অঞ্জনকথা

অঞ্জনকথাযং ‘‘অনুজানামি, ভিক্খৰে, অঞ্জনং কাল়ঞ্জনং রসঞ্জনং সোতঞ্জনং গেরুকং কপল্ল’’ন্তি (মহাৰ. ২৬৫) ৰচনতো ভিক্খূনং চক্খুরোগে সতি অঞ্জনাদীনি ৰট্টন্তি. তত্থ ‘‘অঞ্জনন্তি সব্বসঙ্গাহিকৰচনমেতং. কাল়ঞ্জনন্তি একা অঞ্জনজাতি. রসঞ্জনন্তি নানাসম্ভারেহি কতং. সোতঞ্জনন্তি নদীসোতাদীসু উপ্পজ্জনকঅঞ্জনং. গেরুকো নাম সুৰণ্ণগেরুকো. কপল্লন্তি দীপসিখতো গহিতমসী’’তি অট্ঠকথাযং (মহাৰ. অট্ঠ. ২৬৪) ৰুত্তং. সারত্থদীপনিযং (সারত্থ. টী. মহাৰগ্গ ৩.২৬৫) ‘‘সুৰণ্ণগেরুকোতি সুৰণ্ণতুত্থাদী’’তি ৰুত্তং. ৰিমতিৰিনোদনিযম্পি (ৰি. ৰি. টী. মহাৰগ্গ ২.২৬৪-২৬৫) তথেৰ ৰুত্তং. ‘‘অনুজানামি, ভিক্খৰে, চন্দনং তগরং কাল়ানুসারিযং তালীসং ভদ্দমুত্তক’’ন্তি (মহাৰ. ২৬৫) ৰচনতো অঞ্জনূপপিসনেহি অত্থে সতি ইমানি চন্দনাদীনি ৰট্টন্তি. তত্থ ‘‘চন্দনন্তি লোহিতচন্দনাদিকং যং কিঞ্চি চন্দনং. তগরাদীনি পাকটানি. অঞ্ঞানিপি নীলুপ্পলাদীনি ৰট্টন্তিযেৰ. অঞ্জনূপপিসনেহীতি অঞ্জনেহি সদ্ধিং একতো পিসিতব্বেহি. ন হি কিঞ্চি অঞ্জনূপপিসনং ন ৰট্টতী’’তি অট্ঠকথাযং (মহাৰ. অট্ঠ. ২৬৪) টীকাযং (সারত্থ. টী. মহাৰগ্গ ৩.২৬৫) পন ‘‘অঞ্জনূপপিসনন্তি অঞ্জনত্থায উপপিসিতব্বং যং কিঞ্চি চুণ্ণজাতী’’তি ৰুত্তং. ৰিমতিৰিনোদনিযং (ৰি. ৰি. টী. মহাৰগ্গ ২.২৬৪-২৬৫) পন ‘‘পাল়িযং অঞ্জনূপপিসনন্তি অঞ্জনে উপনেতুং পিসিতব্বভেসজ্জ’’ন্তি ৰুত্তং.

‘‘অনুজানামি, ভিক্খৰে, অঞ্জনি’’ন্তি (মহাৰ. ২৬৫) ৰচনতো অঞ্জনঠপনট্ঠানং ৰট্টতি. ‘‘ন, ভিক্খৰে, উচ্চাৰচা অঞ্জনী ধারেতব্বা, যো ধারেয্য, আপত্তি দুক্কটস্স. অনুজানামি, ভিক্খৰে, অট্ঠিমযং দন্তমযং ৰিসাণমযং নল়মযং ৰেল়ুমযং কট্ঠমযং জতুমযং লোহমযং সঙ্খনাভিময’’ন্তি (মহাৰ. ২৬৫) ৰচনতো এতানি কপ্পিযানি. তত্থ অট্ঠিমযন্তি মনুস্সট্ঠিং ঠপেত্ৰা অৰসেসঅট্ঠিমযং. দন্তমযন্তি হত্থিদন্তাদিসব্বদন্তমযং. ৰিসাণমযেপি অকপ্পিযং নাম নত্থি. নল়মযাদযো একন্তকপ্পিযাযেৰ.

‘‘অনুজানামি, ভিক্খৰে, অপিধান’’ন্তি (মহাৰ. ২৬৫) ৰচনতো অঞ্জনীঅপিধানম্পি ৰট্টতি. ‘‘অনুজানামি, ভিক্খৰে, সুত্তকেন বন্ধিত্ৰা অঞ্জনিযা বন্ধিতু’’ন্তি (মহাৰ. ২৬৫) ৰচনতো অপিধানং সুত্তকেন বন্ধিত্ৰা অঞ্জনিযা বন্ধিতব্বং. ‘‘অনুজানামি, ভিক্খৰে, সুত্তকেন সিব্বেতু’’ন্তি (মহাৰ. ২৬৫) ৰচনতো অপতনত্থায অঞ্জনীসুত্তকেন সিব্বেতুং ৰট্টতি. ‘‘অনুজানামি, ভিক্খৰে, অঞ্জনিসলাক’’ন্তি (মহাৰ. ২৬৫) ৰচনতো অঞ্জনিসলাকম্পি ৰট্টতি. ‘‘ন, ভিক্খৰে, উচ্চাৰচা অঞ্জনিসলাকা ধারেতব্বা, যো ধারেয্য, আপত্তি দুক্কটস্স. অনুজানামি, ভিক্খৰে, অট্ঠিমযং…পে… সঙ্খনাভিময’’ন্তি (মহাৰ. ২৬৫) ৰচনতো এতাযেৰ অঞ্জনিসলাকা ৰট্টন্তি. ‘‘অনুজানামি, ভিক্খৰে, সলাকট্ঠানিয’’ন্তি (মহাৰ. ২৬৫) ৰচনতো অঞ্জনিসলাকট্ঠানিযম্পি ৰট্টতি. তত্থ সলাকট্ঠানিযন্তি যত্থ সলাকং ওদহন্তি, তং সুসিরদণ্ডকং ৰা থৰিকং ৰা অনুজানামীতি অত্থো. ‘‘অনুজানামি, ভিক্খৰে, অঞ্জনিত্থৰিক’’ন্তি (মহাৰ. ২৬৫) ৰচনতো থৰিকম্পি ৰট্টতি. ‘‘অনুজানামি, ভিক্খৰে, অংসবদ্ধকং বন্ধনসুত্তক’’ন্তি (মহাৰ. ২৬৫) ৰচনতো অঞ্জনিত্থৰিকায অংসে লগ্গনত্থায অংসবদ্ধকম্পি বন্ধনসুত্তকম্পি ৰট্টতি.