১. উব্ভজাণুমণ্ডলিকসিক্খাপদৰণ্ণনা

৬৫৬. ভিক্খুনীৰিভঙ্গে মিগারমাতুযাতি মিগারমাতু, ৰিসাখাযাতি অত্থো. পাল়িযং ‘‘এহি ভিক্খুনীতি ভিক্খুনী, তীহি সরণগমনেহি উপসম্পন্নাতি ভিক্খুনী’’তি ইদং ভিক্খুৰিভঙ্গপাল়িযা সমদস্সনত্থং অট্ঠগরুধম্মপ্পটিগ্গহণেন লদ্ধূপসম্পদং মহাপজাপতিগোতমিঞ্চেৰ তায সহ নিক্খন্তা ভগৰতো আণায ভিক্খূনঞ্ঞেৰ সন্তিকে একতোউপসম্পন্না পঞ্চসতসাকিযানিযো চ সন্ধায ৰুত্তং. তা হি ভগৰতা আনন্দত্থেরস্স যাচনায পব্বজ্জং অনুজানন্তেন ‘‘এথ ভিক্খুনিযো, মম সাসনে তুম্হেপি পৰিসথা’’তি ৰুত্তা ৰিয জাতা. সাকিযানিযো এৰ সরণসীলানি দত্ৰা কম্মৰাচায উপসম্পাদিতত্তা ‘‘তীহি সরণগমনেহি উপসম্পন্না’’তি ৰুত্তা. ন হি এতাহি অঞ্ঞা এহিভিক্খুনিভাৰাদিনা উপসম্পন্না নাম সন্তি. যং পন থেরীগাথাসু ভদ্দায কুণ্ডলকেসিযা –

‘‘নিহচ্চ জাণুং ৰন্দিত্ৰা, সম্মুখা অঞ্জলিং অকং;

‘এহি ভদ্দে’তি মং অৰোচ, সা মে আসূপসম্পদা’’তি. (থেরীগা. ১০৯) –

ৰুত্তং. যঞ্চ অপদানেপি –

‘‘আযাচিতো তদা আহ, ‘এহি ভদ্দে’তি নাযকো;

তদাহং উপসম্পন্না, পরিত্তং তোযমদ্দস’’ন্তি. (অপ. থেরী ২.৩.৪৪) –

ৰুত্তং. তম্পি ‘‘এহি ত্ৰং ভিক্খুনীনং সন্তিকে পব্বজ্জং, উপসম্পদঞ্চ গণ্হাহী’’তি ভগৰতো আণা উপসম্পদায কারণত্তা উপসম্পদা অহোসীতি ইমমত্থং সন্ধায ৰুত্তং. তথা হি ৰুত্তং থেরীগাথাট্ঠকথাযং ‘‘এহি ভদ্দে, ভিক্খুনুপস্সযং গন্ত্ৰা ভিক্খুনীনং সন্তিকে পব্বজ্জ উপসম্পজ্জস্সূতি মং অৰচ আণাপেসি, সা সত্থু আণা ময্হং উপসম্পদায কারণত্তা উপসম্পদা আসি অহোসী’’তি (থেরীগা. অট্ঠ. ১১১).

৬৫৭. সাধারণপারাজিকেহীতি মেথুনাদীহি চতূহি. তানি, পন অঞ্ঞানি চ সাধারণসিক্খাপদানি যস্মা ভিক্খুৰিভঙ্গে ৰুত্তনিদানৰত্থাদীসু এৰ সাধারণৰসেন পঞ্ঞত্তানি, পচ্ছা পন তানি ভিক্খুনীনং পাতিমোক্খুদ্দেসং অনুজানন্তেন ভগৰতা তাসং সিক্খাপচ্চক্খানাভাৰেন ‘‘যা পন ভিক্খুনী ছন্দসো মেথুনং ধম্মং পটিসেৰেয্যা’’তিআদিনা তদনুরূপৰসেন পরিৰত্তেত্ৰা অসাধারণসিক্খাপদেহি সদ্ধিং সংসন্দেত্ৰা ভিক্খুনিপাতিমোক্খুদ্দেসৰসেন একতো সঙ্গহিতানি. যস্মা চ নেসং ভিক্খুৰিভঙ্গে (পারা. ৪৪ আদযো) ৰুত্তনযেনেৰ সব্বোপি ৰিনিচ্ছযো সক্কা ঞাতুং, তস্মা তানি ৰজ্জেত্ৰা অসাধারণানং এৰ ইধ ৰিভঙ্গো ৰুত্তোতি ৰেদিতব্বং.

৬৫৯. ভিক্খূনং ‘‘কাযসংসগ্গং সাদিযেয্যা’’তি অৰত্ৰা ‘‘সমাপজ্জেয্যা’’তি ৰুত্তত্তা ‘‘ভিক্খু আপত্তিযা ন কারেতব্বো’’তি ৰুত্তং. তব্বহুলনযেনাতি কিরিযাসমুট্ঠানস্সেৰ বহুলভাৰতো, এতেন অকিরিযাসমুট্ঠানাপি অযং আপত্তি হোতীতি দস্সেতি. কিঞ্চাপি দস্সেতি, মযং পনেত্থ এৰং তক্কযাম ‘‘কাযসংসগ্গক্খণে সাদিযন্তিযা কিরিযায অভাৰেপি ততো পুব্বে পৰত্তিতানং পটিচ্ছন্নট্ঠানগমনইঙ্গিতাকারদস্সনাদিকিরিযানং ৰসেনেৰ কিরিযাসমউট্ঠানমেৰ, পরেহি মগ্গে করিযমানুপক্কমেন নিচ্চলস্স সাদিযতো সুক্কৰিস্সট্ঠি ৰিয পুব্বপযোগাভাৰেপি ৰা তস্মিঞ্ঞেৰ খণে পরূপক্কমেন জনিযমানায অত্তনো কাযচলনাদিসঙ্খাতায কিরিযায, সা হি সাদিযমানেন তস্সা চিত্তেনাপি সমুট্ঠিতা কিরিযা নাম হোতি অৰাযমিত্ৰা পরূপক্কমেন মেথুনসাদিযনে ৰিয, ভিক্খূনং পন পরূপক্কমজনিতং কিরিযং অব্বোহারিকং কত্ৰা অত্তনা করিযমানপযোগৰসেনেৰ ‘কাযসংসগ্গং সমাপজ্জেয্যা’তি এৰং ৰিসেসেত্ৰাৰ সিক্খাপদস্স পঞ্ঞত্তত্তা সাদিযমানেপি ন দোসো. ইতরথা হি তব্বহুলনযেনেত্থ কিরিযত্তে গয্হমানে অঞ্ঞেসম্পি কিরিযাকিরিযসিক্খাপদানং কিরিযত্তগ্গহণপ্পসঙ্গো সিযা’’তি. তস্মা ৰীমংসিত্ৰা গহেতব্বং. সাতি কিরিযাসমুট্ঠানতা. তথেৰাতি কাযসংসগ্গরাগী এৰ.

উব্ভজাণুমণ্ডলিকসিক্খাপদৰণ্ণনা নিট্ঠিতা.