৯. রাজৰগ্গো

১. অন্তেপুরসিক্খাপদৰণ্ণনা

৪৯৯. নৰমৰগ্গস্স পঠমে পাল়িযং সংসুদ্ধগহণিকোতি এত্থ গহণীতি গব্ভাসযসঞ্ঞিতো মাতু কুচ্ছিপ্পদেসো, পুরিসন্তরসুক্কাসম্ফুট্ঠতায সংসুদ্ধগহণিকো. অভিসিত্তখত্তিযতা, উভিন্নম্পি সযনিঘরতো অনিক্খন্ততা, অপ্পটিসংৰিদিতস্স ইন্দখীলাতিক্কমোতি তীণি অঙ্গানি.

অন্তেপুরসিক্খাপদৰণ্ণনা নিট্ঠিতা.

২. রতনসিক্খাপদৰণ্ণনা

৫০৬. দুতিযে আৰসথস্সাতি এত্থ অন্তোআরামে ৰা হোতু অঞ্ঞত্থ ৰা, যত্থ কত্থচি অত্তনো ৰসনট্ঠানং আৰসথো নাম. ছন্দেনপি ভযেনপীতি ৰড্ঢকিআদীসু ছন্দেন, রাজৰল্লভেসু ভযেন. আকিণ্ণমনুস্সেপি জাতে…পে… আসঙ্কন্তীতি তস্মিং নিম্মনুস্সট্ঠানে পচ্ছা আকিণ্ণমনুস্সে জাতেপি ৰিসরিত্ৰা গমনকালে অঞ্ঞস্স অদিট্ঠত্তা তমেৰ ভিক্খুং আসঙ্কন্তি. পতিরূপং নাম কপ্পিযভণ্ডে সযং পংসুকূলং গহেত্ৰা অকপ্পিযভণ্ডে পতিরূপানং উপাসকাদীনং দস্সেত্ৰা চেতিযাদিপুঞ্ঞে নিযোজনং ৰা দাপেত্ৰা নিরপেক্খগমনং ৰা. সমাদপেত্ৰাতি যাচিত্ৰা. পরসন্তকতা, ৰিস্সাসগ্গাহপংসুকূলসঞ্ঞানং অভাৰো, অননুঞ্ঞাতকারণা উগ্গহণাদি চাতি তীণি অঙ্গানি.

রতনসিক্খাপদৰণ্ণনা নিট্ঠিতা.

৩. ৰিকালগামপ্পৰিসনসিক্খাপদৰণ্ণনা

৫০৮. ততিযে পাল়িযং ভযকথন্তি রাজচোরাদিভযং ৰা রোগামনুস্সদুব্ভিক্খকন্তারাদিভযং ৰা আরব্ভ পৰত্তং. ৰিসিখাকথন্তি সুনিৰিট্ঠাদিৰীথিকথং. কুম্ভট্ঠানকথন্তি উদকতিত্থকথং, কুম্ভদাসীকথং ৰা. পুব্বপেতকথন্তি অতীতঞাতিকথং. নানত্তকথন্তি ৰুত্তাহি, ৰক্খমানাহি চ ৰিমুত্তং নানাসভাৰং নিরত্থককথং. লোকক্খাযিকন্তি ‘‘অযং লোকো কেন নিম্মিতো’’তিআদিনা লোকসভাৰক্খানৰসেন পৰত্তনকথা. এৰং সমুদ্দক্খাযিকা ৰেদিতব্বা. ইতি ভৰো ইতি অভৰোতি যং ৰা তং ৰা নিরত্থককারণং ৰত্ৰা পৰত্তিতকথা ইতিভৰাভৰকথা. এত্থ চ ভৰো সস্সতং, ৰুড্ঢি, কামসুখঞ্চাতি তিৰিধো, অভৰো তব্বিপরীতৰসেন. ইতি ইমায ছব্বিধায ইতিভৰাভৰকথায সদ্ধিং দ্ৰত্তিংসতিরচ্ছানকথা নাম হোন্তি. অথ ৰা পাল়িযং সরূপতো অনাগতাপি অরঞ্ঞপব্বতনদীদীপকথা ইতি-সদ্দেন সঙ্গহেত্ৰা দ্ৰত্তিংসতিরচ্ছানকথাতি ৰুচ্চন্তি. ইতি ৰাতি এত্থ ইতি-সদ্দো পকারত্থে. ৰা-সদ্দো ৰিকপ্পত্থে. তস্মা এৰং পকারং ইতো অঞ্ঞং ৰা তাদিসং নিরত্থককথং কথেতীতি অত্থো গহেতব্বো.

৫১২. উস্সাহং পটিপ্পস্সম্ভেত্ৰা ৰিহারং গচ্ছন্তাতি এত্থ গামূপচারতো বহি নিক্খন্তে অন্তরারামাদীনমুপচারং পৰিট্ঠে সন্ধায ৰুত্তং. গামূপচারব্ভন্তরে পন পটিপস্সদ্ধুস্সাহানম্পি পুন তমেৰ ৰা অঞ্ঞং ৰা গামং পৰিসিতুকামতায সতি আপুচ্ছনকিচ্চং নত্থি. ‘‘কুলঘরে ৰা…পে… গন্তব্ব’’ন্তি ইদং পন পুরেভত্তং পৰিট্ঠানং ৰিকালে সঞ্জাতে ৰিকালে গামপ্পৰেসস্স আপুচ্ছিতব্বতায ৰুত্তং. অদিন্নাদানে ৰুত্তনযেনাতি দুতিযলেড্ডুপাতং সন্ধায ৰুত্তং.

৫১৫. অন্তরারামন্তিআদীসূতি এত্থ উস্সৰদিৰসাদীসু মনুস্সেহি গামে পদক্খিণং কারেন্তং জিনবিম্বাদিং পূজেতুকামেহি ৰা রোগৰূপসমাদিযত্থং মনুস্সেহি যাচিতেহি ৰা ভিক্খূহি সুপ্পটিচ্ছন্নাদিৰিধিং অকত্ৰাপি ৰীথিমজ্ঝেনেৰ গামং পদক্খিণং কাতুং ৰট্টতীতি ৰদন্তি, তং ন গহেতব্বং অনাপত্তিৰারে অৰুত্তত্তা, ‘‘মগ্গা অনোক্কমিত্ৰা…পে… পাচিত্তিয’’ন্তি (কঙ্খা. অট্ঠ. ৰিকালগামপ্পৰেসনসিক্খাপদৰণ্ণনা) পটিক্খিত্তত্তা চ. ৰেসালিং অনুপরিযাযিত্ৰা পরিত্তং করোন্তেনাপি আনন্দত্থেরেন সুপ্পটিচ্ছন্নতাদিং অকোপেন্তেনেৰ, অপঞ্ঞত্তে ৰা সিক্খাপদে কতন্তি দট্ঠব্বং. কেচি পন ‘‘অন্তরারামাদিগামন্তরে ঠিতেহি গরুট্ঠানীযানং পচ্চুগ্গমনানুগ্গমনাদিৰসেন গামৰীথিং ওতরিতুং ৰট্টতী’’তি ৰদন্তি, তম্পি অন্তরঘরং পৰিসন্তং পতি কাতুং ন ৰট্টতি এৰ. অন্তরারামাদিকপ্পিযভূমিং পন উদ্দিস্স গচ্ছন্তং পতি কাতুং ৰট্টতীতি খাযতি, ৰীমংসিতব্বং. সন্তং ভিক্খুং অনাপুচ্ছনা, অননুঞ্ঞাতকারণা ৰিকালে গামপ্পৰেসোতি দ্ৰে অঙ্গানি.

ৰিকালগামপ্পৰিসনসিক্খাপদৰণ্ণনা নিট্ঠিতা.

৪. সূচিঘরসিক্খাপদৰণ্ণনা

৫২০. চতুত্থে পাল়িযং ৰাসিজটেতি ৰাসিদণ্ডকে. অট্ঠিমযাদিসূচিঘরতা, করণকারাপনাদিৰসেন অত্তনো পটিলাভোতি দ্ৰে অঙ্গানি.

সূচিঘরসিক্খাপদৰণ্ণনা নিট্ঠিতা.

৫. মঞ্চপীঠসিক্খাপদৰণ্ণনা

৫২১. পঞ্চমে পাল়িযং আসযতো, ভিক্খৰে, মোঘপুরিসো ৰেদিতব্বোতি হীনজ্ঝাসযৰসেন অযং তুচ্ছপুরিসোতি ঞাতব্বো, হীনায পচ্চযে লোলতায পুগ্গলস্স তুচ্ছতা ঞাতব্বাতি অধিপ্পাযো. ইমস্মিং সিক্খাপদে, ইতো পরেসু চ পঞ্চসু অত্তনা কারাপিতস্স পটিলাভে এৰ পাচিত্তিযং. পরিভোগে পনস্স, অঞ্ঞেসঞ্চ দুক্কটমেৰ. পমাণাতিক্কন্তমঞ্চপীঠতা, অত্তনো করণকারাপনৰসেন পটিলাভোতি দ্ৰে অঙ্গানি.

মঞ্চপীঠসিক্খাপদৰণ্ণনা নিট্ঠিতা.

৬. তূলোনদ্ধসিক্খাপদৰণ্ণনা

৫২৬. ছট্ঠে পোটকিতূলন্তি তিণগচ্ছজাতিকানং তূলং. সেসং ৰুত্তনযমেৰ.

তূলোনদ্ধসিক্খাপদৰণ্ণনা নিট্ঠিতা.

৭. নিসীদনসিক্খাপদৰণ্ণনা

৫৩১-৫৩৬. সত্তমে নিসীদনস্স পমাণাতিক্কন্ততা, অত্তনো করণাদিনা পটিলাভোতি দ্ৰে অঙ্গানি.

নিসীদনসিক্খাপদৰণ্ণনা নিট্ঠিতা.

৫৩৭-৫৪৭. ইমিনা নযেন অট্ঠমনৰমদসমেসুপি অঙ্গানি ৰেদিতব্বানি. সেসং সব্বত্থ সুৰিঞ্ঞেয্যমেৰাতি.

নিট্ঠিতো রাজৰগ্গো নৰমো.

খুদ্দকৰণ্ণনানযো নিট্ঠিতো.