সোধনহারৰণ্ণনা

‘‘মমং ৰা ভিক্খৰে, পরে অৰণ্ণং ভাসেয্যু’’ন্তি আরম্ভো. ‘‘ধম্মস্স ৰা অৰণ্ণং ভাসেয্যুং সঙ্ঘস্স ৰা অৰণ্ণং ভাসেয্যু’’ন্তি পদসুদ্ধি, নো আরম্ভসুদ্ধি. ‘‘তত্র তুম্হেহি ন আঘাতো, ন অপ্পচ্চযো, ন চেতসো অনভিরদ্ধি করণীযা’’তি পদসুদ্ধি চেৰ আরম্ভসুদ্ধি চ. দুতিযনযাদীসুপি এসেৰ নযো, তথা ‘‘অপ্পমত্তকং খো পনেত’’ন্তিআদি আরম্ভো. ‘‘কতম’’ন্তিআদি পুচ্ছা. ‘‘পাণাতিপাতং পহাযা’’তিআদি পদসুদ্ধি, নো আরম্ভসুদ্ধি. নো চ পুচ্ছাসুদ্ধি. ‘‘ইদং খো’’তিআদি পুচ্ছাসুদ্ধি চেৰ পদসুদ্ধি চ, আরম্ভসুদ্ধি.

তথা ‘‘অত্থি ভিক্খৰে’’তিআদি আরম্ভো. ‘‘কতমে চ তে’’তিআদি পুচ্ছা. ‘‘সন্তি ভিক্খৰে’’তিআদি আরম্ভো. ‘‘কিমাগম্মা’’তিআদি আরম্ভপুচ্ছা. ‘‘যথা সমাহিতে’’তিআদি পদসুদ্ধি, নো আরম্ভসুদ্ধি, নো চ পুচ্ছাসুদ্ধি. ‘‘ইমে খো’’তিআদি পদসুদ্ধি চেৰ পুচ্ছাসুদ্ধি চ আরম্ভসুদ্ধি চ. ইমিনা নযেন সব্বত্থ আরম্ভাদযো ৰেদিতব্বা. অযং পদারম্ভানং সোধিতাসোধিতভাৰৰিচারণলক্খণো সোধনহারো নাম, ৰুত্তম্পি চ ‘‘ৰিস্সজ্জিতম্হি পঞ্হে, গাথাযং পুচ্ছিতাযমারব্ভা’’তিআদি (নেত্তি. ৪.১৩).