পরিৰত্তনহারৰণ্ণনা

আঘাতাদীনমকরণং খন্তিসোরচ্চানি অনুব্রূহেত্ৰা পটিসঙ্খানভাৰনাবলসিদ্ধিযা উভযহিতপটিপত্তিমাৰহতি. আঘাতাদযো পন পৰত্তিযমানা দুব্বণ্ণতং, দুক্খসেয্যং, ভোগহানিং, অকিত্তিং, পরেহি দুরুপসঙ্কমনতঞ্চ নিপ্ফাদেন্তা নিরযাদীসু মহাদুক্খমাৰহন্তি. পাণাতিপাতাদিপটিৰিরতি অৰিপ্পটিসারাদিকল্যাণং পরম্পরমাৰহতি. পাণাতিপাতাদি পন ৰিপ্পটিসারাদিঅকল্যাণং পরম্পরমাৰহতি. গম্ভীরতাদিৰিসেসযুত্তং ঞাণং ৰেনেয্যানং যথারহং ৰিজ্জাভিঞ্ঞাদিগুণৰিসেসমাৰহতি সব্বঞ্ঞেয্যস্স যথাসভাৰাৰবোধতো. তথা গম্ভীরতাদিৰিসেসরহিতং পন ঞাণং ঞেয্যেসু সাধারণভাৰতো যথাৰুত্তগুণৰিসেসং নাৰহতি. সব্বাপি চেতা দিট্ঠিযো যথারহং সস্সতুচ্ছেদভাৰতো অন্তদ্ৰযভূতা সক্কাযতীরং নাতিৰত্তন্তি অনিয্যানিকসভাৰত্তা. সম্মাদিট্ঠি পন সপরিক্খারা মজ্ঝিমপটিপদাভূতা সক্কাযতীরমতিক্কম্ম পারং গচ্ছতি নিয্যানিকসভাৰত্তা. ৰেদনানং যথাভূতং সমুদযাদিপটিৰেধনা অনুপাদাৰিমুত্তিমাৰহতি মগ্গভাৰতো. ৰেদনানং যথাভূতং সমুদযাদিঅসম্পটিৰেধো সংসারচারকাৰরোধমাৰহতি সঙ্খারানং পচ্চযভাৰতো. ৰেদযিতসভাৰপটিচ্ছাদকো সম্মোহো তদভিনন্দনমাৰহতি, যথাভূতাৰবোধো পন তত্থ নিব্বেধং, ৰিরাগঞ্চ আৰহতি. মিচ্ছাভিনিৰেসে অযোনিসোমনসিকারসহিতা তণ্হা অনেকৰিহিতং দিট্ঠিজালং পসারেতি. যথাৰুত্ততণ্হাসমুচ্ছেদো পঠমমগ্গো তং দিট্ঠিজালং সঙ্কোচেতি. সস্সতৰাদাদিপঞ্ঞাপনস্স ফস্সো পচ্চযো অসতি ফস্সে তদভাৰতো. দিট্ঠিবন্ধনবদ্ধানং ফস্সাযতনাদীনমনিরোধনেন ফস্সাদিঅনিরোধো সংসারদুক্খস্স অনিৰত্তিযেৰ যাথাৰতো ফস্সাযতনাদিপরিঞ্ঞা সব্বদিট্ঠিদস্সনানি অতিৰত্ততি, তেসং পন তথা অপরিঞ্ঞা দিট্ঠিদস্সনং নাতিৰত্ততি. ভৰনেত্তিসমুচ্ছেদো আযতিং অত্তভাৰস্স অনিব্বত্তিযা সংৰত্ততি, অসমুচ্ছিন্নায ভৰনেত্তিযা অনাগতে ভৰপ্পবন্ধো পরিৰত্ততিযেৰাতি অযং সুত্তে নিদ্দিট্ঠানং ধম্মানং পটিপক্খতো পরিৰত্তনলক্খণো পরিৰত্তনহারো নাম. কিমাহ ‘‘কুসলাকুসলে ধম্মে, নিদ্দিট্ঠে ভাৰিতে পহীনে চা’’তিআদি.