৩. অনিযতকণ্ডং

১. পঠমঅনিযতসিক্খাপদৰণ্ণনা

৪৪৩. পুত্তসদ্দেন সামঞ্ঞনিদ্দেসতো একসেসনযেন ৰা পুত্তীপি গহিতাতি আহ ‘‘বহূ ধীতরো চা’’তি. দানপ্পদানেসূতি খুদ্দকেসু চেৰ মহন্তেসু চ দানেসু. ছণং নাম অত্তনো গেহে কত্তব্বমঙ্গলন্তি আহ ‘‘আৰাহৰিৰাহমঙ্গলাদীসূ’’তি. এত্থ আদি-সদ্দেন ফগ্গুণমাসাদীসু উত্তরফগ্গুণাদিঅভিলক্খিতদিৰসেসু সপরিজনানং মনুস্সানং মঙ্গলকরণম্পি সঙ্গণ্হাতি. অন্তরুস্সৰেসূতি মহুস্সৰস্স অন্তরন্তরা পৰত্তিতউস্সৰেসু. আসাল়্হীপৰারণনক্খত্তাদীসূতি এত্থ নক্খত্তসদ্দো পচ্চেকং যোজেতব্বো. তত্থ আসাল়্হীনক্খত্তন্তি ৰস্সূপগমনপূজাদিৰসং সন্ধায ৰুত্তং, পৰারণনক্খত্তন্তি পৰারণপূজাদিৰসং সন্ধায. আদি-সদ্দেন যস্মিং নক্খত্তে গামনিগমৰাসিনো তযো সত্ত ৰা দিৰসে নক্খত্তঘোসনং কত্ৰা যথাৰিভৰং অলঙ্কতপটিযত্তা ভোগে পরিভুঞ্জন্তা নক্খত্তকীল়ং কীল়ন্তি, তম্পি সঙ্গণ্হাতি. ইমেপি দারকাতি অত্তনো দারকে সন্ধায ৰদন্তি. তদনন্তরন্তি ভিক্খূনং ভোজনানন্তরং.

৪৪৪-৪৪৫. তং কম্মন্তি তং অজ্ঝাচারকম্মং. ভিক্খু নিসিন্নেতি এত্থ ভিক্খূতি ভুম্মত্থে পচ্চত্তৰচনং, ভুম্মৰচনস্স ৰা লোপং কত্ৰা নিদ্দেসোতি আহ ‘‘ভিক্খুম্হি নিসিন্নে’’তি. পাল়িযং ‘‘সোতস্স রহো’’তি ইদং অত্থুদ্ধারৰসেন ৰুত্তং, ‘‘পটিচ্ছন্নে আসনে’’তি পন ৰচনতো ‘‘সক্কা হোতি মেথুনং ধম্মং পটিসেৰিতু’’ন্তি চ ৰুত্তত্তা চক্খুস্স রহো ইধাধিপ্পেতোতি দস্সেতুং ‘‘কিঞ্চাপী’’তিআদি ৰুত্তং. পরিচ্ছেদো ৰেদিতব্বোতি রহো নিসজ্জাপত্তিযা পরিচ্ছেদো ৰৰত্থানং ৰেদিতব্বং. ইদানি চক্খুস্স রহেনেৰ আপত্তিং পরিচ্ছিন্দিত্ৰা দস্সেন্তো ‘‘সচেপি হী’’তিআদিমাহ. পিহিতকৰাটস্সাতি ইমিনা পটিচ্ছন্নভাৰতো চক্খুস্স রহোসব্ভাৰং দস্সেতি. অপিহিতকৰাটস্সাতি ইমিনা অপ্পটিচ্ছন্নভাৰং দস্সেতি. অপ্পটিচ্ছন্নে চ দুতিযসিক্খাপদে আগতনযেন সোতস্স রহৰসেনপি পরিচ্ছেদো ৰেদিতব্বোতি আহ ‘‘অন্তোদ্ৰাদসহত্থেপি ওকাসে’’তি. ‘‘অন্তোদ্ৰাদসহত্থে’’তি হি ইদং সোতস্স রহাভাৰং সন্ধায ৰুত্তং. যদি হি চক্খুস্সেৰ রহাভাৰং সন্ধায ৰদেয্য, ‘‘অন্তোদ্ৰাদসহত্থে’’তি ন ৰদেয্য অপ্পটিচ্ছন্নে ততো দূরতরে নিসিন্নেপি চক্খুস্স রহাসম্ভৰতো. যস্মা নিসীদিত্ৰা নিদ্দাযন্তো কপিমিদ্ধপরেতো কঞ্চি কালং চক্খূনি উম্মীলেতি, কঞ্চি কালং নিমীলেতি, ন চ মহানিদ্দং ওক্কমতি, তস্মা ‘‘নিদ্দাযন্তোপি অনাপত্তিং করোতী’’তি ৰুত্তং. নিপজ্জিত্ৰা নিদ্দাযন্তো পন তাদিসো ন হোতীতি আহ ‘‘নিপজ্জিত্ৰা নিদ্দাযন্তো ন করোতী’’তি, অনাপত্তিং ন করোতীতি অত্থো.

পটিলদ্ধসোতাপত্তিফলাতি অন্তিমপরিচ্ছেদতো অরিযসাৰিকং দস্সেতি. পটিৰিদ্ধচতুসচ্চাতি সোতাপত্তিমগ্গেন পটিৰিদ্ধচতুসচ্চা. তিণ্ণং ধম্মানং অঞ্ঞতরেন কারেতব্বোতি নিসজ্জং পটিজানমানস্স তিণ্ণং ধম্মানং অঞ্ঞতরসমাযোগো হোতিযেৰাতি ৰুত্তং. পারাজিকেন পন সঙ্ঘাদিসেসেন চ পাচিত্তিযেন চ তেনাকারেন নিসজ্জং পটিজানমানোৰ কারেতব্বো. ন অপ্পটিজানমানোতি অলজ্জীপি অপ্পটিজানমানো আপত্তিযা ন কারেতব্বোতি অৰিসেসেন ৰুত্তং. সো হি যাৰ ন পটিজানাতি, তাৰ নেৰ সুদ্ধো, ন অসুদ্ধোতি ৰা ৰত্তব্বো, ৰত্তানুসন্ধিনা পন কারেতব্বো. ৰুত্তঞ্হেতং –

‘‘পটিঞ্ঞা লজ্জীসু কতা, অলজ্জীসু এৰং ন ৰিজ্জতি;

বহুম্পি অলজ্জী ভাসেয্য, ৰত্তানুসন্ধিতেন কারযে’’তি. (পরি. ৩৫৯);

যেন ৰা সা সদ্ধেয্যৰচসা উপাসিকা ৰদেয্য, তেন সো ভিক্খু কারেতব্বোতি এত্থ ‘‘পটিজানমানো’’তি অৰুত্তেপি অধিকারত্তা ‘‘পটিজানমানোৰ তেন সো ভিক্খু কারেতব্বো’’তি ৰুত্তং. তথারূপায উপাসিকায ৰচনেন অঞ্ঞথত্তাভাৰতো দিট্ঠং নাম তথাপি হোতি, অঞ্ঞথাপি হোতীতি দস্সনেন অঞ্ঞথত্তসম্ভৰং দস্সেতি. এৰং মহিদ্ধিকা নাম…পে… ৰদাপেথাতি ইদং ‘‘এৰং মহিদ্ধিকাপি তুম্হে এৰরূপে আসঙ্কনীযে ঠানে কস্মা অনুপপরিক্খিত্ৰা নিসিন্নত্থ, তুম্হাদিসেহি নাম অন্তরঘরে নিসীদন্তেহি উপপরিক্খিত্ৰা পতিরূপে ঠানে নিসীদিতব্ব’’ন্তি থেরং ওৰদন্তো আহ, ন পন অসদ্দহন্তো. থেরো অত্তনো অনুপপরিক্খিত্ৰা অনিসিন্নভাৰং দস্সেন্তো ‘‘অন্তরঘরস্সেৰেসো আৰুসো দোসো’’তি আহ. এৰমকাসিন্তি অত্তনো নিগূহিতব্বম্পি গুণং পকাসেন্তো এৰং ৰিয ইদ্ধিপাটিহারিযং অকাসিং. রক্খেয্যাসি মন্তি ‘‘মা মং অঞ্ঞেপি এৰং জানন্তূ’’তি অত্তনো গুণং অজানাপেতুকামো ৰদতি.

৪৪৬-৪৫১. মাতুগামস্স মেথুনং ধম্মং পটিসেৰন্তোতি এত্থ ‘‘মগ্গে’’তি পাঠসেসো দট্ঠব্বোতি আহ ‘‘মাতুগামস্স মগ্গে’’তি. রহো নিসজ্জস্সাদস্স অসতিপি মেথুনরাগভাৰে তপ্পটিবদ্ধকিলেসত্তা ৰুত্তং ‘‘মেথুনধম্মসন্নিস্সিতকিলেসো ৰুচ্চতী’’তি, তেনেৰ সন্নিস্সিতগ্গহণং কতং. তং সন্ধায অগতেপি অসুদ্ধচিত্তেন গতত্তা ‘‘অস্সাদে উপ্পন্নে পাচিত্তিয’’ন্তি ৰুত্তং. রহস্সাদো উপ্পজ্জতি অনাপত্তীতি সুদ্ধচিত্তেন গন্ত্ৰা নিসিন্নত্তা চিত্তুপ্পাদমত্তেনেত্থ আপত্তি ন হোতীতি ৰুত্তং. অযং ধম্মো অনিযতোতি এত্থ তিণ্ণং আপত্তীনং যং আপত্তিং ৰা ৰত্থুং ৰা পটিজানাতি, তস্স ৰসেন কারেতব্বতায অনিযতোতি অযমত্থো পাকটোযেৰাতি ন ৰুত্তো. যং আপত্তিং পটিজানাতি, তস্সা ৰসেনেত্থ অঙ্গভেদো ৰেদিতব্বো.

পঠমঅনিযতসিক্খাপদৰণ্ণনা নিট্ঠিতা.

২. দুতিযঅনিযতসিক্খাপদৰণ্ণনা

৪৫২. ‘‘একো’’তি ৰুত্তত্তা ‘‘নিসজ্জং কপ্পেতুং পটিক্খিত্ত’’ন্তি ইমিনা সম্বন্ধো ন ঘটতীতি আহ ‘‘যং একো…পে… সম্বন্ধো ৰেদিতব্বো’’তি. এতং পচ্চত্তৰচনন্তি ‘‘একো’’তি ইদং পচ্চত্তৰচনং.

৪৫৩. বহি পরিক্খিত্তন্তি বহি পাকারাদিনা পরিক্খিত্তং. পরিৰেণঙ্গণন্তি পরিৰেণমাল়কং সন্ধায ৰুত্তং. ইত্থীপি পুরিসোপীতি এত্থ পঠমে কস্মা ইত্থিসতম্পি অনাপত্তিং ন করোতি, ইধ একাপি কস্মা অনাপত্তিং করোতীতি? ৰুচ্চতে – পঠমসিক্খাপদং ‘‘সক্কা হোতি মেথুনং ধম্মং পটিসেৰিতু’’ন্তি ৰুত্তত্তা মেথুনধম্মৰসেন আগতং, ন চ মেথুনস্স মাতুগামো দুতিযো হোতি. ইত্থিযো হি অঞ্ঞমঞ্ঞিস্সা ৰজ্জং পটিচ্ছাদেন্তি, তেনেৰ ৰেসালিযং মহাৰনে দ্ৰারং ৰিৰরিত্ৰা নিপন্নে ভিক্খুম্হি সম্বহুলা ইত্থিযো যাৰদত্থং কত্ৰা পক্কমিংসু, তস্মা তত্থ ‘‘ইত্থিসতম্পি অনাপত্তিং ন করোতী’’তি ৰুত্তং. ইদং পন সিক্খাপদং দুট্ঠুল্লৰাচাৰসেন আগতং ‘‘অলঞ্চ খো হোতি মাতুগামং দুট্ঠুল্লাহি ৰাচাহি ওভাসিতু’’ন্তি ৰুত্তত্তা. দুট্ঠুল্লৰাচঞ্চ সুত্ৰা মাতুগামোপি ন পটিচ্ছাদেতি. তেনেৰ দুট্ঠুল্লৰাচাসিক্খাপদে যা তা ইত্থিযো হিরিমনা, তা নিক্খমিত্ৰা ভিক্খূ উজ্ঝাপেসুং, তস্মা ইধ ‘‘ইত্থীপি অনাপত্তিং করোতী’’তি ৰুত্তং. ইধ অপ্পটিচ্ছন্নত্তা ইত্থীপি অনাপত্তিং করোতি, তত্থ পটিচ্ছন্নত্তা ইত্থিসতম্পি অনাপত্তিং ন করোতীতি চ ৰদন্তি.

কাযসংসগ্গৰসেন অনন্ধো ৰুত্তো, দুট্ঠুল্লৰাচাৰসেন অবধিরো. অন্তোদ্ৰাদসহত্থে ওকাসেতি সোতস্স রহাভাৰো ৰুত্তো, এতেন ‘‘সোতস্স রহো দ্ৰাদসহত্থেন পরিচ্ছিন্দিতব্বো’’তি দস্সেতি. তস্মা দ্ৰাদসহত্থতো বহি নিসিন্নো অনাপত্তিং ন করোতি সতিপি চক্খুস্স রহাভাৰে সোতস্স রহসব্ভাৰতো. ইমস্মিঞ্হি সিক্খাপদে অপ্পটিচ্ছন্নত্তা সোতস্স রহোযেৰ অধিপ্পেতো. পাল়িযং পন ‘‘চক্খুস্স রহো’’তি অত্থুদ্ধারৰসেন ৰুত্তং. কেনচি পন ‘‘দ্ৰেপি রহা ইধ অধিপ্পেতা’’তি ৰুত্তং, তং ন গহেতব্বং. ন হি অপ্পটিচ্ছন্নে ওকাসে চক্খুস্স রহো সম্ভৰতি দ্ৰাদসহত্থতো বহি দস্সনৰিসযে দূরতরে নিসিন্নস্সপি দট্ঠুং সক্কুণেয্যভাৰতো. নিদ্দাযন্তোপীতি ইমিনা ‘‘নিপজ্জিত্ৰা নিদ্দাযন্তোপি গহিতোযেৰা’’তি তীসুপি গণ্ঠিপদেসু ৰুত্তং. ‘‘নিপজ্জিত্ৰা নিদ্দাযন্তেপি সতিপি চক্খুস্স রহে অবধিরত্তা সোতস্স রহো নত্থী’’তি গণ্ঠিপদকারানং অধিপ্পাযো. যথা পন নিপজ্জিত্ৰা নিদ্দাযন্তো অন্ধো ৰিয কিঞ্চি ন পস্সতীতি চক্খুস্স রহো সম্ভৰতি, তথা বধিরো ৰিয কিঞ্চি সদ্দং ন সুণাতীতি সোতস্স রহোপি সম্ভৰতীতি সক্কা ৰত্তুং. অট্ঠকথাযঞ্চ ঠিতো ৰা নিসিন্নো ৰাতি এত্তকমেৰ ৰুত্তং, পঠমসিক্খাপদে ৰিয ‘‘নিপজ্জিত্ৰা নিদ্দাযন্তোপি অনাপত্তিং ন করোতী’’তি ইদং পন ন ৰুত্তং, তস্মা ৰীমংসিত্ৰা যথা ন ৰিরুজ্ঝতি, তথা গহেতব্বং.

সোতস্স রহস্সেৰ ইধাধিপ্পেতত্তা ‘‘বধিরো পন চক্খুমাপী’’তি ৰুত্তং. অন্ধস্স অপ্পটিচ্ছন্নম্পি পটিচ্ছন্নপক্খং ভজতীতি পঠমসিক্খাপদস্স ৰিসযত্তা ৰুত্তং ‘‘অন্ধো ৰা অবধিরোপি ন করোতী’’তি. যথেৰ হি তত্থ অপিহিতকৰাটস্স গব্ভস্স অন্তো সমীপেপি ঠিতো অন্ধো অনাপত্তিং ন করোতি, এৰমযম্পীতি দট্ঠব্বং. উভযত্থাপীতি দ্ৰীসুপি অনিযতেসু. যস্মা দ্ৰীহি সিক্খাপদেহি উদাযিত্থেরং আরব্ভ ৰিসুং পঞ্ঞত্তা কাচি আপত্তি নাম নত্থি, তস্মা তস্স তস্স সিক্খাপদস্স আদিকম্মিকে সন্ধায আদিকম্মিকানং অনাপত্তি ৰুত্তা. উপনন্দত্থেরাদযো হি রহো নিসজ্জাদীনং আদিকম্মিকা. ভগৰতা পন পঠমং পঞ্ঞত্তসিক্খাপদানিযেৰ গহেত্ৰা উপনন্দৰত্থুস্মিং অনিযতক্কমো দস্সিতো. যদি ইমেহি সিক্খাপদেহি ৰিসুং পঞ্ঞত্তা আপত্তি নাম নত্থি, অথ কস্মা ভগৰতা অনিযতদ্ৰযং পঞ্ঞত্তন্তি? এৰরূপাযপি উপাসিকায ৰুচ্চমানো পটিজানমানোযেৰ আপত্তিযা কারেতব্বো, ন অপ্পটিজানমানোতি দস্সেন্তেন ভগৰতা যায কাযচি আপত্তিযা যেন কেনচি চোদিতে পটিঞ্ঞাতকরণংযেৰ দল়্হং কত্ৰা ৰিনযৰিনিচ্ছযলক্খণং ঠপিতং. অথ ভিক্খুনীনং অনিযতং কস্মা ন ৰুত্তন্তি? ইদমেৰ লক্খণং সব্বত্থ অনুগতন্তি ন ৰুত্তং.

দুতিযঅনিযতসিক্খাপদৰণ্ণনা নিট্ঠিতা.

ইতি সমন্তপাসাদিকায ৰিনযট্ঠকথায সারত্থদীপনিযং

অনিযতৰণ্ণনা নিট্ঠিতা.