৩০. গরুভণ্ডৰিনিচ্ছযকথা

২২৭. গরুভণ্ডানীতি এত্থ ‘‘পঞ্চিমানি, ভিক্খৰে, অৰিস্সজ্জিযানি ন ৰিস্সজ্জেতব্বানি সঙ্ঘেন ৰা গণেন ৰা পুগ্গলেন ৰা, ৰিস্সজ্জিতানিপি অৰিস্সজ্জিতানি হোন্তি, যো ৰিস্সজ্জেয্য, আপত্তি থুল্লচ্চযস্সা’’তিআদিনা (চূল়ৰ. ৩২১) নযেন দস্সিতানি আরামো আরামৰত্থু, ৰিহারো ৰিহারৰত্থু, মঞ্চো পীঠং ভিসি বিম্বোহনং, লোহকুম্ভী লোহভাণকং লোহৰারকো লোহকটাহং ৰাসি ফরসু কুঠারী কুদালো নিখাদনং, ৰল্লি ৰেল়ু মুঞ্জং পব্বজং তিণং মত্তিকা দারুভণ্ডং মত্তিকাভণ্ডন্তি ইমানি পঞ্চ গরুভণ্ডানি নাম.

তত্থ (চূল়ৰ. অট্ঠ. ৩২১) আরামো নাম পুপ্ফারামো ৰা ফলারামো ৰা. আরামৰত্থু নাম তেসংযেৰ আরামানং অত্থায পরিচ্ছিন্দিত্ৰা ঠপিতোকাসো, তেসু ৰা আরামেসু ৰিনট্ঠেসু তেসং পোরাণকভূমিভাগো. ৰিহারো নাম যং কিঞ্চি পাসাদাদি সেনাসনং. ৰিহারৰত্থু নাম তস্স পতিট্ঠানোকাসো. মঞ্চো নাম মসারকো বুন্দিকাবদ্ধো কুল়ীরপাদকো আহচ্চপাদকোতি ইমেসং চতুন্নং মঞ্চানং অঞ্ঞতরো. পীঠং নাম মসারকাদীনংযেৰ চতুন্নং পীঠানং অঞ্ঞতরং. ভিসি নাম উণ্ণভিসিআদীনং পঞ্চন্নং অঞ্ঞতরা. বিম্বোহনং নাম রুক্খতূললতাতূলপোটকীতূলানং অঞ্ঞতরং. লোহকুম্ভী নাম কাল়লোহেন ৰা তম্বলোহেন ৰা যেন কেনচি লোহেন কতকুম্ভী. লোহভাণকাদীসুপি এসেৰ নযো. এত্থ পন ভাণকন্তি অরঞ্জরো ৰুচ্চতি. ৰারকোতি ঘটো. কটাহং কটাহমেৰ. ৰাসিআদীসু ৰল্লিআদীসু চ দুৰিঞ্ঞেয্যং নাম নত্থি. পঞ্চাতি চ রাসিৰসেন ৰুত্তং, সরূপৰসেন পনেতানি পঞ্চৰীসতিৰিধানি হোন্তি. ৰুত্তঞ্হেতং –

‘‘দ্ৰিসঙ্গহানি দ্ৰে হোন্তি, ততিযং চতুসঙ্গহং;

চতুত্থং নৰকোট্ঠাসং, পঞ্চমং অট্ঠভেদনং.

‘‘ইতি পঞ্চহি রাসীহি, পঞ্চনিম্মললোচনো;

পঞ্চৰীসৰিধং নাথো, গরুভণ্ডং পকাসযী’’তি.

তত্রাযং ৰিনিচ্ছযকথা – ইদঞ্হি সব্বম্পি গরুভণ্ডং সেনাসনক্খন্ধকে ‘‘অৰিস্সজ্জিয’’ন্তি ৰুত্তং, কীটাগিরিৰত্থুস্মিং ‘‘অৰেভঙ্গিয’’ন্তি দস্সিতং, পরিৰারে পন –

‘‘অৰিস্সজ্জিযং অৰেভঙ্গিযং,

পঞ্চ ৰুত্তা মহেসিনা;

ৰিস্সজ্জেন্তস্স পরিভুঞ্জন্তস্স অনাপত্তি,

পঞ্হামেসা কুসলেহি চিন্তিতা’’তি. (পরি. ৪৭৯) –

আগতং. তস্মা মূলচ্ছেজ্জৰসেন অৰিস্সজ্জিযঞ্চ অৰেভঙ্গিযঞ্চ, পরিৰত্তনৰসেন পন ৰিস্সজ্জেন্তস্স পরিভুঞ্জন্তস্স চ অনাপত্তীতি এৰমেত্থ অধিপ্পাযো ৰেদিতব্বো.

২২৮. তত্রাযং অনুপুব্বিকথা – ইদং তাৰ পঞ্চৰিধম্পি চীৰরপিণ্ডপাতভেসজ্জত্থায উপনেতুং ন ৰট্টতি, থাৰরেন চ থাৰরং, গরুভণ্ডেন চ গরুভণ্ডং পরিৰত্তেতুং ৰট্টতি. থাৰরে পন খেত্তং ৰত্থু তল়াকং মাতিকাতি এৰরূপং ভিক্খুসঙ্ঘস্স ৰিচারেতুং ৰা সম্পটিচ্ছিতুং ৰা অধিৰাসেতুং ৰা ন ৰট্টতি, কপ্পিযকারকেহেৰ ৰিচারিততো কপ্পিযভণ্ডং ৰট্টতি. আরামেন পন আরামং আরামৰত্থুং ৰিহারং ৰিহারৰত্থুন্তি ইমানি চত্তারিপি পরিৰত্তেতুং ৰট্টতি.

তত্রাযং পরিৰত্তননযো – সঙ্ঘস্স নাল়িকেরারামো দূরে হোতি, কপ্পিযকারকা বহুতরং খাদন্তি, যম্পি ন খাদন্তি, ততো সকটৰেতনং দত্ৰা অপ্পমেৰ আহরন্তি, অঞ্ঞেসং পন তস্স আরামস্স অৰিদূরে গামৰাসীনং মনুস্সানং ৰিহারস্স সমীপে আরামো হোতি, তে সঙ্ঘং উপসঙ্কমিত্ৰা সকেন আরামেন তং আরামং যাচন্তি, সঙ্ঘেন ‘‘রুচ্চতি সঙ্ঘস্সা’’তি অপলোকেত্ৰা সম্পটিচ্ছিতব্বো. সচেপি ভিক্খূনং রুক্খসহস্সং হোতি, মনুস্সানং পঞ্চ সতানি, ‘‘তুম্হাকং আরামো খুদ্দকো’’তি ন ৰত্তব্বং. কিঞ্চাপি হি অযং খুদ্দকো, অথ খো ইতরতো বহুতরং আযং দেতি. সচেপি সমকমেৰ দেতি, এৰম্পি ইচ্ছিতিচ্ছিতক্খণে পরিভুঞ্জিতুং সক্কাতি গহেতব্বমেৰ. সচে পন মনুস্সানং বহুতরা রুক্খা হোন্তি, ‘‘ননু তুম্হাকং বহুতরা রুক্খা’’তি ৰত্তব্বং. সচে ‘‘অতিরেকং অম্হাকং পুঞ্ঞং হোতু, সঙ্ঘস্স দেমা’’তি ৰদন্তি, জানাপেত্ৰা সম্পটিচ্ছিতুং ৰট্টতি. ভিক্খূনং রুক্খা ফলধারিনো, মনুস্সানং রুক্খা ন তাৰ ফলং গণ্হন্তি, কিঞ্চাপি ন গণ্হন্তি, ‘‘ন চিরেন গণ্হিস্সন্তী’’তি সম্পটিচ্ছিতব্বমেৰ. মনুস্সানং রুক্খা ফলধারিনো, ভিক্খূনং রুক্খা ন তাৰ ফলং গণ্হন্তি, ‘‘ননু তুম্হাকং রুক্খা ফলধারিনো’’তি ৰত্তব্বং. সচে ‘‘গণ্হথ, ভন্তে, অম্হাকং পুঞ্ঞং ভৰিস্সতী’’তি দেন্তি, জানাপেত্ৰা সম্পটিচ্ছিতুং ৰট্টতি. এৰং আরামেন আরামো পরিৰত্তেতব্বো. এতেনেৰ নযেন আরামৰত্থুপি ৰিহারোপি ৰিহারৰত্থুপি আরামেন পরিৰত্তেতব্বং, আরামৰত্থুনা চ মহন্তেন ৰা খুদ্দকেন ৰা আরামআরামৰত্থুৰিহারৰিহারৰত্থূনি.

কথং ৰিহারেন ৰিহারো পরিৰত্তেতব্বো? সঙ্ঘস্স অন্তোগামে গেহং হোতি, মনুস্সানং ৰিহারমজ্ঝে পাসাদো হোতি, উভোপি অগ্ঘেন সমকা, সচে মনুস্সা তেন পাসাদেন তং গেহং যাচন্তি, সম্পটিচ্ছিতুং ৰট্টতি. ভিক্খূনং চে মহগ্ঘতরং গেহং হোতি, ‘‘মহগ্ঘতরং অম্হাকং গেহ’’ন্তি ৰুত্তে চ ‘‘কিঞ্চাপি মহগ্ঘতরং পব্বজিতানং অসারুপ্পং, ন সক্কা তত্থ পব্বজিতেহি ৰসিতুং, ইদং পন সারুপ্পং, গণ্হথা’’তি ৰদন্তি, এৰম্পি সম্পটিচ্ছিতুং ৰট্টতি. সচে পন মনুস্সানং মহগ্ঘং হোতি, ‘‘ননু তুম্হাকং গেহং মহগ্ঘ’’ন্তি ৰত্তব্বং. ‘‘হোতু, ভন্তে, অম্হাকং পুঞ্ঞং ভৰিস্সতি, গণ্হথা’’তি ৰুত্তে পন সম্পটিচ্ছিতুং ৰট্টতি. এৰম্পি ৰিহারেন ৰিহারো পরিৰত্তেতব্বো. এতেনেৰ নযেন ৰিহারৰত্থুপি আরামোপি আরামৰত্থুপি ৰিহারেন পরিৰত্তেতব্বং, ৰিহারৰত্থুনা চ মহগ্ঘেন ৰা অপ্পগ্ঘেন ৰা ৰিহারৰিহারৰত্থুআরামআরামৰত্থূনি. এৰং থাৰরেন থাৰরপরিৰত্তনং ৰেদিতব্বং.

গরুভণ্ডেন গরুভণ্ডপরিৰত্তনে পন মঞ্চপীঠং মহন্তং ৰা হোতু খুদ্দকং ৰা, অন্তমসো চতুরঙ্গুলপাদকং গামদারকেহি পংস্ৰাগারকেসু কীল়ন্তেহি কতম্পি সঙ্ঘস্স দিন্নকালতো পট্ঠায গরুভণ্ডং হোতি. সচেপি রাজরাজমহামত্তাদযো একপ্পহারেনেৰ মঞ্চসতং ৰা মঞ্চসহস্সং ৰা দেন্তি, সব্বে কপ্পিযমঞ্চা সম্পটিচ্ছিতব্বা, সম্পটিচ্ছিত্ৰা ‘‘ৰুড্ঢপটিপাটিযা সঙ্ঘিকপরিভোগেন পরিভুঞ্জথা’’তি দাতব্বা, পুগ্গলিকৰসেন ন দাতব্বা. অতিরেকমঞ্চে ভণ্ডাগারাদীসু পঞ্ঞপেত্ৰা পত্তচীৰরং নিক্খিপিতুম্পি ৰট্টতি. বহিসীমায ‘‘সঙ্ঘস্স দেমা’’তি দিন্নমঞ্চো সঙ্ঘত্থেরস্স ৰসনট্ঠানে দাতব্বো. তত্থ চে বহূ মঞ্চা হোন্তি, মঞ্চেন কম্মং নত্থি. যস্স ৰসনট্ঠানে কম্মং অত্থি, তত্থ ‘‘সঙ্ঘিকপরিভোগেন পরিভুঞ্জথা’’তি দাতব্বো. মহগ্ঘেন সতগ্ঘনকেন ৰা সহস্সগ্ঘনকেন ৰা মঞ্চেন অঞ্ঞং মঞ্চসতং লভতি, পরিৰত্তেত্ৰা গহেতব্বং. ন কেৰলং মঞ্চেন মঞ্চোযেৰ, আরামআরামৰত্থুৰিহারৰিহারৰত্থুপীঠভিসিবিম্বোহনানিপি পরিৰত্তেতুং ৰট্টন্তি. এস নযো পীঠভিসিবিম্বোহনেসুপি. এতেসু পন অকপ্পিযং ন পরিভুঞ্জিতব্বং, কপ্পিযং সঙ্ঘিকপরিভোগেন পরিভুঞ্জিতব্বং. অকপ্পিযং ৰা মহগ্ঘং কপ্পিযং ৰা পরিৰত্তেত্ৰা ৰুত্তৰত্থূনি গহেতব্বানি. অগরুভণ্ডুপগং পন ভিসিবিম্বোহনং নাম নত্থি.

২২৯. লোহকুম্ভী লোহভাণকং লোহকটাহন্তি ইমানি তীণি মহন্তানি ৰা হোন্তু খুদ্দকানি ৰা, অন্তমসো পসতমত্তউদকগণ্হনকানিপি গরুভণ্ডানিযেৰ. লোহৰারকো পন কাল়লোহতম্বলোহৰট্টলোহকংসলোহানং যেন কেনচি কতো সীহল়দীপে পাদগণ্হনকো ভাজেতব্বো. পাদো চ নাম মগধনাল়িযা পঞ্চনাল়িমত্তং গণ্হাতি, ততো অতিরেকগণ্হনকো গরুভণ্ডং. ইমানি তাৰ পাল়িযং আগতানি লোহভাজনানি. পাল়িযং পন অনাগতানি ভিঙ্গারপটিগ্গহউল়উঙ্কদব্বিকটচ্ছুপাতিতট্টকসরকসমুগ্গঅঙ্গারকপল্লধূমকটচ্ছুআদীনি খুদ্দকানি ৰা মহন্তানি ৰা সব্বানি গরুভণ্ডানি. পত্তো অযথালকং তম্বলোহথালকন্তি ইমানি পন ভাজনীযানি. কংসলোহৰট্টলোহভাজনৰিকতি সঙ্ঘিকপরিভোগেন ৰা গিহিৰিকটা ৰা ৰট্টতি, পুগ্গলিকপরিভোগেন ন ৰট্টতি. কংসলোহাদিভাজনং সঙ্ঘস্স দিন্নম্পি হি পারিহারিযং ন ৰট্টতি, গিহিৰিকটনীহারেনেৰ পরিভুঞ্জিতব্বন্তি মহাপচ্চরিযং ৰুত্তং.

ঠপেত্ৰা পন ভাজনৰিকতিং অঞ্ঞস্মিম্পি কপ্পিযলোহভণ্ডে অঞ্জনী অঞ্জনিসলাকা কণ্ণমলহরণী সূচি পণ্ণসূচি খুদ্দকো পিপ্ফলকো খুদ্দকং আরকণ্টকং কুঞ্চিকা তাল়ং কত্তরযট্ঠি ৰেধকো নত্থুদানং ভিণ্ডিৰালো লোহকূটো লোহকুত্তি লোহগুল়ো লোহপিণ্ডি লোহচক্কলিকং অঞ্ঞম্পি ৰিপ্পকতলোহভণ্ডং ভাজনীযং. ধূমনেত্তফালদীপরুক্খদীপকপল্লকওলম্বকদীপইত্থিপুরিসতিরচ্ছানগতরূপকানি পন অঞ্ঞানি ৰা ভিত্তিচ্ছদনকৰাটাদীসু উপনেতব্বানি অন্তমসো লোহখিলকং উপাদায সব্বানি লোহভণ্ডানি গরুভণ্ডানিযেৰ হোন্তি, অত্তনা লদ্ধানিপি পরিহরিত্ৰা পুগ্গলিকপরিভোগেন ন পরিভুঞ্জিতব্বানি, সঙ্ঘিকপরিভোগেন ৰা গিহিৰিকটানি ৰা ৰট্টন্তি. তিপুভণ্ডেপি এসেৰ নযো. খীরপাসাণমযানি তট্টকসরকাদীনি গরুভণ্ডানিযেৰ.

ঘটকো পন তেলভাজনং ৰা পাদগণ্হনকতো অতিরেকমেৰ গরুভণ্ডং. সুৰণ্ণরজতহারকূটজাতিফলিকভাজনানি গিহিৰিকটানিপি ন ৰট্টন্তি, পগেৰ সঙ্ঘিকপরিভোগেন ৰা পুগ্গলিকপরিভোগেন ৰা. সেনাসনপরিভোগে পন আমাসম্পি অনামাসম্পি সব্বং ৰট্টতি.

ৰাসিআদীসু যায ৰাসিযা ঠপেত্ৰা দন্তকট্ঠচ্ছেদনং ৰা উচ্ছুতচ্ছনং ৰা অঞ্ঞং মহাকম্মং কাতুং ন সক্কা, অযং ভাজনীযা. ততো মহন্ততরা যেন কেনচি আকারেন কতা ৰাসি গরুভণ্ডমেৰ. ফরসু পন অন্তমসো ৰেজ্জানং সিরাৰেধনফরসুপি গরুভণ্ডমেৰ. কুঠারিযং ফরসুসদিসোযেৰ ৰিনিচ্ছযো. যা পন আৰুধসঙ্খেপেন কতা, অযং অনামাসা. কুদালো অন্তমসো চতুরঙ্গুলমত্তোপি গরুভণ্ডমেৰ. নিখাদনং চতুরস্সমুখং ৰা হোতু দোণিমুখং ৰা ৰঙ্কং ৰা উজুকং ৰা, অন্তমসো সম্মুঞ্জনীদণ্ডকৰেধনম্পি দণ্ডবদ্ধং চে, গরুভণ্ডমেৰ. সম্মুঞ্জনীদণ্ডখণনকং পন অদণ্ডকং ফলমত্তমেৰ. যং সক্কা সিপাটিকায পক্খিপিত্ৰা পরিহরিতুং, তং ভাজনীযং. সিখরম্পি নিখাদনেনেৰ সঙ্গহিতং. যেহি মনুস্সেহি ৰিহারে ৰাসিআদীনি দিন্নানি হোন্তি, তে চে ঘরে দড্ঢে ৰা চোরেহি ৰা ৰিলুত্তে ‘‘দেথ নো, ভন্তে, উপকরণে, পুন পাকতিকে করিস্সামা’’তি ৰদন্তি, দাতব্বা. সচে আহরন্তি, ন ৰারেতব্বা, অনাহরন্তাপি ন চোদেতব্বা.

কম্মারতচ্ছকারচুন্দকারনল়কারমণিকারপত্তবন্ধকানং অধিকরণিমুট্ঠিকসণ্ডাসতুলাদীনি সব্বানি লোহমযউপকরণানি সঙ্ঘে দিন্নকালতো পট্ঠায গরুভণ্ডানি. তিপুকোট্টকসুৰণ্ণকারচম্মকারউপকরণেসুপি এসেৰ নযো. অযং পন ৰিসেসো – তিপুকোট্টকউপকরণেসুপি তিপুচ্ছেদনকসত্থকং, সুৰণ্ণকারউপকরণেসু সুৰণ্ণচ্ছেদনকসত্থকং, চম্মকারউপকরণেসু কতপরিকম্মচম্মচ্ছেদনকখুদ্দকসত্থকন্তি ইমানি ভাজনীযভণ্ডানি. নহাপিততুন্নকারউপকরণেসুপি ঠপেত্ৰা মহাকত্তরিং মহাসণ্ডাসং মহাপিপ্ফলিকঞ্চ সব্বং ভাজনীযং, মহাকত্তরিআদীনি গরুভণ্ডানি.

ৰল্লিআদীসু ৰেত্তৰল্লিআদিকা যা কাচি অড্ঢবাহুপ্পমাণা ৰল্লি সঙ্ঘস্স দিন্না ৰা তত্থজাতকা ৰা রক্খিতগোপিতা গরুভণ্ডং হোতি, সা সঙ্ঘকম্মে চ চেতিযকম্মে চ কতে সচে অতিরেকা হোতি, পুগ্গলিককম্মেপি উপনেতুং ৰট্টতি. অরক্খিতা পন গরুভণ্ডমেৰ ন হোতি. সুত্তমকচিৰাকনাল়িকেরহীরচম্মমযা রজ্জুকা ৰা যোত্তানি ৰা ৰাকে চ নাল়িকেরহীরে চ ৰট্টেত্ৰা কতা একৰট্টা ৰা দ্ৰিৰট্টা ৰা সঙ্ঘস্স দিন্নকালতো পট্ঠায গরুভণ্ডং. সুত্তং পন অৰট্টেত্ৰা দিন্নং মকচিৰাকনাল়িকেরহীরা চ ভাজনীযা. যেহি পনেতানি রজ্জুকযোত্তাদীনি দিন্নানি হোন্তি, তে অত্তনো করণীযেন হরন্তা ন ৰারেতব্বা.

যো কোচি অন্তমসো অট্ঠঙ্গুলসূচিদণ্ডকমত্তোপি ৰেল়ু সঙ্ঘস্স দিন্নো ৰা তত্থজাতকো ৰা রক্খিতগোপিতো গরুভণ্ডং, সোপি সঙ্ঘকম্মে চ চেতিযকম্মে চ কতে অতিরেকো পুগ্গলিককম্মে চ দাতুং ৰট্টতি. পাদগণ্হনকতেলনাল়ি পন কত্তরযট্ঠি উপাহনদণ্ডকো ছত্তদণ্ডকো ছত্তসলাকাতি ইদমেত্থ ভাজনীযভণ্ডং. দড্ঢগেহমনুস্সা গণ্হিত্ৰা গচ্ছন্তা ন ৰারেতব্বা. রক্খিতগোপিতং ৰেল়ুং গণ্হন্তেন সমকং ৰা অতিরেকং ৰা থাৰরং অন্তমসো তংঅগ্ঘনকৰল্লিকাযপি ফাতিকম্মং কত্ৰা গহেতব্বো, ফাতিকম্মং অকত্ৰা গণ্হন্তেন তত্থেৰ ৰল়ঞ্জেতব্বো. গমনকালে সঙ্ঘিকে আৰাসে ঠপেত্ৰা গন্তব্বং, অসতিযা গহেত্ৰা গতেন পহিণিত্ৰা দাতব্বো. দেসন্তরগতেন সম্পত্তৰিহারো সঙ্ঘিকাৰাসে ঠপেতব্বো.

তিণন্তি মুঞ্জঞ্চ পব্বজঞ্চ ঠপেত্ৰা অৰসেসং যং কিঞ্চি তিণং. যত্থ পন তিণং নত্থি, তত্থ পণ্ণেহি ছাদেন্তি, তস্মা পণ্ণম্পি তিণেনেৰ সঙ্গহিতং. ইতি মুঞ্জাদীসু যং কিঞ্চি মুট্ঠিপ্পমাণং তিণং তালপণ্ণাদীসু চ একপণ্ণম্পি সঙ্ঘস্স দিন্নং ৰা তত্থজাতকং ৰা বহারামে সঙ্ঘস্স তিণৰত্থুতো জাততিণং ৰা রক্খিতগোপিতং গরুভণ্ডং হোতি, তম্পি সঙ্ঘকম্মে চ চেতিযকম্মে চ কতে অতিরেকং পুগ্গলিককম্মে দাতুং ৰট্টতি, দড্ঢগেহমনুস্সা গহেত্ৰা গচ্ছন্তা ন ৰারেতব্বা. অট্ঠঙ্গুলপ্পমাণোপি রিত্তপোত্থকো গরুভণ্ডমেৰ.

মত্তিকা পকতিমত্তিকা ৰা হোতু পঞ্চৰণ্ণা ৰা সুধা ৰা সজ্জুরসকঙ্গুট্ঠসিলেসাদীসু ৰা যং কিঞ্চি দুল্লভট্ঠানে আনেত্ৰা দিন্নং তত্থজাতকং ৰা, রক্খিতগোপিতং তালফলপক্কমত্তং গরুভণ্ডং হোতি, তম্পি সঙ্ঘকম্মে চ চেতিযকম্মে চ নিট্ঠিতে অতিরেকং পুগ্গলিককম্মে চ দাতুং ৰট্টতি, হিঙ্গুহিঙ্গুলকহরিতালমনোসিলঞ্জনানি পন ভাজনীযভণ্ডানি.

দারুভণ্ডে ‘‘যো কোচি অট্ঠঙ্গুলসূচিদণ্ডমত্তোপি দারুভণ্ডকো দারুদুল্লভট্ঠানে সঙ্ঘস্স দিন্নো ৰা তত্থজাতকো ৰা রক্খিতগোপিতো, অযং গরুভণ্ডং হোতী’’তি কুরুন্দিযং ৰুত্তং. মহাঅট্ঠকথাযং পন সব্বম্পি দারুৰেল়ুচম্মপাসাণাদিৰিকতিং দারুভণ্ডেন সঙ্গণ্হিত্ৰা আসন্দিকতো পট্ঠায দারুভণ্ডে ৰিনিচ্ছযো ৰুত্তো. তত্রাযং নযো – আসন্দিকো সত্তঙ্গো ভদ্দপীঠং পীঠিকা একপাদকপীঠং আমণ্ডকৰণ্টকপীঠং ফলকং কোচ্ছং পলালপীঠন্তি ইমেসু তাৰ যং কিঞ্চি খুদ্দকং ৰা হোতু মহন্তং ৰা, সঙ্ঘস্স দিন্নং গরুভণ্ডং হোতি. পলালপীঠেন চেত্থ কদলিপত্তাদিপীঠানিপি সঙ্গহিতানি. ব্যগ্ঘচম্মওনদ্ধম্পি ৰাল়রূপপরিক্খিত্তং রতনপরিসিব্বিতং কোচ্ছং গরুভণ্ডমেৰ, ৰঙ্কফলকং দীঘফলকং চীৰরধোৰনফলকং ঘট্টনফলকং ঘট্টনমুগ্গরো দন্তকট্ঠচ্ছেদনগণ্ঠিকা দণ্ডমুগ্গরো অম্বণং রজনদোণি উদকপটিচ্ছকো দারুমযো ৰা দন্তমযো ৰা ৰেল়ুমযো ৰা সপাদকোপি অপাদকোপি সমুগ্গো মঞ্জূসা পাদগণ্হনকতো অতিরেকপ্পমাণো করণ্ডো উদকদোণি উদককটাহং উল়ুঙ্কো কটচ্ছু পানীযসরাৰং পানীযসঙ্খোতি এতেসুপি যং কিঞ্চি সঙ্ঘে দিন্নং গরুভণ্ডং. সঙ্খথালকং পন ভাজনীযং, তথা দারুমযো উদকতুম্বো.

পাদকথলিকমণ্ডলং দারুমযং ৰা হোতু চোল়পণ্ণাদিমযং ৰা, সব্বং গরুভণ্ডং. আধারকো পত্তপিধানং তালৰণ্টং বীজনী চঙ্কোটকং পচ্ছি যট্ঠিসম্মুঞ্জনী মুট্ঠিসম্মুঞ্জনীতি এতেসুপি যং কিঞ্চি খুদ্দকং ৰা হোতু মহন্তং ৰা, দারুৰেল়ুপণ্ণচম্মাদীসু যেন কেনচি কতং গরুভণ্ডমেৰ. থম্ভতুলাসোপানফলকাদীসু দারুমযং ৰা পাসাণমযং ৰা যং কিঞ্চি গেহসম্ভাররূপং যো কোচি কটসারকো যং কিঞ্চি ভূমত্থরণং যং কিঞ্চি অকপ্পিযচম্মং, সব্বং সঙ্ঘে দিন্নং গরুভণ্ডং, ভূমত্থরণং কাতুং ৰট্টতি. এল়কচম্মং পন পচ্চত্থরণগতিকং হোতি, তম্পি গরুভণ্ডমেৰ. কপ্পিযচম্মানি ভাজনীযানি. কুরুন্দিযং পন ‘‘সব্বং মঞ্চপ্পমাণং চম্মং গরুভণ্ড’’ন্তি ৰুত্তং.

উদুক্খলং মুসলং সুপ্পং নিসদং নিসদপোতো পাসাণদোণি পাসাণকটাহং তুরিৰেমভস্তাদি সব্বং পেসকারাদিভণ্ডং সব্বং কসিভণ্ডং সব্বং চক্কযুত্তকং যানং গরুভণ্ডমেৰ. মঞ্চপাদো মঞ্চঅটনী পীঠপাদো পীঠঅটনী ৰাসিফরসুআদীনং দণ্ডাতি এতেসু যং কিঞ্চি ৰিপ্পকততচ্ছনকম্মং অনিট্ঠিতমেৰ ভাজনীযং, তচ্ছিতমট্ঠং পন গরুভণ্ডং হোতি. অনুঞ্ঞাতৰাসিযা পন দণ্ডো ছত্তমুট্ঠিপণ্ণং কত্তরযট্ঠি উপাহনা অরণিসহিতং ধম্মকরণো পাদগণ্হনকতো অনতিরিত্তং আমলকতুম্বং আমলকঘটো লাবুকতুম্বং লাবুঘটো ৰিসাণকতুম্বন্তি সব্বমেৰেতং ভাজনীযং, ততো মহন্ততরং গরুভণ্ডং. হত্থিদন্তো ৰা যং কিঞ্চি ৰিসাণং ৰা অতচ্ছিতং যথাগতমেৰ ভাজনীযং. তেহি কতমঞ্চপাদাদীসু পুরিমসদিসোযেৰ ৰিনিচ্ছযো. তচ্ছিতনিট্ঠিতোপি হিঙ্গুকরণ্ডকো গণ্ঠিকা ৰিধো অঞ্জনী অঞ্জনীসলাকা উদকপুঞ্ছনীতি ইদং সব্বং ভাজনীযমেৰ.

মত্তিকাভণ্ডে সব্বং মনুস্সানং উপভোগপরিভোগং ঘটপীঠরাদিকুলালভাজনং পত্তকটাহং অঙ্গারকটাহং ধূমদানং দীপরুক্খকো দীপকপল্লিকা চযনিট্ঠকা ছদনিট্ঠকা থূপিকাতি সঙ্ঘস্স দিন্নকালতো পট্ঠায গরুভণ্ডং, পাদগণ্হনকতো অনতিরিত্তপ্পমাণো পন ঘটকো পত্তং থালকং কঞ্চনকো কুণ্ডিকাতি ইদমেত্থ ভাজনীযভণ্ডং. যথা চ মত্তিকাভণ্ডে, এৰং লোহভণ্ডেপি কুণ্ডিকা ভাজনীযকোট্ঠাসমেৰ ভজতীতি অযমেত্থ অনুপুব্বিকথা.

ইতি পাল়িমুত্তকৰিনযৰিনিচ্ছযসঙ্গহে

গরুভণ্ডৰিনিচ্ছযকথা সমত্তা.