দুতিযভেসজ্জকথা

দুতিযভেসজ্জকথাযং ‘‘অনুজানামি, ভিক্খৰে, তানি পঞ্চ ভেসজ্জানি পটিগ্গহেত্ৰা কালেপি ৰিকালেপি পরিভুঞ্জিতু’’ন্তি (মহাৰ. ২৬১) ৰচনতো ‘‘তানি পঞ্চ ভেসজ্জানি কালে পটিগ্গহেত্ৰা কালে পরিভুঞ্জন্তানং তেসং ভিক্খূনং যানিপি তানি পাকতিকানি লূখানি ভোজনানি, তানি নচ্ছাদেন্তি, পগেৰ সেনেসিতানি. তে তেন চেৰ সারদিকেন আবাধেন ফুট্ঠা ইমিনা চ ভত্তাচ্ছাদকেন তদুভযেন ভিয্যোসোমত্তায কিসা হোন্তী’’তি ইমস্মিং ৰত্থুস্মিং কালেপি ৰিকালেপীতি অনুঞ্ঞাতত্তা ৰিকালেপি পরিভুঞ্জিতুং ৰট্টতি. তত্থ ‘‘নচ্ছাদেন্তীতি ন জীরন্তি, ন ৰাতরোগং পটিপ্পস্সম্ভেতুং সক্কোন্তি. সেনেসিতানীতি সিনিদ্ধানি. ভত্তাচ্ছাদকেনাতি ভত্তং অরোচিকেনা’’তি অট্ঠকথাযং (মহাৰ. অট্ঠ. ২৬১) ৰুত্তং, টীকাসু (সারত্থ. টী. মহাৰগ্গ ৩.২৬১; ৰি. ৰি. টী. মহাৰগ্গ ২.২৬১-২৬২) পন ‘‘নচ্ছাদেন্তীতি রুচিং ন উপ্পাদেন্তী’’তি এত্তকমেৰ ৰুত্তং, মহাৰিভঙ্গে (পারা. ৬২২) পন ‘‘যানি খো পন তানি গিলানানং ভিক্খূনং পটিসাযনীযানি ভেসজ্জানি. সেয্যথিদং – সপ্পি নৰনীতং তেলং মধু ফাণিতং, তানি পটিগ্গহেত্ৰা সত্তাহপরমং সন্নিধিকারকং পরিভুঞ্জিতব্বানি, তং অতিক্কামযতো নিস্সগ্গিযং পাচিত্তিয’’ন্তি ৰচনতো ইমেসং পঞ্চভেসজ্জানং সত্তাহকালিকভাৰো ৰেদিতব্বো, ইধ পন অট্ঠুপ্পত্তিৰসেন ৰুত্তোতি.