২. সঙ্ঘাদিসেসকণ্ডং

১. পঠমসঙ্ঘাদিসেসসিক্খাপদৰণ্ণনা

৬৭৯. সঙ্ঘাদিসেসকণ্ডে ‘‘দুতিযস্স আরোচেতী’’তি এত্থাপি দ্ৰীসুপি অড্ডকারকেসু যস্স কস্সচি দুতিযস্স কথং যো কোচি আরোচেতীতি এৰমত্থো গহেতব্বোতি আহ ‘‘এসেৰ নযো’’তি.

গতিগতন্তি চিরকালপ্পৰত্তং. আপত্তীতি আপজ্জনং. ‘‘নিস্সারণীয’’ন্তি ইদং কত্তুঅত্থে সিদ্ধন্তি আহ ‘‘নিস্সারেতী’’তি. আপন্নং ভিক্খুনিং সঙ্ঘতো ৰিযোজেতি, ৰিযোজনহেতু হোতীতি অত্থো.

গীৰাযেৰাতি আণত্তিযা অভাৰতো. তেসং অনত্থকামতাযাতি ‘‘চোরো’’তি ৰুত্তং মম ৰচনং সুত্ৰা কেচি দণ্ডিস্সন্তি জীৰিতা ৰোরোপেস্সন্তীতি এৰং সঞ্ঞায. এতেন কেৰলং ভযেন ৰা পরিক্খারগ্গহণত্থং ৰা সহসা ‘‘চোরো’’তি ৰুত্তে দণ্ডিতেপি ন দোসোতি দস্সেতি. রাজপুরিসানঞ্হি ‘‘চোরো অয’’ন্তি উদ্দিস্স কথনে এৰ গীৰা, ভিক্খূনং, পন আরামিকাদীনং ৰা সম্মুখা ‘‘অসুকো চোরো এৰমকাসী’’তি কেনচি ৰুত্তৰচনং নিস্সায আরামিকাদীসু রাজপুরিসানং ৰত্ৰা দণ্ডাপেন্তেসুপি ভিক্খুস্স ন গীৰা রাজপুরিসানং অৰুত্তত্তা. যেসঞ্চ ৰুত্তং, তেহি সযং চোরস্স অদণ্ডিতত্তাতি গহেতব্বং. ‘‘ত্ৰং এতস্স সন্তকং অচ্ছিন্দা’’তি আণত্তোপি হি সচে অঞ্ঞেন অচ্ছিন্দাপেতি, আণাপকস্স অনাপত্তি ৰিসঙ্কেতত্তা. ‘‘অত্তনো ৰচনকর’’ন্তি ইদং সামীচিৰসেন ৰুত্তং. ৰচনং অকরোন্তানং রাজপুরিসানম্পি ‘‘ইমিনা গহিতপরিক্খারং আহরাপেহি, মা চস্স দণ্ডং করোহী’’তি উদ্দিস্স ৰদন্তস্সাপি দণ্ডে গহিতেপি ন গীৰা এৰ দণ্ডগ্গহণস্স পটিক্খিত্তত্তা, ‘‘অসুকভণ্ডং অৰহরা’’তি আণাপেত্ৰা ৰিপ্পটিসারে উপ্পন্নে পুন পটিক্খিপনে (পারা. ১২১) ৰিয.

দাসাদীনং সম্পটিচ্ছনে ৰিয তদত্থায অড্ডকরণে ভিক্খূনম্পি দুক্কটন্তি আহ ‘‘অকপ্পিযঅড্ডো নাম ন ৰট্টতী’’তি. কেনচি পন ভিক্খুনা খেত্তাদিঅত্থায ৰোহারিকানং সন্তিকং গন্ত্ৰা অড্ডে কতেপি তং খেত্তাদিসম্পটিচ্ছনে ৰিয সব্বেসং অকপ্পিযং ন হোতি পুব্বে এৰ সঙ্ঘস্স সন্তকত্তা, ভিক্খুস্সেৰ পন পযোগৰসেন আপত্তিযো হোন্তি. দাসাদীনম্পি পন অত্থায রক্খং যাচিতুং ৰোহারিকেন পুট্ঠেন সঙ্ঘস্স উপ্পন্নং কপ্পিযক্কমং ৰত্তুং, আরামিকাদীহি চ অড্ডং কারাপেতুঞ্চ ৰট্টতি এৰ. ৰিহারৰত্থাদিকপ্পিযঅড্ডং পন ভিক্খুনো সযম্পি কাতুং ৰট্টতি.

ভিক্খুনীনং ৰুত্তোতি রক্খং যাচন্তীনং ভিক্খুনীনং ৰুত্তো উদ্দিস্সঅনুদ্দিস্সৰসেন রক্খাযাচনৰিনিচ্ছযো, ন সব্বো সিক্খাপদৰিনিচ্ছযো অসাধারণত্তা সিক্খাপদস্স. তেনাহ ‘‘ভিক্খুনোপী’’তিআদি. অনাকড্ঢিতায অড্ডকরণং, অড্ডপরিযোসানন্তি দ্ৰে অঙ্গানি.

পঠমসঙ্ঘাদিসেসসিক্খাপদৰণ্ণনা নিট্ঠিতা.

২. দুতিযসঙ্ঘাদিসেসসিক্খাপদৰণ্ণনা

৬৮৩. পাল়িযং দুতিযে মল্লগণভটিপুত্তগণাদিকন্তিআদীসু মল্লরাজূনং গণো মল্লগণো. ভটিপুত্তা নাম কেচি গণরাজানো, তেসং গণো. কেচি পন ‘‘নারাযনভত্তিকো পুঞ্ঞকারগণো মল্লগণো. তথা কুমারভত্তিকো চ গণো ভটিপুত্তগণো’’তিপি (সারত্থ. টী. সংঘাদিসেসকণ্ড ৩.৬৮৩) ৰদন্তি. ধম্মগণোতি সাসনে, লোকে ৰা অনেকপ্পকারপুঞ্ঞকারকো গণো. গন্ধৰিকতিকারকো গণো গন্ধিকসেণী. পেসকারাদিগণো দুস্সিকসেণী. কপ্পগতিকন্তি কপ্পিযভাৰগতং, পব্বজিতপুব্বন্তি অত্থো.

৬৮৫. পাল়িযং ৰুট্ঠাপেতীতি উপসম্পাদেতি. অকপ্পগতম্পি পব্বাজেন্তিযা দুক্কটন্তি ৰদন্তি. খীণাসৰাযপি আপজ্জিতব্বতো ‘‘তিচিত্ত’’ন্তি ৰুত্তং. চোরিতা, তং ঞত্ৰা অননুঞ্ঞাতকারণা ৰুট্ঠাপনন্তি দ্ৰে অঙ্গানি.

দুতিযসঙ্ঘাদিসেসসিক্খাপদৰণ্ণনা নিট্ঠিতা.

৩. ততিযসঙ্ঘাদিসেসসিক্খাপদৰণ্ণনা

৬৯২. ততিযে পরিক্খেপং অতিক্কামেন্তিযাতি গামন্তরস্স পরিক্খেপং অতিক্কামেন্তিযা. ‘‘গামন্তরং গচ্ছেয্যা’’তি হি ৰুত্তং. ৰিকালগামপ্পৰেসনসিক্খাপদে ৰিয ‘‘অপরিক্খিত্তস্স উপচারং ওক্কমন্তিযা’’তি অৰত্ৰা ‘‘অতিক্কামেন্তিযা’’তি পাল়িযং ৰুত্তত্তা গামং পৰিসন্তিযা ঘরূপচারে ঠিতস্স দুতিযলেড্ডুপাতসঙ্খাতস্স উপচারস্স অতিক্কমো নাম পঠমলেড্ডুপাতট্ঠানসঙ্খাতস্স পরিক্খেপারহট্ঠানস্স অতিক্কমো এৰাতি আহ ‘‘পরিক্খেপারহট্ঠানং একেন পাদেন অতিক্কমতী’’তি.

মজ্ঝেতি গামমজ্ঝে. পচ্ছাতি অপরকালে. ‘‘চতুগামসাধারণত্তা’’তি ইমিনা ৰিহারতো চতূসু গামেসু যত্থ কত্থচি পৰিসিতুং ৰট্টতীতি এত্থ কারণমাহ.

পরতীরমেৰ অক্কমন্তিযাতি নদিং অনোতরিত্ৰা ওরিমতীরতো লঙ্ঘিত্ৰা ৰা আকাসাদিনা ৰা পরতীরমেৰ অতিক্কামেন্তিযা. ওরিমতীরমেৰ আগচ্ছতি, আপত্তীতি পারগমনায ওতিণ্ণত্তা ৰুত্তং.

তাদিসে অরঞ্ঞেতি ইন্দখীলতো বহিভাৰলক্খণে অরঞ্ঞে. ‘‘তেনেৰা’’তিআদিনা দস্সনূপচারে ৰিরহিতে সৰনূপচারস্স ৰিজ্জমানত্তেপি আপত্তি হোতীতি দস্সেতি. অঞ্ঞং মগ্গং গণ্হাতীতি মগ্গমূল়্হত্তা গণ্হাতি, ন দুতিযিকং ওহিযিতুং. তস্মা অনাপত্তি. অনন্তরাযেন একভাৰো, অনাপদায গামন্তরগমনাদীসু একন্তি দ্ৰে অঙ্গানি.

ততিযসঙ্ঘাদিসেসসিক্খাপদৰণ্ণনা নিট্ঠিতা.

৪. চতুত্থসঙ্ঘাদিসেসসিক্খাপদৰণ্ণনা

৬৯৪. চতুত্থে কারকগণস্সাতি ইমস্স কম্মং কাতব্বন্তি যেহি সন্নিট্ঠানং কতং, তে সন্ধায ৰুত্তং. কম্মৰাচক্খণে সহঠিতেতি কেচি. নেত্থারৰত্তেতি নিত্থরণহেতুম্হি ৰত্তে.

৬৯৮. পাল়িযং অসন্তে কারকসঙ্ঘেতি এত্থ ৰিজ্জমানং সুদূরম্পি গন্ত্ৰা আপুচ্ছিতব্বং. অন্তরাযে পন সতি সম্মা ৰত্তন্তং ওসারেতুং ৰট্টতীতি. ধম্মকম্মেন উক্খিত্ততা, অননুঞ্ঞাতকারণা ওসারণন্তি দ্ৰে অঙ্গানি.

চতুত্থসঙ্ঘাদিসেসসিক্খাপদৰণ্ণনা নিট্ঠিতা.

৫. পঞ্চমসঙ্ঘাদিসেসসিক্খাপদৰণ্ণনা

৭০১. পঞ্চমে তন্তি মহাঅট্ঠকথাযং অৰচনং ‘‘অনৰস্সুতোতি জানন্তী পটিগ্গণ্হাতী’’তিআদি পাল়িযা সমেতি. উভতো অৰস্সুতভাৰো, উদকদন্তপোনতো অঞ্ঞং সহত্থা গহেত্ৰা অজ্ঝোহরণন্তি দ্ৰে অঙ্গানি.

পঞ্চমসঙ্ঘাদিসেসসিক্খাপদৰণ্ণনা নিট্ঠিতা.

৬. ছট্ঠসঙ্ঘাদিসেসসিক্খাপদৰণ্ণনা

৭০৫. ছট্ঠে পটিগ্গহো তেন ন ৰিজ্জতীতি তেনেৰ ‘‘ন দেতী’’তি ৰুত্তকারণেন উয্যোজিতায হত্থতো ইতরায পটিগ্গহোপি নত্থি. পরিভোগপচ্চযাতি উয্যোজিতায ভোজনপরিযোসানপচ্চযাতি অত্থো. মনুস্সপুরিসস্স অৰস্সুততা, তং ঞত্ৰা অননুঞ্ঞাতকারণা উয্যোজনা, তেন ইতরিস্সা গহেত্ৰা ভোজনপরিযোসানন্তি তীণি অঙ্গানি.

ছট্ঠসঙ্ঘাদিসেসসিক্খাপদৰণ্ণনা নিট্ঠিতা.

৭০৯-৭২৭. সত্তমতো যাৰদসমপরিযোসানানি উত্তানানেৰ.

সঙ্ঘাদিসেসৰণ্ণনানযো নিট্ঠিতো.