অকপ্পিযচীৰরকথা

অকপ্পিযচীৰরকথাযং ‘‘নগ্গিযং কুসচীরং ফলকচীরং কেসকম্বলং ৰাল়কম্বলং উলূকপক্খিকং অজিনক্খিপ’’ন্তি ইমানি তিত্থিযসমাদানত্তা থুল্লচ্চযৰত্থূনীতি ভগৰতা পটিক্খিত্তানি. তত্থ নগ্গিযন্তি নগ্গভাৰো অচেলকভাৰো. কুসচীরন্তি কুসেন গন্থেত্ৰা কতচীৰরং. ৰাকচীরন্তি তাপসানং ৰক্কলং. ফলকচীরন্তি ফলকসণ্ঠানানি ফলকানি সিব্বিত্ৰা কতচীৰরং. কেসকম্বলন্তি কেসেহি তন্তে ৰাযিত্ৰা কতকম্বলং. ৰালকম্বলন্তি চামরীৰালেহি ৰাযিত্ৰা কতকম্বলং. উলূকপক্খিকন্তি উলূকসকুণস্স পক্খেহি কতনিৰাসনং. অজিনক্খিপন্তি সলোমং সখুরং অজিনমিগচম্মং. তানি তিত্থিযদ্ধজভূতানি অচীৰরভাৰেন পাকটানীতি আচরিযেন ইধ ন ৰুত্তানি. পোত্থকো পন অপাকটোতি তং ৰত্ৰা সব্বনীলকাদীনি দুক্কটৰত্থুকানি ৰুত্তানি. ‘‘তিপট্টচীৰরস্স ৰা মজ্ঝে দাতব্বানী’’তি ৰুত্তত্তা তিপট্টচীৰরং ধারেতুং ৰট্টতীতি সিদ্ধং. তিপট্টাদীনঞ্চ বহুপট্টচীৰরানং অন্তরে ঈদিসানি অসারুপ্পৰণ্ণানি পটপিলোতিকানি কাতব্বানীতি দস্সেতি. কঞ্চুকং নাম সীসতো পটিমুঞ্চিত্ৰা কাযারুল়্হৰত্থং. তেনাহ ‘‘ফালেত্ৰা রজিত্ৰা পরিভুঞ্জিতুং ৰট্টতী’’তি. ৰেঠনন্তি সীসৰেঠনং. তিরীটন্তি মকুটং. তস্স ৰিসেসং দস্সেতুং ‘‘তিরীটকং পনা’’তিআদিমাহ.