উচ্চাসযনমহাসযনকথা

৫৬. উচ্চাসযনমহাসযনকথাযং ‘‘ৰাল়রূপানীতি আহরিমানি ৰাল়রূপানি, ‘অকপ্পিযরূপাকুলো অকপ্পিযমঞ্চো পল্লঙ্কো’তি সারসমাসে ৰুত্তং. দীঘলোমকো মহাকোজৰোতি চতুরঙ্গুলাধিকলোমো কাল়কোজৰো. ‘চতুরঙ্গুলাধিকানি কির তস্স লোমানী’তি ৰচনতো চতুরঙ্গুলতো হেট্ঠা ৰট্টতীতি ৰদন্তি. ৰানচিত্রো উণ্ণামযত্থরণোতি ভিত্তিচ্ছেদাদিৰসেন ৰিচিত্রো উণ্ণামযত্থরণো. ঘনপুপ্ফকো উণ্ণামযত্থরণোতি উণ্ণামযলোহিতত্থরণো. পকতিতূলিকাতি রুক্খতূললতাতূলপোটকীতূলসঙ্খাতানং তিণ্ণং তূলানং অঞ্ঞতরপুণ্ণা তূলিকা. ‘উদ্দলোমীতি উভতোদসং উণ্ণামযত্থরণং. একন্তলোমীতি একতোদসং উণ্ণামযত্থরণ’ন্তি দীঘনিকাযট্ঠকথাযং ৰুত্তং. সারসমাসে পন ‘উদ্দলোমীতি একতোউগ্গতপুপ্ফং. একন্তলোমীতি উভতোউগ্গতপুপ্ফ’ন্তি ৰুত্তং. ‘কোসেয্যকট্টিস্সমযন্তি কোসেয্যকসটময’ন্তি আচরিযধম্মপালত্থেরেন ৰুত্তং. সুদ্ধকোসেয্যন্তি রতনপরিসিব্বনরহিতং. দীঘনিকাযট্ঠকথাযং পনেত্থ ‘ঠপেত্ৰা তূলিকং সব্বানেৰ গোনকাদীনি রতনপরিসিব্বিতানি ন ৰট্টন্তী’তি ৰুত্তং. তত্থ ‘ঠপেত্ৰা তূলিক’ন্তি এতেন রতনপরিসিব্বনরহিতাপি তূলিকা ন ৰট্টতীতি দীপেতি. ‘রতনপরিসিব্বিতানি ন ৰট্টন্তী’তি ইমিনা পন যানি রতনপরিসিব্বিতানি, তানি ভূমত্থরণৰসেন যথানুরূপং মঞ্চাদীসু চ উপনেতুং ৰট্টতীতি দীপিতন্তি ৰেদিতব্বং. এত্থ চ ৰিনযপরিযাযং পত্ৰা গরুকে ঠাতব্বত্তা ইধ ৰুত্তনযেনেৰেত্থ ৰিনিচ্ছযো ৰেদিতব্বো. সুত্তন্তিকদেসনায পন গহট্ঠানম্পি ৰসেন ৰুত্তত্তা তেসং সঙ্গণ্হনত্থং ‘ঠপেত্ৰা তূলিকং…পে… ৰট্টতী’তি ৰুত্তন্তি অপরে.

অজিনচম্মেহীতি অজিনমিগচম্মেহি. তানি কির চম্মানি সুখুমতরানি, তস্মা দুপট্টতিপট্টানি কত্ৰা সিব্বন্তি. তেন ৰুত্তং ‘অজিনপ্পৰেণী’তি. উত্তরং উপরিভাগং ছাদেতীতি উত্তরচ্ছদো, ৰিতানং, তঞ্চ লোহিতৰিতানং ইধাধিপ্পেতন্তি আহ ‘উপরিবদ্ধেন রত্তৰিতানেনা’তি, ‘রত্তৰিতানেসু চ কাসাৰং ৰট্টতি, কুসুম্ভাদিরত্তমেৰ ন ৰট্টতী’তি গণ্ঠিপদেসু ৰুত্তং. মহাউপধানন্তি পমাণাতিক্কন্তং উপধানং. এত্থ চ কিঞ্চাপি দীঘনিকাযট্ঠকথাযং ‘অলোহিতকানি দ্ৰেপি ৰট্টন্তিযেৰ, ততো উত্তরি লভিত্ৰা অঞ্ঞেসং দাতব্বানি. দাতুমসক্কোন্তো মঞ্চে তিরিযং অত্থরিত্ৰা উপরিপচ্চত্থরণং দত্ৰা নিপজ্জিতুম্পি লভতী’তি অৰিসেসেন ৰুত্তং, সেনাসনক্খন্ধকৰণ্ণনাযং (চূল়ৰ. অট্ঠ. ২৯৭) পন ‘অগিলানস্স সীসূপধানঞ্চ পাদূপধানঞ্চাতি দ্ৰযমেৰ ৰট্টতি. গিলানস্স বিম্বোহনানি সন্থরিত্ৰা উপরি চ পচ্চত্থরণং দত্ৰা নিপজ্জিতুম্পি ৰট্টতী’তি ৰুত্তত্তা গিলানোযেৰ মঞ্চে তিরিযং অত্থরিত্ৰা নিপজ্জিতুং ৰট্টতীতি ৰেদিতব্বং. অভিনিস্সায নিসীদিতুন্তি অপস্সায নিসীদিতু’’ন্তি এত্তকো ৰিনিচ্ছযো সারত্থদীপনিযং আগতো.

ৰিমতিৰিনোদনিযং (ৰি. ৰি. টী. মহাৰগ্গ ২.২৫৪) – পন ৰাল়রূপানীতি আহরিমানি ৰাল়রূপানি. চতুরঙ্গুলাধিকানীতি উদ্দলোমীএকন্তলোমীহি ৰিসেসদস্সনং. চতুরঙ্গুলতো হি ঊনানি কির উদ্দলোমীআদীসু পৰিসন্তি. ৰানচিত্রো উণ্ণামযত্থরণোতি নানাৰণ্ণেহি উণ্ণামযসুত্তেহি ভিত্তিচ্ছেদাদিৰসেন ৰাযিত্ৰা কতচিত্তত্থরণো. ঘনপুপ্ফকোতি বহলরাগো. পকতিতূলিকাতি তূলপুণ্ণা ভিসি. ৰিকতিকাতি সীহরূপাদিৰসেন ৰানচিত্রাৰ গয্হতি. ‘‘উদ্দলোমীতি উভতোদসং উণ্ণামযত্থরণং. একন্তলোমীতি একন্তদসং উণ্ণামযত্থরণ’’ন্তি দীঘনিকাযট্ঠকথাযং ৰুত্তং. কোসেয্যকট্টিস্সমযন্তি কোসিযসুত্তানং অন্তরা সুৰণ্ণমযসুত্তানি পৰেসেত্ৰা ৰীতং, সুৰণ্ণসুত্তং কির কট্টিস্সং কসটন্তি চ ৰুচ্চতি. তেনেৰ ‘‘কোসেয্যকসটময’’ন্তি আচরিযধম্মপালত্থেরেন ৰুত্তন্তি ৰদন্তি. রতনপরিসিব্বিতন্তি সুৰণ্ণলিত্তং. সুদ্ধকোসেয্যন্তি রতনপরিসিব্বনরহিতং.

অজিনমিগচম্মানং অতিসুখুমত্তা দুপট্টতিপট্টানি কত্ৰা সিব্বন্তীতি ৰুত্তং ‘‘অজিনপ্পৰেণী’’তি. রত্তৰিতানেনাতি সব্বরত্তেন ৰিতানেন. যং পন নানাৰণ্ণং ৰানচিত্তং ৰা লেপচিত্তং ৰা, তং ৰট্টতি. উভতোলোহিতকূপধানেপি এসেৰ নযো. চিত্রং ৰাতি ইদং পন সব্বথা কপ্পিযত্তা ৰুত্তং, ন পন উভতোউপধানেসু অকপ্পিযত্তা. ন হি লোহিতকসদ্দো চিত্তে ৰট্টতি. পটলিগ্গহণেনেৰ চিত্তকস্সপি অত্থরণস্স সঙ্গহেতব্বপ্পসঙ্গতো. কাসাৰং পন লোহিতঙ্গৰোহারং ন গচ্ছতি, তস্মা ৰিতানেপি উভতোউপধানেপি ৰট্টতি. সচে পমাণযুত্তন্তিআদি অঞ্ঞস্স পমাণাতিক্কন্তস্স বিম্বোহনস্স পটিক্খিত্তভাৰদস্সনত্থং ৰুত্তং, ন পন উচ্চাসযনমহাসযনভাৰদস্সনত্থং তথা অৰুত্তত্তা, তং পন উপধানং উপোসথিকানং গহট্ঠানং ৰট্টতি. উচ্চাসযনমহাসযনমেৰ হি তদা তেসং ন ৰট্টতি. দীঘনিকাযট্ঠকথাদীসু কিঞ্চাপি ‘‘ঠপেত্ৰা তূলিকং সব্বানেৰ গোনকাদীনি রতনপরিসিব্বিতানি ন ৰট্টন্তী’’তি ৰুত্তং, ৰিনযট্ঠকথা এৰ পন কপ্পিযাকপ্পিযভাৰে পমাণন্তি গহেতব্বং. অভিনিস্সাযাতি অপস্সাযাতি ৰুত্তং.