৪. সালসুত্তৰণ্ণনা

৩৭০. যথানুসিট্ঠং পটিপজ্জমানে অপাযদুক্খে অপাতনৰসেন ধারণট্ঠেন ধম্মো, সাসনব্রহ্মচরিযং, তদেৰ তদঙ্গাদিৰসেন কিলেসানং ৰিনযনট্ঠেন ৰিনযোতি আহ – ‘‘ধম্মোতি ৰা…পে… নাম’’ন্তি. পটিপক্খধম্মেহি অনভিভূততায একো উদেতীতি একোদীতি লদ্ধনামো সমাধি ভূতো জাতো এতেসন্তি একোদিভূতা. এত্থ চ একোদিভূতাতি এতেন উপচারজ্ঝানাৰহো পুব্বভাগিকো সমাধি ৰুত্তো. সমাহিতাতি এতেন উপচারপ্পনাসমাধি. একগ্গচিত্তাতি এতেন সুভাৰিতো ৰসিপ্পত্তো অপ্পনাসমাধি ৰুত্তোতি ৰেদিতব্বো. নৰকভিক্খূহি ভাৰিতসতিপট্ঠানা পুব্বভাগা. তে হি যথাভূতঞাণায ভাৰিতা. যথাভূতঞাণন্তি হি সোতাপত্তিমগ্গঞাণং ইধাধিপ্পেতং. খীণাসৰেহি ভাৰিতসতিপট্ঠানাপি পুব্বভাগা. তেসঞ্হি কতকরণীযানং দিট্ঠধম্মসুখৰিহারায সতিপট্ঠানভাৰনা, সেক্খানং পন সতিপট্ঠানভাৰনা পরিঞ্ঞত্থায পৰত্তা লোকিযা, পরিজাননৰসেন পৰত্তা লোকুত্তরাতি ‘‘মিস্সকা’’তি ৰুত্তং.