২০. পটিগ্গহণৰিনিচ্ছযকথা

১০৪. এৰং কপ্পিযভূমিৰিনিচ্ছযং কথেত্ৰা ইদানি পটিগ্গহণৰিনিচ্ছযং কথেতুং ‘‘খাদনীযাদিপটিগ্গাহো’’তিআদিমাহ. তত্থ খাদিযতেতি খাদনীযং, ঠপেত্ৰা পঞ্চ ভোজনানি সব্বস্স অজ্ঝোহরিতব্বস্সেতং অধিৰচনং. আদিসদ্দেন ভোজনীযং সঙ্গণ্হাতি. পটিগ্গহণং সম্পটিচ্ছনং পটিগ্গাহো, খাদনীযাদীনং পটিগ্গাহো খাদনীযাদিপটিগ্গাহো. তেনাহ ‘‘অজ্ঝোহরিতব্বস্স যস্স কস্সচি খাদনীযস্স ৰা ভোজনীযস্স ৰা পটিগ্গহণ’’ন্তি. পঞ্চসু অঙ্গেসু উচ্চারণমত্তন্তি উক্খিপনমত্তং, ইমিনা পটিগ্গহিতব্বভারস্স পমাণং দস্সেতি. তেনেৰ তাদিসেন পুরিসেন অনুক্খিপনীযৰত্থুস্মিং পটিগ্গহণং ন রুহতীতি দীপেতি. ‘‘হত্থপাসো’’তি ইমিনা আসন্নভাৰং. তেনেৰ চ দূরে ঠত্ৰা অভিহরন্তস্স পটিগ্গহণং ন রুহতীতি দীপেতি. অভিহারোতি পরিণামিতভাৰো, তেন চ তত্রট্ঠকাদীসু ন রুহতীতি দীপেতি. ‘‘দেৰো ৰা’’তিআদিনা দাযকতো পযোগত্তযং দস্সেতি. ‘‘তঞ্চে’’তিআদিনা পটিগ্গাহকতো পযোগদ্ৰযং দস্সেতি.

ইদানি তেসু পঞ্চসু অঙ্গেসু হত্থপাসস্স দুরাজানতায তং দস্সেতুমাহ ‘‘তত্থি’’চ্চাদি. তত্থ অড্ঢতেয্যহত্থো হত্থপাসো নামাতি যোজনা. ‘‘তস্স ওরিমন্তেনা’’তি ইমিনা আকাসে উজুং ঠত্ৰা পরেন উক্খিত্তং গণ্হন্তস্সাপি আসন্নঙ্গভূতপাদতলতো পট্ঠায হত্থপাসো পরিচ্ছিন্দিতব্বো, ন সীসতো পট্ঠাযাতি দস্সেতি. তত্থ ‘‘ওরিমন্তেনা’’তি ইমস্স হেট্ঠিমন্তেনাতি অত্থো গহেতব্বো.

এত্থ চ পৰারণসিক্খাপদট্ঠকথাযং (পাচি. অট্ঠ. ২৩৮-২৩৯) ‘‘সচে পন ভিক্খু নিসিন্নো হোতি, আসন্নস্স পচ্ছিমন্ততো পট্ঠাযা’’তিআদিনা পটিগ্গাহকানং আসন্নঙ্গস্স পারিমন্ততো পট্ঠায পরিচ্ছেদস্স দস্সিতত্তা ইধাপি আকাসে ঠিতস্স পটিগ্গাহকস্স আসন্নঙ্গভূতপাদতলস্স পারিমন্তভূততো পণ্হিপরিযন্তস্স হেট্ঠিমতলতো পট্ঠায, দাযকস্স পন ওরিমন্তভূততো পাদঙ্গুলস্স হেট্ঠিমপরিযন্ততো পট্ঠায হত্থপাসো পরিচ্ছিন্দিতব্বোতি দট্ঠব্বং. ইমিনাৰ নযেন ভূমিযং নিপজ্জিত্ৰা উস্সীসকে নিসিন্নস্স হত্থতো পটিগ্গণ্হন্তস্সাপি আসন্নসীসঙ্গস্স পারিমন্তভূততো গীৰন্ততো পট্ঠাযেৰ হত্থপাসো মিনিতব্বো, ন পাদতলতো পট্ঠায. এৰং নিপজ্জিত্ৰা দানেপি যথানুরূপং ৰেদিতব্বং. ‘‘যং আসন্নতরং অঙ্গ’’ন্তি (পাচি. অট্ঠ. ২৩৮-২৩৯) হি ৰুত্তং. অকল্লকোতি গিলানো সহত্থা পরিভুঞ্জিতুং অসক্কোন্তো মুখেন পটিগ্গণ্হাতি. ৰিমতিৰিনোদনিযং (ৰি. ৰি. টী. পাচিত্তিয ২.২৬৫) পন ‘‘অকল্লকোতি গিলানো গহেতুং ৰা’’তি এত্তকমেৰ ৰুত্তং, এতেন অকল্লকোতি গিলানো ৰা অথ ৰা গহেতুং অকল্লকো অসমত্থোতি অত্থো দস্সিতো. তেনাহ ‘‘সচেপি নত্থুকরণিযং দীযমানং নাসাপুটেন অকল্লকো ৰা মুখেন পটিগ্গণ্হাতী’’তি.

১০৫. একদেসেনাপীতি অঙ্গুলিযা ফুট্ঠমত্তেন.

তঞ্চে পটিগ্গণ্হাতি, সব্বং পটিগ্গহিতমেৰাতি ৰেণুকোটিযং বন্ধিত্ৰা ঠপিতত্তা. সচে ভূমিযং ঠিতমেৰ ঘটং দাযকেন হত্থপাসে ঠত্ৰা ‘‘ঘটং দস্সামী’’তি দিন্নং ৰেণুকোটিযা গহণৰসেন পটিগ্গণ্হাতি, উভযকোটিবদ্ধং সব্বম্পি পটিগ্গহিতমেৰ হোতি. ভিক্খুস্স হত্থে অপীল়েত্ৰা পকতিযা পীল়িযমানং উচ্ছুরসং সন্ধায ‘‘গণ্হথা’’তি ৰুত্তত্তা ‘‘অভিহারো ন পঞ্ঞাযতী’’তি ৰুত্তং, হত্থপাসে ঠিতস্স পন ভিক্খুস্স অত্থায পীল়িযমানং উচ্ছুতো পগ্ঘরন্তং রসং গণ্হিতুং ৰট্টতি. দোণিকায সযং পগ্ঘরন্তং উচ্ছুরসং মজ্ঝে আৰরিত্ৰা ৰিস্সজ্জিতম্পি গণ্হিতুং ৰট্টতি. পটিগ্গহণসঞ্ঞাযাতি ‘‘মঞ্চাদিনা পটিগ্গহেস্সামী’’তি উপ্পাদিতসঞ্ঞায, ইমিনা ‘‘পটিগ্গণ্হামী’’তি ৰাচায ৰত্তব্বকিচ্চং নত্থীতি দস্সেতি.

যত্থ কত্থচি অট্ঠকথাসু, পদেসেসু ৰা. অসংহারিমে ফলকেতি থামমজ্ঝিমেন অসংহারিযে. ‘‘তিন্তিণিকাদিপণ্ণেসূতি ৰচনতো সাখাসু পটিগ্গহণং রুহতীতি দট্ঠব্ব’’ন্তি সারত্থদীপনিযং (সারত্থ. টী. পাচিত্তিয ৩.২৬৫) ৰুত্তং. পোরাণটীকাযম্পি তথেৰ ৰুত্তং, তদেতং ৰিচারেতব্বং. অট্ঠকথাযঞ্হি ‘‘ভূমিযং অত্থতেসু সুখুমেসু তিন্তিণিকাদিপণ্ণেসু পটিগ্গহণং ন রুহতী’’তি ৰুত্তং. তং তিন্তিণিকাদিপণ্ণানং সুখুমত্তা তত্থ ঠপিতআমিসস্স অসণ্ঠহনতো ভূমিযং ঠপিতসদিসত্তা ‘‘ন রুহতী’’তি ৰুত্তং, তিন্তিণিকাদিসাখাসু ঠপিতেপি এৰমেৰ সিযা, তস্মা ‘‘সাখাসু পটিগ্গহণং রুহতী’’তি ৰচনং অযুত্তং ৰিয দিস্সতি. অট্ঠকথাযং ‘‘ন রুহতী’’তি কিরিযাপদস্স ‘‘কস্মা’’তি হেতুপরিযেসনে সতি ন অঞ্ঞং পরিযেসিতব্বং, ‘‘সুখুমেসূ’’তি ৰুত্তং ৰিসেসনপদংযেৰ হেতুমন্তৰিসেসনং ভৰতি, তস্মা তিন্তিণিকপণ্ণাদীসু পটিগ্গহণং ন রুহতি, কস্মা? তেসং সুখুমত্তা. অঞ্ঞেসু পন পদুমিনীপণ্ণাদীসু রুহতি, কস্মা? তেসং ওল়ারিকত্তাতি হেতুফলসম্বন্ধো ইচ্ছিতব্বোতি দিস্সতি, তস্মা ‘‘তদেতং ৰিচারেতব্ব’’ন্তি ৰুত্তং. তথা হি ৰুত্তং অট্ঠকথাযং ‘‘ন হি তানি সন্ধারেতুং সমত্থানীতি মহন্তেসু পন পদুমিনীপণ্ণাদীসু রুহতী’’তি.

১০৬. পুঞ্ছিত্ৰা পটিগ্গহেত্ৰাতি পুঞ্ছিতেপি রজনচুণ্ণাসঙ্কায সতি পটিগ্গহণত্থায ৰুত্তং, নাসতি. তং পনাতি পতিতরজং অপ্পটিগ্গহেত্ৰা উপরি গহিতপিণ্ডপাতং. অনাপত্তীতি দুরূপচিণ্ণাদিদোসো নত্থি. পুব্বাভোগস্স অনুরূপৰসেন ‘‘অনুপসম্পন্নস্স দত্ৰা…পে… ৰট্টতী’’তি ৰুত্তং. যস্মা পন তং ‘‘অঞ্ঞস্স দস্সামী’’তি চিত্তুপ্পাদমত্তেন পরসন্তকং ন হোতি, তস্মা তস্স অদত্ৰাপি পটিগ্গহেত্ৰা পরিভুঞ্জিতুং ৰট্টতি. ‘‘অনুপসম্পন্নস্স দস্সামী’’তিআদিপি ৰিনযদুক্কটস্স পরিহারায ৰুত্তং, তথা অকত্ৰা গহিতেপি পটিগ্গহেত্ৰা পরিভুঞ্জতো অনাপত্তিযেৰ. ভিক্খুস্স দেতীতি অঞ্ঞস্স ভিক্খুস্স দেতি. কঞ্জিকন্তি খীররসাদিং যং কিঞ্চি দ্রৰং সন্ধায ৰুত্তং. হত্থতো মোচেত্ৰা পুন গণ্হাতি, উগ্গহিতকং হোতীতি আহ ‘‘হত্থতো অমোচেন্তেনেৰা’’তি. আলুল়েন্তানন্তি আলোল়েন্তানং, অযমেৰ ৰা পাঠো. আহরিত্ৰা ভূমিযং ঠপিতত্তা অভিহারো নত্থীতি আহ ‘‘পত্তো পটিগ্গহেতব্বো’’তি.

১০৭. পঠমতরং উল়ুঙ্কতো থেৰা পত্তে পতন্তীতি এত্থ ‘‘যথা পঠমতরং পতিতথেৰে দোসো নত্থি, তথা আকিরিত্ৰা অপনেন্তানং পচ্ছা পতিতথেৰেপি অভিহটত্তা নেৰত্থি দোসো’’তি ৰদন্তি. চরুকেনাতি খুদ্দকভাজনেন. ‘‘অভিহটত্তাতি দীযমানক্খণং সন্ধায ৰুত্তং. দত্ৰা অপনযনকালে পন ছারিকা ৰা বিন্দূনি ৰা পতন্তি, পুন পটিগ্গহেতব্বং অভিহারস্স ৰিগতত্তা’’তি ৰদন্তি, তং যথা ন পততি, তথা অপনেস্সামীতি পটিহরন্তে যুজ্জতি, পকতিসঞ্ঞায অপনেন্তে অভিহারো ন ছিজ্জতি, সুপতিতং. পটিগ্গহিতমেৰ হি তং হোতি. মুখৰট্টিযাপি গহেতুং ৰট্টতীতি অভিহরিযমানস্স পত্তস্স মুখৰট্টিযা উপরিভাগে হত্থং পসারেত্ৰা ফুসিতুং ৰট্টতি. পাদেন পেল্লেত্ৰাতি পাদেন ‘‘পটিগ্গহেস্সামী’’তি সঞ্ঞায অক্কমিত্ৰা. কেচীতি অভযগিরিৰাসিনো. ৰচনমত্তমেৰাতি পটিবদ্ধং পটিবদ্ধপটিবদ্ধন্তি সদ্দমত্তমেৰ নানং, কাযপটিবদ্ধমেৰ হোতি, তস্মা তেসং ৰচনং ন গহেতব্বন্তি অধিপ্পাযো. এস নযোতি ‘‘পটিবদ্ধপটিবদ্ধম্পি কাযপটিবদ্ধমেৰা’’তি অযং নযো. তথা চ তত্থ কাযপটিবদ্ধে তপ্পটিবদ্ধে চ থুল্লচ্চযমেৰ ৰুত্তং.

তেন আহরাপেতুন্তি যস্স ভিক্খুনো সন্তিকং গতং, তং ‘‘ইধ নং আনেহী’’তি আণাপেত্ৰা তেন আহরাপেতুং ইতরস্স ৰট্টতীতি অত্থো. তস্মাতি যস্মা মূলট্ঠস্সেৰ পরিভোগো অনুঞ্ঞাতো, তস্মা. তং দিৰসং হত্থেন গহেত্ৰা দুতিযদিৰসে পটিগ্গহেত্ৰা পরিভুঞ্জন্তস্স উগ্গহিতকপটিগ্গহিতং হোতীতি আহ ‘‘অনামসিত্ৰা’’তি. অপ্পটিগ্গহিতত্তা ‘‘সন্নিধিপচ্চযা অনাপত্তী’’তি ৰুত্তং. অপ্পটিগ্গহেত্ৰা পরিভুঞ্জন্তস্স অদিন্নমুখদ্ৰারাপত্তি হোতীতি আহ ‘‘পটিগ্গহেত্ৰা পন পরিভুঞ্জিতব্ব’’ন্তি. ‘‘ন ততো পরন্তি তদহেৰ সামং অপ্পটিগ্গহিতং সন্ধায ৰুত্তং, তদহেৰ পটিগ্গহিতং পন পুনদিৰসাদীসু অপ্পটিগ্গহেত্ৰাপি পরিভুঞ্জিতুং ৰট্টতী’’তি ৰদন্তি.

১০৮. খীযন্তীতি খযং গচ্ছন্তি, তেসং চুণ্ণেহি থুল্লচ্চযঅপ্পটিগ্গহণাপত্তিযো ন হোন্তীতি অধিপ্পাযো. সত্থকেনাতি পটিগ্গহিতসত্থকেন. নৰসমুট্ঠিতন্তি এতেনেৰ উচ্ছুআদীসু অভিনৰলগ্গত্তা অব্বোহারিকং ন হোতীতি দস্সেতি. এসেৰ নযোতি সন্নিধিদোসাদিং সন্ধায ৰদতি. তেনাহ ‘‘ন হী’’তিআদি. কস্মা পনেত্থ উগ্গহিতপচ্চযা, সন্নিধিপচ্চযা ৰা দোসো ন সিযাতি আহ ‘‘ন হি তং পরিভোগত্থায পরিহরন্তী’’তি. ইমিনা চ বাহিরপরিভোগত্থং সামং গহেত্ৰা ৰা অনুপসম্পন্নেন দিন্নং ৰা পরিহরিতুং ৰট্টতীতি দীপেতি, তস্মা পত্তসম্মক্খনাদিঅত্থং সামং গহেত্ৰা পরিহরিততেলাদিং সচে পরিভুঞ্জিতুকামো হোতি, পটিগ্গহেত্ৰা পরিভুঞ্জন্তস্স অনাপত্তি. অব্ভন্তরপরিভোগত্থং পন সামং গহিতং পটিগ্গহেত্ৰা পরিভুঞ্জন্তস্স উগ্গহিতপটিগ্গহণং হোতি, অপ্পটিগ্গহেত্ৰা পরিভুঞ্জন্তস্স অদিন্নমুখদ্ৰারাপত্তি হোতি. অব্ভন্তরপরিভোগত্থমেৰ অনুপসম্পন্নেন দিন্নং গহেত্ৰা পরিহরন্তস্স সিঙ্গীলোণকপ্পো ৰিয সন্নিধিপচ্চযা আপত্তি হোতি. কেচি পন ‘‘থামমজ্ঝিমস্স পুরিসস্স উচ্চারণমত্তং হোতীতিআদিনা ৰুত্তপঞ্চঙ্গসম্পত্তিযা পটিগ্গহণস্স রুহণতো বাহিরপরিভোগত্থম্পি সচে অনুপসম্পন্নেহি দিন্নং গণ্হাতি, পটিগ্গহিতমেৰা’’তি ৰদন্তি. এৰং সতি ইধ বাহিরপরিভোগত্থং অনুপসম্পন্নেন দিন্নং গহেত্ৰা পরিহরন্তস্স সন্নিধিপচ্চযা আপত্তি ৰত্তব্বা সিযা. ‘‘ন হি তং পরিভোগত্থায পরিহরন্তী’’তি চ ন ৰত্তব্বং, তস্মা বাহিরপরিভোগত্থং গহিতং পটিগ্গহিতং নাম ন হোতীতি ৰেদিতব্বং.

যদি এৰং পঞ্চসু পটিগ্গহণঙ্গেসু ‘‘পরিভোগত্থাযা’’তি ৰিসেসনং ৰত্তব্বন্তি? ন ৰত্তব্বং. পটিগ্গহণঞ্হি পরিভোগত্থমেৰ হোতীতি ‘‘পরিভোগত্থাযা’’তি ৰিসুং অৰত্ৰা ‘‘তঞ্চে ভিক্খু কাযেন ৰা কাযপটিবদ্ধেন ৰা পটিগ্গণ্হাতী’’তি এত্তকমেৰ ৰুত্তং. অপরে পন ‘‘সতিপি পটিগ্গহণে ‘ন হি তং পরিভোগত্থায পরিহরন্তী’তি ইধ অপরিভোগত্থায পরিহরণে অনাপত্তি ৰুত্তা’’তি ৰদন্তি. তেন চ পটিগ্গহণঙ্গেসু পঞ্চসু সমিদ্ধেসু অজ্ঝোহরিতুকামতায গহিতমেৰ পটিগ্গহিতং নাম হোতি অজ্ঝোহরিতব্বেসুযেৰ পটিগ্গহণস্স অনুঞ্ঞাতত্তাতি দস্সেতি. তথা বাহিরপরিভোগত্থায গহেত্ৰা ঠপিততেলাদিং অজ্ঝোহরিতুকামতায সতি পটিগ্গহেত্ৰা পরিভুঞ্জিতুং ৰট্টতীতি দস্সেতি. উদুক্খলমুসলাদীনি খীযন্তীতি এত্থ উদুক্খলমুসলানং খযেন পিসিতকোট্টিতভেসজ্জেসু সচে আগন্তুকৰণ্ণো পঞ্ঞাযতি, ন ৰট্টতি. সুদ্ধং উদকং হোতীতি রুক্খসাখাদীহি গল়িত্ৰা পতনউদকং সন্ধায ৰুত্তং.

১০৯. পত্তো ৰাস্স পটিগ্গহেতব্বোতি এত্থাপি পত্তগতং ছুপিত্ৰা দেন্তস্স হত্থে লগ্গেন আমিসেন দোসাভাৰত্থং পত্তপটিগ্গহণন্তি অব্ভন্তরপরিভোগত্থমেৰ পত্তপটিগ্গহণং ৰেদিতব্বং. যং সামণেরস্স পত্তে পততি…পে… পটিগ্গহণং ন ৰিজহতীতি এত্থ পুনপ্পুনং গণ্হন্তস্স অত্তনো পত্তে পক্খিত্তমেৰ অত্তনো সন্তকন্তি সন্নিট্ঠানকরণতো হত্থগতং পটিগ্গহণং ন ৰিজহতি. পরিচ্ছিন্দিত্ৰা দিন্নং পন গণ্হন্তস্স গহণসমযেযেৰ অত্তনো সন্তকন্তি সন্নিট্ঠানস্স কতত্তা হত্থগতং পটিগ্গহণং ৰিজহতি. কেসঞ্চি অত্থায ভত্তং পক্খিপতীতি এত্থ অনুপসম্পন্নস্স অত্থায পক্খিপন্তেপি আগন্ত্ৰা গণ্হিস্সতীতি সযমেৰ পক্খিপিত্ৰা ঠপনতো পটিগ্গহণং ন ৰিজহতি. অনুপসম্পন্নস্স হত্থে পক্খিত্তং পন অনুপসম্পন্নেনেৰ ঠপিতং নাম হোতীতি পটিগ্গহণং ৰিজহতি পরিচ্চত্তভাৰতো. তেন ৰুত্তং ‘‘সামণের…পে… পরিচ্চত্তত্তা’’তি. কেসঞ্চীতিআদীসু অনুপসম্পন্নানং অত্থায কত্থচি ঠপিযমানম্পি হত্থতো মুত্তমত্তে এৰ পটিগ্গহণং ন ৰিজহতি, অথ খো ভাজনে পতিতমেৰ পটিগ্গহণং ৰিজহতি. ভাজনঞ্চ ভিক্খুনা পুনদিৰসত্থায অপেক্খিতমেৰাতি তগ্গতম্পি আমিসং দুদ্ধোতপত্তগতং ৰিয পটিগ্গহণং ৰিজহতীতি সঙ্কায ‘‘সামণেরস্স হত্থে পক্খিপিতব্ব’’ন্তি ৰুত্তন্তি ৰেদিতব্বং. ঈদিসেসু হি যুত্তি ন গৰেসিতব্বা, ৰুত্তনযেনেৰ পটিপজ্জিতব্বং.

১১০. পত্তগতা যাগূতি ইমিনা পত্তমুখৰট্টিযা ফুট্ঠেপি কুটে যাগু পটিগ্গহিতা, উগ্গহিতা ৰা ন হোতি ভিক্খুনো অনিচ্ছায ফুট্ঠত্তাতি দস্সেতি. আরোপেতীতি হত্থং ফুসাপেতি. পটিগ্গহণূপগং ভারং নাম থামমজ্ঝিমস্স পুরিসস্স উক্খেপারহং. কিঞ্চাপি অৰিস্সজ্জেত্ৰাৰ অঞ্ঞেন হত্থেন পিদহন্তস্স দোসো নত্থি, তথাপি ন পিদহিতব্বন্তি অট্ঠকথাপমাণেনেৰ গহেতব্বং. ৰিমতিৰিনোদনিযং (ৰি. ৰি. টী. পাচিত্তিয ২.২৬৫) পন ‘‘ন পিদহিতব্বন্তি হত্থতো মুত্তং সন্ধায ৰুত্তং, হত্থগতং পন ইতরেন হত্থেন পিদহতো, হত্থতো মুত্তম্পি ৰা অফুসিত্ৰা উপরি পিধানং পাতেন্তস্স ন দোসো’’তি ৰুত্তং.

১১১. পটিগ্গণ্হাতীতি ছাযত্থায উপরি ধারিযমানা মহাসাখা যেন কেনচি ছিজ্জেয্য, তত্থ লগ্গরজং মুখে পাতেয্য ৰাতি কপ্পিযং কারাপেত্ৰা পটিগ্গণ্হাতি.

মচ্ছিকৰারণত্থন্তি এত্থ ‘‘সচেপি সাখায লগ্গরজং পত্তে পততি, সুখেন পরিভুঞ্জিতুং সক্কাতি সাখায পটিগ্গহিতত্তা অব্ভন্তরপরিভোগত্থমেৰিধ পটিগ্গহণন্তি মূলপটিগ্গহণমেৰ ৰট্টতী’’তি ৰুত্তং. অপরে পন ‘‘মচ্ছিকৰারণত্থন্তি ৰচনমত্তং গহেত্ৰা বাহিরপরিভোগত্থং গহিত’’ন্তি ৰদন্তি. কুণ্ডকেতি মহাঘটে. তস্মিম্পীতি চাটিঘটেপি. অনুপসম্পন্নং গাহাপেত্ৰাতি তমেৰ অজ্ঝোহরণীযং ভণ্ডং অনুপসম্পন্নেন গাহাপেত্ৰা.

থেরস্স পত্তং দুতিযত্থেরস্সাতি ‘‘থেরস্স পত্তং ময্হং দেথা’’তি তেন অত্তনো পরিচ্চজাপেত্ৰা দুতিযত্থেরস্স দেতি. তুয্হং যাগুং ময্হং দেহীতি এত্থ এৰং ৰত্ৰা সামণেরস্স পত্তং গহেত্ৰা অত্তনোপি পত্তং তস্স দেতি. এত্থ পনাতি ‘‘পণ্ডিতো সামণেরো’’তিআদিপত্তপরিৰত্তনকথাযং. কারণং উপপরিক্খিতব্বন্তি যথা মাতুআদীনং তেলাদীনি হরন্তো তথারূপে কিচ্চে অনুপসম্পন্নেন অপরিৰত্তেত্ৰাৰ পরিভুঞ্জিতুং লভতি, এৰমিধ পত্তপরিৰত্তনং অকত্ৰা পরিভুঞ্জিতুং কস্মা ন লভতীতি কারণং ৰীমংসিতব্বন্তি অত্থো. এত্থ পন ‘‘সামণেরেহি গহিততণ্ডুলেসু পরিক্খীণেসু অৰস্সং অম্হাকং সামণেরা সঙ্গহং করোন্তীতি চিত্তুপ্পত্তি সম্ভৰতি, তস্মা তং পরিৰত্তেত্ৰাৰ পরিভুঞ্জিতব্বং. মাতাপিতূনং অত্থায পন ছাযত্থায ৰা গহণে পরিভোগাসা নত্থি, তস্মা তং ৰট্টতী’’তি কারণং ৰদন্তি. তেনেৰ আচরিযবুদ্ধদত্তত্থেরেনপি ৰুত্তং –

‘‘মাতাপিতূনমত্থায, তেলাদিং হরতোপি চ;

সাখং ছাযাদিঅত্থায, ইমস্স ন ৰিসেসতা.

‘‘তস্মা হিস্স ৰিসেসস্স, চিন্তেতব্বং তু কারণং;

তস্স সালযভাৰং তু, ৰিসেসং তক্কযামহ’’ন্তি.

ইদমেৰেত্থ যুত্ততরং অৰস্সং তথাৰিধৰিতক্কুপ্পত্তিযা সম্ভৰতো. ন হি সক্কা এত্থ ৰিতক্কং সোধেতুন্তি. মাতাদীনং অত্থায হরণে পন নাৰস্সং তথাৰিধৰিতক্কুপ্পত্তীতি সক্কা ৰিতক্কং সোধেতুং. যত্থ হি ৰিতক্কং সোধেতুং সক্কা, তত্থ নেৰত্থি দোসো. তেনেৰ ৰক্খতি ‘‘সচে পন সক্কোতি ৰিতক্কং সোধেতুং, ততো লদ্ধং খাদিতুম্পি ৰট্টতী’’তি. ৰিমতিৰিনোদনিযং (ৰি. ৰি. টী. পাচিত্তিয ২.২৬৫) পন ‘‘এত্থ পনাতি পত্তপরিৰত্তনে. কারণন্তি এত্থ যথা সামণেরা ইতো অম্হাকম্পি দেন্তীতি ৰিতক্কো উপ্পজ্জতি, ন তথা অঞ্ঞত্থাতি কারণং ৰদন্তি, তঞ্চ যুত্তং. যস্স পন তাদিসো ৰিতক্কো নত্থি, তেন অপরিৰত্তেত্ৰাপি ভুঞ্জিতুং ৰট্টতী’’তি ৰুত্তং.

১১২. নিচ্চালেতুন্তি চালেত্ৰা পাসাণসক্খরাদিঅপনযনং কাতুং. উদ্ধনং আরোপেতব্বন্তি অনগ্গিকং উদ্ধনং সন্ধায ৰুত্তং. উদ্ধনে পচ্চমানস্স আলুল়নে উপরি অপক্কতণ্ডুলা হেট্ঠা পৰিসিত্ৰা পচ্চন্তীতি আহ ‘‘সামংপাকঞ্চেৰ হোতী’’তি.

১১৩. আধারকে পত্তো ঠপিতোতি অপ্পটিগ্গহিতামিসো পত্তো পুন পটিগ্গহণত্থায ঠপিতো. চালেতীতি ৰিনা কারণং চালেতি, সতিপি কারণে ভিক্খূনং পরিভোগারহং চালেতুং ন ৰট্টতি. কিঞ্চাপি ‘‘অনুজানামি, ভিক্খৰে, অমনুস্সিকাবাধে আমকমংসং আমকলোহিত’’ন্তি (মহাৰ. ২৬৪) তাদিসে আবাধে অত্তনো অত্থায আমকমংসপটিগ্গহণং অনুঞ্ঞাতং, ‘‘আমকমংসপটিগ্গহণা পটিৰিরতো হোতী’’তি (দী. নি. ১.১০, ১৯৪) চ সামঞ্ঞতো পটিক্খিত্তং, তথাপি অত্তনো, অঞ্ঞস্স ৰা ভিক্খুনো অত্থায অগ্গহিতত্তা ‘‘সীহৰিঘাসাদিং…পে… ৰট্টতী’’তি ৰুত্তং. সক্কোতি ৰিতক্কং সোধেতুন্তি ‘‘ময্হম্পি দেতী’’তি ৰিতক্কস্স অনুপ্পন্নভাৰং সল্লক্খেতুং সক্কোতি, ‘‘সামণেরস্স দস্সামী’’তি সুদ্ধচিত্তেন মযা গহিতন্তি ৰা সল্লক্খেতুং সক্কোতি. সচে পন মূলেপি পটিগ্গহিতং হোতীতি এত্থ ‘‘গহেত্ৰা গতে ময্হম্পি দদেয্যুন্তি সঞ্ঞায সচে পটিগ্গহিতং হোতী’’তি ৰদন্তি.

১১৪. কোট্ঠাসে করোতীতি ‘‘ভিক্খূ সামণেরা চ অত্তনো অত্তনো অভিরুচিতং কোট্ঠাসং গণ্হন্তূ’’তি সব্বেসং সমকে কোট্ঠাসে করোতি. গহিতাৰসেসন্তি সামণেরেহি গহিতকোট্ঠাসতো অৰসেসং. গণ্হিত্ৰাতি ‘‘ময্হং ইদং গণ্হিস্সামী’’তি গহেত্ৰা. ইধ গহিতাৰসেসং নাম তেন গণ্হিত্ৰা পুন ঠপিতং.

পটিগ্গহেত্ৰাতি তদহু পটিগ্গহেত্ৰা. তেনেৰ ‘‘যাৰকালিকেন যাৰজীৰিকসংসগ্গে দোসো নত্থী’’তি ৰুত্তং. সচে পন পুরিমদিৰসে পটিগ্গহেত্ৰা ঠপিতা হোতি, সামিসেন মুখেন তস্সা ৰট্টিযা ধূমং পিৰিতুং ন ৰট্টতি. সমুদ্দোদকেনাতি অপ্পটিগ্গহিতসমুদ্দোদকেন.

হিমকরকা নাম কদাচি ৰস্সোদকেন সহ পতনকা পাসাণলেখা ৰিয ঘনীভূতা উদকৰিসেসা, তেসু পটিগ্গহণকিচ্চং নত্থি. তেনাহ ‘‘উদকগতিকা এৰা’’তি. যস্মা কতকট্ঠি উদকং পসাদেত্ৰা ৰিসুং তিট্ঠতি, তস্মা ‘‘অব্বোহারিক’’ন্তি ৰুত্তং. ইমিনা অপ্পটিগ্গহিতাপত্তীহি অব্বোহারিকং, ৰিকালভোজনাপত্তীহিপি অব্বোহারিকন্তি দস্সেতি. লগ্গতীতি সুক্খে মুখে চ হত্থে চ মত্তিকাৰণ্ণং দস্সেন্তং লগ্গতি. বহলন্তি হত্থমুখেসু অলগ্গনকম্পি পটিগ্গহেতব্বং.

ৰাসমত্তন্তি রেণুখীরাভাৰং দস্সেতি. পানীযং গহেত্ৰাতি অত্তনোযেৰ অত্থায গহেত্ৰা. সচে পন পীতাৰসেসকং তত্থেৰ আকিরিস্সামীতি গণ্হাতি, পুন পটিগ্গহণকিচ্চং নত্থি. আকিরতি, পটিগ্গহেতব্বন্তি পুপ্ফরসস্স পঞ্ঞাযনতো ৰুত্তং. ৰিক্খম্ভেত্ৰাতি ৰিযূহিত্ৰা, অপনেত্ৰাতি অত্থো.

১১৫. মহাভূতেসূতি পাণসরীরসন্নিস্সিতেসু পথৰীআদিমহাভূতেসু. সব্বং ৰট্টতীতি অত্তনো পরেসঞ্চ সরীরসন্নিস্সিতং সব্বং ৰট্টতি, অকপ্পিযমংসানুলোমতায থুল্লচ্চযাদিং ন জনেতীতি অধিপ্পাযো. পততীতি অত্তনো সরীরতো ছিজ্জিত্ৰা পততি. ‘‘রুক্খতো ছিন্দিত্ৰা’’তি ৰুত্তত্তা মত্তিকত্থায পথৰিং খণিতুং, অঞ্ঞম্পি যং কিঞ্চি মূলপণ্ণাদিৰিসভেসজ্জং ছিন্দিত্ৰা ছারিকং অকত্ৰাপি অপ্পটিগ্গহিতম্পি পরিভুঞ্জিতুং ৰট্টতীতি দট্ঠব্বং.

ইতি ৰিনযসঙ্গহসংৰণ্ণনাভূতে ৰিনযালঙ্কারে

পটিগ্গহণৰিনিচ্ছযকথালঙ্কারো নাম

ৰীসতিমো পরিচ্ছেদো.