১৩. দানলক্খণাদিৰিনিচ্ছযকথা

৬৯. এৰং রূপিযাদিপটিগ্গহণৰিনিচ্ছযং কথেত্ৰা ইদানি দানৰিস্সাসগ্গাহলাভপরিণামনৰিনিচ্ছযং কথেতুং ‘‘দানৰিস্সাসগ্গাহেহী’’তিআদিমাহ. তত্থ দীযতে দানং, চীৰরাদিৰত্থুং আরম্মণং কত্ৰা পৰত্তো অলোভপ্পধানো কামাৰচরকুসলকিরিযচিত্তুপ্পাদো. সসনং সাসো, সসু হিংসাযন্তি ধাতু, হিংসনন্তি অত্থো, ৰিগতো সাসো এতস্মা গাহাতি ৰিস্সাসো. গহণং গাহো, ৰিস্সাসেন গাহো ৰিস্সাসগ্গাহো. ৰিসেসনে চেত্থ করণৰচনং, ৰিস্সাসৰসেন গাহো, ন থেয্যচিত্তৰসেনাতি অত্থো. লচ্ছতেতি লাভো, চীৰরাদিৰত্থু, তস্স লাভস্স. পরিণমিযতে পরিণামনং, অঞ্ঞেসং অত্থায পরিণতস্স অত্তনো, অঞ্ঞস্স ৰা পরিণামনং, দাপনন্তি অত্থো. দানৰিস্সাসগ্গাহেহি লাভস্স পরিণামনন্তি এত্থ উদ্দেসে সমভিনিৰিট্ঠস্স ‘‘দান’’ন্তি পদস্স অত্থৰিনিচ্ছযো তাৰ পঠমং এৰং ৰেদিতব্বোতি যোজনা. অত্তনো সন্তকস্স চীৰরাদিপরিক্খারস্স দানন্তি সম্বন্ধো. যস্স কস্সচীতি সম্পদাননিদ্দেসো, যস্স কস্সচি পটিগ্গাহকস্সাতি অত্থো.

যদিদং ‘‘দান’’ন্তি ৰুত্তং, তত্থ কিং লক্খণন্তি আহ ‘‘তত্রিদং দানলক্খণ’’ন্তি. ‘‘ইদং তুয্হং দেমী’’তি ৰদতীতি ইদং তিৰঙ্গসম্পন্নং দানলক্খণং হোতীতি যোজনা. তত্থ ইদন্তি দেয্যধম্মনিদস্সনং. তুয্হন্তি পটিগ্গাহকনিদস্সনং. দেমীতি দাযকনিদস্সনং. দদামীতিআদীনি পন পরিযাযৰচনানি. ৰুত্তঞ্হি ‘‘দেয্যদাযকপটিগ্গাহকা ৰিয দানস্সা’’তি, ‘‘তিণ্ণং সম্মুখীভাৰা কুসলং হোতী’’তি চ. ‘‘ৰত্থুপরিচ্চাগলক্খণত্তা দানস্সা’’তি ইদং পন একদেসলক্খণকথনমেৰ, কিং এৰং দীযমানং সম্মুখাযেৰ দিন্নং হোতি, উদাহু পরম্মুখাপীতি আহ ‘‘সম্মুখাপি পরম্মুখাপি দিন্নংযেৰ হোতী’’তি. তুয্হং গণ্হাহীতিআদীসু অযমত্থো – ‘‘গণ্হাহী’’তি ৰুত্তে ‘‘দেমী’’তি ৰুত্তসদিসং হোতি, তস্মা মুখ্যতো দিন্নত্তা সুদিন্নং হোতি, ‘‘গণ্হামী’’তি চ ৰুত্তে মুখ্যতো গহণং হোতি, তস্মা সুগ্গহিতং হোতি. ‘‘তুয্হং ময্হ’’ন্তি ইমানি পন পটিগ্গাহকপটিবন্ধতাকরণে ৰচনানি. তৰ সন্তকং করোহীতিআদীনি পন পরিযাযতো দানগ্গহণানি, তস্মা দুদিন্নং দুগ্গহিতঞ্চ হোতি. লোকে হি অপরিচ্চজিতুকামাপি পুন গণ্হিতুকামাপি ‘‘তৰ সন্তকং হোতূ’’তি নিয্যাতেন্তি যথা তং কুসরঞ্ঞো মাতু রজ্জনিয্যাতনং. তেনাহ ‘‘নেৰ দাতা দাতুং জানাতি, ন ইতরো গহেতু’’ন্তি. সচে পনাতিআদীসু পন দাযকেন পঞ্ঞত্তিযং অকোৰিদতায পরিযাযৰচনে ৰুত্তেপি পটিগ্গাহকো অত্তনো পঞ্ঞত্তিযং কোৰিদতায মুখ্যৰচনেন গণ্হাতি, তস্মা ‘‘সুগ্গহিত’’ন্তি ৰুত্তং.

সচে পন একোতিআদীসু পন দাযকো মুখ্যৰচনেন দেতি, পটিগ্গাহকোপি মুখ্যৰচনেন পটিক্খিপতি, তস্মা দাযকস্স পুব্বে অধিট্ঠিতম্পি চীৰরং দানৰসেন অধিট্ঠানং ৰিজহতি, পরিচ্চত্তত্তা অত্তনো অসন্তকত্তা অতিরেকচীৰরম্পি ন হোতি, তস্মা দসাহাতিক্কমেপি আপত্তি ন হোতি. পটিগ্গাহকস্সপি ন পটিক্খিপিতত্তা অত্তনো সন্তকং ন হোতি, তস্মা অতিরেকচীৰরং ন হোতীতি দসাহাতিক্কমেপি আপত্তি নত্থি. যস্স পন রুচ্চতীতি এত্থ পন ইমস্স চীৰরস্স অস্সামিকত্তা পংসুকূলট্ঠানে ঠিতত্তা যস্স রুচ্চতি, তেন পংসুকূলভাৰেন গহেত্ৰা পরিভুঞ্জিতব্বং, পরিভুঞ্জন্তেন পন দাযকেন পুব্বঅধিট্ঠিতম্পি দানৰসেন অধিট্ঠানস্স ৰিজহিতত্তা পুন অধিট্ঠহিত্ৰা পরিভুঞ্জিতব্বং ইতরেন পুব্বে অনধিট্ঠিতত্তাতি দট্ঠব্বং.

ইত্থন্নামস্স দেহীতিআদীসু পন আণত্যত্থে পৰত্তায পঞ্চমীৰিভত্তিযা ৰুত্তত্তা আণত্তেন পটিগ্গাহকস্স দিন্নকালেযেৰ পটিগ্গাহকস্স সন্তকং হোতি, ন ততো পুব্বে, পুব্বে পন আণাপকস্সেৰ, তস্মা ‘‘যো পহিণতি, তস্সেৰ সন্তক’’ন্তি ৰুত্তং. ইত্থন্নামস্স দম্মীতি পন পচ্চুপ্পন্নত্থে পৰত্তায ৰত্তমানৰিভত্তিযা ৰুত্তত্তা ততো পট্ঠায পটিগ্গাহকস্সেৰ সন্তকং হোতি, তস্মা ‘‘যস্স পহীযতি, তস্স সন্তক’’ন্তি ৰুত্তং. তস্মাতি ইমিনা আযস্মতা রেৰতত্থেরেন আযস্মতো সারিপুত্তস্স চীৰরপেসনৰত্থুস্মিং ভগৰতা দেসিতেসু অধিট্ঠানেসু ইধ ৰুত্তলক্খণেন অসম্মোহতো জানিতব্বন্তি দস্সেতি.

তত্থ দ্ৰাধিট্ঠিতং, স্ৰাধিট্ঠিতন্তি চ ন তিচীৰরাধিট্ঠানং সন্ধায ৰুত্তং, অথ খো সামিকে জীৰন্তে ৰিস্সাসগ্গাহচীৰরভাৰেন চ সামিকে মতে মতকচীৰরভাৰেন চ গহণং সন্ধায ৰুত্তং, ততো পন দসাহে অনতিক্কন্তেযেৰ তিচীৰরাধিট্ঠানং ৰা পরিক্খারচোল়াধিট্ঠানং ৰা ৰিকপ্পনং ৰা কাতব্বং. যো পহিণতীতি দাযকং সন্ধাযাহ, যস্স পহীযতীতি পটিগ্গাহকং.

পরিচ্চজিত্ৰা…পে… ন লভতি, আহরাপেন্তো ভণ্ডগ্ঘেন কারেতব্বোতি অত্থো. অত্তনা…পে… নিস্সগ্গিযন্তি ইমিনা পরসন্তকভূতত্তং জানন্তো থেয্যপসয্হৰসেন অচ্ছিন্দন্তো পারাজিকো হোতীতি দস্সেতি. পোরাণটীকাযং পন ‘‘সকসঞ্ঞায ৰিনা গণ্হন্তো ভণ্ডং অগ্ঘাপেত্ৰা আপত্তিযা কারেতব্বো’’তি ৰুত্তং. সকসঞ্ঞায ৰিনাপি তাৰকালিকপংসুকূলসঞ্ঞাদিৰসেন গণ্হন্তো আপত্তিযা ন কারেতব্বো. অট্ঠকথাযং পন পসয্হাকারং সন্ধায ৰদতি. তেনাহ ‘‘অচ্ছিন্দতো নিস্সগ্গিয’’ন্তি. সচে পন…পে… ৰট্টতীতি তুট্ঠদানং আহ, অথ পনাতিআদিনা কুপিতদানং. উভযথাপি সযং দিন্নত্তা ৰট্টতি, গহণে আপত্তি নত্থীতি অত্থো.

মম সন্তিকে…পে… এৰং পন দাতুং ন ৰট্টতীতি ৰত্থুপরিচ্চাগলক্খণত্তা দানস্স এৰং দদন্তো অপরিচ্চজিত্ৰা দিন্নত্তা দানং ন হোতীতি ন ৰট্টতি, ততো এৰ দুক্কটং হোতি. আহরাপেতুং পন ৰট্টতীতি পুব্বে ‘‘অকরোন্তস্স ন দেমী’’তি ৰুত্তত্তা যথাৰুত্তউপজ্ঝাযগ্গহণাদীনি অকরোন্তে আচরিযস্সেৰ সন্তকং হোতীতি কত্ৰা ৰুত্তং. করোন্তে পন অন্তেৰাসিকস্স সন্তকং ভৰেয্য সব্বসো অপরিচ্চজিত্ৰা দিন্নত্তা. সকসঞ্ঞায ৰিজ্জমানত্তা ‘‘আহরাপেতুং ৰট্টতী’’তি ৰুত্তং সিযা. টীকাযং (সারত্থ. টী. ২.৬৩৫) পন ‘‘এৰং দিন্নং ভতিসদিসত্তা আহরাপেতুং ৰট্টতী’’তি ৰুত্তং. ভতিসদিসে সতিপি কম্মে কতে ভতি লদ্ধব্বা হোতি, তস্মা আরোপেতুং ন ৰট্টেয্য. ৰিমতিৰিনোদনিযং (ৰি. ৰি. টী. ১.৬৩৫) পন ‘‘আহরাপেতুং ৰট্টতীতি কম্মে অকতে ভতিসদিসত্তা ৰুত্ত’’ন্তি ৰুত্তং, তেন কম্মে কতে আহরাপেতুং ন ৰট্টতীতি সিদ্ধং. উপজ্ঝং গণ্হিস্সতীতি সামণেরস্স দানং দীপেতি, তেন চ সামণেরকালে দত্ৰা উপসম্পন্নকালে অচ্ছিন্দতোপি পাচিত্তিযং দীপেতি. অযং তাৰ দানে ৰিনিচ্ছযোতি ইমিনা দানৰিনিচ্ছযাদীনং তিণ্ণং ৰিনিচ্ছযানং একপরিচ্ছেদকতভাৰং দীপেতি.

ৰিস্সাসগ্গাহলক্খণৰিনিচ্ছযকথা

৭০. অনুট্ঠানসেয্যা নাম যায সেয্যায সযিতো যাৰ জীৰিতিন্দ্রিযুপচ্ছেদং ন পাপুণাতি, তাৰ ৰুচ্চতি. দদমানেন চ মতকধনং তাৰ যে তস্স ধনে ইস্সরা গহট্ঠা ৰা পব্বজিতা ৰা, তেসং দাতব্বন্তি এত্থ কে গহট্ঠা কে পব্বজিতা কেন কারণেন তস্স ধনে ইস্সরাতি? গহট্ঠা তাৰ গিলানুপট্ঠাকভূতা তেন কারণেন গিলানুপট্ঠাকভাগভূতে তস্স ধনে ইস্সরা, যেসঞ্চ ৰাণিজানং হত্থতো কপ্পিযকারকেন পত্তাদিপরিক্খারো গাহাপিতো, তেসং যং দাতব্বমূলং, তে চ তস্স ধনে ইস্সরা, যেসঞ্চ মাতাপিতূনং অত্থায পরিচ্ছিন্দিত্ৰা ৰত্থানি ঠপিতানি, তেপি তস্স ধনস্স ইস্সরা. এৰমাদিনা যেন যেন কারণেন যং যং পরিক্খারধনং যেহি যেহি গহট্ঠেহি লভিতব্বং হোতি, তেন তেন কারণেন তে তে গহট্ঠা তস্স তস্স ধনস্স ইস্সরা.

পব্বজিতা পন বাহিরকা তথেৰ সতি কারণে ইস্সরা. পঞ্চসু পন সহধম্মিকেসু ভিক্খূ সামণেরা চ মতানং ভিক্খুসামণেরানং ধনং ৰিনাপি কারণেন দাযাদভাৰেন লভন্তি, ন ইতরা. ভিক্খুনীসিক্খমানসামণেরীনম্পি ধনং তাযেৰ লভন্তি, ন ইতরে. তং পন মতকধনভাজনং চতুপচ্চযভাজনৰিনিচ্ছযে আৰি ভৰিস্সতি, বহূ পন ৰিনযধরত্থেরা ‘‘যে তস্স ধনস্স ইস্সরা গহট্ঠা ৰা পব্বজিতা ৰা’’তি পাঠং নিস্সায ‘‘মতভিক্খুস্স ধনং গহট্ঠভূতা ঞাতকা লভন্তী’’তি ৰিনিচ্ছিনন্তি, তম্পি ৰিনিচ্ছযং তস্স চ যুত্তাযুত্তভাৰং তত্থেৰ ৰক্খাম.

অনত্তমনস্স সন্তকন্তি ‘‘দুট্ঠু কতং তযা মযা অদিন্নং মম সন্তকং গণ্হন্তেনা’’তি ৰচীভেদেন ৰা চিত্তুপ্পাদমত্তেন ৰা দোমনস্সপ্পত্তস্স সন্তকং. যো পন পঠমংযেৰ ‘‘সুট্ঠু কতং তযা মম সন্তকং গণ্হন্তেনা’’তি ৰচীভেদেন ৰা চিত্তুপ্পাদমত্তেন ৰা অনুমোদিত্ৰা পচ্ছা কেনচি কারণেন কুপিতো, পচ্চাহরাপেতুং ন লভতি. যোপি অদাতুকামো, চিত্তেন পন অধিৰাসেতি, ন কিঞ্চি ৰদতীতি এত্থ তু পোরাণটীকাযং (সারত্থ. টী. ২.১৩১) ‘‘চিত্তেন পন অধিৰাসেতীতি ৰুত্তমেৰত্থং ৰিভাৰেতুং ‘ন কিঞ্চি ৰদতী’তি ৰুত্ত’’ন্তি ৰুত্তং. এৰং সতি ‘‘চিত্তেনা’’তি ইদং অধিৰাসনকিরিযায করণং হোতি. অদাতুকামোতি এত্থাপি তমেৰ করণং সিযা, ততো ‘‘চিত্তেন অদাতুকামো, চিত্তেন অধিৰাসেতী’’তিৰচনং ওচিত্যসম্পোসকং ন ভৰেয্য. তং ঠপেত্ৰা ‘‘অদাতুকামো’’তি এত্থ কাযেনাতি ৰা ৰাচাযাতি ৰা অঞ্ঞং করণম্পি ন সম্ভৰতি, তদসম্ভৰে সতি ৰিসেসত্থৰাচকো পন-সদ্দোপি নিরত্থকো. ন কিঞ্চি ৰদতীতি এত্থ তু ৰদনকিরিযায করণং ‘‘ৰাচাযা’’তি পদং ইচ্ছিতব্বং, তথা চ সতি অঞ্ঞং অধিৰাসনকিরিযায করণং, অঞ্ঞং ৰদনকিরিযায করণং, অঞ্ঞা অধিৰাসনকিরিযা, অঞ্ঞা ৰদনকিরিযা, তস্মা ‘‘ৰুত্তমেৰত্থং ৰিভাৰেতু’’ন্তি ৰত্তুং ন অরহতি, তস্মা যোপি চিত্তেন অদাতুকামো হোতি, পন তথাপি ৰাচায অধিৰাসেতি, ন কিঞ্চি ৰদতীতি যোজনং কত্ৰা পন ‘‘অধিৰাসেতীতি ৰুত্তমেৰত্থং পকাসেতুং ন কিঞ্চি ৰদতীতি ৰুত্ত’’ন্তি ৰত্তুমরহতি. এত্থ তু পন-সদ্দো অরুচিলক্খণসূচনত্থো. ‘‘চিত্তেনা’’তি ইদং অদাতুকামকিরিযায করণং, ‘‘ৰাচাযা’’তি অধিৰাসনকিরিযায অৰদনকিরিযায চ করণং. অধিৰাসনকিরিযা চ অৰদনকিরিযাযেৰ. ‘‘অধিৰাসেতী’’তি ৰুত্তে অৰদনকিরিযায অপাকটভাৰতো তং পকাসেতুং ‘‘ন কিঞ্চি ৰদতী’’তি ৰুত্তং, এৰং গয্হমানে পুব্বাপরৰচনত্থো ওচিত্যসম্পোসকো সিযা, তস্মা এত্তকৰিৰরেহি ৰিচারেত্ৰা গহেতব্বোতি.

লাভপরিণামনৰিনিচ্ছযকথা

৭১. লাভপরিণামনৰিনিচ্ছযে তুম্হাকং সপ্পিআদীনি আভতানীতি তুম্হাকং অত্থায আভতানি সপ্পিআদীনি. পরিণতভাৰং জানিত্ৰাপি ৰুত্তৰিধিনা ৰিঞ্ঞাপেন্তেন তেসং সন্তকমেৰ ৰিঞ্ঞাপিতং নাম হোতীতি আহ ‘‘ময্হম্পি দেথাতি ৰদতি, ৰট্টতী’’তি.

‘‘পুপ্ফম্পি আরোপেতুং ন ৰট্টতীতি ইদং পরিণতং সন্ধায ৰুত্তং, সচে পন একস্মিং চেতিযে পূজিতং পুপ্ফং গহেত্ৰা অঞ্ঞস্মিং চেতিযে পূজেতি, ৰট্টতী’’তি সারত্থদীপনিযং (সারত্থ. টী. ২.৬৬০) ৰুত্তং. অট্ঠকথাযং (পারা. অট্ঠ. ২.৬৬০) পন নিযমেত্ৰা ‘‘অঞ্ঞস্স চেতিযস্স অত্থায রোপিতমালাৰচ্ছতো’’তি ৰুত্তত্তা ন কেৰলং পরিণতভাৰোযেৰ কথিতো, অথ খো নিযমেত্ৰা রোপিতভাৰোপি. পুপ্ফম্পীতি পি-সদ্দেন কুতো মালাৰচ্ছন্তি দস্সেতি. ৰিমতিৰিনোদনিযং (ৰি. ৰি. টী. ১.৬৬০) পন ‘‘রোপিতমালাৰচ্ছতোতি কেনচি নিযমেত্ৰা রোপিতং সন্ধায ৰুত্তং, অনোচিতং মিলাযমানং ওচিনিত্ৰা যত্থ কত্থচি পূজেতুং ৰট্টতী’’তি ৰুত্তং. ঠিতং দিস্ৰাতি সেসকং গহেত্ৰা ঠিতং দিস্ৰা. ইমস্স সুনখস্স মা দেহি, এতস্স দেহীতি ইদং পরিণতেযেৰ, তিরচ্ছানগতস্স পরিচ্চজিত্ৰা দিন্নে পন তং পলাপেত্ৰা অঞ্ঞং ভুঞ্জাপেতুং ৰট্টতি, তস্মা ‘‘কত্থ দেমাতিআদিনা একেনাকারেন অনাপত্তি দস্সিতা. এৰং পন অপুচ্ছিতেপি ‘অপরিণতং ইদ’ন্তি জানন্তেন অত্তনো রুচিযা যত্থ ইচ্ছতি, তত্থ দাপেতুং ৰট্টতী’’তি তীসুপি গণ্ঠিপদেসু ৰুত্তং. যত্থ ইচ্ছথ, তত্থ দেথাতি এত্থাপি ‘‘তুম্হাকং রুচিযা’’তি ৰুত্তত্তা যত্থ ইচ্ছতি, তত্থ দাপেতুং লভতি.

পরিৰারে (পরি. অট্ঠ. ৩২৯) পন নৰ অধম্মিকানি দানানীতি সঙ্ঘস্স পরিণতং অঞ্ঞসঙ্ঘস্স ৰা চেতিযস্স ৰা পুগ্গলস্স ৰা পরিণামেতি, চেতিযস্স পরিণতং অঞ্ঞচেতিযস্স ৰা সঙ্ঘস্স ৰা পুগ্গলস্স ৰা পরিণামেতি, পুগ্গলস্স পরিণতং অঞ্ঞপুগ্গলস্স ৰা সঙ্ঘস্স ৰা চেতিযস্স ৰা পরিণামেতীতি এৰং ৰুত্তানি. নৰ পটিগ্গহা পরিভোগা চাতি এতেসংযেৰ দানানং পটিগ্গহা চ পরিভোগা চ. তীণি ধম্মিকানি দানানীতি সঙ্ঘস্স নিন্নং সঙ্ঘস্সেৰ দেতি, চেতিযস্স নিন্নং চেতিযস্সেৰ দেতি, পুগ্গলস্স নিন্নং পুগ্গলস্সেৰ দেতীতি ইমানি তীণি. পটিগ্গহপটিভোগাপি তেসংযেৰ পটিগ্গহা চ পরিভোগা চাতি আগতং.

ইতি ৰিনযসঙ্গহসংৰণ্ণনাভূতে ৰিনযালঙ্কারে

দানলক্খণাদিৰিনিচ্ছযকথালঙ্কারো নাম

তেরসমো পরিচ্ছেদো.