চীৰরক্খন্ধককথাৰণ্ণনা

২৭২৬-৭. চীৰরং উপ্পজ্জতি এতাসূতি ‘‘উপ্পাদা’’তি জনিকাৰ ৰুচ্চন্তি, চীৰরৰত্থপরিলাভক্খেত্তন্তি অত্থো. যথাহ – ‘‘যথাৰুত্তানং চীৰরানং পটিলাভায খেত্তং দস্সেতুং অট্ঠিমা ভিক্খৰে মাতিকাতিআদিমাহা’’তি (মহাৰ. অট্ঠ. ৩৭৯). চীৰরমাতিকাতি চীৰরুপ্পাদহেতুভূতমাতরো. তেনাহ কথিনক্খন্ধকৰণ্ণনাযং ‘‘মাতিকাতি মাতরো, জনেত্তিযোতি অত্থো’’তি (মহাৰ. অট্ঠ. ৩১০). মাতিকাতি চেত্থ চীৰরদানমধিপ্পেতং. যথাহ ‘‘সীমায দানং একা মাতিকা, কতিকায দানং দুতিযা’’তিআদি. সীমায দেতি, কতিকায দেতি, ভিক্খাপঞ্ঞত্তিযা দেতি, সঙ্ঘস্স দেতি, উভতোসঙ্ঘে দেতি, ৰস্সংৰুত্থসঙ্ঘস্স দেতি, আদিস্স দেতি, পুগ্গলস্স দেতি. ‘‘ইমা পন অট্ঠ মাতিকা’’তি ৰুত্তমেৰ নিগমনৰসেন ৰুত্তং.

২৭২৮. তত্থাতি তাসু অট্ঠমাতিকাসু. সীমায দেতীতি ‘‘সীমায দম্মী’’তি এৰং সীমং পরামসিত্ৰা দেন্তো সীমায দেতি, এৰং দিন্নং অন্তোসীমগতেহি ভিক্খূহি ভাজেতব্বন্তি ৰণ্ণিতন্তি যোজনা. তত্থ অন্তোসীমগতেহীতি দাযকো যং সীমং অপেক্খিত্ৰা এৰমাহ, তস্সা সীমায অন্তোগতেহি সব্বেহি. ভাজেতব্বন্তি তং চীৰরং ভাজেতব্বং. ৰরৰণ্ণিনাতি ‘‘ইতিপি সো ভগৰা অরহ’’ন্তিআদিনা সকললোকব্যাপিগুণাতিসযযুত্তেন ব্যামপ্পভায, ছব্বণ্ণানং রংসীনঞ্চ ৰসেন উত্তমপ্পভাতিসযযুত্তেন ৰরৰণ্ণিনা ৰণ্ণিতং কথিতং. অযমেত্থ পদৰণ্ণনা, অযং পন ৰিনিচ্ছযো – সীমায দেতীতি এত্থ তাৰ খণ্ডসীমা উপচারসীমা সমানসংৰাসসীমা অৰিপ্পৰাসসীমা লাভসীমা গামসীমা নিগমসীমা নগরসীমা অব্ভন্তরসীমা উদকুক্খেপসীমা জনপদসীমা রট্ঠসীমা রজ্জসীমা দীপসীমা চক্কৰাল়সীমা ইতি পন্নরস সীমা ৰেদিতব্বা.

তত্থ খণ্ডসীমা সীমাকথাযং ৰুত্তা. উপচারসীমা পরিক্খিত্তস্স ৰিহারস্স পরিক্খেপেন, অপরিক্খিত্তস্স ৰিহারস্স পরিক্খেপারহট্ঠানেন পরিচ্ছিন্না হোতি. অপিচ ভিক্খূনং ধুৰসন্নিপাতট্ঠানতো ৰা পরিযন্তে ঠিতভোজনসালতো ৰা নিবদ্ধৰসনকআৰাসতো ৰা থামমজ্ঝিমস্স পুরিসস্স দ্ৰিন্নং লেড্ডুপাতানং অন্তো উপচারসীমা ৰেদিতব্বা. সা পন আৰাসেসু ৰড্ঢন্তেসু ৰড্ঢতি, পরিহাযন্তেসু পরিহাযতি. মহাপচ্চরিযং পন ‘‘ভিক্খূসুপি ৰড্ঢন্তেসু ৰড্ঢতী’’তি (মহাৰ. অট্ঠ. ৩৭৯) ৰুত্তং. তস্মা সচে ৰিহারে সন্নিপতিতভিক্খূহি সদ্ধিং একাবদ্ধা হুত্ৰা যোজনসতম্পি পূরেত্ৰা নিসীদন্তি, যোজনসতম্পি উপচারসীমাৰ হোতি, সব্বেসং লাভো পাপুণাতি. সমানসংৰাসঅৰিপ্পৰাসসীমাদ্ৰযম্পি ৰুত্তমেৰ.

লাভসীমা নাম নেৰ সম্মাসম্বুদ্ধেন অনুঞ্ঞাতা, ন ধম্মসঙ্গাহকত্থেরেহি ঠপিতা, অপিচ খো রাজরাজমহামত্তা ৰিহারং কারেত্ৰা গাৰুতং ৰা অড্ঢযোজনং ৰা যোজনং ৰা সমন্ততো পরিচ্ছিন্দিত্ৰা ‘‘অযং অম্হাকং ৰিহারস্স লাভসীমা’’তি নামলিখিতকে থম্ভে নিখণিত্ৰা ‘‘যং এত্থন্তরে উপ্পজ্জতি, সব্বং তং অম্হাকং ৰিহারস্স দেমা’’তি সীমং ঠপেন্তি, অযং লাভসীমা নাম. গামনিগমনগরঅব্ভন্তরউদকুক্খেপসীমাপি ৰুত্তা এৰ.

জনপদসীমা নাম কাসিকোসলরট্ঠাদীনং অন্তো বহূ জনপদা হোন্তি, এত্থ একেকো জনপদপরিচ্ছেদো জনপদসীমা. রট্ঠসীমা নাম কাসিকোসলাদিরট্ঠপরিচ্ছেদো. রজ্জসীমা নাম মহাচোল়ভোগো কেরল়ভোগোতি এৰং একেকস্স রঞ্ঞো আণাপৰত্তিট্ঠানং. দীপসীমা নাম সমুদ্দন্তেন সমুচ্ছিন্নমহাদীপা চ অন্তরদীপা চ. চক্কৰাল়সীমা নাম চক্কৰাল়পব্বতেনেৰ পরিচ্ছিন্না.

এৰমেতাসু সীমাসু খণ্ডসীমায কেনচি কম্মেন সন্নিপতিতং সঙ্ঘং দিস্ৰা ‘‘এত্থেৰ সীমায সঙ্ঘস্স দেমী’’তি ৰুত্তে যাৰতিকা ভিক্খূ অন্তোখণ্ডসীমগতা, তেহি ভাজেতব্বং. তেসংযেৰ হি তং পাপুণাতি, অঞ্ঞেসং সীমন্তরিকায ৰা উপচারসীমায ৰা ঠিতানম্পি ন পাপুণাতি. খণ্ডসীমায ঠিতে পন রুক্খে ৰা পব্বতে ৰা ঠিতস্স হেট্ঠা ৰা পথৰিযা ৰেমজ্ঝং গতস্স পাপুণাতিযেৰ.

‘‘ইমিস্সা উপচারসীমায সঙ্ঘস্স দম্মী’’তি দিন্নং পন খণ্ডসীমাসীমন্তরিকাসু ঠিতানম্পি পাপুণাতি. ‘‘সমানসংৰাসসীমায দম্মী’’তি দিন্নং পন খণ্ডসীমাসীমন্তরিকাসু ঠিতানং ন পাপুণাতি. অৰিপ্পৰাসসীমালাভসীমাসু দিন্নং তাসু সীমাসু অন্তোগতানংযেৰ পাপুণাতি. গামসীমাদীসু দিন্নং তাসং সীমানং অব্ভন্তরে বদ্ধসীমায ঠিতানম্পি পাপুণাতি. অব্ভন্তরসীমাউদকুক্খেপসীমাসু দিন্নং তত্থ অন্তোগতানংযেৰ পাপুণাতি. জনপদরট্ঠরজ্জদীপচক্কৰাল়সীমাসুপি গামসীমাদীসু ৰুত্তসদিসোযেৰ ৰিনিচ্ছযো.

সচে পন জম্বুদীপে ঠিতো ‘‘তম্বপণ্ণিদীপে সঙ্ঘস্স দম্মী’’তি ৰদতি, তম্বপণ্ণিদীপতো একোপি গন্ত্ৰা সব্বেসং গণ্হিতুং লভতি. সচেপি তত্রেৰ একো সভাগভিক্খু সভাগানং ভাগং গণ্হাতি, ন ৰারেতব্বো. এৰং তাৰ যো সীমং পরামসিত্ৰা দেতি, তস্স দানে ৰিনিচ্ছযো ৰেদিতব্বো.

যো পন ‘‘অসুকসীমাযা’’তি ৰত্তুং ন জানাতি, কেৰলং ‘‘সীমা’’তি ৰচনমত্তমেৰ জানন্তো ৰিহারং আগন্ত্ৰা ‘‘সীমায দম্মী’’তি ৰা ‘‘সীমট্ঠকসঙ্ঘস্স দম্মী’’তি ৰা ভণতি, সো পুচ্ছিতব্বো ‘‘সীমা নাম বহুৰিধা, কতরং সীমং সন্ধায ভণসী’’তি, সচে ৰদতি ‘‘অহং ‘অসুকসীমা’তি ন জানামি, সীমট্ঠকসঙ্ঘো ভাজেত্ৰা গণ্হতূ’’তি, কতরসীমায ভাজেতব্বং? মহাসীৰত্থেরো কিরাহ ‘‘অৰিপ্পৰাসসীমাযা’’তি. ততো নং আহংসু ‘‘অৰিপ্পৰাসসীমা নাম তিযোজনাপি হোতি, এৰং সন্তে তিযোজনে ঠিতা লাভং গণ্হিস্সন্তি, তিযোজনে ঠত্ৰা আগন্তুকৰত্তং পূরেত্ৰা আরামং পৰিসিতব্বং ভৰিস্সতি, গমিকো তিযোজনং গন্ত্ৰা সেনাসনং আপুচ্ছিস্সতি, নিস্সযপটিপন্নস্স তিযোজনাতিক্কমে নিস্সযো পটিপ্পস্সম্ভিস্সতি, পারিৰাসিকেন তিযোজনং অতিক্কমিত্ৰা অরুণং উট্ঠাপেতব্বং ভৰিস্সতি, ভিক্খুনিযা তিযোজনে ঠত্ৰা আরামপ্পৰেসনং আপুচ্ছিতব্বং ভৰিস্সতি, সব্বম্পেতং উপচারসীমাপরিচ্ছেদৰসেনেৰ কত্তুং ৰট্টতি. তস্মা উপচারসীমাযমেৰ ভাজেতব্ব’’ন্তি.

২৭২৯. যে ৰিহারা সঙ্ঘেন কতিকায একলাভকা সমানলাভকা এত্থ এতেসু ৰিহারেসু দিন্নং ‘‘কতিকায দম্মী’’তি দিন্নং সব্বেহি ভিক্খূহি সহ ভাজেতব্বং চীৰরং কতিকায ৰুচ্চতীতি যোজনা.

অযমেত্থ ৰিনিচ্ছযো – কতিকা নাম সমানলাভকতিকা, তত্রেৰং কতিকা কাতব্বা – একস্মিং ৰিহারে সন্নিপতিতেহি ভিক্খূহি যং ৰিহারং সঙ্গণ্হিতুকামা সমানলাভং কাতুং ইচ্ছন্তি, অস্স নামং গহেত্ৰা ‘‘অসুকো নাম ৰিহারো পোরাণকো’’তি ৰা ‘‘বুদ্ধাধিৰুত্থো’’তি ৰা ‘‘অপ্পলাভো’’তি ৰা যং কিঞ্চি কারণং ৰত্ৰা ‘‘তং ৰিহারং ইমিনা ৰিহারেন সদ্ধিং একলাভং কাতুং সঙ্ঘস্স রুচ্চতী’’তি তিক্খত্তুং সাৰেতব্বং. এত্তাৰতা তস্মিং ৰিহারে নিসিন্নোপি ইধ নিসিন্নোৰ হোতি. তস্মিং ৰিহারেপি সঙ্ঘেন এৰমেৰ কাতব্বং. এত্তাৰতা ইধ নিসিন্নোপি তস্মিং ৰিহারে নিসিন্নোৰ হোতি. একস্মিং লাভে ভাজিযমানে ইতরস্মিং ঠিতস্স ভাগং গহেতুং ৰট্টতি. এৰং একেন ৰিহারেন সদ্ধিং বহূপি আৰাসা একলাভা কাতব্বাতি.

২৭৩০. চীৰরদাযকেন ধুৰকারা পাকৰত্তাদিনিচ্চসক্কারা যত্থ সঙ্ঘস্স ক্রীযন্তি করীযন্তি তত্থ তস্মিং ৰিহারে তেনেৰ দাযকেন সঙ্ঘস্স দিন্নং ৰিহারং ‘‘ভিক্খাপঞ্ঞত্তিযা দিন্ন’’ন্তি মহেসিনা ৰুত্তন্তি যোজনা.

তত্রাযং ৰিনিচ্ছযো – যস্মিং ৰিহারে ইমস্স চীৰরদাযকস্স সন্তকং সঙ্ঘস্স পাকৰত্তং ৰা ৰত্ততি, যস্মিং ৰা ৰিহারে ভিক্খূ অত্তনো ভারং কত্ৰা সদা গেহে ভোজেতি, যত্থ ৰা তেন আৰাসো কারিতো, সলাকভত্তাদীনি ৰা নিবদ্ধানি, যেন পন সকলোপি ৰিহারো পতিট্ঠাপিতো, তত্থ ৰত্তব্বমেৰ নত্থি, ইমে ধুৰকারা নাম. তস্মা সচে সো ‘‘যত্থ ময্হং ধুৰকারা করীযন্তি, এত্থ দম্মী’’তি ৰা ‘‘তত্থ দেথা’’তি ৰা ভণতি, বহূসু চেপি ঠানেসু ধুৰকারা হোন্তি, সব্বত্থ দিন্নমেৰ হোতি.

সচে পন একস্মিং ৰিহারে ভিক্খূ বহুতরা হোন্তি, তেহি ৰত্তব্বং ‘‘তুম্হাকং ধুৰকারে একত্থ ভিক্খূ বহূ, একত্থ অপ্পকা’’তি, সচে ‘‘ভিক্খুগণনায গণ্হথা’’তি ভণতি, তথা ভাজেত্ৰা গণ্হিতুং ৰট্টতি. এত্থ চ ৰত্থভেসজ্জাদি অপ্পকম্পি সুখেন ভাজীযতি, যদি পন মঞ্চো ৰা পীঠকং ৰা একমেৰ হোতি, তং পুচ্ছিত্ৰা যস্স ৰা ৰিহারস্স একৰিহারেপি ৰা যস্স সেনাসনস্স সো ৰিচারেতি, তত্থ দাতব্বং. সচে ‘‘অসুকভিক্খু গণ্হতূ’’তি ৰদতি, ৰট্টতি.

অথ ‘‘ময্হং ধুৰকারে দেথা’’তি ৰত্ৰা অৰিচারেত্ৰাৰ গচ্ছতি, সঙ্ঘস্সপি ৰিচারেতুং ৰট্টতি. এৰং পন ৰিচারেতব্বং – ‘‘সঙ্ঘত্থেরস্স ৰসনট্ঠানে দেথা’’তি ৰত্তব্বং. সচে তত্থ সেনাসনং পরিপুণ্ণং হোতি. যত্থ নপ্পহোতি, তত্থ দাতব্বং. সচে একো ভিক্খু ‘‘ময্হং ৰসনট্ঠানে সেনাসনপরিভোগভণ্ডং নত্থী’’তি ৰদতি, তত্থ দাতব্বন্তি.

২৭৩১. সঙ্ঘস্স পন যং দিন্নন্তি ৰিহারং পৰিসিত্ৰা ‘‘ইমানি চীৰরানি সঙ্ঘস্স দম্মী’’তি যং চীৰরং দিন্নং. ‘‘সম্মুখীভূতেনা’’তি ৰত্তব্বে গাথাবন্ধেন রস্সত্তং. সম্মুখিভূতেনাতি চ উপচারসীমায ঠিতেন. ভাজেতব্বন্তি ঘণ্টিং পহরিত্ৰা কালং ঘোসেত্ৰা ভাজেতব্বং. ইদমেত্থ মুখমত্তদস্সনং. ৰিনিচ্ছযো অট্ঠকথায (মহাৰ. অট্ঠ. ৩৭৯) ৰেদিতব্বো. সেয্যথিদং – চীৰরদাযকেন ৰিহারং পৰিসিত্ৰা ‘‘ইমানি চীৰরানি সঙ্ঘস্স দম্মী’’তি দিন্নেসু ভাজিযমানেসু সীমট্ঠস্স অসম্পত্তস্সপি ভাগং গণ্হন্তো ন ৰারেতব্বো. ৰিহারো মহা হোতি, থেরাসনতো পট্ঠায ৰত্থেসু দিয্যমানেসু অলসজাতিকা মহাথেরা পচ্ছা আগচ্ছন্তি, ‘‘ভন্তে, ৰীসতিৰস্সানং দিয্যতি, তুম্হাকং ঠিতিকা অতিক্কন্তা’’তি ন ৰত্তব্বা, ঠিতিকং ঠপেত্ৰা তেসং দত্ৰা পচ্ছা ঠিতিকায দাতব্বং.

‘‘অসুকৰিহারে কির বহুং চীৰরং উপ্পন্ন’’ন্তি সুত্ৰা যোজনন্তরিকৰিহারতোপি ভিক্খূ আগচ্ছন্তি, সম্পত্তসম্পত্তানং ঠিতট্ঠানতো পট্ঠায দাতব্বং. অসম্পত্তানম্পি উপচারসীমং পৰিট্ঠানং অন্তেৰাসিকাদীসু গণ্হন্তেসু দাতব্বমেৰ. ‘‘বহি উপচারসীমায ঠিতানং দেথা’’তি ৰদন্তি, ন দাতব্বং. সচে পন উপচারসীমং ওক্কন্তেহি একাবদ্ধা হুত্ৰা অত্তনো ৰিহারদ্ৰারে ৰা অন্তোৰিহারেযেৰ ৰা হোন্তি, পরিসৰসেন ৰড্ঢিতা নাম সীমা হোতি, তস্মা দাতব্বং. সঙ্ঘনৰকস্স দিন্নেপি পচ্ছা আগতানং দাতব্বমেৰ. দুতিযভাগে পন থেরাসনং আরুল়্হে আগতানং পঠমভাগো ন পাপুণাতি, দুতিযভাগতো ৰস্সগ্গেন দাতব্বং.

একস্মিং ৰিহারে দস ভিক্খূ হোন্তি, দস ৰত্থানি ‘‘সঙ্ঘস্স দেমা’’তি দেন্তি, পাটেক্কং ভাজেতব্বানি. সচে ‘‘সব্বানেৰ অম্হাকং পাপুণন্তী’’তি গহেত্ৰা গচ্ছন্তি, দুপ্পাপিতানি চেৰ দুগ্গহিতানি চ, গতগতট্ঠানে সঙ্ঘিকানেৰ হোন্তি. একং পন উদ্ধরিত্ৰা ‘‘ইদং তুম্হাকং পাপুণাতী’’তি সঙ্ঘত্থেরস্স দত্ৰা সেসানি ‘‘ইমানি অম্হাকং পাপুণন্তী’’তি গহেতুং ৰট্টতি.

একমেৰ ৰত্থং ‘‘সঙ্ঘস্স দেমা’’তি আহরন্তি, অভাজেত্ৰাৰ ‘‘অম্হাকং পাপুণাতী’’তি গণ্হন্তি, দুপ্পাপিতঞ্চেৰ দুগ্গহিতঞ্চ, সত্থকেন, পন হলিদ্দিআদিনা ৰা লেখং কত্ৰা একং কোট্ঠাসং ‘‘ইমং ঠানং তুম্হাকং পাপুণাতী’’তি সঙ্ঘত্থেরস্স পাপেত্ৰা সেসং ‘‘অম্হাকং পাপুণাতী’’তি গহেতুং ৰট্টতি. যং পন ৰত্থস্সেৰ পুপ্ফং ৰা ৰলি ৰা, তেন পরিচ্ছেদং কাতুং ন ৰট্টতি. সচে একং তন্তং উদ্ধরিত্ৰা ‘‘ইদং ঠানং তুম্হাকং পাপুণাতী’’তি সঙ্ঘত্থেরস্স দত্ৰা সেসং ‘‘অম্হাকং পাপুণাতী’’তি গণ্হন্তি, ৰট্টতি. খণ্ডং খণ্ডং ছিন্দিত্ৰা ভাজিযমানং ৰট্টতিযেৰ.

একভিক্খুকে ৰিহারে সঙ্ঘস্স চীৰরেসু উপ্পন্নেসু সচে পুব্বে ৰুত্তনযেনেৰ সো ভিক্খু ‘‘সব্বানি ময্হং পাপুণন্তী’’তি গণ্হাতি, সুগ্গহিতানি, ঠিতিকা পন ন তিট্ঠতি. সচে একেকং উদ্ধরিত্ৰা ‘‘ইদং ময্হং পাপুণাতী’’তি গণ্হাতি, ঠিতিকা তিট্ঠতি. তত্থ ঠিতিকায অট্ঠিতায পুন অঞ্ঞস্মিং চীৰরে উপ্পন্নে সচে একো ভিক্খু আগচ্ছতি, মজ্ঝে ছিন্দিত্ৰা দ্ৰীহিপি গহেতব্বং. ঠিতায ঠিতিকায পুন অঞ্ঞস্মিং চীৰরে উপ্পন্নে সচে নৰকতরো আগচ্ছতি, ঠিতিকা হেট্ঠা ওরোহতি. সচে ৰুড্ঢতরো আগচ্ছতি, ঠিতিকা উদ্ধং আরোহতি. অথ অঞ্ঞো নত্থি, পুন অত্তনো পাপেত্ৰা গহেতব্বং.

‘‘সঙ্ঘস্স দেমা’’তি ৰা ‘‘ভিক্খুসঙ্ঘস্স দেমা’’তি ৰা যেন কেনচি আকারেন সঙ্ঘং আমসিত্ৰা দিন্নং পন পংসুকূলিকানং ন ৰট্টতি ‘‘গহপতিচীৰরং পটিক্খিপামি, পংসুকূলিকঙ্গং সমাদিযামী’’তি ৰুত্তত্তা, ন পন অকপ্পিযত্তা. ভিক্খুসঙ্ঘেন অপলোকেত্ৰা দিন্নম্পি ন গহেতব্বং. যং পন ভিক্খু অত্তনো সন্তকং দেতি, তং ভিক্খুদত্তিযং নাম ৰট্টতি. পংসুকূলং পন ন হোতি. এৰং সন্তেপি ধুতঙ্গং ন ভিজ্জতি. ‘‘ভিক্খূনং দেম, থেরানং দেমা’’তি ৰুত্তে পন পংসুকূলিকানম্পি ৰট্টতি. ‘‘ইদং ৰত্থং সঙ্ঘস্স দেম, ইমিনা উপাহনত্থৰিকপত্তত্থৰিকআযোগঅংসবদ্ধকাদীনি করোথা’’তি দিন্নম্পি ৰট্টতি.

পত্তত্থৰিকাদীনং অত্থায দিন্নানি বহূনিপি হোন্তি, চীৰরত্থাযপি পহোন্তি, ততো চীৰরং কত্ৰা পারুপিতুং ৰট্টতি. সচে পন সঙ্ঘো ভাজিতাতিরিত্তানি ৰত্থানি ছিন্দিত্ৰা উপাহনত্থৰিকাদীনং অত্থায ভাজেতি, ততো গহেতুং ন ৰট্টতি. সামিকেহি ৰিচারিতমেৰ হি ৰট্টতি, ন ইতরং.

‘‘পংসুকূলিকসঙ্ঘস্স ধম্মকরণঅংসবদ্ধাদীনং অত্থায দেমা’’তি ৰুত্তেপি গহেতুং ৰট্টতি. পরিক্খারো নাম পংসুকূলিকানম্পি ইচ্ছিতব্বো. যং তত্থ অতিরেকং হোতি, তং চীৰরেপি উপনেতুং ৰট্টতি. সুত্তং সঙ্ঘস্স দেন্তি, পংসুকূলিকেহিপি গহেতব্বং. অযং তাৰ ৰিহারং পৰিসিত্ৰা ‘‘ইমানি চীৰরানি সঙ্ঘস্স দম্মী’’তি দিন্নেসু ৰিনিচ্ছযো.

সচে পন বহি উপচারসীমায অদ্ধানপটিপন্নে ভিক্খূ দিস্ৰা ‘‘সঙ্ঘস্স দম্মী’’তি সঙ্ঘত্থেরস্স ৰা সঙ্ঘনৰকস্স ৰা আরোচেতি, সচেপি যোজনং ফরিত্ৰা পরিসা ঠিতা হোতি, একাবদ্ধা চে, সব্বেসং পাপুণাতি. যে পন দ্ৰাদসহি হত্থেহি পরিসং অসম্পত্তা, তেসং ন পাপুণাতীতি.

২৭৩২. ইদানি ‘‘উভতোসঙ্ঘে দেতী’’তি মাতিকং ৰিৰরন্তো আহ ‘‘উভতোসঙ্ঘমুদ্দিস্সা’’তিআদি. উভতোসঙ্ঘমুদ্দিস্সাতি ভিক্খুসঙ্ঘং, ভিক্খুনিসঙ্ঘঞ্চ উদ্দিসিত্ৰা. দেতীতি ‘‘উভতোসঙ্ঘস্স দেমী’’তি দেতি. ‘‘বহু ৰা’’তি এত্থ ‘‘বহূ ৰা’’তি ৰত্তব্বে গাথাবন্ধৰসেন রস্সত্তং. ভিক্খুনীনং ভিক্খূ থোকা ৰা হোন্তু বহূ ৰা, পুগ্গলগ্গেন অকত্ৰা উভতোসঙ্ঘৰসেন সমভাগোৰ কাতুং ৰট্টতীতি যোজনা.

তত্রাযং ৰিনিচ্ছযো – ‘‘উভতোসঙ্ঘস্স দম্মী’’তি ৰুত্তেপি ‘‘দ্ৰেধাসঙ্ঘস্স দম্মি, দ্ৰিন্নং সঙ্ঘানং দম্মি, ভিক্খুসঙ্ঘস্স চ ভিক্খুনিসঙ্ঘস্স চ দম্মী’’তি ৰুত্তেপি উভতোসঙ্ঘস্স দিন্নমেৰ হোতি, দ্ৰে ভাগে সমে কত্ৰা একো দাতব্বো.

‘‘উভতোসঙ্ঘস্স চ তুয্হঞ্চ দম্মী’’তি ৰুত্তে সচে দস দস ভিক্খূ, ভিক্খুনিযো চ হোন্তি, একৰীসতি পটিৰীসে কত্ৰা একো পুগ্গলস্স দাতব্বো, দস ভিক্খুসঙ্ঘস্স, দস ভিক্খুনিসঙ্ঘস্স. যেন পুগ্গলিকো লদ্ধো, সো সঙ্ঘতোপি অত্তনো ৰস্সগ্গেন গহেতুং লভতি. কস্মা? উভতোসঙ্ঘগ্গহণেন গহিতত্তা.

‘‘উভতোসঙ্ঘস্স চ চেতিযস্স চ দম্মী’’তি ৰুত্তেপি এসেৰ নযো. ইধ পন চেতিযস্স সঙ্ঘতো পাপুণনকোট্ঠাসো নাম নত্থি, একপুগ্গলস্স পত্তকোট্ঠাসসমোৰ কোট্ঠাসো হোতি.

‘‘উভতোসঙ্ঘস্স চ তুয্হঞ্চ চেতিযস্স চা’’তি ৰুত্তে পন দ্ৰাৰীসতি কোট্ঠাসে কত্ৰা দস ভিক্খূনং, দস ভিক্খুনীনং, একো পুগ্গলস্স, একো চেতিযস্স দাতব্বো. তত্থ পুগ্গলো সঙ্ঘতোপি অত্তনো ৰস্সগ্গেন পুন গহেতুং লভতি. চেতিযস্স একোযেৰ.

‘‘ভিক্খুসঙ্ঘস্স চ ভিক্খুনীনঞ্চ দম্মী’’তি ৰুত্তে পন মজ্ঝে ভিন্দিত্ৰা ন দাতব্বং, ভিক্খূ চ ভিক্খুনিযো চ গণেত্ৰা দাতব্বং.

‘‘ভিক্খুসঙ্ঘস্স চ ভিক্খুনীনঞ্চ তুয্হঞ্চা’’তি ৰুত্তে পন পুগ্গলো ৰিসুং ন লভতি, পাপুণনট্ঠানতো একমেৰ লভতি. কস্মা? ভিক্খুসঙ্ঘগ্গহণেন গহিতত্তা.

‘‘ভিক্খুসঙ্ঘস্স চ ভিক্খুনীনঞ্চ তুয্হঞ্চ চেতিযস্স চা’’তি ৰুত্তেপি চেতিযস্স একপুগ্গলপটিৰীসো লব্ভতি, পুগ্গলস্স ৰিসুং ন লব্ভতি. তস্মা একং চেতিযস্স দত্ৰা অৰসেসং ভিক্খূ চ ভিক্খুনিযো চ গণেত্ৰা ভাজেতব্বং.

‘‘ভিক্খূনঞ্চ ভিক্খুনীনঞ্চ দম্মী’’তি ৰুত্তেপি ন মজ্ঝে ভিন্দিত্ৰা দাতব্বং, পুগ্গলগণনায এৰ ৰিভজিতব্বং.

‘‘ভিক্খূনঞ্চ ভিক্খুনীনঞ্চ তুয্হঞ্চ চেতিযস্স চা’’তি এৰং ৰুত্তেপি চেতিযস্স একপুগ্গলপটিৰীসো লব্ভতি, পুগ্গলস্স ৰিসুং নত্থি, ভিক্খূ চ ভিক্খুনিযো চ গণেত্ৰা এৰ ভাজেতব্বং. যথা চ ভিক্খুসঙ্ঘং আদিং কত্ৰা নযো নীতো, এৰং ভিক্খুনিসঙ্ঘং আদিং কত্ৰাপি নেতব্বো.

‘‘ভিক্খুসঙ্ঘস্স চ তুয্হঞ্চা’’তি ৰুত্তে পুগ্গলস্স ৰিসুং ন লব্ভতি, ৰস্সগ্গেনেৰ গহেতব্বং.

‘‘ভিক্খুসঙ্ঘস্স চ চেতিযস্স চা’’তি ৰুত্তে পন চেতিযস্স ৰিসুং পটিৰীসো লব্ভতি.

‘‘ভিক্খুসঙ্ঘস্স চ তুয্হঞ্চ চেতিযস্স চা’’তি ৰুত্তেপি চেতিযস্সেৰ লব্ভতি, ন পুগ্গলস্স.

‘‘ভিক্খূনঞ্চ তুয্হঞ্চা’’তি ৰুত্তেপি ৰিসুং ন লব্ভতি.

‘‘ভিক্খূনঞ্চ চেতিযস্স চা’’তি ৰুত্তে পন চেতিযস্স লব্ভতি.

‘‘ভিক্খূনঞ্চ তুয্হঞ্চ চেতিযস্স চা’’তি ৰুত্তেপি চেতিযস্সেৰ ৰিসুং লব্ভতি, ন পুগ্গলস্স. ভিক্খুনিসঙ্ঘং আদিং কত্ৰাপি এৰমেৰ যোজেতব্বং.

পুব্বে বুদ্ধপ্পমুখস্স উভতোসঙ্ঘস্স দানং দেন্তি, ভগৰা মজ্ঝে নিসীদতি, দক্খিণতো ভিক্খূ, ৰামতো ভিক্খুনিযো নিসীদন্তি, ভগৰা উভিন্নং সঙ্ঘত্থেরো, তদা ভগৰা অত্তনো লদ্ধপচ্চযে অত্তনাপি পরিভুঞ্জতি, ভিক্খূনম্পি দাপেতি. এতরহি পন পণ্ডিতমনুস্সা সধাতুকং পটিমং ৰা চেতিযং ৰা ঠপেত্ৰা বুদ্ধপ্পমুখস্স উভতোসঙ্ঘস্স দানং দেন্তি, পটিমায ৰা চেতিযস্স ৰা পুরতো আধারকে পত্তং ঠপেত্ৰা দক্খিণোদকং দত্ৰা ‘‘বুদ্ধানং দেমা’’তি তত্থ যং পঠমং খাদনীযং ভোজনীযং দেন্তি, ৰিহারং ৰা আহরিত্ৰা ‘‘ইদং চেতিযস্স দেমা’’তি পিণ্ডপাতঞ্চ মালাগন্ধাদীনি চ দেন্তি, তত্থ কথং পটিপজ্জিতব্বন্তি? মালাগন্ধাদীনি তাৰ চেতিযে আরোপেতব্বানি, ৰত্থেহি পটাকা, তেলেন পদীপা কাতব্বা. পিণ্ডপাতমধুফাণিতাদীনি পন যো নিবদ্ধং চেতিযস্স জগ্গকো হোতি পব্বজিতো ৰা গহট্ঠো ৰা, তস্স দাতব্বানি. নিবদ্ধজগ্গকে অসতি আহটপত্তং ঠপেত্ৰা ৰত্তং কত্ৰা পরিভুঞ্জিতুং ৰট্টতি. উপকট্ঠে কালে ভুঞ্জিত্ৰা পচ্ছাপি ৰত্তং কাতুং ৰট্টতিযেৰ.

মালাগন্ধাদীসু চ যং কিঞ্চি ‘‘ইদং হরিত্ৰা চেতিযস্স পূজং করোথা’’তি ৰুত্তে দূরম্পি হরিত্ৰা পূজেতব্বং. ‘‘ভিক্খং সঙ্ঘস্স হরা’’তি ৰুত্তেপি হরিতব্বং. সচে পন ‘‘অহং পিণ্ডায চরামি, আসনসালায ভিক্খূ অত্থি, তে হরিস্সন্তী’’তি ৰুত্তে ‘‘ভন্তে, তুয্হংযেৰ দম্মী’’তি ৰদতি, ভুঞ্জিতুং ৰট্টতি. অথ পন ‘‘ভিক্খুসঙ্ঘস্স দস্সামী’’তি হরন্তস্স গচ্ছতো অন্তরাৰ কালো উপকট্ঠো হোতি, অত্তনো পাপেত্ৰা ভুঞ্জিতুং ৰট্টতি.

২৭৩৩. যং পন চীৰরং ‘‘যস্মিং আৰাসে ৰস্সংৰুত্থস্স সঙ্ঘস্স দম্মী’’তি দেতি, তস্মিংযেৰ আৰাসে ৰুত্থৰস্সেন সঙ্ঘেন ৰা গণেন ৰা পুগ্গলেন ৰা তং চীৰরং ভাজেতব্বন্তি ৰণ্ণিতং দেসিতন্তি যোজনা.

তত্রাযং ৰিনিচ্ছযো – ৰিহারং পৰিসিত্ৰা ‘‘ইমানি চীৰরানি ৰস্সংৰুত্থসঙ্ঘস্স দম্মী’’তি দেতি, যাৰতিকা ভিক্খূ তস্মিং আৰাসে ৰস্সংৰুত্থা, যত্তকা ৰস্সচ্ছেদং অকত্ৰা পুরিমৰস্সংৰুত্থা, তেহি ভাজেতব্বং, অঞ্ঞেসং ন পাপুণাতি. দিসাপক্কন্তস্সাপি সতি গাহকে যাৰ কথিনস্স উব্ভারা দাতব্বং. অনত্থতে পন কথিনে অন্তোহেমন্তে এৰঞ্চ ৰত্ৰা দিন্নং পচ্ছিমৰস্সংৰুত্থানম্পি পাপুণাতীতি লক্খণঞ্ঞূ ৰদন্তি. অট্ঠকথাসু পনেতং অৰিচারিতং.

সচে পন বহি উপচারসীমাযং ঠিতো ‘‘ৰস্সংৰুত্থসঙ্ঘস্স দম্মী’’তি ৰদতি, সম্পত্তানং সব্বেসং পাপুণাতি. অথ ‘‘অসুকৰিহারে ৰস্সংৰুত্থসঙ্ঘস্সা’’তি ৰদতি, তত্র ৰস্সংৰুত্থানমেৰ যাৰ কথিনস্সুব্ভারা পাপুণাতি. সচে পন গিম্হানং পঠমদিৰসতো পট্ঠায এৰং ৰদতি, তত্র সম্মুখীভূতানংযেৰ সব্বেসং পাপুণাতি. কস্মা? পিট্ঠিসমযে উপ্পন্নত্তা. অন্তোৰস্সেযেৰ ‘‘ৰস্সং ৰসন্তানং দম্মী’’তি ৰুত্তে ছিন্নৰস্সা ন লভন্তি, ৰস্সং ৰসন্তাৰ লভন্তি. চীৰরমাসে পন ‘‘ৰস্সং ৰসন্তানং দম্মী’’তি ৰুত্তে পচ্ছিমিকায ৰস্সূপগতানংযেৰ পাপুণাতি, পুরিমিকায ৰস্সূপগতানঞ্চ ছিন্নৰস্সানঞ্চ ন পাপুণাতি.

চীৰরমাসতো পট্ঠায যাৰ হেমন্তস্স পচ্ছিমো দিৰসো, তাৰ ‘‘ৰস্সাৰাসিকং দেমা’’তি ৰুত্তে কথিনং অত্থতং ৰা হোতু অনত্থতং ৰা, অতীতৰস্সংৰুত্থানমেৰ পাপুণাতি. গিম্হানং পঠমদিৰসতো পট্ঠায ৰুত্তে পন মাতিকা আরোপেতব্বা ‘‘অতীতৰস্সাৰাসস্স পঞ্চ মাসা অভিক্কন্তা, অনাগতে চাতুমাসচ্চযেন ভৰিস্সতি, কতরৰস্সাৰাসস্স দেসী’’তি. সচে ‘‘অতীতৰস্সংৰুত্থানং দম্মী’’তি ৰদতি, তং অন্তোৰস্সং ৰুত্থানমেৰ পাপুণাতি. দিসাপক্কন্তানম্পি সভাগা গণ্হিতুং লভন্তি.

সচে ‘‘অনাগতে ৰস্সাৰাসিকং দম্মী’’তি ৰদতি, তং ঠপেত্ৰা ৰস্সূপনাযিকদিৰসে গহেতব্বং. অথ ‘‘অগুত্তো ৰিহারো, চোরভযং অত্থি, ন সক্কা ঠপেতুং, গণ্হিত্ৰা ৰা আহিণ্ডিতু’’ন্তি ৰুত্তে ‘‘সম্পত্তানং দম্মী’’তি ৰদতি, ভাজেত্ৰা গহেতব্বং. সচে ৰদতি ‘‘ইতো মে, ভন্তে, ততিযে ৰস্সে ৰস্সাৰাসিকং ন দিন্নং, তং দম্মী’’তি, তস্মিং অন্তোৰস্সে ৰুত্থভিক্খূনং পাপুণাতি. সচে তে দিসাপক্কন্তা, অঞ্ঞো ৰিস্সাসিকো গণ্হাতি, দাতব্বং. অথ একোযেৰ অৰসিট্ঠো, সেসা কালকতা, সব্বং একস্সেৰ পাপুণাতি. সচে একোপি নত্থি, সঙ্ঘিকং হোতি, সম্মুখীভূতেহি ভাজেতব্বন্তি.

২৭৩৪. যাগুযা পন পীতায ৰা ভত্তে ৰা ভুত্তে সচে পন আদিস্স ‘‘যেন মে যাগু পীতা, তস্স দম্মি, যেন মে ভত্তং ভুত্তং, তস্স দম্মী’’তি পরিচ্ছিন্দিত্ৰা চীৰরং দেতি, ৰিনযধরেন তত্থ তত্থেৰ দানং দাতব্বন্তি যোজনা. এস নযো খাদনীযচীৰরসেনাসনভেসজ্জাদীসু.

তত্রাযং ৰিনিচ্ছযো – ভিক্খূ অজ্জতনায ৰা স্ৰাতনায ৰা যাগুযা নিমন্তেত্ৰা তেসং ঘরং পৰিট্ঠানং যাগুং দেতি, যাগুং দত্ৰা পীতায যাগুযা ‘‘ইমানি চীৰরানি যেহি ময্হং যাগু পীতা, তেসং দম্মী’’তি দেতি, যেহি নিমন্তিতেহি যাগু পীতা, তেসংযেৰ পাপুণন্তি, যেহি পন ভিক্খাচারৰত্তেন ঘরদ্ৰারেন গচ্ছন্তেহি ৰা ঘরং পৰিট্ঠেহি ৰা যাগু লদ্ধা, যেসং ৰা আসনসালতো পত্তং আহরিত্ৰা মনুস্সেহি নীতা, যে ৰা থেরেহি পেসিতা, তেসং ন পাপুণন্তি.

সচে পন নিমন্তিতভিক্খূহি সদ্ধিং অঞ্ঞেপি বহূ আগন্ত্ৰা অন্তোগেহঞ্চ বহিগেহঞ্চ পূরেত্ৰা নিসিন্না, দাযকো চ এৰং ৰদতি ‘‘নিমন্তিতা ৰা হোন্তু অনিমন্তিতা ৰা, যেসং মযা যাগু দিন্না, সব্বেসং ইমানি ৰত্থানি হোন্তূ’’তি, সব্বেসং পাপুণন্তি. যেহি পন থেরানং হত্থতো যাগু লদ্ধা, তেসং ন পাপুণন্তি. অথ সো ‘‘যেহি ময্হং যাগু পীতা, সব্বেসং হোন্তূ’’তি ৰদতি, সব্বেসং পাপুণন্তি. ভত্তখাদনীযেসুপি এসেৰ নযো.

চীৰরে ৰাতি পুব্বেপি যেন ৰস্সং ৰাসেত্ৰা ভিক্খূনং চীৰরং দিন্নপুব্বং হোতি, সো চে ভিক্খূ ভোজেত্ৰা ৰদতি ‘‘যেসং মযা পুব্বে চীৰরং দিন্নং, তেসংযেৰ ইমং চীৰরং ৰা সুত্তং ৰা সপ্পিমধুফাণিতাদীনি ৰা হোন্তূ’’তি, সব্বং তেসংযেৰ পাপুণাতি.

সেনাসনে ৰাতি ‘‘যো মযা কারিতে ৰিহারে ৰা পরিৰেণে ৰা ৰসতি, তস্সিদং হোতূ’’তি ৰুত্তে তস্সেৰ হোতি.

ভেসজ্জে ৰাতি ‘‘মযং কালেন কালং থেরানং সপ্পিআদীনি ভেসজ্জানি দেম, যেহি তানি লদ্ধানি, তেসংযেৰিদং হোতূ’’তি ৰুত্তে তেসংযেৰ হোতীতি.

২৭৩৫. দীযতেতি দানন্তি কম্মসাধনেন চীৰরং ৰুচ্চতি. যং-সদ্দেন চীৰরস্স পরামট্ঠত্তা তং-সদ্দেনাপি তদেৰ পরামসিতব্বন্তি.

তত্রাযং ৰিনিচ্ছযো – ‘‘ইমং চীৰরং ইত্থন্নামস্স দম্মী’’তি এৰং পরম্মুখা ৰা ‘‘ইদং মে, ভন্তে, তুম্হাকং দম্মী’’তি এৰং সম্মুখা ৰা পাদমূলে ঠপেত্ৰা ৰা দেতি, তং তস্সেৰ হোতি. সচে পন ‘‘ইদং তুম্হাকঞ্চ তুম্হাকং অন্তেৰাসিকানঞ্চ দম্মী’’তি এৰং ৰদতি, থেরস্স চ অন্তেৰাসিকানঞ্চ পাপুণাতি. উদ্দেসং গহেতুং আগতো গহেত্ৰা গচ্ছন্তো চ অত্থি, তস্সাপি পাপুণাতি. ‘‘তুম্হেহি সদ্ধিং নিবদ্ধচারিকভিক্খূনং দম্মী’’তি ৰুত্তে উদ্দেসন্তেৰাসিকানং ৰত্তং কত্ৰা উদ্দেসপরিপুচ্ছাদীনি গহেত্ৰা ৰিচরন্তানং সব্বেসং পাপুণাতীতি.

২৭৩৭. ৰদতিচ্চেৰমেৰ চেতি ইচ্চেৰং যথাৰুত্তনযেন ৰদতি চে. তন্তি তং পরিক্খারং. তেসন্তি মাতুআদীনং. সঙ্ঘস্সেৰ সন্তকং হোতীতি যোজনা.

২৭৩৮. ‘‘পঞ্চন্নং…পে… হোতী’’তি ইমিনা পুরিমগাথাদ্ৰযেন ৰিত্থারিতমেৰত্থং সংখিপিত্ৰা দস্সেতি. পঞ্চন্নং সহধম্মিকানং. অচ্চযেতি কালকিরিযায. দানন্তি ‘‘মযি কালকতে ইমং পরিক্খারং তুয্হং হোতু, তৰ সন্তকং করোহী’’তিআদিনা পরিচ্চজনং. কিঞ্চিপীতি অন্তমসো দন্তকট্ঠম্পি. গিহীনং পন দানং তথা দাযকানং গিহীনমেৰ অচ্চযে রূহতীতি যোজনা.

২৭৩৯. ভিক্খু ৰা সামণেরো ৰা ভিক্খুনিউপস্সযে কালং করোতি, অস্স ভিক্খুস্স ৰা সামণেরস্স ৰা পরিক্খারা ভিক্খূনংযেৰ সন্তকা ভিক্খুসঙ্ঘস্সেৰ সন্তকাতি যোজনা. ভিক্খুসঙ্ঘস্সেৰ সন্তকা কালকতস্স ভিক্খুসঙ্ঘপরিযাপন্নত্তা.

২৭৪০. সামণেরী ৰাতি এত্থ ৰা-সদ্দেন ‘‘সিক্খমানা ৰা’’তি ইদং সঙ্গণ্হাতি. ৰিহারস্মিং ভিক্খূনং নিৰাসনট্ঠানে. তস্সাতি ভিক্খুনিযা ৰা সামণেরিযা ৰা সিক্খমানায ৰা পরিক্খারা ভিক্খুনীনং সন্তকা হোন্তীতি যোজনা. সন্তকাতি এত্থাপি ভিক্খূসু ৰুত্তনযেনেৰত্থো গহেতব্বো.

২৭৪১. দেহি নেত্ৰাতি এত্থ ‘‘ইমং চীৰর’’ন্তি পকরণতো লব্ভতি. ‘‘ইমং চীৰরং নেত্ৰা অসুকস্স দেহী’’তি যং চীৰরং দিন্নং, তং তস্স পুরিমস্সেৰ সন্তকং হোতি. ‘‘ইদং চীৰরং অসুকস্স দম্মী’’তি যং চীৰরং দিন্নং, তং যস্স পহিয্যতি, তস্স পচ্ছিমস্সেৰ সন্তকং হোতীতি যোজনা.

২৭৪২. যথাৰুত্তৰচনপ্পকারানুরূপেন সামিকে ঞত্ৰা সামিকেসু ৰিস্সাসেন ৰা তেসু মতেসু মতকচীৰরম্পি গণ্হিতুং ৰট্টতীতি দস্সেতুং আহ ‘‘এৰ’’ন্তিআদি. ‘‘মতস্স ৰা অমতস্স ৰা’’তি পদচ্ছেদো. ৰিস্সাসং ৰাপি গণ্হেয্যাতি জীৰন্তস্স সন্তকং ৰিস্সাসগ্গাহং গণ্হেয্য. গণ্হে মতকচীৰরন্তি মতস্স চীৰরং মতকপরিক্খারনীহারেন পাপেত্ৰা গণ্হেয্য.

২৭৪৩. রজতে অনেনাতি রজনন্তি মূলাদিসব্বমাহ. ৰন্তদোসেনাতি সৰাসনসমুচ্ছিন্নরাগাদিদোসেন. তাদিনাতি রূপাদীসু ছল়ারম্মণেসু রাগাদীনং অনুপ্পত্তিযা অট্ঠসু লোকধম্মেসু নিব্বিকারতায একসদিসেন.

২৭৪৪-৫. ‘‘মূলে’’তিআদীসু নিদ্ধারণে ভুম্মং. মূলরজনে হলিদ্দিং ঠপেত্ৰা সব্বং মূলরজনং ৰট্টতি. খন্ধেসু রজনেসু মঞ্জেট্ঠঞ্চ তুঙ্গহারকঞ্চ ঠপেত্ৰা সব্বং খন্ধরজনং ৰট্টতি. পত্তেসু রজনেসু অল্লিযা পত্তং তথা নীলিযা পত্তঞ্চ ঠপেত্ৰা সব্বং পত্তরজনং ৰট্টতি. পুপ্ফরজনেসু কুসুম্ভঞ্চ কিংসুকঞ্চ ঠপেত্ৰা সব্বং পুপ্ফরজনং ৰট্টতি. তচরজনে লোদ্দঞ্চ কণ্ডুলঞ্চ ঠপেত্ৰা সব্বং তচরজনং ৰট্টতি. ফলরজনং সব্বম্পি ৰট্টতীতি যোজনা.

মঞ্জেট্ঠন্তি একো সকণ্টকরুক্খো, ৰল্লিৰিসেসো চ, যস্স রজনং মঞ্জেট্ঠবীজৰণ্ণং হোতি. মঞ্জেট্ঠরুক্খস্স খন্ধো সেতৰণ্ণোতি সো ইধ ন গহেতব্বো রজনাধিকারত্তা. তুঙ্গহারকো নাম একো সকণ্টকরুক্খো, যস্স রজনং হরিতালৰণ্ণং হোতি. অল্লীতি চুল্লতাপিঞ্ছরুক্খো, যস্স পণ্ণরজনং হলিদ্দিৰণ্ণং হোতি. নীলীতি গচ্ছৰিসেসো, যস্স পন রজনং নীলৰণ্ণং হোতি. কিংসুকং নাম ৰল্লিকিংসুকপুপ্ফং, যস্স রজনং লোহিতৰণ্ণং হোতি.

২৭৪৬. কিলিট্ঠসাটকন্তি মলীনসাটকং. ধোৰিতুন্তি একৰারং ধোৰিতুং. অল্লিযা ধোতং কির সম্মদেৰ রজনং পটিগ্গণ্হাতি.

২৭৪৭. চীৰরানং কথা সেসাতি ভেদকারণপ্পকারকথাদিকা ইধ অৰুত্তকথা. পঠমে কথিনে ৰুত্তাতি সেসো. ৰিভাৰিনাতি খন্ধকভাণকেন.

চীৰরক্খন্ধককথাৰণ্ণনা.

ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায

মহাৰগ্গৰিনিচ্ছযৰণ্ণনা নিট্ঠিতা.