অতিরেকচীৰরকথা

অতিরেকচীৰরকথাযং ‘‘ন, ভিক্খৰে, অতিরেকচীৰরং ধারেতব্বং, যো ধারেয্য, যথাধম্মো কারেতব্বো’’তি (মহাৰ. ৩৪৭) ৰচনতো নিট্ঠিতচীৰরস্মিং উব্ভতস্মিং কথিনে দসাহতো পরং অতিরেকচীৰরং ধারেন্তস্স নিস্সগ্গিযং পাচিত্তিযং. ‘‘অনুজানামি, ভিক্খৰে, দসাহপরমং অতিরেকচীৰরং ধারেতু’’ন্তি (মহাৰ. ৩৪৭) ৰচনতো উব্ভতেপি কথিনে দসাহব্ভন্তরে ধারেন্তস্স অত্থতকথিনানং অনুব্ভতেপি কথিনে পঞ্চমাসব্ভন্তরে ততো পরম্পি দসাহব্ভন্তরে অনত্থতকথিনানম্পি দসাহব্ভন্তরে অতিরেকচীৰরং অনাপত্তি. ‘‘অনুজানামি, ভিক্খৰে, অতিরেকচীৰরং ৰিকপ্পেতু’’ন্তি (মহাৰ. ৩৪৭) ৰচনতো দসাহতো পরং ৰিকপ্পেত্ৰা অতিরেকচীৰরং ধারেতুং ৰট্টতি. কিত্তকং পন চীৰরং ৰিকপ্পেতব্বন্তি? ‘‘অনুজানামি, ভিক্খৰে, আযামেন অট্ঠঙ্গুলং সুগতঙ্গুলেন চতুরঙ্গুলৰিত্থতং পচ্ছিমং চীৰরং ৰিকপ্পেতু’’ন্তি (মহাৰ. ৩৫৮) ৰচনতো সব্বন্তিমেন পরিচ্ছেদেন সুগতঙ্গুলেন অট্ঠঙ্গুলাযামং চতুরঙ্গুলৰিত্থারং চীৰরং ৰিকপ্পেতুং ৰট্টতি. তত্থ সুগতঙ্গুলং নাম মজ্ঝিমপুরিসঙ্গুলসঙ্খাতেন ৰড্ঢকীঅঙ্গুলেন তিৰঙ্গুলং হোতি, মনুস্সানং পকতিঅঙ্গুলেন অড্ঢপঞ্চকঙ্গুলং, তস্মা দীঘতো ৰড্ঢকীহত্থেন একহত্থং পকতিহত্থেন দিযড্ঢহত্থং ৰিত্থারতো ৰড্ঢকীহত্থেন ৰিদত্থিপ্পমাণং পকতিহত্থেন ছল়ঙ্গুলাধিকৰিদত্থিপ্পমাণং পচ্ছিমং চীৰরং ৰিকপ্পেতুং ৰট্টতি, ততো ঊনপ্পমাণং ন ৰট্টতি, অধিকপ্পমাণং পন ৰট্টতীতি দট্ঠব্বং.