জতুভেসজ্জকথা

জতুভেসজ্জকথাযং ‘‘অনুজানামি, ভিক্খৰে, জতূনি ভেসজ্জানি হিঙ্গুং হিঙ্গুজতুং হিঙ্গুসিপাটিকং তকং তকপত্তিং তকপণ্ণিং সজ্জুলসং, যানি ৰা পনঞ্ঞানিপি অত্থি জতূনি ভেসজ্জানি নেৰ খাদনীযে খাদনীযত্থং ফরন্তি, ন ভোজনীযে ভোজনীযত্থং ফরন্তি, তানি পটিগ্গহেত্ৰা যাৰজীৰং পরিহরিতুং, সতি পচ্চযে পরিভুঞ্জিতুং, অসতি পচ্চযে পরিভুঞ্জন্তস্স আপত্তি দুক্কটস্সা’’তি (মহাৰ. ২৬৩) ৰচনতো তানি জতূনি ভেসজ্জানি পটিগ্গহেত্ৰা যাৰজীৰং পরিহরিতুং, সতি পচ্চযে পরিভুঞ্জিতুং ৰট্টতি. তত্থ হিঙ্গুহিঙ্গুজতুহিঙ্গুসিপাটিকা হিঙ্গুজাতিযোযেৰ. তকতকপত্তিতকপণ্ণযো লাখাজাতিযো.

ৰজিরবুদ্ধিটীকাযং (ৰজির. টী. মহাৰগ্গ ২৬৩) পন ‘‘হিঙ্গুজতু নাম হিঙ্গুরুক্খস্স দণ্ডপল্লৰপৰাল়পাকনিপ্ফন্না. হিঙ্গুসিপাটিকা নাম তস্স মূলসাখপাকনিপ্ফন্না. তকং নাম তস্স রুক্খস্স তচপাকোদকং. তকপত্তীতি তস্স পত্তপাকোদকং. তকপণ্ণীতি তস্স ফলপাকোদকং. অথ ৰা ‘তকং নাম লাখা. তকপত্তীতি কিত্তিমলোহসাখা. তকপণ্ণীতি পক্কলাখা’তি লিখিতং. সতি পচ্চযেতি এত্থ সতিপচ্চযতা গিলানাগিলানৰসেন দ্ৰিধা ৰেদিতব্বা. ৰিকালভোজনসিক্খাপদস্স হি অনাপত্তিৰারে যামকালিকাদীনং তিণ্ণম্পি অৰিসেসেন সতিপচ্চযতা ৰুত্তা. ইমস্মিং খন্ধকে ‘অনুজানামি, ভিক্খৰে, গিলানস্স গুল়ং অগিলানস্স গুল়োদকং. অনুজানামি, ভিক্খৰে, গিলানস্স লোণসোৰীরকং, অগিলানস্স উদকসম্ভিন্ন’ন্তি (মহাৰ. ২৭৩) ৰুত্তং, তস্মা সিদ্ধং ‘সতিপচ্চযতা গিলানাগিলানৰসেন দুৰিধা’তি, অঞ্ঞথা অসতি পচ্চযে গুল়োদকাদি আপজ্জতি, ততো চ পাল়িৰিরোধো. আহারত্থন্তি আহারপযোজনং, আহারকিচ্চযাপনন্তি অত্থোতি চ. তেলপরিভোগেনাতি সত্তাহকালিকপরিভোগেন. পিট্ঠেহীতি পিসিততেলেহি. কোট্ঠফলন্তি কোট্ঠরুক্খস্স ফলং, মদনফলং ৰাতি চ লিখিত’’ন্তি ৰুত্তং.