পঞ্ঞত্তিহারৰণ্ণনা

আঘাতো ৰত্থুৰসেন দসৰিধেন, একূনৰীসতিৰিধেন ৰা পঞ্ঞত্তো. অপচ্চযো উপৰিচারৰসেন ছধা পঞ্ঞত্তো. আনন্দো পীতিআদিৰসেন ৰেৰচনেন নৰধা পঞ্ঞত্তো. পীতি সামঞ্ঞতো পন খুদ্দিকাদিৰসেন পঞ্চধা পঞ্ঞত্তো. সোমনস্সং উপৰিচারৰসেন ছধা, সীলং ৰারিত্তচারিত্তাদিৰসেন অনেকধা, গম্ভীরতাদিৰিসেসযুত্তং ঞাণং চিত্তুপ্পাদৰসেন চতুধা, দ্ৰাদসধা ৰা, ৰিসযভেদতো অনেকধা চ, দিট্ঠিসস্সতাদিৰসেন দ্ৰাসট্ঠিযা ভেদেহি, তদন্তোগধৰিভাগেন অনেকধা চ, ৰেদনা ছধা, অট্ঠসতধা, অনেকধা চ, তস্সা সমুদযো পঞ্চধা, তথা অত্থঙ্গমোপি, অস্সাদো দুৰিধেন, আদীনৰো তিৰিধেন, নিস্সরণং একধা, চতুধা চ, অনুপাদাৰিমুত্তি দুৰিধেন, ‘‘অজানতং অপস্সত’’ন্তি ৰুত্তা অৰিজ্জা ৰিসযভেদেন চতুধা, অট্ঠধা চ, ‘‘তণ্হাগতান’’ন্তিআদিনা ৰুত্তা তণ্হা ছধা, অট্ঠসতধা, অনেকধা চ, ফস্সো নিস্সযৰসেন ছধা, উপাদানং চতুধা, ভৰো দ্ৰিধা, অনেকধা চ, জাতি ৰেৰচনৰসেন ছধা, তথা জরা সত্তধা, মরণং অট্ঠধা, নৰধা চ, সোকো পঞ্চধা, পরিদেৰো ছধা, দুক্খং চতুধা, তথা দোমনস্সং, উপাযাসো চতুধা পঞ্ঞত্তোতি অযং পভেদপঞ্ঞত্তি, সমূহপঞ্ঞত্তি চ.

‘‘সমুদযো হোতী’’তি পভৰপঞ্ঞত্তি, ‘‘যথাভূতং পজানাতী’’তি দুক্খস্স পরিঞ্ঞাপঞ্ঞত্তি, সমুদযস্স পহানপঞ্ঞত্তি, নিরোধস্স সচ্ছিকিরিযাপঞ্ঞত্তি, মগ্গস্স ভাৰনাপঞ্ঞত্তি. ‘‘অন্তোজালীকতা’’তিআদিসব্বদিট্ঠীনং সঙ্গহপঞ্ঞত্তি. ‘‘উচ্ছিন্নভৰনেত্তিকো’’তিআদি দুৰিধেন পরিনিব্বানপঞ্ঞত্তীতি এৰং আঘাতাদীনং পভৰপঞ্ঞত্তিপরিঞ্ঞাপঞ্ঞত্তিআদিৰসেন. তথা ‘‘আঘাতো’’তি ব্যাপাদস্স ৰেৰচনপঞ্ঞত্তি. ‘‘অপ্পচ্চযো’’তি দোমনস্সস্সৰেৰচনপঞ্ঞত্তীতিআদিৰসেন চ পঞ্ঞত্তিভেদো ৰিভজ্জিতব্বোতি অযং একেকস্স ধম্মস্স অনেকাহি পঞ্ঞত্তীহি পঞ্ঞপেতব্বাকারৰিভাৰনলক্খণো পঞ্ঞত্তিহারো নাম, তেন ৰুত্তং ‘‘একং ভগৰা ধম্মং, পণ্ণত্তীহি ৰিৰিধাহি দেসেতী’’তিআদি (নেত্তি. ৪.১১).