৯. চীৰরৰিপ্পৰাসৰিনিচ্ছযকথা

৫১. চীৰরেনৰিনাৰাসোতি তিচীৰরাধিট্ঠানেন অধিট্ঠিতানং তিণ্ণং চীৰরানং অঞ্ঞতরেন ৰিপ্পৰাসো. এৰং অধিট্ঠিতেসু হি তীসু চীৰরেসু একেনপি ৰিনা ৰসিতুং ন ৰট্টতি, ৰসন্তস্স সহ অরুণুগ্গমনা চীৰরং নিস্সগ্গিযং হোতি, তস্মা অরুণুগ্গমনসমযে চীৰরং অড্ঢতেয্যরতনপ্পমাণে হত্থপাসে কত্ৰা ৰসিতব্বং. গামনিৰেসনউদোসিতঅড্ডমাল়পাসাদহম্মিযনাৰাসত্থখেত্তধঞ্ঞকরণআরামৰিহাররুক্খমূলঅজ্ঝোকাসেসু পন অযং ৰিসেসো (পারা. অট্ঠ. ২.৪৭৭-৮) – সচে একস্স রঞ্ঞো গামভোজকস্স ৰা সন্তকো গামো হোতি, যেন কেনচি পাকারেন ৰা ৰতিযা ৰা পরিখায ৰা পরিক্খিত্তো চ, এৰরূপে গামে চীৰরং নিক্খিপিত্ৰা গামব্ভন্তরে যত্থ কত্থচি যথারুচিতট্ঠানে অরুণং উট্ঠাপেতুং ৰট্টতি. সচে পন অপরিক্খিত্তো হোতি, এৰরূপে গামে যস্মিং ঘরে চীৰরং নিক্খিত্তং, তস্মিং ৰত্থব্বং, তস্স ৰা ঘরস্স হত্থপাসে সমন্তা অড্ঢতেয্যরতনব্ভন্তরে ৰসিতব্বং. তং পমাণং অতিক্কমিত্ৰা সচেপি ইদ্ধিমা ভিক্খু আকাসে অরুণং উট্ঠাপেতি, চীৰরং নিস্সগ্গিযমেৰ হোতি.

সচে নানারাজূনং ৰা ভোজকানং ৰা গামো হোতি ৰেসালীকুসিনারাদিসদিসো পরিক্খিত্তো চ, এৰরূপে গামে যস্মিং ঘরে চীৰরং নিক্খিত্তং, তত্থ ৰা ৰত্থব্বং, তত্থ সদ্দসঙ্ঘট্টনেন ৰা জনসম্বাধেন ৰা ৰসিতুং অসক্কোন্তেন সভাযে ৰা ৰত্থব্বং নগরদ্ৰারমূলে ৰা. তত্রাপি ৰসিতুং অসক্কোন্তেন যত্থ কত্থচি ফাসুকট্ঠানে ৰসিত্ৰা অন্তোঅরুণে আগম্ম তেসংযেৰ সভাযনগরদ্ৰারমূলানং হত্থপাসে ৰসিতব্বং. ঘরস্স পন চীৰরস্স ৰা হত্থপাসে ৰত্তব্বমেৰ নত্থি.

সচে ঘরে অট্ঠপেত্ৰা ‘‘সভাযে ঠপেস্সামী’’তি সভাযং গচ্ছন্তো হত্থং পসারেত্ৰা ‘‘হন্দিমং চীৰরং ঠপেহী’’তি এৰং নিক্খেপসুখে হত্থপাসগতে কিস্মিঞ্চি আপণে চীৰরং নিক্খিপতি, তেন পুরিমনযেনেৰ সভাযে ৰা ৰত্থব্বং, দ্ৰারমূলে ৰা তেসং হত্থপাসে ৰা ৰসিতব্বং.

সচে নগরস্স বহূনিপি দ্ৰারানি হোন্তি বহূনি চ সভাযানি, সব্বত্থ ৰসিতুং ন ৰট্টতি. যস্সা পন ৰীথিযা চীৰরং ঠপিতং, যং তস্সা সম্মুখট্ঠানে সভাযঞ্চ দ্ৰারঞ্চ, তস্স সভাযস্স চ দ্ৰারস্স চ হত্থপাসে ৰসিতব্বং. এৰঞ্হি সতি সক্কা চীৰরস্স পৰত্তিং জানিতুং. সভাযং পন গচ্ছন্তেন যস্স আপণিকস্স হত্থে নিক্খিত্তং, সচে সো তং চীৰরং অতিহরিত্ৰা ঘরে নিক্খিপতি, ৰীথিহত্থপাসো ন রক্খতি, ঘরস্স হত্থপাসে ৰত্থব্বং. সচে মহন্তং ঘরং হোতি দ্ৰে ৰীথিযো ফরিত্ৰা ঠিতং, পুরতো ৰা পচ্ছতো ৰা হত্থপাসেযেৰ অরুণং উট্ঠাপেতব্বং. সভাযে নিক্খিপিত্ৰা পন সভাযে ৰা তস্স সম্মুখে নগরদ্ৰারমূলে ৰা তেসংযেৰ হত্থপাসে ৰা অরুণং উট্ঠাপেতব্বং. সচে পন গামো অপরিক্খিত্তো হোতি, যস্মিং ঘরে চীৰরং নিক্খিত্তং, তস্মিং ঘরে তস্স ঘরস্স ৰা হত্থপাসে ৰত্থব্বং.

সচে (পারা. ৪৮০) এককুলস্স সন্তকং নিৰেসনং হোতি পরিক্খিত্তঞ্চ নানাগব্ভং নানাওৰরকং, অন্তোনিৰেসনে চীৰরং নিক্খিপিত্ৰা অন্তোনিৰেসনে ৰত্থব্বং. সচে অপরিক্খিত্তং, যস্মিং গব্ভে চীৰরং নিক্খিত্তং হোতি, তস্মিং গব্ভে ৰত্থব্বং গব্ভস্স হত্থপাসে ৰা. সচে নানাকুলস্স নিৰেসনং হোতি পরিক্খিত্তঞ্চ নানাগব্ভং নানাওৰরকং, যস্মিং গব্ভে চীৰরং নিক্খিত্তং হোতি, তস্মিং গব্ভে ৰত্থব্বং, সব্বেসং সাধারণে ঘরদ্ৰারমূলে ৰা গব্ভস্স ৰা ঘরদ্ৰারমূলস্স ৰা হত্থপাসে. সচে অপরিক্খিত্তং হোতি, যস্মিং গব্ভে চীৰরং নিক্খিত্তং, তস্মিং গব্ভে ৰত্থব্বং গব্ভস্স ৰা হত্থপাসে. উদোসিতঅড্ডমাল়পাসাদহম্মিযেসুপি নিৰেসনে ৰুত্তনযেনেৰ ৰিনিচ্ছযো ৰেদিতব্বো.

সচে এককুলস্স নাৰা হোতি, অন্তোনাৰাযং চীৰরং নিক্খিপিত্ৰা অন্তোনাৰাযং ৰত্থব্বং. সচে নানাকুলস্স নাৰা হোতি নানাগব্ভা নানাওৰরকা, যস্মিং ওৰরকে চীৰরং নিক্খিত্তং হোতি, তস্মিং ওৰরকে ৰত্থব্বং ওৰরকস্স হত্থপাসে ৰা.

সচে এককুলস্স সত্থো হোতি, তস্মিং সত্থে চীৰরং নিক্খিপিত্ৰা পুরতো ৰা পচ্ছতো ৰা সত্তব্ভন্তরা ন ৰিজহিতব্বা, পস্সতো অব্ভন্তরং ন ৰিজহিতব্বং. একং অব্ভন্তরং অট্ঠৰীসতিহত্থং হোতি. সচে নানাকুলস্স সত্থো হোতি, সত্থে চীৰরং নিক্খিপিত্ৰা চীৰরস্স হত্থপাসে ৰসিতব্বং. সচে সত্থো গচ্ছন্তো গামং ৰা নদিং ৰা পরিযাদিযিত্ৰা তিট্ঠতি, অন্তোপৰিট্ঠেন সদ্ধিং একাবদ্ধো হুত্ৰা ওরঞ্চ পারঞ্চ ফরিত্ৰা ঠিতো হোতি, সত্থপরিহারো লব্ভতি. অথ গামে ৰা নদিযা ৰা পরিযাপন্নো হোতি, গামপরিহারো চেৰ নদীপরিহারো চ লব্ভতি. সচে ৰিহারসীমং অতিক্কমিত্ৰা তিট্ঠতি, অন্তোসীমায চ চীৰরং হোতি, ৰিহারং গন্ত্ৰা ৰসিতব্বং. সচে বহিসীমায চীৰরং হোতি, সত্থসমীপেযেৰ ৰসিতব্বং. সচে গচ্ছন্তো সত্থো সকটে ৰা ভগ্গে গোণে ৰা নট্ঠে অন্তরা ছিজ্জতি, যস্মিং কোট্ঠাসে চীৰরং নিক্খিত্তং, তত্থ ৰসিতব্বং.

সচে এককুলস্স খেত্তং হোতি পরিক্খিত্তঞ্চ, অন্তোখেত্তে চীৰরং নিক্খিপিত্ৰা অন্তোখেত্তে ৰত্থব্বং. সচে অপরিক্খিত্তং হোতি, চীৰরস্স হত্থপাসে ৰসিতব্বং. সচে নানাকুলস্স খেত্তং হোতি পরিক্খিত্তঞ্চ, অন্তোখেত্তে চীৰরং নিক্খিপিত্ৰা দ্ৰারমূলে ৰত্থব্বং দ্ৰারমূলস্স হত্থপাসে ৰা. সচে অপরিক্খিত্তং হোতি, চীৰরস্স হত্থপাসে ৰসিতব্বং.

সচে এককুলস্স ধঞ্ঞকরণং হোতি পরিক্খিত্তঞ্চ, অন্তোধঞ্ঞকরণে চীৰরং নিক্খিপিত্ৰা অন্তোধঞ্ঞকরণে ৰত্থব্বং. সচে অপরিক্খিত্তং হোতি, চীৰরস্স হত্থপাসে ৰসিতব্বং. সচে নানাকুলস্স ধঞ্ঞকরণং হোতি পরিক্খিত্তঞ্চ, অন্তোধঞ্ঞকরণে চীৰরং নিক্খিপিত্ৰা দ্ৰারমূলে ৰা ৰত্থব্বং দ্ৰারমূলস্স ৰা হত্থপাসে. সচে অপরিক্খিত্তং হোতি, চীৰরস্স হত্থপাসে ৰসিতব্বং. পুপ্ফারামফলারামেসুপি খেত্তে ৰুত্তনযেনেৰ ৰিনিচ্ছযো ৰেদিতব্বো.

সচে এককুলস্স ৰিহারো হোতি পরিক্খিত্তো চ, অন্তোৰিহারে চীৰরং নিক্খিপিত্ৰা অন্তোৰিহারে ৰত্থব্বং. সচে অপরিক্খিত্তো হোতি, যস্মিং ৰিহারে চীৰরং নিক্খিত্তং, তস্মিং ৰত্থব্বং তস্স ৰিহারস্স ৰা হত্থপাসে.

সচে এককুলস্স রুক্খমূলং হোতি, যং মজ্ঝন্হিকে কালে সমন্তা ছাযা ফরতি, অন্তোছাযায চীৰরং নিক্খিপিত্ৰা অন্তোছাযায ৰত্থব্বং. ৰিরল়সাখস্স পন রুক্খস্স আতপেন ফুট্ঠোকাসে ঠপিতং নিস্সগ্গিযমেৰ হোতি, তস্মা তাদিসস্স রুক্খস্স সাখচ্ছাযায ৰা খন্ধচ্ছাযায ৰা ঠপেতব্বং. সচে সাখায ৰা ৰিটপে ৰা ঠপেতি, উপরি অঞ্ঞসাখচ্ছাযায ফুট্ঠোকাসেযেৰ ঠপেতব্বং. খুজ্জরুক্খস্স ছাযা দূরং গচ্ছতি, ছাযায গতট্ঠানে ঠপেতুং ৰট্টতিযেৰ. সচে নানাকুলস্স রুক্খমূলং হোতি, চীৰরস্স হত্থপাসে ৰসিতব্বং.

অজ্ঝোকাসে পন অগামকে অরঞ্ঞে চীৰরং ঠপেত্ৰা তস্স সমন্তা সত্তব্ভন্তরে ৰসিতব্বং. অগামকং নাম অরঞ্ঞং ৰিঞ্ঝাটৰীআদীসু ৰা সমুদ্দমজ্ঝে ৰা মচ্ছবন্ধানং অগমনপথে দীপকেসু লব্ভতি. তাদিসে অরঞ্ঞে মজ্ঝে ঠিতস্স সমন্তা সত্তব্ভন্তরপরিচ্ছেদো, ৰিনিব্বেধেন চুদ্দস হোন্তি. মজ্ঝে নিসিন্নো পুরত্থিমায ৰা পচ্ছিমায ৰা দিসায পরিযন্তে ঠপিতচীৰরং রক্খতি. সচে পন অরুণুগ্গমনসমযে কেসগ্গমত্তম্পি পুরত্থিমং দিসং গচ্ছতি, পচ্ছিমায দিসায চীৰরং নিস্সগ্গিযং হোতি. এস নযো ইতরস্মিং. নিস্সগ্গিযং পন চীৰরং অনিস্সজ্জিত্ৰা পরিভুঞ্জন্তো দুক্কটং আপজ্জতি.

৫২. সচে পধানিকো ভিক্খু সব্বরত্তিং পধানমনুযুঞ্জিত্ৰা পচ্চূসসমযে ‘‘নহাযিস্সামী’’তি তীণি চীৰরানি তীরে ঠপেত্ৰা নদিং ওতরতি, নহাযন্তস্সেৰ চস্স অরুণং উট্ঠহতি, কিং কাতব্বং? সো হি যদি উত্তরিত্ৰা চীৰরং নিৰাসেতি, নিস্সগ্গিযং চীৰরং, অনিস্সজ্জিত্ৰা পরিভুঞ্জনপচ্চযা দুক্কটং আপজ্জতি. অথ নগ্গো গচ্ছতি, এৰম্পি দুক্কটং আপজ্জতীতি? নাপজ্জতি. সো হি যাৰ অঞ্ঞং ভিক্খুং দিস্ৰা ৰিনযকম্মং ন করোতি, তাৰ তেসং চীৰরানং অপরিভোগারহত্তা নট্ঠচীৰরট্ঠানে ঠিতো হোতি, নট্ঠচীৰরস্স চ অকপ্পিযং নাম নত্থি, তস্মা একং নিৰাসেত্ৰা দ্ৰে হত্থেন গহেত্ৰা ৰিহারং গন্ত্ৰা ৰিনযকম্মং কাতব্বং. সচে দূরে ৰিহারো হোতি, অন্তরামগ্গে মনুস্সা সঞ্চরন্তি, একং নিৰাসেত্ৰা একং পারুপিত্ৰা একং অংসকূটে ঠপেত্ৰা গন্তব্বং. সচে ৰিহারে সভাগং ভিক্খুং ন পস্সতি, ভিক্খাচারং গতা হোন্তি, সঙ্ঘাটিং বহিগামে ঠপেত্ৰা সন্তরুত্তরেন আসনসালং গন্ত্ৰা ৰিনযকম্মং কাতব্বং. সচে বহিগামে চোরভযং হোতি, পারুপিত্ৰা গন্তব্বং. সচে আসনসালা সম্বাধা হোতি, জনাকিণ্ণা ন সক্কা একমন্তে চীৰরং অপনেত্ৰা ৰিনযকম্মং কাতুং, একং ভিক্খুং আদায বহিগামং গন্ত্ৰা ৰিনযকম্মং কত্ৰা চীৰরানি পরিভুঞ্জিতব্বানি.

সচে থেরা ভিক্খূ দহরানং হত্থে পত্তচীৰরং দত্ৰা মগ্গং গচ্ছন্তা পচ্ছিমযামে সযিতুকামা হোন্তি, অত্তনো অত্তনো চীৰরং হত্থপাসে কত্ৰাৰ সযিতব্বং. সচে গচ্ছন্তানংযেৰ অসম্পত্তেসু দহরেসু অরুণং উগ্গচ্ছতি, চীৰরং নিস্সগ্গিযং হোতি, নিস্সযো পন ন পটিপ্পস্সম্ভতি. দহরানম্পি পুরতো গচ্ছন্তানং থেরেসু অসম্পত্তেসু এসেৰ নযো. মগ্গং ৰিরজ্ঝিত্ৰা অরঞ্ঞে অঞ্ঞমঞ্ঞং অপস্সন্তেসুপি এসেৰ নযো. সচে পন দহরা ‘‘মযং, ভন্তে, মুহুত্তং সযিত্ৰা অসুকস্মিং নাম ওকাসে তুম্হে সম্পাপুণিস্সামা’’তি ৰত্ৰা যাৰ অরুণুগ্গমনা সযন্তি, চীৰরঞ্চ নিস্সগ্গিযং হোতি, নিস্সযো চ পটিপ্পস্সম্ভতি. দহরে উয্যোজেত্ৰা থেরেসু সযন্তেসুপি এসেৰ নযো. দ্ৰেধাপথং দিস্ৰা থেরা ‘‘অযং মগ্গো’’, দহরা ‘‘অযং মগ্গো’’তি ৰত্ৰা অঞ্ঞমঞ্ঞস্স ৰচনং অগ্গহেত্ৰা গতা, সহ অরুণস্স উগ্গমনা চীৰরানি চ নিস্সগ্গিযানি হোন্তি, নিস্সযো চ পটিপ্পস্সম্ভতি. সচে দহরা মগ্গতো ওক্কম্ম ‘‘অন্তোঅরুণেযেৰ নিৰত্তিস্সামা’’তি ভেসজ্জত্থায গামং পৰিসিত্ৰা আগচ্ছন্তি, অসম্পত্তানংযেৰ চ নেসং অরুণো উগ্গচ্ছতি, চীৰরানি নিস্সগ্গিযানি হোন্তি, নিস্সযো পন ন পটিপ্পস্সম্ভতি. সচে পন ধেনুভযেন ৰা সুনখভযেন ৰা মুহুত্তং ঠত্ৰা ‘‘গমিস্সামা’’তি ঠত্ৰা ৰা নিসীদিত্ৰা ৰা গচ্ছন্তি, অন্তরা অরুণে উগ্গতে চীৰরানি চ নিস্সগ্গিযানি হোন্তি, নিস্সযো চ পটিপ্পস্সম্ভতি.

সচে ‘‘অন্তোঅরুণেযেৰ আগমিস্সামা’’তি অন্তোসীমাযং গামং পৰিট্ঠানং অন্তরা অরুণো উগ্গচ্ছতি, নেৰ চীৰরানি নিস্সগ্গিযানি হোন্তি, ন নিস্সযো পটিপ্পস্সম্ভতি. সচে পন ‘‘ৰিভাযতু তাৰা’’তি নিসীদন্তি, অরুণে উগ্গতে ন চীৰরানি নিস্সগ্গিযানি হোন্তি, নিস্সযো পন পটিপ্পস্সম্ভতি. সচে যেপি ‘‘অন্তোঅরুণেযেৰ আগমিস্সামা’’তি সামন্তৰিহারং ধম্মস্সৰনত্থায সউস্সাহা গচ্ছন্তি, অন্তরামগ্গেযেৰ চ নেসং অরুণো উগ্গচ্ছতি, চীৰরানি নিস্সগ্গিযানি হোন্তি, নিস্সযো পন ন পটিপ্পস্সম্ভতি. সচে ধম্মগারৰেন ‘‘যাৰপরিযোসানং সুত্ৰাৰ গমিস্সামা’’তি নিসীদন্তি, সহ অরুণস্স উগ্গমনা চীৰরানিপি নিস্সগ্গিযানি হোন্তি, নিস্সযো চ পটিপ্পস্সম্ভতি. থেরেন দহরং চীৰরধোৰনত্থায গামকং পেসেন্তেন অত্তনো চীৰরং পচ্চুদ্ধরিত্ৰাৰ দাতব্বং, দহরস্সপি চীৰরং পচ্চুদ্ধরাপেত্ৰাৰ ঠপেতব্বং. সচে অসতিযা গচ্ছতি, অত্তনো চীৰরং পচ্চুদ্ধরিত্ৰা দহরস্স চীৰরং ৰিস্সাসেন গহেত্ৰা ঠপেতব্বং. সচে থেরো ন সরতি, দহরোৰ সরতি, দহরেন অত্তনো চীৰরং পচ্চুদ্ধরিত্ৰা থেরস্স চীৰরং ৰিস্সাসেন গহেত্ৰা গন্ত্ৰা ৰত্তব্বং ‘‘ভন্তে, তুম্হাকং চীৰরং অধিট্ঠহিত্ৰা পরিভুঞ্জথা’’তি. অত্তনোপি চীৰরং অধিট্ঠাতব্বং. এৰং একস্স সতিযাপি আপত্তিমোক্খো হোতি.

ইতি পাল়িমুত্তকৰিনযৰিনিচ্ছযসঙ্গহে

চীৰরৰিপ্পৰাসৰিনিচ্ছযকথা সমত্তা.