১০. সপ্পাণকসিক্খাপদৰণ্ণনা

১৪০. দসমে ইমস্স সিক্খাপদস্স ‘‘সিঞ্চেয্য ৰা সিঞ্চাপেয্য ৰা’’তি বাহিরপরিভোগৰসেন পঠমং পঞ্ঞত্তত্তা ‘‘সপ্পাণকং উদকং পরিভুঞ্জেয্যা’’তি সিক্খাপদং অত্তনো নহানপানাদিপরিভোগৰসেন পঞ্ঞত্তন্তি ৰেদিতব্বং. তস্মিং ৰা পঠমং পঞ্ঞত্তেপি অত্তনো পরিভোগৰসেনেৰ পঞ্ঞত্তত্তা পুন ইমং সিক্খাপদং বাহিরপরিভোগৰসেনেৰ পঞ্ঞত্তন্তি গহেতব্বং.

সপ্পাণকসঞ্ঞিস্স ‘‘পরিভোগেন পাণকা মরিস্সন্তী’’তি পুব্বভাগে জানন্তস্সপি সিঞ্চনসিঞ্চাপনং ‘‘পদীপে নিপতিত্ৰা পটঙ্গাদিপাণকা মরিস্সন্তী’’তি জানন্তস্স পদীপুজ্জলনং ৰিয ৰিনাপি ৰধকচেতনায হোতীতি আহ ‘‘পণ্ণত্তিৰজ্জ’’ন্তি. সেসং উত্তানত্থমেৰ. উদকস্স সপ্পাণকতা, ‘‘সিঞ্চনেন পাণকা মরিস্সন্তী’’তি জাননং, তাদিসমেৰ চ উদকং, ৰিনা ৰধকচেতনায কেনচিদেৰ করণীযেন তিণাদীনং সিঞ্চনন্তি ইমানি পনেত্থ চত্তারি অঙ্গানি.

সপ্পাণকসিক্খাপদৰণ্ণনা নিট্ঠিতা.

নিট্ঠিতো সেনাসনৰগ্গো দুতিযো.

ভূতগামৰগ্গোতিপি ইমস্সেৰ নামং.