২১. পৰারণাৰিনিচ্ছযকথা

১১৬. এৰং পটিগ্গহণৰিনিচ্ছযং কথেত্ৰা ইদানি পৰারণাৰিনিচ্ছযং কথেতুং ‘‘পটিক্খেপপৰারণা’’তিআদিমাহ. তত্থ পটিক্খিপনং পটিক্খেপো, অসম্পটিচ্ছনন্তি অত্থো. পৰারিযতে পৰারণা, পটিসেধনন্ত্যত্থো. পটিক্খেপসঙ্খাতা পৰারণা পটিক্খেপপৰারণা. অথ ৰা পটিক্খেপৰসেন পৰারণা পটিক্খেপপৰারণা. পঞ্চন্নং ভোজনানং অঞ্ঞতরং ভুঞ্জন্তস্স অঞ্ঞস্মিং ভোজনে অভিহটে পটিক্খেপসঙ্খাতা পৰারণাতি সম্বন্ধো.

১১৭. যং অস্নাতীতি যং ভুঞ্জতি. অম্বিলপাযাসাদীসূতি আদি-সদ্দেন খীরপাযাসাদিং সঙ্গণ্হাতি. তত্থ অম্বিলপাযাসগ্গহণেন তক্কাদিঅম্বিলসংযুত্তা ঘনযাগু ৰুত্তা. খীরপাযাসগ্গহণেন খীরসংযুত্তা যাগু সঙ্গয্হতি. পৰারণং জনেতীতি অনতিরিত্তভোজনাপত্তিনিবন্ধনং পটিক্খেপং সাধেতি. কতোপি পটিক্খেপো অনতিরিত্তভোজনাপত্তিনিবন্ধনো ন হোতি, অকতট্ঠানেযেৰ তিট্ঠতীতি আহ ‘‘পৰারণং ন জনেতী’’তি.

‘‘যাগু-সদ্দস্স পৰারণজনকযাগুযাপি সাধারণত্তা ‘যাগুং গণ্হথা’তি ৰুত্তেপি পৰারণা হোতীতি পৰারণং জনেতিযেৰাতি ৰুত্ত’’ন্তি তীসুপি গণ্ঠিপদেসু ৰুত্তং. তং পরতো তত্থেৰ ‘‘ভত্তমিস্সকং যাগুং আহরিত্ৰা’’তি এত্থ ৰুত্তকারণেন ন সমেতি. ৰুত্তঞ্হি তত্থ – হেট্ঠা অযাগুকে নিমন্তনে উদককঞ্জিকখীরাদীহি সদ্ধিং মদ্দিতং ভত্তমেৰ সন্ধায ‘‘যাগুং গণ্হথা’’তি ৰুত্তত্তা পৰারণা হোতি. ‘‘ভত্তমিস্সকং যাগুং আহরিত্ৰা’’তি এত্থ পন ৰিসুং যাগুযা ৰিজ্জমানত্তা পৰারণা ন হোতীতি. তস্মা তত্থ ৰুত্তনযেনেৰ খীরাদীহি সদ্ধিং মদ্দিতং ভত্তমেৰ সন্ধায ‘‘যাগুং গণ্হথা’’তি ৰুত্তত্তা যাগুযাৰ তত্থ অভাৰতো পৰারণা হোতীতি এৰমেত্থ কারণং ৰত্তব্বং. এৰঞ্হি সতি পরতো ‘‘যেনাপুচ্ছিতো, তস্স অত্থিতাযা’’তি অট্ঠকথায ৰুত্তকারণেনপি সংসন্দতি, অঞ্ঞথা গণ্ঠিপদেসুযেৰ পুব্বাপরৰিরোধো আপজ্জতি, অট্ঠকথায চ ন সমেতীতি. সচে…পে… পঞ্ঞাযতীতি ইমিনা ৰুত্তপ্পমাণস্স মচ্ছমংসখণ্ডস্স নহারুনো ৰা সব্ভাৰমত্তং দস্সেতি. তাহীতি পুথুকাহি.

সালিৰীহিযৰেহি কতসত্তূতি যেভুয্যনযেন ৰুত্তং, সত্ত ধঞ্ঞানি পন ভজ্জিত্ৰা কতোপি সত্তুযেৰ. তেনেৰাহ ‘‘কঙ্গুৰরক…পে… সত্তুসঙ্গহমেৰ গচ্ছতী’’তি. সত্তুমোদকোতি সত্তুযো পিণ্ডেত্ৰা কতো অপক্কো সত্তুগুল়ো. ৰিমতিৰিনোদনিযং (ৰি. ৰি. টী. পাচিত্তিয ২.২৩৮-২৩৯) পন ‘‘সত্তুমোদকোতি সত্তুং তেমেত্ৰা কতো অপক্কো, সত্তুং পন পিসিত্ৰা পিট্ঠং কত্ৰা তেমেত্ৰা পূৰং কত্ৰা পচন্তি, তং ন পৰারেতী’’তি ৰুত্তং.

পঞ্চন্নং ভোজনানং অঞ্ঞতরৰসেন ৰিপ্পকতভোজনভাৰস্স উপচ্ছিন্নত্তা ‘‘মুখে সাসপমত্তম্পি…পে… ন পৰারেতী’’তি ৰুত্তং. ‘‘অকপ্পিযমংসং পটিক্খিপতি, ন পৰারেতী’’তি ৰচনতো সচে সঙ্ঘিকং লাভং অত্তনো অপাপুণন্তং জানিত্ৰা ৰা অজানিত্ৰা ৰা পটিক্খিপতি, ন পৰারেতি পটিক্খিপিতব্বস্সেৰ পটিক্খিত্তত্তা, অলজ্জিসন্তকং পটিক্খিপন্তোপি ন পৰারেতি. অৰত্থুতাযাতি অনতিরিত্তাপত্তিসাধিকায পৰারণায অৰত্থুভাৰতো. এতেন পটিক্খিপিতব্বস্সেৰ পটিক্খিত্তভাৰং দীপেতি. যঞ্হি পটিক্খিপিতব্বং হোতি, তস্স পটিক্খেপো আপত্তিযা অঙ্গং ন হোতীতি তং পৰারণায অৰত্থূতি ৰুচ্চতি.

১১৮. আসন্নতরং অঙ্গন্তি হত্থপাসতো বহি ঠত্ৰা ওনমিত্ৰা দেন্তস্স সীসং আসন্নতরং হোতি, তস্স ওরিমন্তেন পরিচ্ছিন্দিতব্বং.

উপনামেতীতি ইমিনা কাযাভিহারং দস্সেতি. অপনামেত্ৰাতি অভিমুখং হরিত্ৰা. ইদং ভত্তং গণ্হাতি ৰদতীতি কিঞ্চি অপনামেত্ৰা ৰদতি. কেৰলং ৰাচাভিহারস্স অনধিপ্পেতত্তা গণ্হথাতি গহেতুং আরদ্ধং. হত্থপাসতো বহি ঠিতস্স সতিপি দাতুকামতাভিহারে পটিক্খিপন্তস্স দূরভাৰেনেৰ পৰারণায অভাৰতো থেরস্সপি দূরভাৰমত্তং গহেত্ৰা পৰারণায অভাৰং দস্সেন্তো ‘‘থেরস্স দূরভাৰতো’’তিআদিমাহ, ন পন থেরস্স অভিহারসম্ভৰতো. সচেপি গহেত্ৰা গতো হত্থপাসে ঠিতো হোতি, কিঞ্চি পন অৰত্ৰা আধারট্ঠানে ঠিতত্তা অভিহারো নাম ন হোতীতি ‘‘দূতস্স চ অনভিহরণতো’’তি ৰুত্তং. ‘‘গহেত্ৰা আগতেন ‘ভত্তং গণ্হথা’তি ৰুত্তে অভিহারো নাম হোতীতি ‘সচে পন গহেত্ৰা আগতো ভিক্খু…পে… পৰারণা হোতী’তি ৰুত্ত’’ন্তি তীসুপি গণ্ঠিপদেসু ৰুত্তং. কেচি পন ‘‘পত্তং কিঞ্চিপি উপনামেত্ৰা ‘ইমং ভত্তং গণ্হথা’তি ৰুত্তন্তি গহেতব্ব’’ন্তি ৰদন্তি, তং যুত্তং ৰিয দিস্সতি ৰাচাভিহারস্স ইধ অনধিপ্পেতত্তা.

পরিৰেসনাযাতি ভত্তগ্গে. অভিহটাৰ হোতীতি পরিৰেসকেনেৰ অভিহটা হোতি. ততো দাতুকামতায গণ্হন্তং পটিক্খিপন্তস্স পৰারণা হোতীতি এত্থ অগ্গণ্হন্তম্পি পটিক্খিপতো পৰারণা হোতিযেৰ. কস্মা? দাতুকামতায অভিহটত্তা, ‘‘তস্মা সা অভিহটাৰ হোতী’’তি হি ৰুত্তং. তেনেৰ তীসুপি গণ্ঠিপদেসু ‘‘দাতুকামাভিহারে সতি কেৰলং ‘দস্সামী’তি গহণমেৰ অভিহারো ন হোতি, ‘দস্সামী’তি গণ্হন্তেপি অগণ্হন্তেপি দাতুকামতাভিহারোৰ অভিহারো হোতি, তস্মা গহণসমযে ৰা অগ্গহণসমযে ৰা তং পটিক্খিপতো পৰারণা হোতী’’তি ৰুত্তং. ইদানি তস্স অসতি দাতুকামতাভিহারে গহণসমযেপি পটিক্খিপতো পৰারণা ন হোতীতি দস্সেতুং ‘‘সচে পনা’’তিআদি ৰুত্তং. কটচ্ছুনা অনুক্খিত্তম্পি পুব্বে এৰ অভিহটত্তা পৰারণা হোতীতি ‘‘অভিহটাৰ হোতী’’তি ৰুত্তং. উদ্ধটমত্তেতি ভাজনতো ৰিযোজিতমত্তে. দ্ৰিন্নং সমভারেপীতি পরিৰেসকস্স চ অঞ্ঞস্স চ ভত্তপচ্ছিভারগ্গহণে সম্ভূতেপীতি অত্থো.

১১৯. রসং গণ্হথাতি এত্থ কেৰলং মংসরসস্স অপৰারণাজনকস্স নামেন ৰুত্তত্তা পটিক্খিপতো পৰারণা ন হোতি. মচ্ছরসন্তিআদীসু মচ্ছো চ রসঞ্চাতি অত্থসম্ভৰতো, ৰত্থুনোপি তাদিসত্তা পৰারণা হোতি. ‘‘ইদং গণ্হথা’’তিপি অৰত্ৰা তুণ্হীভূতেন অভিহটং পটিক্খিপতোপি হোতি এৰ.

করম্বকোতি মিস্সকাধিৰচনমেতং. যঞ্হি বহূহি মিস্সেত্ৰা করোন্তি, সো ‘‘করম্বকো’’তি ৰুচ্চতি, সো সচেপি মংসেন মিস্সেত্ৰা কতো হোতি, ‘‘করম্বকং গণ্হথা’’তি অপৰারণারহস্স নামেন ৰুত্তত্তা পটিক্খিপতো পৰারণা ন হোতি. ‘‘মংসকরম্বকং গণ্হথা’’তি ৰুত্তে পন ‘‘মংসমিস্সকং গণ্হথা’’তি ৰুত্তং হোতি, তস্মা পৰারণাৰ হোতি.

১২০. ‘‘উদ্দিস্সকত’’ন্তি মঞ্ঞমানোতি এত্থ ‘‘ৰত্থুনো কপ্পিযত্তা অকপ্পিযসঞ্ঞায পটিক্খেপতোপি অচিত্তকত্তা ইমস্স সিক্খাপদস্স পৰারণা হোতী’’তি ৰদন্তি. ‘‘হেট্ঠা অযাগুকে নিমন্তনে উদককঞ্জিকখীরাদীহি সদ্ধিং মদ্দিতং ভত্তমেৰ সন্ধায ‘যাগুং গণ্হথা’তি ৰুত্তত্তা পৰারণা হোতি, ‘ভত্তমিস্সকং যাগুং আহরিত্ৰা’তি এত্থ পন ৰিসুং যাগুযা ৰিজ্জমানত্তা পৰারণা ন হোতী’’তি ৰদন্তি. অযমেত্থ অধিপ্পাযোতি ‘‘যেনাপুচ্ছিতো’’তিআদিনা ৰুত্তমেৰত্থং সন্ধায ৰদতি. কারণং পনেত্থ দুদ্দসন্তি এত্থ একে তাৰ ৰদন্তি ‘‘যস্মা যাগুমিস্সকং নাম ভত্তমেৰ ন হোতি, খীরাদিকম্পি হোতিযেৰ, তস্মা করম্বকে ৰিয পৰারণায ন ভৰিতব্বং, এৰঞ্চ সতি ‘যাগু বহুতরা ৰা হোতি সমসমা ৰা, ন পৰারেতি, যাগু মন্দা, ভত্তং বহুতরং, পৰারেতী’তি এত্থ কারণং দুদ্দস’’ন্তি. কেচি পন ৰদন্তি ‘‘যাগুমিস্সকং নাম ভত্তং, তস্মা তং পটিক্খিপতো পৰারণায এৰ ভৰিতব্বং, এৰঞ্চ সতি ‘ইধ পৰারণা হোতি, ন হোতী’তি এত্থ কারণং দুদ্দস’’ন্তি.

যথা চেত্থ কারণং দুদ্দসং, এৰং পরতো ‘‘মিস্সকং গণ্হথা’’তি এত্থাপি কারণং দুদ্দসমেৰাতি ৰেদিতব্বং. ন হি পৰারণপ্পহোনকস্স অপ্পবহুভাৰো পৰারণায ভাৰাভাৰনিমিত্তং, কিঞ্চরহি পৰারণাজনকস্স নাম গহণমেৰেত্থ পমাণং, তস্মা ‘‘ইদঞ্চ করম্বকেন ন সমানেতব্ব’’ন্তিআদিনা যম্পি কারণং ৰুত্তং, তম্পি পুব্বে ৰুত্তেন সংসন্দিযমানং ন সমেতি. যদি হি মিস্সকন্তি ভত্তমিস্সকেযেৰ রুল়্হং সিযা, এৰং সতি যথা ‘‘ভত্তমিস্সকং গণ্হথা’’তি ৰুত্তে ভত্তং বহুতরং ৰা সমং ৰা অপ্পতরং ৰা হোতি, পৰারেতিযেৰ, এৰং ‘‘মিস্সকং গণ্হথা’’তি ৰুত্তেপি অপ্পতরেপি ভত্তে পৰারণায ভৰিতব্বং ‘‘মিস্সক’’ন্তি ভত্তমিস্সকেযেৰ রুল়্হত্তা. তথা হি ‘‘মিস্সকন্তি ভত্তমিস্সকেযেৰ রুল়্হৰোহারত্তা ইদং পন ভত্তমিস্সকমেৰাতি ৰুত্ত’’ন্তি তীসুপি গণ্ঠিপদেসু ৰুত্তং. অথ মিস্সকন্তি ভত্তমিস্সকে রুল়্হং ন হোতি, মিস্সকভত্তং পন সন্ধায ‘‘মিস্সকং গণ্হথা’’তি ৰুত্তন্তি. এৰম্পি যথা অযাগুকে নিমন্তনে খীরাদীহি সম্মদ্দিতং ভত্তমেৰ সন্ধায ‘‘যাগুং গণ্হথা’’তি ৰুত্তে পৰারণা হোতি, এৰমিধাপি মিস্সকভত্তমেৰ সন্ধায ‘‘মিস্সকং গণ্হথা’’তি ৰুত্তে ভত্তং অপ্পং ৰা হোতু, বহু ৰা, পৰারণা এৰ সিযা, তস্মা মিস্সকন্তি ভত্তমিস্সকে রুল়্হং ৰা হোতু, মিস্সকং সন্ধায ভাসিতং ৰা, উভযথাপি পুব্বেনাপরং ন সমেতীতি কিমেত্থ কারণচিন্তায. ঈদিসেসু পন ঠানেসু অট্ঠকথাপমাণেনেৰ গন্তব্বন্তি অযং অম্হাকং খন্তি.

ৰিমতিৰিনোদনিযং (ৰি. ৰি. টী. পাচিত্তিয ২.২৩৮-২৩৯) পন ‘‘উদ্দিস্সকতন্তি মঞ্ঞমানোতি এত্থ ৰত্থুনো কপ্পিযত্তা ‘পৰারিতোৰ হোতী’তি ৰুত্তং. তঞ্চে উদ্দিস্সকতমেৰ হোতি, পটিক্খেপো নত্থি. অযমেত্থাধিপ্পাযোতি ‘যেনাপুচ্ছিতো’তিআদিনা ৰুত্তমেৰত্থং সন্ধায ৰদতি. কারণং পনেত্থ দুদ্দসন্তি ভত্তস্স বহুতরভাৰে পৰারণায সম্ভৰকারণং দুদ্দসং, অঞ্ঞথা করম্বকেপি মচ্ছাদিবহুভাৰে পৰারণা ভৰেয্যাতি অধিপ্পাযো. যথা চেত্থ কারণং দুদ্দসং, এৰং পরতো ‘মিস্সকং গণ্হথা’তি এত্থাপি কারণং দুদ্দসমেৰাতি দট্ঠব্বং. যঞ্চ ‘ইদং পন ভত্তমিস্সকমেৰা’তিআদি কারণং ৰুত্তং, তম্পি ‘অপ্পতরং ন পৰারেতী’তি ৰচনেন ন সমেতী’’তি এত্তকমেৰ ৰুত্তং.

‘‘ৰিসুং কত্ৰা দেতীতি ভত্তস্স উপরি ঠিতং রসাদিং ৰিসুং গহেত্ৰা দেতী’’তি তীসুপি গণ্ঠিপদেসু ৰুত্তং. কেহিচি পন ‘‘যথা ভত্তসিত্থং ন পততি, তথা গাল়্হং হত্থেন পীল়েত্ৰা পরিস্সাৰেত্ৰা দেতী’’তি ৰুত্তং. তত্থাপি কারণং ন দিস্সতি. যথা হি ভত্তমিস্সকং যাগুং আহরিত্ৰা ‘‘যাগুং গণ্হথা’’তি ৰত্ৰা যাগুমিস্সকং ভত্তম্পি দেন্তং পটিক্খিপতো পৰারণা ন হোতি, এৰমিধাপি বহুখীররসাদীসু ভত্তেসু ‘‘খীরং গণ্হথা’’তিআদীনি ৰত্ৰা দিন্নানি খীরাদীনি ৰা দেতু খীরাদিমিস্সকং ভত্তং ৰা, উভযথাপি পৰারণায ন ভৰিতব্বং, তস্মা ‘‘ৰিসুং কত্ৰা দেতী’’তি তেনাকারেন দেন্তং সন্ধায ৰুত্তং, ন পন ভত্তমিস্সকং কত্ৰা দীযমানং পটিক্খিপতো পৰারণা হোতীতি দস্সনত্থন্তি গহেতব্বং. যদি পন ভত্তমিস্সকং কত্ৰা দীযমানে পৰারণা হোতীতি অধিপ্পাযেন অট্ঠকথাযং ‘‘ৰিসুং কত্ৰা দেতী’’তি ৰুত্তং, এৰং সতি অট্ঠকথাযেৰেত্থ পমাণন্তি গহেতব্বং, ন পন কারণন্তরং গৰেসিতব্বং. ৰিমতিৰিনোদনিযং (ৰি. ৰি. টী. পাচিত্তিয ২.২৩৮-২৩৯) পন ‘‘ৰিসুং কত্ৰা দেতীতি ‘রসং গণ্হথা’তিআদিনা ৰাচায ৰিসুং কত্ৰা দেতীতি অত্থো গহেতব্বো, ন পন কাযেন রসাদিং ৰিযোজেত্ৰাতি তথা অৰিযোজিতেপি পটিক্খিপতো পৰারণায অসম্ভৰতো অপৰারণাপহোনকস্স নামেন ৰুত্তত্তা ভত্তমিস্সকযাগুং আহরিত্ৰা ‘যাগুং গণ্হথা’তি ৰুত্তট্ঠানাদীসু ৰিয, অঞ্ঞথা এত্থ যথা পুব্বাপরং ন ৰিরুজ্ঝতি, তথা অধিপ্পাযো গহেতব্বো’’তি ৰুত্তং.

নাৰা ৰা সেতু ৰাতিআদিম্হি নাৰাদিঅভিরুহনাদিক্খণে কিঞ্চি ঠত্ৰাপি অভিরুহনাদিকাতব্বত্তেপি গমনতপ্পরতায ঠানং নাম ন হোতি, জনসম্মদ্দেন পন অনোকাসাদিভাৰেন ঠাতুং ন ৰট্টতি. অচালেত্ৰাতি ৰুত্তট্ঠানতো অঞ্ঞস্মিং পীঠপ্পদেসে ৰা উদ্ধং ৰা অপেল্লেত্ৰা, তস্মিং এৰ পন ঠানে পরিৰত্তেতুং লভতি. তেনাহ ‘‘যেন পস্সেনা’’তিআদি. সচে উক্কুটিকং নিসিন্নো পাদে অমুঞ্চিত্ৰাপি ভূমিযং নিসীদতি, ইরিযাপথং ৰিকোপেন্তো নাম হোতীতি উক্কুটিকাসনং অৰিকোপেত্ৰা সুখেন নিসীদিতুং ‘‘তস্স পন হেট্ঠা…পে… নিসীদনকং দাতব্ব’’ন্তি ৰুত্তং. ‘‘আসনং অচালেত্ৰাতি পীঠে ফুট্ঠোকাসতো আনিসদমংসং অমোচেত্ৰা অনুট্ঠহিত্ৰাতি ৰুত্তং হোতি. অদিন্নাদানে ৰিয ঠানাচাৰনং ন গহেতব্ব’’ন্তি তীসুপি গণ্ঠিপদেসু ৰুত্তং.

১২১. অকপ্পিযকতন্তি এত্থ অকপ্পিযকতস্সেৰ অনতিরিত্তভাৰতো কপ্পিযং অকারাপেত্ৰা তস্মিং পত্তে পক্খিত্তং মূলফলাদিযেৰ অতিরিত্তং ন হোতি, অকপ্পিযভোজনং ৰা কুলদূসনাদিনা উপ্পন্নং. সেসং পন পত্তপরিযাপন্নং অতিরিত্তমেৰ হোতি, পরিভুঞ্জিতুং ৰট্টতি, তং পন মূলফলাদিং পরিভুঞ্জিতুকামেন ততো নীহরিত্ৰা কপ্পিযং কারাপেত্ৰা অঞ্ঞস্মিং ভাজনে ঠপেত্ৰা অতিরিত্তং কারাপেত্ৰা পরিভুঞ্জিতব্বং.

১২২. সো পুন কাতুং ন লভতীতি তস্মিংযেৰ ভাজনে করিযমানং পঠমং কতেন সদ্ধিং কতং হোতীতি পুন সোযেৰ কাতুং ন লভতি, অঞ্ঞো লভতি. অঞ্ঞস্মিং পন ভাজনে তেন ৰা অঞ্ঞেন ৰা কাতুং ৰট্টতি. তেনাহ ‘‘যেন অকতং, তেন কাতব্বং, যঞ্চ অকতং, তং কাতব্ব’’ন্তি. তেনাপীতি এত্থ পি-সদ্দো ন কেৰলং অঞ্ঞেনেৰাতি ইমমত্থং দীপেতি. এৰং কতন্তি অঞ্ঞস্মিং ভাজনে কতং.

পেসেত্ৰাতি অনুপসম্পন্নস্স হত্থে পেসেত্ৰা. ইমস্স ৰিনযকম্মভাৰতো ‘‘অনুপসম্পন্নস্স হত্থে ঠিতং ন কাতব্ব’’ন্তি ৰুত্তং.

সচে পন আমিসসংসট্ঠানীতি এত্থ সচে মুখগতেনাপি অনতিরিত্তেন আমিসেন সংসট্ঠানি হোন্তি, পাচিত্তিযমেৰাতি ৰেদিতব্বং, তস্মা পৰারিতেন ভোজনং অতিরিত্তং কারাপেত্ৰা ভুঞ্জন্তেনপি যথা অকতেন মিস্সং ন হোতি, এৰং মুখঞ্চ হত্থঞ্চ সুদ্ধং কত্ৰা ভুঞ্জিতব্বং. কিঞ্চাপি অপৰারিতস্স পুরেভত্তং যামকালিকাদীনি আহারত্থায পরিভুঞ্জতোপি অনাপত্তি, পৰারিতস্স পন পৰারণমূলকং দুক্কটং হোতিযেৰাতি ‘‘যামকালিকং…পে… অজ্ঝোহারে অজ্ঝোহারে আপত্তি দুক্কটস্সা’’তি পাল়িযং (পাচি. ২৪০) ৰুত্তং.

ইতি ৰিনযসঙ্গহসংৰণ্ণনাভূতে ৰিনযালঙ্কারে

পটিক্খেপপৰারণাৰিনিচ্ছযকথালঙ্কারো নাম

একৰীসতিমো পরিচ্ছেদো.