ৰনট্ঠপোক্খরট্ঠকথা

ৰনট্ঠপোক্খরট্ঠকথাযং ‘‘তেন খো পন সমযেন আযস্মতো সারিপুত্তস্স কাযডাহাবাধো হোতি. অথ খো আযস্মা মহামোগ্গল্লানো যেনাযস্মা সারিপুত্তো তেনুপসঙ্কমি, উপসঙ্কমিত্ৰা আযস্মন্তং সারিপুত্তং এতদৰোচ ‘পুব্বে তে, আৰুসো সারিপুত্ত, কাযডাহাবাধো কেন ফাসু হোতী’তি. ভিসেহি চ মে, আৰুসো, মুল়ালিকাহি চাতি…পে… অথ খো আযস্মতো সারিপুত্তস্স ভিসে চ মুল়ালিকাযো চ পরিভুত্তস্স কাযডাহাবাধো পটিপ্পস্সম্ভি…পে… পটিগ্গণ্হথ, ভিক্খৰে, পরিভুঞ্জথ. অনুজানামি, ভিক্খৰে, ৰনট্ঠং পোক্খরট্ঠং ভুত্তাৰিনা পৰারিতেন অনতিরিত্তং পরিভুঞ্জিতু’’ন্তি (মহাৰ. ২৭৮) ৰচনতো ৰনট্ঠং পোক্খরট্ঠং পৰারিতেন ভিক্খুনা পরিভুঞ্জিতুং ৰট্টতি, পৰারিতসিক্খাপদেন আপত্তি ন হোতি. তত্থ ৰনট্ঠং পোক্খরট্ঠন্তি ৰনে চেৰ পদুমিনিগচ্ছে চ জাতং.