৬. মচ্ছমংসৰিনিচ্ছযকথা

৩৮. এৰং কুলসঙ্গহৰিনিচ্ছযং কথেত্ৰা ইদানি মচ্ছমংসৰিনিচ্ছযং কথেতুং ‘‘মচ্ছমংসেসু পনা’’তিআদি ৰুত্তং. তত্থ থলে ঠপিতমত্তে মরতি, কেৰট্টাদীহি ৰা মারিযতীতি মচ্ছো. মচ্ছস্স ইদন্তি মচ্ছং, মসিযতে আমসিযতেতি মংসং, মচ্ছঞ্চ মংসঞ্চ মচ্ছমংসানি, তেসু. মচ্ছমংসেসু পন ৰিনিচ্ছযো এৰং ৰেদিতব্বোতি যোজনা. মচ্ছগ্গহণেনাতি এত্থ নিদ্ধারণং ন কাতব্বং. পন-সদ্দো পক্খন্তরত্থো, দিৰাসেয্যাদীসু ৰিনিচ্ছযতো অপরো মচ্ছমংসেসু ৰিনিচ্ছযো ৰেদিতব্বোতি অত্থো. গয্হতে অনেনাতি গহণং. কিং তং? সদ্দো, মচ্ছইতি গহণং মচ্ছগ্গহণং, তেন মচ্ছগ্গহণেন, মচ্ছসদ্দেনাতি অত্থো. মংসেসু পন…পে… অকপ্পিযানীতি এত্থ মনুস্সমংসং সমানজাতিমংসতো পটিক্খিত্তং. হত্থিঅস্সানং মংসানি রাজঙ্গতো, সুনখঅহীনং জেগুচ্ছভাৰতো, সেসানং ৰাল়মিগত্তা ভিক্খূনং পরিবন্ধৰিমোচনত্থং পটিক্খিত্তন্তি দট্ঠব্বং.

তিকোটিপরিসুদ্ধন্তি দিট্ঠসুতপরিসঙ্কিতসঙ্খাতাহি তীহি কোটীহি তীহি আকারেহি তীহি কারণেহি পরিসুদ্ধং, ৰিমুত্তন্তি অত্থো. তত্থ অদিট্ঠঅসুতানি চক্খুৰিঞ্ঞাণসোতৰিঞ্ঞাণানং অনারম্মণভাৰতো জানিতব্বানি. অপরিসঙ্কিতং পন কথং জানিতব্বন্তি আহ ‘‘অপরিসঙ্কিতং পনা’’তিআদি, তীণি পরিসঙ্কিতানি ঞত্ৰা তেসং পটিপক্খৰসেন অপরিসঙ্কিতং জানিতব্বন্তি অত্থো. ইদানি তানি তীণি পরিসঙ্কিতানি চ এৰং পরিসঙ্কিতে সতি ভিক্খূহি কত্তব্বৰিধিঞ্চ তেন ৰিধিনা অপরিসঙ্কিতে সতি কত্তব্বভাৰঞ্চ ৰিত্থারতো দস্সেতুং ‘‘কথ’’ন্তিআদিমাহ. তত্থ দিস্ৰা পরিসঙ্কিতং দিট্ঠপরিসঙ্কিতং নাম. সুত্ৰা পরিসঙ্কিতং সুতপরিসঙ্কিতং নাম. অদিস্ৰা অসুত্ৰা তক্কেন অনুমানেন পরিসঙ্কিতং তদুভযৰিনিমুত্তপরিসঙ্কিতং নাম. তং তিৰিধম্পি পরিসঙ্কিতসামঞ্ঞেন একা কোটি হোতি, ততো ৰিমুত্তং অপরিসঙ্কিতং নাম. এৰং অদিট্ঠং অসুতং অপরিসঙ্কিতং মচ্ছমংসং তিকোটিপরিসুদ্ধং হোতি.

জালং মচ্ছবন্ধনং. ৰাগুরা মিগবন্ধিনী. কপ্পতীতি যদি তেসং ৰচনেন সঙ্কা নিৰত্ততি, ৰট্টতি, ন তং ৰচনং লেসকপ্পং কাতুং ৰট্টতি. তেনেৰ ৰক্খতি ‘‘যত্থ চ নিব্বেমতিকো হোতি, তং সব্বং কপ্পতী’’তি. পৰত্তমংসন্তি আপণাদীসু পৰত্তং ৰিক্কাযিকং ৰা মতমংসং ৰা. মঙ্গলাদীনন্তি আদি-সদ্দেন আহুনপাহুনাদিকে সঙ্গণ্হাতি. ভিক্খূনংযেৰ অত্থায অকতন্তি এত্থ অট্ঠানপ্পযুত্তো এৰ-সদ্দো, ভিক্খূনং অত্থায অকতমেৰাতি সম্বন্ধিতব্বং, তস্মা ভিক্খূনঞ্চ মঙ্গলাদীনঞ্চাতি মিস্সেত্ৰা কতম্পি ন ৰত্ততীতি ৰেদিতব্বং. কেচি পন ‘‘যথাঠিতৰসেন অৰধারণং গহেত্ৰা ৰট্টতী’’তি ৰদন্তি, তং ন সুন্দরং. যত্থ চ নিব্বেমতিকো হোতীতি ভিক্খূনং অত্থায কতেপি সব্বেন সব্বং পরিসঙ্কিতাভাৰমাহ.

৩৯. তমেৰত্থং আৰিকাতুং ‘‘সচে পনা’’তিআদি ৰুত্তং. ইতরেসং ৰট্টতীতি অজানন্তানং ৰট্টতি, জানতোৰেত্থ আপত্তি হোতীতি. তেযেৰাতি যে উদ্দিস্স কতং, তেযেৰ. উদ্দিস্স কতমংসপরিভোগতো অকপ্পিযমংসপরিভোগে ৰিসেসং দস্সেতুং ‘‘অকপ্পিযমংসং পনা’’তিআদি ৰুত্তং. পুরিমস্মিং সচিত্তকাপত্তি, ইতরস্মিং অচিত্তকা. তেনাহ ‘‘অকপ্পিযমংসং অজানিত্ৰা ভুঞ্জন্তস্সপি আপত্তিযেৰা’’তি. ‘‘পরিভোগকালে পুচ্ছিত্ৰা পরিভুঞ্জিস্সামীতি ৰা গহেত্ৰা পুচ্ছিত্ৰাৰ পরিভুঞ্জিতব্ব’’ন্তি (ৰি. সঙ্গ. অট্ঠ. ৩৯) ৰচনতো অকপ্পিযমংসং অজানিত্ৰা পটিগ্গণ্হন্তস্স পটিগ্গহণে অনাপত্তি সিদ্ধা. অজানিত্ৰা পরিভুঞ্জন্তস্সেৰ হি আপত্তি ৰুত্তা. ৰত্তন্তি ৰদন্তীতি ইমিনা আপত্তি নত্থীতি দস্সেতি.

ইতি ৰিনযসঙ্গহসংৰণ্ণনাভূতে ৰিনযালঙ্কারে

মচ্ছমংসৰিনিচ্ছযকথালঙ্কারো নাম

ছট্ঠো পরিচ্ছেদো.