ভিক্খুনিৰিভঙ্গো

১৭০. ৰিনযস্স ৰিনিচ্ছযে ভিক্খূনং পাটৰত্থাযাতি ভিক্খুনীনং পাটৰস্সাপি তদধীনত্তা পধানদস্সনৰসেন ৰুত্তং. অথ ৰা দস্সনলিঙ্গন্তরসাধারণত্তে ইচ্ছিতে পুল্লিঙ্গেন, নপুংসকলিঙ্গেন ৰা নিদ্দেসো সদ্দসত্থানুযোগতোতি ‘‘ভিক্খূন’’ন্তি পুল্লিঙ্গেন ৰুত্তং.

১৭১. নন্দন্তী সাদিযন্তী.

১৭২. তিস্সো আপত্তিযো ফুসেতি যোজনা. জাণুস্স উদ্ধং, অক্খকস্স অধো গহণং সাদিযন্তিযা তস্সা পারাজিকন্তি যোজনা.

১৭৩. কাযপটিবদ্ধে ৰা গহণং সাদিযন্তিযা দুক্কটং.

১৭৪. ৰজ্জন্তি অঞ্ঞিস্সা ভিক্খুনিযা পারাজিকাপত্তিং.

১৭৬. তং লদ্ধিন্তি উক্খিত্তস্স যং লদ্ধিং অত্তনো রোচেসি, তং লদ্ধিং ন নিস্সজ্জন্তীতি যোজনা.

১৭৮. ‘‘ইধ আগচ্ছা’’তি পদচ্ছেদো. ‘‘ৰুত্তা আগচ্ছতী’’তি পদচ্ছেদো.

১৭৯. হত্থপাসপ্পৰেসনেতি হত্থপাসূপগমনে. ‘‘হত্থগতপ্পৰেসনে’’তি ৰা পাঠো, সোযেৰ অত্থো.

ইতি উত্তরে লীনত্থপকাসনিযা ভিক্খুনিৰিভঙ্গে

পারাজিককথাৰণ্ণনা নিট্ঠিতা.

১৮০. একস্সাতি অত্তনো অত্তনো অট্টকারস্স ৰা. আরোচনেতি ৰত্তব্বস্স ৰোহারিকানং নিৰেদনে.

১৮১. দুতিযারোচনেতি দুতিযস্স, দুতিযং এৰং আরোচনে.

১৮২. দ্ৰীহীতি দ্ৰীহি কম্মৰাচাহি. কম্মৰাচোসানেতি কম্মৰাচাওসানে.

১৮৩. পরিক্খেপে অতিক্কন্তেতি অত্তনো গামতো গন্ত্ৰা ইতরং গামং পৰিসন্তিযা পঠমেন পাদেন তস্স গামস্স পরিক্খেপে অতিক্কন্তে, পঠমপাদে পরিক্খেপং অতিক্কমেত্ৰা অন্তোগামসঙ্খেপং গতেতি অত্থো.

১৮৪. দুতিযেনাতি গামপরিক্খেপতো বহি ঠিতেন দুতিযপাদেন. অতিক্কন্তেতি তস্মিং গামপরিক্খেপে অতিক্কন্তে, তস্মিং পাদে অন্তোগামং পৰেসিতেতি অত্থো. সেসং উত্তানত্থমেৰ.

ইতি উত্তরে লীনত্থপকাসনিযা ভিক্খুনিৰিভঙ্গে

সঙ্ঘাদিসেসকথাৰণ্ণনা নিট্ঠিতা.

১৯৩. ইহ ভিক্খুনী পত্তসন্নিচযং করোন্তী হোতি, সা একং নিস্সগ্গিযং পাচিত্তিযংযেৰ ফুসেতি যোজনা.

১৯৪. অকালচীৰরং কালচীৰরং কত্ৰা ভাজাপেন্তিযাতি যোজনা. পযোগেতি ভাজনপযোগে.

১৯৫. ছিন্নেতি অচ্ছিন্নে.

১৯৬. ততো পরন্তি ততো পঠমতো অঞ্ঞং.

ইতি উত্তরে লীনত্থপকাসনিযা ভিক্খুনিৰিভঙ্গে

নিস্সগ্গিযকথাৰণ্ণনা নিট্ঠিতা.

১৯৯. লসুণং খাদতি চে, দ্ৰে আপত্তিযো ফুটাতি যোজনা.

২০০. পযোগেতি সংহারাপনপযোগে. সংহটেতি অত্তনা সংহটে, পরেন সংহরাপিতে চ আপত্তি পাচিত্তি হোতি.

২০১. কতেতি তলঘাতে কতে.

২০২. জতুনা মট্ঠকন্তি জতুনা কতং মট্ঠদণ্ডকং. ‘‘দুক্কটং আদিন্নে’’তি পদচ্ছেদো.

২০৪. ভুঞ্জমানস্স ভিক্খুস্স হত্থপাসেতি যোজনা. হিত্ৰা হত্থপাসং.

২০৫. ৰিঞ্ঞাপেত্ৰাতি অন্তমসো মাতরম্পি যাচিত্ৰা. অজ্ঝোহারে পাচিত্তিং দীপযেতি যোজনা.

২০৬. উচ্চারাদিন্তি আদি-সদ্দেন ৰিঘাসসঙ্কারমুত্তানং গহণং.

লসুণৰগ্গৰণ্ণনা পঠমা.

২০৯. ইধ ইমস্মিং রত্তন্ধকারৰগ্গে. পঠমে, দুতিযে, ততিযে, চতুত্থেপি ৰিনিচ্ছযো লসুণৰগ্গস্স ছট্ঠেন সিক্খাপদেন তুল্যো সদিসোতি যোজনা.

২১০. আসনেতি পল্লঙ্কে তস্সোকাসভূতে. সামিকে অনাপুচ্ছাতি তস্মিং কুলে যং কিঞ্চি ৰিঞ্ঞুমনুস্সং অনাপুচ্ছা.

২১১. অনোৰস্সন্তি ভিত্তিযা বহি নিব্বকোসব্ভন্তরং. দুতিযাতিক্কমেতি দুতিযেন পাদেন নিব্বকোসস্স উদকপাতট্ঠানাতিক্কমে.

২১২. নিসীদিতেতি নিসিন্নে.

২১৩. পযোগেতি উজ্ঝাপনপযোগে.

২১৪. নিরযাদিনা অত্তানং ৰা পরং ৰা অভিসপ্পেন্তী সপথং করোন্তী দ্ৰে ফুসেতি যোজনা. অভিসপ্পিতেতি অভিসপিতে.

২১৫. ৰধিত্ৰাতি হত্থাদীহি পহরিত্ৰা. ‘‘করোতি এক’’ন্তি পদচ্ছেদো.

রত্তন্ধকারৰগ্গৰণ্ণনা দুতিযা.

২১৬. নগ্গাতি অনিৰত্থা ৰা অপারুতা ৰা. পযোগেতি চুণ্ণমত্তিকাঅভিসঙ্খরণাদিপযোগে.

২১৭. পমাণাতিক্কন্তন্তি ‘‘দীঘসোচতস্সো ৰিদত্থিযো সুগতৰিদত্থিযা, তিরিযং দ্ৰে ৰিদত্থিযো’’তি (পাচি. ৮৮৮) ৰুত্তপমাণমতিক্কন্তং. পযোগেতি কারাপনপযোগে.

২১৮. ৰিসিব্বেত্ৰাতি দুস্সিব্বিতং পুন সিব্বনত্থায ৰিসিব্বেত্ৰা.

২১৯. পঞ্চ অহানি পঞ্চাহং, পঞ্চাহমেৰ পঞ্চাহিকং. সঙ্ঘাটীনং চারো সঙ্ঘাটিচারো, পরিভোগৰসেন ৰা ওতাপনৰসেন ৰা সঙ্ঘটিতট্ঠেন ‘‘সঙ্ঘাটী’’তি লদ্ধনামানং ‘‘তিচীৰরং, উদকসাটিকা, সংকচ্চিকা’’তি ইমেসং পঞ্চন্নং চীৰরানং পরিৰত্তনং. অতিক্কমেতি ভিক্খুনী অতিক্কমেয্য. অস্সা পন একাৰ পাচিত্তি পরিদীপিতাতি যোজনা.

২২০. সঙ্কমনীযন্তি সঙ্কমেতব্বং. অঞ্ঞিস্সা সন্তকং অনাপুচ্ছা গহিতং পুন দাতব্বং পঞ্চন্নং অঞ্ঞতরং.

২২১. গণচীৰরলাভস্সাতি ভিক্খুনিসঙ্ঘেন লভিতব্বচীৰরস্স. অন্তরাযং করোতীতি যথা তে দাতুকামা ন দেন্তি, এৰং পরক্কমতি.

২২২. ধম্মিকন্তি সমগ্গেন সঙ্ঘেন সন্নিপতিত্ৰা করিযমানং. পটিবাহন্তীতি পটিসেধেন্তী. পটিবাহিতে পটিসেধিতে.

২২৩. অগারিকাদিনোতি আদি-সদ্দেন ‘‘পরিব্বাজকস্স ৰা পরিব্বাজিকায ৰা’’তি (পারা. ৯১৭) ৰুত্তে সঙ্গণ্হাতি. সমণচীৰরন্তি কপ্পকতং নিৰাসনপারুপনুপগং. পযোগেতি দানপযোগে.

২২৪. চীৰরে দুব্বলাসাযাতি দুব্বলচীৰরপচ্চাসায ‘‘সচে সক্কোম, দস্সামা’’তি এত্তকমত্তং সুত্ৰা উপ্পাদিতায আসাযাতি অত্থো. কালন্তি চীৰরকালসমযং. সমতিক্কমেতি ভিক্খুনীহি কালচীৰরে ভাজিযমানে ‘‘আগমেথ, অয্যে, অত্থি সঙ্ঘস্স চীৰরপচ্চাসা’’তি ৰত্ৰা তং চীৰরৰিভঙ্গং সমতিক্কমেয্য.

২২৫. ধম্মিকং কথিনুদ্ধারন্তি সমগ্গেন সঙ্ঘেন করিযমানং কথিনস্স অন্তরুব্ভারং. পটিবাহন্তিযাতি নিৰারেন্তিযা.

ন্হানৰগ্গৰণ্ণনা ততিযা.

২২৬. তুৰট্টেয্যুন্তি নিপজ্জেয্যুং. ইতরং পাচিত্তিযং.

২২৭. পযোগেতি ভিক্খুনিযা অফাসুককরণপযোগে করিযমানে.

২২৮. দুক্খিতন্তি গিলানং. নুপট্ঠাপেন্তিযা ৰাপীতি তস্সা উপট্ঠানং পরেহি অকারাপেন্তিযা, সযং ৰা অকরোন্তিযা.

২২৯. উপস্সযং দত্ৰাতি কৰাটবন্ধং অত্তনো পুগ্গলিকৰিহারং দত্ৰা. কড্ঢিতেতি নিক্কড্ঢিতে.

২৩০. সংসট্ঠাতি গহপতিনা ৰা গহপতিপুত্তেন ৰা সংসট্ঠৰিহারী ভিক্খুনী সঙ্ঘেন সংসট্ঠৰিহারতো নিৰত্তিযমানা. ঞত্তিযা দুক্কটং ফুসেতি সমনুভাসনকম্মঞত্তিযা দুক্কটং আপজ্জেয্য.

২৩১. অন্তোরট্ঠেতি যস্স ৰিজিতে ৰিহরতি, তস্স রট্ঠে. পটিপন্নাযাতি চারিকং কপ্পেন্তিযা. সেসকন্তি পাচিত্তিযং.

তুৰট্টৰগ্গৰণ্ণনা চতুত্থা.

২৩৩. রাজাগারাদিকন্তি আদি-সদ্দেন চিত্তাগারাদীনং গহণং.

২৩৫. পযোগেতি কপ্পাসৰিচারণং আদিং কত্ৰা সব্বপযোগে. উজ্জৰুজ্জৰনেতি যত্তকং হত্থেন অঞ্ছিতং হোতি, তস্মিং তক্কম্হি ৰেঠিতে.

২৩৭. পযোগেতি অগারিকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযাদীনং দানপযোগে.

২৩৮. ‘‘সমং আপত্তিপভেদতো’’তি পদচ্ছেদো.

২৩৯. তিরচ্ছানগতং ৰিজ্জন্তি যং কিঞ্চি বাহিরকং অনত্থসংহিতং পরূপঘাতকরং হত্থিসিক্খাদিসিপ্পং. পঠন্তিযাতি সিক্খন্তিযা. পযোগেতি দুরুপসঙ্কমনাদিপযোগে. পদে পদেতি পদাদিৰসেন পরিযাপুণন্তিযা পদে পদে অক্খরপদানং ৰসেন.

২৪০. নৰমে ‘‘পরিযাপুণাতী’’তি পদং, দসমে ‘‘ৰাচেতী’’তি পদন্তি এৰং পদমত্তমেৰ উভিন্নং ৰিসেসকং ভেদকং.

চিত্তাগারৰগ্গৰণ্ণনা পঞ্চমা.

২৪১. তমারামন্তি যত্থ ভিক্খূ রুক্খমূলেপি ৰসন্তি, তং সভিক্খুকং পদেসং.

২৪৩. অক্কোসতীতি দসন্নং অক্কোসৰত্থূনং অঞ্ঞতরেন সম্মুখা ৰা পরম্মুখা ৰা অক্কোসতি. পরিভাসতীতি ভযদস্সনেন তজ্জেতি. ‘‘পাচিত্তি অক্কোসিতে’’তি পদচ্ছেদো.

২৪৪. চণ্ডিকভাৰেনাতি কোধেন. গণন্তি ভিক্খুনিসঙ্ঘং. পরিভাসতীতি ‘‘বালা এতা’’তিআদীহি ৰচনেহি অক্কোসতি. পযোগেতি পরিভাসনপযোগে. পরিভট্ঠেতি অক্কোসিতে. ইতরং পাচিত্তিযং.

২৪৫. নিমন্তিতাতি গণভোজনে ৰুত্তনযেন নিমন্তিতা. পৰারিতাতি পৰারণসিক্খাপদে ৰুত্তনযেন ৰারিতা. খাদনং ভোজনম্পি ৰাতি যাগুপূৰখজ্জকং, যাৰকালিকং মূলখাদনীযাদিখাদনীযং, ওদনাদিভোজনম্পি ৰা যা ভিক্খুনী ভুঞ্জন্তী হোতি, সা পন দ্ৰেযেৰ আপত্তিযো ফুসেতি যোজনা.

২৪৭. মচ্ছরাযন্তীতি মচ্ছরং করোন্তী, অত্তনো পচ্চযদাযককুলস্স অঞ্ঞেহি সাধারণভাৰং অসহন্তীতি অত্থো. পযোগেতি তদনুরূপে কাযৰচীপযোগে. মচ্ছরিতেতি মচ্ছরৰসেন কতপযোগে নিপ্ফন্নে.

২৪৮. অভিক্খুকে পনাৰাসেতি যতো ভিক্খুনুপস্সযতো অদ্ধযোজনব্ভন্তরে ওৰাদদাযকা ভিক্খূ ন ৰসন্তি, মগ্গো ৰা অখেমো হোতি, ন সক্কা অনন্তরাযেন গন্তুং, এৰরূপে আৰাসে. পুব্বকিচ্চেসূতি ‘‘ৰস্সং ৰসিস্সামী’’তি সেনাসনপঞ্ঞাপনপানীযউপট্ঠাপনাদিপুব্বকিচ্চে পন করিযমানে দুক্কটং ভৰেতি যোজনা.

২৪৯. ৰস্সংৰুত্থাতি পুরিমং ৰা পচ্ছিমং ৰা তেমাসং ৰুত্থা. উভতোসঙ্ঘেতি ভিক্খুনিসঙ্ঘে, ভিক্খুসঙ্ঘে চ. তীহিপি ঠানেহীতি ‘‘দিট্ঠেন ৰা’’তিআদিনা ৰুত্তেহি তীহি কারণেহি.

২৫০. ওৰাদত্থাযাতি গরুধম্মোৰাদনত্থায. সংৰাসত্থাযাতি উপোসথপুচ্ছনত্থায চেৰ পৰারণত্থায চ. ন গচ্ছতীতি ভিক্খুং ন উপগচ্ছতি.

২৫১. ওৰাদম্পি ন যাচন্তীতি উপোসথাদিৰসেন ওৰাদূপসঙ্কমনং ভিক্খুং ন যাচন্তী ন পুচ্ছন্তী. উপোসথন্তি উপোসথদিৰসতো পুরিমদিৰসে তেরসিযং ৰা চাতুদ্দসিযং ৰা উপোসথং ন পুচ্ছন্তী.

২৫২. অপুচ্ছিত্ৰাৰ সঙ্ঘং ৰাতি সঙ্ঘং ৰা গণং ৰা অনপলোকেত্ৰাৰ. ‘‘ভেদাপেতী’’তি ইদং নিদস্সনমত্তং ‘‘ফালাপেয্য ৰা ধোৰাপেয্য ৰা আলিম্পাপেয্য ৰা বন্ধাপেয্য ৰা মোচাপেয্য ৰা’’তি ইমেসম্পি কিরিযাৰিকপ্পানং সঙ্গহেতব্বত্তা. পসাখজন্তি নাভিযা হেট্ঠা, জাণুমণ্ডলানং উপরি পদেসে জাতং গণ্ডং ৰা রুধিতং ৰা. পযোগেতি ভেদাপনাদিপযোগে.

আরামৰগ্গৰণ্ণনা ছট্ঠা.

২৫৩. গব্ভিনিন্তি আপন্নসত্তং সিক্খমানং. ৰুট্ঠাপেন্তীতি উপজ্ঝাযা হুত্ৰা উপসম্পাদেন্তী. পযোগেতি গণপরিযেসনাদিপযোগে. ৰুট্ঠাপিতেতি উপসম্পাদিতে, কম্মৰাচাপরিযোসানেতি অত্থো.

২৫৫. সহজীৰিনিন্তি সদ্ধিৰিহারিনিং. নানুগ্গণ্হন্তীতি উদ্দেসদানাদীহি ন সঙ্গণ্হন্তী.

গব্ভিনিৰগ্গৰণ্ণনা সত্তমা.

২৫৮. ‘‘অলং ৰুট্ঠাপিতেনা’’তি ৰুচ্চমানা ভিক্খুনীহি নিৰারিযমানা. খীযতীতি অঞ্ঞাসং ব্যত্তানং লজ্জীনং ৰুট্ঠানসম্মুতিং দীযমানং দিস্ৰা ‘‘অহমেৰ নূন বালা’’তিআদিনা ভণমানা খীযতি. পযোগেতি খীযমানপযোগে. খীযিতেতি খীযনপযোগে নিট্ঠিতে.

কুমারিভূতৰগ্গৰণ্ণনা অট্ঠমা.

২৬০. ছত্তুপাহনন্তি ৰুত্তলক্খণং ছত্তঞ্চ উপাহনাযো চ. পযোগেতি ধারণপযোগে.

২৬১. যানেনাতি ৰয্হাদিনা. যাযন্তীতি সচে যানেন গতা হোতি.

২৬২. সঙ্ঘাণিন্তি যং কিঞ্চি কটূপগং. ধারেন্তিযাতি কটিযং পটিমুচ্চন্তিযা.

২৬৩. গন্ধৰণ্ণেনাতি যেন কেনচি ৰণ্ণেন চ যেন কেনচি গন্ধেন চ. গন্ধো নাম চন্দনালেপাদি. ৰণ্ণো নাম কুঙ্কুমহলিদ্দাদি. পযোগেতি গন্ধাদিপযোগে রচনতো পট্ঠায পুব্বপযোগে.

২৬৬. অনাপুচ্ছাতি ‘‘নিসীদামি, অয্যা’’তি অনাপুচ্ছিত্ৰা. নিসীদিতে ভিক্খুস্স উপচারে অন্তমসো ছমায নিসিন্নে.

২৬৭. অনোকাসকতন্তি ‘‘অসুকস্মিং নাম ঠানে পুচ্ছিস্সামী’’তি এৰং অকতওকাসং.

২৬৮. পৰিসন্তিযাতি ৰিনিচ্ছযং আরামৰগ্গস্স পঠমেনেৰ সিক্খাপদেন সদিসং কত্ৰা ৰদেয্যাতি যোজনা.

ছত্তুপাহনৰগ্গৰণ্ণনা নৰমা.

ইতি উত্তরে লীনত্থপকাসনিযা ভিক্খুনিৰিভঙ্গে

পাচিত্তিযকথাৰণ্ণনা নিট্ঠিতা.

২৬৯-৭০. অট্ঠসু পাটিদেসনীযসিক্খাপদেসুপি দ্ৰিধা আপত্তি হোতীতি যোজনা. ততোতি গহণহেতু. সব্বেসূতি পাটিদেসনীযসিক্খাপদেসু.

পাটিদেসনীযকথাৰণ্ণনা.

২৭১-২. ইমং পরমং উত্তমং নিরুত্তরং কেনচি ৰা ৰত্তব্বেন উত্তরেন রহিতং নিদ্দোসং উত্তরং এৰংনামকং ধীরো পঞ্ঞৰা ভিক্খু অত্থৰসেন ৰিদিত্ৰা দুরুত্তরং কিচ্ছেন উত্তরিতব্বং পঞ্ঞত্তমহাসমুদ্দং ৰিনযমহাসাগরং সুখেনেৰ যস্মা উত্তরতি, তস্মা কঙ্খচ্ছেদে ৰিনযৰিচিকিচ্ছায ছিন্দনে সত্থে সত্থসদিসে অস্মিং সত্থে ইমস্মিং উত্তরপকরণে উস্মাযুত্তো কম্মজতেজোধাতুযা সমন্নাগতো জীৰমানো ভিক্খু নিচ্চং নিরন্তরং সত্তো অভিরতো নিচ্চং যোগং সততাভিযোগং কাতুং যুত্তো অনুরূপোতি যোজনা.

ভিক্খুনিৰিভঙ্গো নিট্ঠিতোতি এত্থাপি উপ্পত্তি ৰুত্তনযেনেৰ ৰেদিতব্বা.

ইতি উত্তরে লীনত্থপকাসনিযা

ভিক্খুনিৰিভঙ্গৰণ্ণনা নিট্ঠিতা.