৪. চতুত্থনযো সঙ্গহিতেনসঙ্গহিতপদৰণ্ণনা

১৯১. তিণ্ণং সঙ্গহানন্তি খন্ধাযতনধাতুসঙ্গহানং. সঙ্গহণপুব্বং অসঙ্গহণং, অসঙ্গহণপুব্বং সঙ্গহণঞ্চ ৰুচ্চমানং সঙ্গহণাসঙ্গহণানং পৰত্তিৰিসেসেন ৰুত্তং হোতীতি আহ ‘‘সঙ্গহণা…পে… উদ্দিট্ঠা’’তি. সঙ্গহাভাৰকতো অসঙ্গহো সঙ্গহহেতুকো সঙ্গহস্স পৰত্তিৰিসেসোযেৰ নাম হোতীতি আহ ‘‘সঙ্গহণপ্পৰত্তিৰিসেসৰিরহে’’তি. কেনচি সমুদযসচ্চাদিনা তীহিপি সঙ্গহেহি সঙ্গহিতেন সঙ্খারক্খন্ধপরিযাপন্নেন ধম্মৰিসেসেন পুন তথেৰ সঙ্গহিতো সো এৰ সমুদযসচ্চাদিকো ধম্মৰিসেসো সঙ্গহিতেন সঙ্গহিতো. সঙ্গাহকত্তাভাৰসব্ভাৰা সঙ্গাহকভাৰেন ন উদ্ধটা, ন অসঙ্গাহকত্তা এৰ. যথা হি তীহি সঙ্গহেহি ন সঙ্গাহকা, এৰং দ্ৰীহি, একেনপি সঙ্গহেন ন সঙ্গাহকা ইধ ন উদ্ধটা. তেহি সঙ্গহিতাতি তেহি তীহি সঙ্গহেহি সঙ্গহিতা ধম্মা. যস্সাতি যস্স অত্তনো সঙ্গাহকস্স.

সকলৰাচকেনাতি অনৰসেসং খন্ধাদিঅত্থং ৰদন্তেন. তেন খন্ধাদিপদেনাতি ‘‘তেনেৰ সঙ্গহং গচ্ছেয্যা’’তি এত্থ তেন খন্ধাদিপদেনাতি এৰং যোজেতব্বং. এৰং পন অযোজেত্ৰা ‘‘যং অত্তনো সঙ্গাহকং সঙ্গণ্হিত্ৰা পুন তেনেৰ সঙ্গহং গচ্ছেয্য, তং অঞ্ঞং সঙ্গহিতং নাম নত্থী’’তি এৰং ন সক্কা ৰত্তুং. কস্মাতি চে? ন হি যেন সমুদযসচ্চাদিনা যং সঙ্খারক্খন্ধপরিযাপন্নং ধম্মজাতং খন্ধাদিসঙ্গহেহি সঙ্গহিতং, তেনেৰ সমুদযসচ্চাদিনা তস্স তদৰসিট্ঠস্স সঙ্খারক্খন্ধধম্মস্স, ন চ তস্সেৰ কেৰলস্স সমুদযসচ্চাদিকস্স সঙ্গহো পুচ্ছিতো ৰিস্সজ্জিতোতি যোজনা, অথ খো তেন সঙ্খারক্খন্ধধম্মেন ফস্সাদিনা. সঙ্গহিতস্সাতি সঙ্গহিততাৰিসিট্ঠস্সাতি অত্থো. তস্মা অত্তনো সঙ্গাহকং সকলক্খণাদিং সঙ্গণ্হিত্ৰা পুন তেন খন্ধাদিপদেন যং সঙ্গহং গচ্ছেয্য, তং তাদিসং নত্থীতি অত্থো ৰেদিতব্বো. ৰেদনা সদ্দো চ খন্ধো আযতনঞ্চাতি ৰেদনা ৰিসুং খন্ধো, সদ্দো চ ৰিসুং আযতনন্তি অত্থো. অঞ্ঞেন খন্ধন্তরাদিনা. অসম্মিস্সন্তি অব্যাকতদুক্খসচ্চাদি ৰিয অমিস্সিতং. ন হি…পে… এত্থাতি সঙ্গহিততাৰিসিট্ঠেন ধম্মেন যো ধম্মো সঙ্গহিতো, তস্স সঙ্গহিততাৰিসিট্ঠোযেৰ যো সঙ্গহো, সো ন এত্থ ৰারে পুচ্ছিতো ৰিস্সজ্জিতো চ. সঙ্গহোৰাতি কেৰলো সঙ্গহো, ন কত্তাপেক্খোতি অত্থো. ন সঙ্গাহকেনাতি ইদং যথাৰুত্তেন অত্থেন নিৰত্তিতস্স দস্সনং. ন হীতিআদি তংসমত্থনং.

চতুত্থনযসঙ্গহিতেনসঙ্গহিতপদৰণ্ণনা নিট্ঠিতা.