কথং কথেসীতি দস্সেতুং ‘‘ভো আনন্দা’’তিআদি ৰুত্তং. ‘‘কো নামা’’তিআদিনা হি রোগং পুচ্ছতি, ‘‘কিং ভগৰা পরিভুঞ্জী’’তি ইমিনা কারণং, ‘‘অপিচা’’তিআদিনা চিত্তসন্তাপং, ‘‘সত্থা নামা’’তিআদিনা তস্স সব্বলোকসাধারণতং, ‘‘একা দানী’’তিআদিনা মরণস্স অপ্পটিকরণতং দস্সেতীতি দট্ঠব্বং. মহাজানীতি মহাহানি. যত্রাতি যেন কারণেন পরিনিব্বুতো, তেন কো দানি অঞ্ঞো মরণা মুচ্চিস্সতীতিআদিনা যোজেতব্বং. ইদানীতি চ অত্তনো মনসিকারং পতি ৰোহারমত্তেন ৰুত্তং. লজ্জিস্সতীতি লজ্জা ৰিয ভৰিস্সতি, ৰিজ্জিস্সতীতি অত্থো. পীতভেসজ্জানুরূপং আহারভোজনং পোরাণাচিণ্ণন্তি আহ ‘‘পীত…পে… দত্ৰা’’তি.

হুত্ৰাতি পাঠসেসো সন্তিকাৰচরভাৰস্স ৰিসেসনতো. মারো পাপিমা ৰিয ন রন্ধগৰেসী, উত্তরমাণৰো ৰিয চ ন ৰীমংসনাধিপ্পাযো, অপি তু খলু উপট্ঠাকো হুত্ৰা সন্তিকাৰচরোতি হি ৰিসেসেতি. ন রন্ধগৰেসীতি ন ছিদ্দগৰেসী. যেসু ধম্মেসূতি ৰিমোক্খুপাযেসু নিয্যানিকধম্মেসু. ধরন্তীতি অধুনা তিট্ঠন্তি, পৰত্তন্তীতি অত্থো.

৪৪৯. অত্থতো পযুত্ততায সদ্দপযোগস্স সদ্দপবন্ধলক্খণানি তীণি পিটকানি তদত্থভূতেহি সীলাদীহি তীহি ধম্মক্খন্ধেহি সঙ্গয্হন্তীতি ৰুত্তং ‘‘তীণি পিটকানি তীহি খন্ধেহি সঙ্গহেত্ৰা’’তি. সঙ্খিত্তেন কথিতন্তি ‘‘তিণ্ণং খো মাণৰ খন্ধান’’ন্তি এৰং গণনতো, সামঞ্ঞতো চ সঙ্খেপেনেৰ কথিতং. ‘‘কতমেসং তিণ্ণ’’ন্তি অযং অদিট্ঠজোতনাপুচ্ছাযেৰ, ন কথেতুকম্যতাপুচ্ছা. মাণৰস্সেৰ হি অযং পুচ্ছা, ন থেরস্সাতি আহ ‘‘মাণৰো’’তিআদি. অঞ্ঞত্থ পন ঈদিসেসু ঠানেসু কথেতুকম্যতাপুচ্ছাযেৰ দিস্সতি, ন অদিট্ঠজোতনাপুচ্ছা. ইধ পন অট্ঠকথাযং এৰং ৰুত্তং, তদেতং অট্ঠকথাপমাণতো পচ্চেতব্বং. তদা পৰত্তমানঞ্হি পচ্চক্খং কত্ৰা অট্ঠকথম্পি সঙ্গহমারোপিংসু. কথেতুকম্যতাপুচ্ছাভাৰে পনস্স থেরস্সেৰ ৰচনতা সিযা.

সীলক্খন্ধৰণ্ণনা

৪৫০-৪৫৩. সীলক্খন্ধস্সাতি এত্থ পদত্থৰিপল্লাসকারী ইতিসদ্দো লুত্তো, অত্থনিদ্দেসো ৰিয সদ্দনিদ্দেসো ৰা, যথারুতো চ ইতিসদ্দো আদ্যত্থো, পকারত্থো ৰা, তেন ‘‘অরিযস্স সমাধিক্খন্ধস্স…পে… পতিট্ঠপেসী’’তি অযং পাঠো গহিতোতি দট্ঠব্বং. তেন ৰুত্তং ‘‘তেসু দস্সিতেসূ’’তি, তেসু তীসু খন্ধেসু উদ্দেসৰসেন দস্সিতেসূতি অত্থো. ভগৰতা ৰুত্তনযেনেৰাতি সামঞ্ঞফলাদীসু (দী. নি. ১.১৯৪) দেসিতনযেনেৰ, তেন ইমস্স সুত্তস্স বুদ্ধভাসিতভাৰং দস্সেতীতি ৰেদিতব্বং. সাসনে ন সীলমেৰ সারোতি অরিযমগ্গসারে ভগৰতো সাসনে যথাদস্সিতং সীলং সারো এৰ ন হোতি সারৰতো মহতো রুক্খস্স পপটিকট্ঠানিকত্তা. অট্ঠানপযুত্তো হি এৰসদ্দো যথাঠানে ন যোজেতব্বো. যজ্জেৰং কস্মা তমিধ গহিতন্তি আহ ‘‘কেৰল’’ন্তিআদি. ঝানাদিউত্তরিমনুস্সধম্মে অধিগন্তুকামস্স অধিট্ঠানমত্তং তত্থ অপ্পতিট্ঠিতস্স তেসমসম্ভৰতো. ৰুত্তঞ্হি ‘‘সীলে পতিট্ঠায নরো সপঞ্ঞো’’তিআদি (সং. নি. ১.২৩, ১৯২; পেটকো. ২২) অথ ৰা সাসনে ন সীলমেৰ সারোতি কামঞ্চেত্থ সাসনে মগ্গফলসীলসঙ্খাতং লোকুত্তরসীলম্পি সারমেৰ, তথাপি ন সীলক্খন্ধো এৰ সারো হোতি, অথ খো সমাধিক্খন্ধোপি পঞ্ঞাক্খন্ধোপি সারো এৰাতি এৰম্পেত্থ যথাপযুত্তেন এৰসদ্দেন অত্থো ৰেদিতব্বো, পুরিমোযেৰ পনত্থো যুত্ততরো. তথা হি ৰুত্তং ‘‘ইতো উত্তরী’’তিআদি. অঞ্ঞম্পি কত্তব্বন্তি সেসখন্ধদ্ৰযং.

সমাধিক্খন্ধৰণ্ণনা

৪৫৪. কস্মা পনেত্থ থেরো সমাধিক্খন্ধং পুট্ঠোপি ইন্দ্রিযসংৰরাদিকে ৰিস্সজ্জেসি, ননু এৰং সন্তে অঞ্ঞং পুট্ঠো অঞ্ঞং ব্যাকরোন্তো অম্বং পুট্ঠো লবুজং ব্যাকরোন্তো ৰিয হোতীতি ঈদিসী চোদনা ইধ অনোকাসাতি দস্সেন্তো ‘‘কথঞ্চ…পে… আরভী’’তি আহ, তেনেত্থ ইন্দ্রিযসংৰরাদযোপি সমাধিউপকারকতং উপাদায সমাধিক্খন্ধপক্খিকভাৰেন উদ্দিট্ঠাতি দস্সেতি. যে তে ইন্দ্রিযসংৰরাদযোতি সম্বন্ধো. রূপাৰচরচতুত্থজ্ঝানদেসনানন্তরং অভিঞ্ঞাদেসনায অৰসরোতি কত্ৰা রূপজ্ঝানানেৰ আগতানি,ন অরূপজ্ঝানানি. রূপাৰচরচতুত্থজ্ঝানপাদিকা হি সপরিভণ্ডা ছপি অভিঞ্ঞাযো. যস্মা পন লোকিযাভিঞ্ঞাযো ইজ্ঝমানা অট্ঠসু সমাপত্তীসু চুদ্দসৰিধেন চিত্তপরিদমনেন ৰিনা ন ইজ্ঝন্তি, তস্মা অভিঞ্ঞাসু দেসিযমানাসু অরূপজ্ঝানানিপি দেসিতানেৰ হোন্তি নানন্তরিকভাৰতো. তেনাহ ‘‘আনেত্ৰা পন দীপেতব্বানী’’তি, ৰুত্তনযেন দেসিতানেৰ কত্ৰা সংৰণ্ণকেহি পকাসেতব্বানীতি অত্থো. অট্ঠকথাযং পন ‘‘চতুত্থজ্ঝানং উপসম্পজ্জ ৰিহরতী’’তি ইমিনাৰ অরূপজ্ঝানম্পি সঙ্গহিতন্তি দস্সেতুং ‘‘চতুত্থজ্ঝানেন হী’’তিআদি ৰুত্তং. চতুত্থজ্ঝানমেৰ হি রূপৰিরাগভাৰনাৰসেন পৰত্তং ‘‘অরূপজ্ঝান’’ন্তি ৰুচ্চতি.

৪৭১-৪৮০. ন চিত্তেকগ্গতামত্তকেনেৰাতি এত্থ হেট্ঠা ৰুত্তনযানুসারেন ঠানাঠানপযুত্তস্স এৰসদ্দস্সানুরূপমত্থো ৰেদিতব্বো. লোকিযসমাধিক্খন্ধস্স পন অধিপ্পেতত্তা ‘‘ন চিত্তেকগ্গতা…পে… অত্থী’’তি ৰুত্তং. অরিযো সমাধিক্খন্ধোতি এত্থ হি অরিযসদ্দো সুদ্ধমত্তপরিযাযোৰ, ন লোকুত্তরপরিযাযো. যথা চেত্থ, তথা অরিযো সীলক্খন্ধোতি এত্থাপি. ইতোতি পঞ্ঞাক্খন্ধতো, সো চ উক্কট্ঠতো অরহত্তফলপরিযাপন্নো এৰাতি আহ ‘‘অরহত্তপরিযোসান’’ন্তিআদি. লোকিযাভিঞ্ঞাপটিসম্ভিদাহি ৰিনাপি হি অরহত্তে অধিগতে ‘‘নত্থেৰ উত্তরিকরণীয’’ন্তি সক্কা ৰত্তুং যদত্থং ভগৰতি ব্রহ্মচরিযং ৰুস্সতি, তস্স সিদ্ধত্তা. ইধ পন লোকিযাভিঞ্ঞাযোপি আগতাযেৰ. সেসমেত্থ সুৰিঞ্ঞেয্যং.

ইতি সুমঙ্গলৰিলাসিনিযা দীঘনিকাযট্ঠকথায পরমসুখুমগম্ভীরদুরনুবোধত্থপরিদীপনায সুৰিমলৰিপুলপঞ্ঞাৰেয্যত্তিযজননায সাধুৰিলাসিনিযা নাম লীনত্থপকাসনিযা সুভসুত্তৰণ্ণনায লীনত্থপকাসনা.

সুভসুত্তৰণ্ণনা নিট্ঠিতা.