৫. চীৰরঅচ্ছিন্দনসিক্খাপদৰণ্ণনা

৬৩১. পঞ্চমে যম্পি…পে… অচ্ছিন্দীতি এত্থ যং তে অহং চীৰরং অদাসিং, তং ‘‘মযা সদ্ধিং পক্কমিস্সতী’’তি সঞ্ঞায অদাসিং, ন অঞ্ঞথাতি কুপিতো অচ্ছিন্দীতি এৰং অজ্ঝাহরিত্ৰা যোজেতব্বং.

৬৩৩. একং দুক্কটন্তি যদি আণত্তো অৰস্সং অচ্ছিন্দতি, আণত্তিক্খণে পাচিত্তিযমেৰ. যদি ন অচ্ছিন্দতি, তদা এৰ দুক্কটন্তি দট্ঠব্বং. একৰাচায সম্বহুলা আপত্তিযোতি যদি আণত্তো অনন্তরাযেন অচ্ছিন্দতি, আণত্তিক্খণেযেৰ ৰত্থুগণনায পাচিত্তিযআপত্তিযো পযোগকরণক্খণেযেৰ আপত্তিযা আপজ্জিতব্বতো, চীৰরং পন অচ্ছিন্নেযেৰ নিস্সগ্গিযং হোতি. যদি সো ন অচ্ছিন্দতি, আণত্তিক্খণে একমেৰ দুক্কটন্তি দট্ঠব্বং. এৰং অঞ্ঞত্থাপি ঈদিসেসু নযো ঞাতব্বো.

৬৩৫. উপজ্ঝং গণ্হিস্সতীতি সামণেরস্স দানং দীপেতি, তেন চ সামণেরকালে দত্ৰা উপসম্পন্নকালে অচ্ছিন্দতোপি পাচিত্তিযং দীপেতি. ‘‘ভিক্খুস্স সামং চীৰরং দত্ৰা’’তি ইদং উক্কট্ঠৰসেন ৰুত্তং. আহরাপেতুং পন ৰট্টতীতি কম্মে অকতে ভতিসদিসত্তা ৰুত্তং. ৰিকপ্পনুপগপচ্ছিমচীৰরতা, সামং দিন্নতা, সকসঞ্ঞিতা, উপসম্পন্নতা, কোধৰসেন অচ্ছিন্দনং ৰা অচ্ছিন্দাপনং ৰাতি ইমানেত্থ পঞ্চ অঙ্গানি.

চীৰরঅচ্ছিন্দনসিক্খাপদৰণ্ণনা নিট্ঠিতা.