নমো তস্স ভগৰতো অরহতো সম্মাসম্বুদ্ধস্স

সংযুত্তনিকাযে

মহাৰগ্গটীকা

১. মগ্গসংযুত্তং

১. অৰিজ্জাৰগ্গো

১-২. অৰিজ্জাসুত্তাদিৰণ্ণনা

১-২. পুব্বঙ্গমাতি পুব্বেচরা. অৰিজ্জা হি অঞ্ঞাণলক্খণা সম্মুয্হনাকারেন আরম্মণে পৰত্ততীতি সম্পযুত্তধম্মানম্পি তদাকারানুৰিধানতায পচ্চযো হোতি. তথা হি তে অনিচ্চাসুভদুক্খানত্তসভাৰেপি ধম্মে নিচ্চাদিতো গণ্হন্তি, অযমস্সা তেসং সহজাতৰসেন পুব্বঙ্গমতা. যং পন মোহেন অভিভূতো পাপকিরিযায আদীনৰং অপস্সন্তো পাণং হনতি, অদিন্নং আদিযতি, কামেসু মিচ্ছা চরতি, মুসা ভণতি, অঞ্ঞম্পি ৰিৰিধং দুস্সীল্যং আচরতি, অযমস্স সহজাতৰসেন চ উপনিস্সযৰসেন চ পুব্বঙ্গমতা. সমাপজ্জনাযাতি তব্ভাৰাপজ্জনায অকুসলপ্পত্তিযা. সভাৰপটিলাভাযাতি অত্তলাভায. তেনাহ ‘‘উপ্পত্তিযা’’তি. সা পনেসা ৰুত্তাকারেন অকুসলানং পুব্বঙ্গমভূতা অৰিজ্জা উপ্পজ্জতীতি সম্বন্ধো. যদেতন্তি যং এতং পাপাজিগুচ্ছনতায পাপতো অলজ্জনাকারসণ্ঠিতং অহিরিকং, পাপানুত্রাসতায পাপতো অভাযনাকারসণ্ঠিতঞ্চ অনোত্তপ্পং, এতং দ্ৰযং অনুদেৰ অন্ৰাগতমেৰ. অনু-সদ্দেন চেত্থ এতন্তি উপযোগৰচনং. অনুদেৰাতি এতস্স অত্থো সহেৰ একতোতি. এত্থ অৰিজ্জায ৰুত্তনযানুসারেন তপ্পটিপক্খতো চ অত্থো ৰেদিতব্বো. অযং পন ৰিসেসো – তত্থ যথা অকুসলকম্মপথৰসেন পৰত্তিযং পুব্বঙ্গমতা অৰিজ্জায, এৰং কুসলকম্মপথৰসেন পুঞ্ঞকিরিযৰত্থুৰসেন চ পৰত্তিযং ৰিজ্জায পুব্বঙ্গমতা ৰত্তব্বা. ৰীমংসাধিপতিৰসেন পৰত্তিযং আধিপচ্চাকারৰসেন চ পুব্বঙ্গমতা ৰেদিতব্বা. দ্ৰীহেৰাতি চ অৰধারণং আধিপচ্চাকারস্স সহজাতেনেৰ সঙ্গহেতব্বতো.

লজ্জনাকারসণ্ঠিতাতি পাপতো জিগুচ্ছনাকারসণ্ঠিতা. ভাযনাকারসণ্ঠিতন্তি উত্তসনাকারসণ্ঠিতং. এত্থাতি হিরিওত্তপ্পে. ৰিদতি, ৰিন্দতীতি ৰা ৰিজ্জা. ৰিদ্দসূতি চ সপ্পঞ্ঞপরিযাযোতি আহ ‘‘ৰিদ্দসুনোতি ৰিদুনো’’তি. যাথাৰদিট্ঠীতি অৰিপরীতা দিট্ঠি, সংকিলেসতো নিয্যানিকদিট্ঠি. সম্মাদিট্ঠি পহোতীতি এত্থ সা ৰিজ্জা সম্মাদিট্ঠি ৰেদিতব্বা. ন একতো সব্বানি লব্ভন্তি সম্মাৰাচাকম্মন্তাজীৰানং পুব্বাভিসঙ্খারস্স অনেকরূপত্তা. লোকুত্তরমগ্গক্খণে একতো লব্ভন্তি কিচ্চতো ভিন্নানম্পি তাসং তত্থ সরূপতো অভিন্নত্তা. একা এৰ হি ৰিরতি মগ্গক্খণে তিস্সন্নম্পি ৰিরতীনং কিচ্চং সাধেন্তী পৰত্ততি, যথা একা এৰ সম্মাদিট্ঠি পরিজাননাদিৰসেন চতুব্বিধকিচ্চং সাধেন্তী পৰত্ততি. তানি চ খো সব্বানি অট্ঠপি পঠমজ্ঝানিকে মগ্গে লব্ভন্তীতি যোজনা. পঠমজ্ঝানিকেতি পঠমঝানৰন্তে.

তথাভূতস্সাতি অরিযমগ্গসমঙ্গিনো. যস্মা মহাসল়াযতনসুত্তে ৰুত্তং ‘‘সম্মাদিট্ঠিআদীনং পঞ্চন্নং এৰ অঙ্গানং ৰসেনা’’তি, তস্মা পঞ্চঙ্গিকো লোকুত্তরমগ্গো হোতি. ‘‘পুব্বেৰ খো পনা’’তি হি ৰচনং তদা মগ্গক্খণে ৰিরতীনং অভাৰং ঞাপেতি, তস্মা কামাৰচরচিত্তেসু ৰিয লোকুত্তরচিত্তেসু ৰিরতি অনিযতাতি অধিপ্পাযো. পরিসুদ্ধভাৰদস্সনন্তি পরিসুদ্ধসীলভাৰদস্সনত্থং. অযমত্থো দীপিতো, ন অরিযমগ্গে ৰিরতীনং অভাৰো.

যদি এৰং কস্মা অভিধম্মে মগ্গৰিভঙ্গে পঞ্চঙ্গিকৰারো আগতোতি আহ ‘‘যম্পি অভিধম্মে’’তিআদি. তন্তি ‘‘পঞ্চঙ্গিকো মগ্গো হোতী’’তি ৰচনং. ‘‘একং কিচ্চন্তরং দস্সেতুং ৰুত্ত’’ন্তি ৰত্ৰা তং দস্সেতুং ‘‘যস্মিঞ্হি কালে’’তিআদি ৰুত্তং. যস্মিঞ্হি কালেতি লোকিযকালে. তেন ‘‘একং কিচ্চন্তর’’ন্তি ৰুত্তং অট্ঠঙ্গিককিচ্চং দস্সেতি. ৰিরতিউপ্পাদনেন মিচ্ছাৰাচাদীনি পুগ্গলেন মগ্গসমযে পজহাপেন্তীতি সম্মাদিট্ঠিআদীনি ‘‘পঞ্চ কারকঙ্গানী’’তি ৰুত্তানি. সম্মাৰাচাদিকিরিযা হি ৰিরতি, তঞ্চ এতানি কারাপেন্তীতি. ৰিরতিৰসেনাতি ৰিরমণকিরিযাৰসেন কারাপকভাৰেন, কত্তুভাৰেন ৰাতি অত্থো. ‘‘ৰিরতিত্তযৰসেনা’’তি ৰা পাঠো.

সম্মাকম্মন্তো পূরতীতি ইমেহি সম্মাদিট্ঠিআদীহি সম্মাকম্মন্তকিচ্চং পূরতি নাম তেহি ৰীরিযাদিকেহি তদত্থসিদ্ধিতো. তম্পি সন্ধায ‘‘একং কিচ্চন্তরং দস্সেতু’’ন্তি ৰুত্তং. ইমং কিচ্চন্তরং দস্সেতুন্তি লোকুত্তরমগ্গক্খণেপি ইমানেৰ পঞ্চ সম্মাৰাচাদিৰিরতিত্তযস্স একক্খণে কারাপকঙ্গানীতি দস্সেতুং. এৰং ৰুত্তন্তি ‘‘তস্মিং সমযে পঞ্চঙ্গিকো মগ্গো হোতী’’তি (ৰিভ. ৪৯৪) এৰং ৰুত্তং. লোকিযমগ্গক্খণে পঞ্চেৰ হোন্তি, ৰিরতি পন অনিযতা, তস্মা ‘‘ছঅঙ্গিকো’’তি অৰত্ৰা ‘‘পঞ্চঙ্গিকো’’ইচ্চেৰ ৰুত্তং. তযিদং অভিধম্মে পঞ্চঙ্গিকৰারদেসনায কারণকিত্তনমগ্গো, অরিযমগ্গো পন অট্ঠঙ্গিকোৰাতি দস্সেতুং, ‘‘যা চ, ভিক্খৰে’’তিআদিমাহ, তং সুৰিঞ্ঞেয্যমেৰ. মিচ্ছাদিট্ঠিআদিকা দস, তপ্পচ্চযা অকুসলা চ দসাতি ৰীসতি অকুসলপক্খিযা, সম্মাদিট্ঠিআদিকা দস, তপ্পচ্চযা কুসলা চ দসাতি ৰীসতি কুসলপক্খিযা মহাচত্তারীসকসুত্তে ৰুত্তা. মহাচত্তারীসকন্তি তস্সেতং নামং. মিস্সকোৰ কথিতো লোকুত্তরস্সপি ইধ লব্ভমানত্তা.

যস্মা কোসলসংযুত্তেপি ইধ চ থেরেন ‘‘উপড্ঢমিদং, ভন্তে, ব্রহ্মচরিযস্সা’’তিআদিনা ৰুত্তং ‘‘মা হেৰং আনন্দা’’তিআদিনা পটিক্খিপিত্ৰা ‘‘সকলমেৰিদং আনন্দা’’তিআদিনা ভগৰতা দেসিতং সুত্তং আগতং. তস্সত্থো কোসলসংযুত্তৰণ্ণনাযং ৰুত্তো, তস্মা ৰুত্তং ‘‘কোসলসংযুত্তে ৰুত্তত্থমেৰা’’তি.

অৰিজ্জাসুত্তাদিৰণ্ণনা নিট্ঠিতা.

৩. সারিপুত্তসুত্তৰণ্ণনা

৩. সাৰকবোধি সাৰকপারমিযো, তপ্পরিযাপন্নং ঞাণং সাৰকপারমিঞাণং, তং পন দ্ৰিন্নং অগ্গসাৰকানং তত্থপি ধম্মসেনাপতিনো এৰ সৰিসেসং মত্থকং পত্তং, ন ইতরেসন্তি আহ – ‘‘সাৰক…পে… অপ্পত্ততাযা’’তি. তস্মা তস্স মত্থকপ্পত্তিযা মগ্গব্রহ্মচরিযে ইজ্ঝন্তে তস্স একদেসো ইধ ইজ্ঝতি, ন সকলন্তি. ন হি অদ্ধব্রহ্মচরিযং নাম অত্থি, তস্মা ৰুত্তং, ‘‘সকলম্পি …পে… লব্ভতী’’তি, তং পন ভণ্ডাগারিকো নাঞ্ঞাসি ঞাণস্স সাৰকৰিসযেপি সপ্পদেসিকত্তা, ধম্মসেনাপতি পন ঞাণস্স তত্থ নিপ্পদেসিকত্তা অঞ্ঞাসীতি. তেনাহ – ‘‘আনন্দত্থেরো…পে… অঞ্ঞাসী’’তি. এৰমাহাতি ‘‘সকলমিদং, ভন্তে’’তি এৰং অৰোচ.

সারিপুত্তসুত্তৰণ্ণনা নিট্ঠিতা.

৪. জাণুস্সোণিব্রাহ্মণসুত্তৰণ্ণনা

৪. ৰল়ৰাভি-সদ্দো ৰল়ৰাপরিযাযোতি আহ ‘‘চতূহি ৰল়ৰাহি যুত্তরথেনা’’তি. যোধরথোতি যোধেহি যুজ্ঝনত্থং আরোহিতব্বরথো. অলঙ্কাররথো মঙ্গলদিৰসেসু অলঙ্কতপটিযত্তেহি আরোহিতব্বরথো. ঘনদুকুলেন পরিৰারিতোতি রজতপট্টৰণ্ণেন সেতদুকুলেন পটিচ্ছাদিতো. পটিচ্ছাদনত্থো হি ইধ পরিৰারসদ্দো. রজতপনাল়িসুপরিক্খিত্তা সেতভাৰকরণত্থং.

ছন্নং ছন্নং মাসানন্তি নিদ্ধারণে সামিৰচনং. একৰারং নগরং পদক্খিণং করোতীতি ইদং তস্মিং ঠানন্তরে ঠিতেন কাতব্বং চারিত্তং. নগরতো ন পক্কন্তাতি নগরতো বহি ন গতা. মঙ্গলৰচনে নিযুত্তা মঙ্গলিকা, সুৰত্থিৰচনে নিযুত্তা সোৰত্থিকা. আদি-সদ্দেন থুতিমাগধৰন্দিকাচরিযকে সঙ্গণ্হাতি. সুকপত্তসদিসানি ৰণ্ণতো.

ৰণ্ণগীতন্তি থুতিগীতং. ব্রহ্মভূতং সেট্ঠভূতং যানং, ব্রহ্মভূতানং সেট্ঠভূতানং যানন্তি ৰা ব্রহ্মযানং. ৰিজিতত্তা ৰিসেসেন জিননতো. রাগং ৰিনযমানা পরিযোসাপেতীতি সব্বম্পি রাগং সমুচ্ছেদৰিনযৰসেন ৰিনেতি, অত্তনো কিচ্চং পরিযোসাপেতি. কিচ্চপরিযোসাপনেনেৰ হি সযম্পি পরিযোসানং নিপ্ফত্তিং উপগচ্ছতি. তেনাহ ‘‘পরিযোসানং গচ্ছতি নিপ্ফজ্জতী’’তি.

ধুরন্তি ভুম্মত্থে উপযোগৰচনন্তি আহ ‘‘তত্রমজ্ঝত্ততাযুগে যুত্তা’’তি. ঈসাতি যুগসন্ধারিকা দারুযুগল়া. যথা ৰা বাহিরং যুগং ধারেতি, তস্সা ঠিতায এৰ কিচ্চসিদ্ধি, এৰং কিরিযাৰসেন লদ্ধবলেন তত্রমজ্ঝত্ততাযুগে থিরং ধারেতি, তেহেৰ অরিযমগ্গরথস্স পৰত্তনং. হিরিগ্গহণেন চেত্থ তংসহচরণতো ওত্তপ্পম্পি গহিতংযেৰ হোতি. তেনাহ ‘‘অত্তনা সদ্ধি’’ন্তিআদি. নাল়িযা মিনমানো পুরিসো ৰিয আরম্মণং মিনাতীতি মনো. কতরং পন তং মনো, কথঞ্চস্স যোত্তসদিসতাতি আহ ‘‘ৰিপস্সনাচিত্ত’’ন্তিআদি. তেন যোত্তং ৰিযাতি যোত্তন্তি দস্সেতি. লোকিযৰিপস্সনাচিত্তং অতিরেকপঞ্ঞাস কুসলধম্মে একাবদ্ধে একসঙ্গহিতে করোতীতি সম্বন্ধো. তে পন ‘‘ফস্সো হোতি…পে… অৰিক্খেপো হোতী’’তি চিত্তঙ্গৰসেন ধম্মসঙ্গহে (ধ. স. ১) আগতনযেনেৰ ৰেদিতব্বা. লোকুত্তরৰিপস্সনাচিত্তন্তি মগ্গচিত্তং আহ. অতিরেকসট্ঠীতি তে এৰ সম্মাকম্মন্তাজীৰেহি অনঞ্ঞাতঞ্ঞস্সামীতিন্দ্রিযাদীহি চ সদ্ধিং অতিরেকসট্ঠি কুসলধম্মে. একাবদ্ধেতি একস্মিং এৰ আরম্মণে আবদ্ধে. একসঙ্গহেতি তথেৰ ৰিপস্সনাকিচ্চৰসেন একসঙ্গহে করোতি. পুব্বঙ্গমভাৰেন আরক্খং সারেতীতি আরক্খসারথী. ‘‘যথা হি রথস্স…পে… সারথী’’তি ৰত্ৰা তং দস্সেতুং ‘‘যোগ্গিযো’’তি ৰুত্তং. ধুরং ৰাহেতি যোগ্গে. যোজেতি যোগ্গে সমগতিযঞ্চ. অক্খং অব্ভঞ্জতি সুখপ্পৰত্তনত্থং. রথং পেসেতি যোগ্গচোদনেন. নিব্বিসেৰনে করোতি গমনৰীথিযং পটিপাদনেন সন্নিযোজেতি. আরক্খপচ্চুপট্ঠানাতি আরক্খং পচ্চুপট্ঠপেতি অসম্মোসসভাৰত্তা. গতিযোতি পৰত্তিযো, নিপ্ফত্তিযো ৰা. সমন্ৰেসতীতি গৰেসতি.

অরিযপুগ্গলস্স নিব্বানং পটিমুখং সম্পাপনে রথো ৰিযাতি রথো. পরিকরোতি ৰিভূসযতীতি পরিক্খারো, ৰিভূসনং, সীলঞ্চ অরিযমগ্গস্স ৰিভূসনট্ঠানিযং. তেন ৰুত্তং ‘‘চতুপারিসুদ্ধিসীলালঙ্কারো’’তি, সীলভূসনোতি অত্থো. ৰিপস্সনাসম্পযুত্তানন্তি লোকিযায লোকুত্তরায চ ৰিপস্সনায সম্পযুত্তানং. ৰিধিনা ঈরেতব্বতো পৰত্তেতব্বতো ৰীরিযং, সম্মাৰাযামো. সমং সম্মা চ ধিযতীতি সমাধি, ধুরঞ্চ তং সমাধি চাতি ধুরসমাধি, উপেক্খা ধুরসমাধি এতস্সাতি উপেক্খাধুরসমাধি, অরিযমগ্গো উপেক্খাসঙ্খাতধুরসমাধীতি অত্থো. অট্ঠকথাযং পন ব্যঞ্জনং অনাদিযিত্ৰা ধুরসমাধিসদ্দানং ভিন্নাধিকরণতা ৰুত্তা. পযোগমজ্ঝত্তেতি ৰীরিযসমতায. অনিচ্ছাতি ইচ্ছাপটিপক্খা. তেনাহ ‘‘অলোভসঙ্খাতা’’তি. পরিৰারণন্তি পরিৰারো, পরিচ্ছদোতি অত্থো.

মেত্তাতি মেত্তাচেতোৰিমুত্তি. তথা করুণা. পুব্বভাগোতি উভিন্নম্পি উপচারো. দ্ৰেপি কাযচিত্তৰিৰেকা ৰিয পুব্বভাগধম্মৰসেন ৰুত্তা. অরিযমগ্গরথেতি পরিসুদ্ধমগ্গসঙ্খাতে রথে. অরিযমগ্গরথো চ মগ্গরথো চাতি অরিযমগ্গরথো, এৰং একসেসনযেন ৰা অত্থো ৰেদিতব্বো. তেনাহ ‘‘ইমস্মিং লোকিযলোকুত্তরমগ্গরথে ঠিতো’’তি. সন্নদ্ধচম্মোতি যোগাৰচরস্স পটিমুক্কচম্মং. ন নং তে ৰিজ্ঝন্তীতি ৰচনপথা ন নং ৰিজ্ঝন্তি. ধম্মভেদনৰসেন ন ভঞ্জতি, তস্স অরিযমগ্গস্স রথস্স সম্মা যোজিতস্স অন্তরা ভঙ্গো নত্থীতি অত্থো.

অত্তনো পুরিসকারং নিস্সায লদ্ধত্তা অত্তনো সন্তানেতি অধিপ্পাযো. অনুত্তরন্তি উত্তররহিতং. ততো এৰ সেট্ঠযানং, নস্স কেনচি সদিসন্তি অসদিসং. ধিতিসম্পন্নতায ধীরা পণ্ডিতপুরিসা লোকম্হা নিয্যন্তি গচ্ছন্তি. ‘‘জযং জয’’ন্তি গাথাযং ৰচনৰিপল্লাসেন ৰুত্তন্তি আহ ‘‘জিনন্তা জিনন্তা’’তি.

জাণুস্সোণিব্রাহ্মণসুত্তৰণ্ণনা নিট্ঠিতা.

৫-৬. কিমত্থিযসুত্তাদিৰণ্ণনা

৫-৬. নিযমত্থোতি অৰধারণত্থো. তেন নিযমেন অৰধারণেন – অঞ্ঞং মগ্গং পটিক্খিপতি ইতো অঞ্ঞস্স নিয্যানিকমগ্গস্স অভাৰতো. ‘‘দুক্খস্স পরিঞ্ঞত্থ’’ন্তি ৰুত্তত্তা ৰট্টদুক্খং কথিতং. অরিযমগ্গে গহিতে তস্স পুব্বভাগমগ্গো ৰিপস্সনায গহিতো এৰাতি ‘‘মিস্সকমগ্গো কথিতো’’তি ৰুত্তং. উত্তানমেৰ অপুব্বস্স অভাৰা. অযং পন ৰিসেসো ‘‘রাগক্খযো’’তিআদীহি যদিপি নিব্বানং ৰুত্তং. তথাপি অরহত্তং ৰিয ব্রহ্মচরিযম্পি. তেন নিব্বানং এৰ ৰুচ্চতি ‘‘ইদং ব্রহ্মচরিযপরিযোসান’’ন্তি.

কিমত্থিযসুত্তাদিৰণ্ণনা নিট্ঠিতা.

৭. দুতিযঅঞ্ঞতরভিক্খুসুত্তৰণ্ণনা

৭. রাগৰিনযাদিপদেহি নিব্বানং ৰাপি ৰুচ্চেয্য অরহত্তং ৰাপি. যস্মা সো ভিক্খু উভযত্থপি নিৰিট্ঠবুদ্ধি, তস্মা ভগৰা তস্স অজ্ঝাসযৰসেন ‘‘নিব্বানধাতুযা খো এত’’ন্তিআদিনা নিব্বানধাতুং ৰিস্সজ্জেত্ৰা পুন ‘‘আসৰানং খযো তেন ৰুচ্চতী’’তি আহ. যস্মা অরিযমগ্গো রাগাদিকে সমুচ্ছেদৰসেন ৰিনেতি, আসৰঞ্চ সব্বসো খেপেতি, তেন চ ৰুত্তং নিব্বানং অরহত্তঞ্চ, তস্মা তদুভযং ‘‘রাগৰিনযোতিআদি নামমেৰা’’তি ৰুত্তং. অনুসন্ধিকুসলতায পুচ্ছন্তো এতং অৰোচাতি ইমিনা ‘‘পুচ্ছানুসন্ধি ইধ লব্ভতী’’তি দীপিতং, অজ্ঝাসযানুসন্ধিপি এত্থ লব্ভতেৰাতি দট্ঠব্বং.

দুতিযঅঞ্ঞতরভিক্খুসুত্তৰণ্ণনা নিট্ঠিতা.

৮. ৰিভঙ্গসুত্তৰণ্ণনা

৮. একেন পরিযাযেন অট্ঠঙ্গিকমগ্গং ৰিভজিত্ৰাতি ‘‘সম্মাদিট্ঠী’’তিআদিনা একেন পরিযাযেন অরিযং অট্ঠঙ্গিকং মগ্গং ৰিভাগেন দস্সেত্ৰা ‘‘কতমা চ, ভিক্খৰে, সম্মাদিট্ঠী’’তিআদিনা পুন অপরেন পরিযাযেন ৰিভজিতুকামো. উগ্গহধারণপরিচযঞাণানিপি সৰনঞাণে এৰ অৰরোধং গচ্ছন্তীতি ‘‘সৰনসম্মসনপটিৰেধপচ্চৰেক্খণৰসেনা’’তি ৰুত্তং.

কম্মট্ঠানাভিনিৰেসোতি কম্মট্ঠানপটিপত্তি. পুরিমানি দ্ৰে সচ্চানি উগ্গণ্হিত্ৰাতি সম্বন্ধো. ইট্ঠং কন্তং মনাপন্তি নিরোধমগ্গেসু নিন্নভাৰং দস্সেতি, ন অভিনন্দনং, তন্নিন্নভাৰো এৰ চ তত্থ কম্মকরণং দট্ঠব্বং. একেনেৰাকারেন সচ্চানং পটিৰেধনিমিত্ততা, সো এৰ অভিমুখভাৰো তেসং সমাগমোতি একাভিসমযো.

অস্সাতি ঞাণস্স, যোগিনো ৰা. এত্থ চ কেচি ‘‘লোকিযঞাণম্পি পটিৰেধো সব্বস্স যাথাৰবোধভাৰতো’’তি ৰদন্তি. ননু উগ্গহাদিপটিৰেধো চ পটিৰেধোৰ, ন চ সো লোকুত্তরোতি? তং ন, কেৰলেন পটিৰেধ-সদ্দেন উগ্গহাদিপটিৰেধানং অৰচনীযত্তা, পটিৰেধনিমিত্তত্তা ৰা উগ্গহাদিৰসেন পৰত্তং দুক্খাদীসু পুব্বভাগে ঞাণং ‘‘পটিৰেধো’’তি ৰুচ্চতি, ন পটিৰেধত্তা, পটিৰেধভূতমেৰ পন ঞাণং উজুকং পটিৰেধোতি ৰত্তব্বতং অরহতি. কিচ্চতোতি পরিঞ্ঞাদিকিচ্চতো. আরম্মণপটিৰেধোতি সচ্ছিকিরিযাপটিৰেধমাহ. কিচ্চতোতি অসম্মোহপটিৰেধং. উগ্গহাদীহি সচ্চস্স পরিগ্গণ্হনং পরিগ্গহো.

দুদ্দসত্তাতি অনধিগতঞাণেন যাথাৰসরসলক্খণতো দট্ঠুং অসক্কুণেয্যত্তা উপ্পত্তিতো পাকটানিপি. তেনাহ ‘‘দুক্খসচ্চং হী’’তিআদি. উভযন্তি পুরিমং সচ্চদ্ৰযং. পযোগোতি কিরিযা, ৰাযামো ৰা. তস্স মহন্ততরস্স ইচ্ছিতব্বতং দুক্করতরতঞ্চ উপমাহি দস্সেতি ‘‘ভৰগ্গগ্গহণত্থ’’ন্তিআদিনা. যথা পুরিমং সচ্চদ্ৰযং ৰিয কেনচি পরিযাযেন অপাকটতায পরমগম্ভীরত্তা উগ্গহাদিৰসেন পুব্বভাগে পৰত্তিভেদং গহেত্ৰা ‘‘দুক্খে ঞাণ’’ন্তিআদিনা চতুব্বিধং কত্ৰা ৰুত্তং. একমেৰ তং ঞাণং হোতি একাভিসমযৰসেনেৰ পৰত্তনতো.

কামপচ্চনীকট্ঠেনাতি কামানং উজুপচ্চনীকভাৰেন. কামতো নিস্সটভাৰেনাতি কামেহি ৰিসংযুত্তভাৰেন. কামং সম্মসন্তস্সাতি দুৰিধম্পি কামং অনিচ্চাদিতো সম্মসন্তস্স. পজ্জতি পৰত্ততি এতেনাতি পদং, কামস্স পদন্তি কামপদং, কামস্স উপ্পত্তিকারণস্স ঘাতো সমুগ্ঘাতো, তং কামপদঘাতং. তেনাহ ‘‘কামৰূপসম’’ন্তি. কামেহি ৰিৰিত্তং কামৰিৰিত্তং. সো এৰ চ নেসং অন্তো সমুচ্ছেদৰিৰেকেতি কত্ৰা তস্মিং সাধেতব্বে উপ্পন্নোতি ৰুত্তং ‘‘কামৰিৰিত্তন্তে উপ্পন্নো’’তি. কামতো নিক্খমতীতি নিক্খমো, সো এৰ নেক্খম্মসঙ্কপ্পো. ইমস্মিঞ্চ নেক্খম্মসঙ্কপ্পস্স সদ্দত্থৰিভাৰেন যথাৰুত্তো কামপচ্চনীকট্ঠাদিকো অত্থনিদ্ধারণৰিসেসো অন্তোগধো.

এসেৰ নযোতি ইমিনা ব্যাপাদপচ্চনীকট্ঠেন ৰিহিংসায পচ্চনীকট্ঠেনাতিআদিকং অব্যাপাদাৰিহিংসাসঙ্কপ্পানং অত্থুদ্ধারণৰিধিং অতিদিসতি. নেক্খম্মসঙ্কপ্পাদযোতি আদি-সদ্দেন অব্যাপাদঅৰিহিংসাসঙ্কপ্পে এৰ সঙ্গণ্হাতি. কাম…পে… সঞ্ঞানন্তি কামৰিতক্কাদিৰিরতিসম্পযুত্তানং নেক্খম্মাদিসঞ্ঞানং. নানত্তাতি নানাখণিকত্তা. তীসু ঠানেসূতি তিপ্পকারেসু কারণেসু. উপ্পন্নস্সাতি উপ্পজ্জনারহস্স. ভূমিলদ্ধউপ্পন্নং ইধাধিপ্পেতং. এস নযো ইতো পরেসুপি. পদচ্ছেদতোতি কারণুপচ্ছেদতো. পদন্তি হি উপ্পত্তিকারণন্তি ৰুত্তোৰাযমত্থো. অনুপ্পত্তিসাধনৰসেনাতি যথা সঙ্কপ্পো আযতিং নুপ্পজ্জতি, এৰং অনুপ্পত্তিসাধনৰসেন. সম্মাদিট্ঠি ৰিয একোৰ কুসলসঙ্কপ্পো উপ্পজ্জতি.

চতূসু ঠানেসূতি ৰিসংৰাদনাদীসু চতূসু ৰীতিক্কমট্ঠানেসু. পব্বজিতানং মিচ্ছাজীৰো নাম আহারনিমিত্তকোতি আহ ‘‘খাদনীযভোজনীযাদীনং অত্থাযা’’তি. সব্বসো অনেসনায পহানং সম্মাআজীৰোতি আহ ‘‘বুদ্ধপ্পসত্থেন আজীৰেনা’’তি. কম্মপথপত্তানং ৰসেন ‘‘সত্তসু ঠানেসূ’’তি ৰুত্তং. অকম্মপথপত্তায হি অনেসনায সো পদঘাতং করোতিযেৰ.

তথারূপে ৰা আরম্মণেতি যস্মিং আরম্মণে ইমস্স পুব্বে কিলেসা ন উপ্পন্না, তস্মিং এৰ. অনুপ্পন্নানন্তি অনুপ্পাদস্সপি পত্থনাৰসেন অনুপ্পন্নানং. ৰীরিযচ্ছন্দন্তি ৰীরিযস্স নিব্বত্তেতুকামতাছন্দং. ‘‘ছন্দসম্পযুত্তৰীরিযঞ্চা’’তি ৰদন্তি. ৰীরিযমেৰ পন অনুপ্পন্নাকুসলানুপ্পাদনে লব্ভমানছন্দতায ধুরসম্পগ্গহতায ছন্দপরিযাযেন ৰুত্তং. তথা হি ৰীরিযং – ‘‘অনিক্খিত্তছন্দতা অনিক্খিত্তধুরতা’’তি (ধ. স. ২৬) নিদ্দিট্ঠং. কোসজ্জপক্খে পতিতুং অদত্ৰা চিত্তং পগ্গহিতং করোতি. পধানন্তি পধানভূতৰীরিযং.

উপ্পত্তিপবন্ধৰসেনাতি নিরন্তরুপ্পাদনৰসেন. চতূসু ঠানেসু কিচ্চসাধনৰসেনাতি যথাৰুত্তেসু চতূসু ঠানেসু পধানকিচ্চস্স নিপ্ফাদনৰসেন অনুপ্পাদনাদিৰসেন. কিচ্চসাধনৰসেনাতি কাযৰেদনাচিত্তধম্মেসু সুভসুখনিচ্চঅত্তগাহৰিধমনৰসেন অসুভদুক্খানিচ্চানত্তসাধনৰসেন.

অযন্তি যথাৰুত্তো সদিসাসদিসতাৰিসেসো. অস্সাতি মগ্গস্স. এত্থ কথন্তি যদি রূপাৰচরচতুত্থজ্ঝানতো পট্ঠায যাৰ সব্বভৰগ্গা ঝানঙ্গমগ্গঙ্গবোজ্ঝঙ্গানং সদিসতা, এৰং সন্তে ‘‘আরুপ্পে চতুক্কপঞ্চকজ্ঝানং উপ্পজ্জতি, তঞ্চ লোকুত্তর’’ন্তি এত্থ কথং অত্থো গহেতব্বোতি আহ ‘‘এত্থাপী’’তিআদি. তংঝানিকাৰাতি পঠমজ্ঝানাদীসু যং ঝানং মগ্গপটিলাভস্স পাদকভূতং, তংঝানিকাৰ অস্স অরিযস্স উপরিপি তযো মগ্গা. এৰন্তি ৰুত্তাকারেন. পাদকজ্ঝানমেৰ নিযমেতি আরুপ্পে চতুক্কপঞ্চকজ্ঝানুপ্পত্তিযং. ৰিপস্সনায আরম্মণভূতা খন্ধাতি সম্মসিতখন্ধে ৰদন্তি. পুগ্গলজ্ঝাসযো নিযমেতি পাদকসম্মসিতজ্ঝানানং ভেদে. যস্মা সঙ্খারুপেক্খাঞাণমেৰ অরিযমগ্গস্স বোজ্ঝঙ্গাদিৰিসেসং নিযমেতি, ততো দুতিযাদিপাদকজ্ঝানতো উপ্পন্নস্স সঙ্খারুপেক্খাঞাণস্স পাদকজ্ঝানাতিক্কন্তানং অঙ্গানং অসমাপজ্জিতুকামতাৰিরাগভাৰতো ইতরস্স চ অতব্ভাৰতো তীসুপি ৰাদেসু ৰিপস্সনাৰ নিযমেতীতি ৰেদিতব্বো, তস্মা ৰিপস্সনানিযমেনেৰ হি পঠমৰাদেপি অপাদকজ্ঝানাদিপাদকাপি মগ্গা পঠমজ্ঝানিকা হোন্তি. ইতরেহি চ পাদকজ্ঝানেহি ৰিপস্সনানিযমেহি তংতংঝানিকাৰ. এৰং সেসৰাদেসু ৰিপস্সনানিযমো যথাসম্ভৰং যোজেতব্বো. দুতিযৰাদে তংতংঝানিকতা সম্মসিতসঙ্খারৰিপস্সনানিযমেহি হোতি. তত্র হি ৰিপস্সনা তংতংৰিরাগভাৰনা ভাৰেতব্বা, ন সোমনস্সসহগতা উপেক্খাসহগতা হুত্ৰা ঝানঙ্গাদিনিযমং মগ্গস্স করোতীতি এৰং ৰিপস্সনানিযমো ৰুত্তনযেনেৰ ৰেদিতব্বো. ইমস্মিঞ্চ ৰাদে পাদকসম্মসিতজ্ঝানুপনিস্সযসব্ভাৰে অজ্ঝাসযো একন্তেন হোতীতি ‘‘পুগ্গলজ্ঝাসযো নিযমেতীতি ৰদন্তী’’তি ৰুত্তং, অট্ঠকথাযং পন ৰিসুদ্ধিমগ্গস্স এতিস্সা অট্ঠকথায একসঙ্গহিতত্তা ‘‘তেসং ৰাদৰিনিচ্ছযো…পে… ৰেদিতব্বো’’তি ৰুত্তং. পুব্বভাগেতি ৰিপস্সনাক্খণে.

ৰিভঙ্গসুত্তৰণ্ণনা নিট্ঠিতা.

৯. সূকসুত্তৰণ্ণনা

৯. সূকন্তি সালিযৰাদীনং ৰালমাহ. সো হি নিকন্তকসদিসো পটিমুখগতং হত্থং ৰা পাদং ৰা ভিন্দতি, তস্মা ভেদং ইচ্ছন্তেন উদ্ধগ্গং কত্ৰা ঠপিতং সম্মাপণিহিতং নাম, তথা অট্ঠপিতং মিচ্ছাপণিহিতং নামাতি ৰুত্তং. মিচ্ছাপণিহিতাযাতি কম্মস্সকতপঞ্ঞায মিচ্ছাঠপনং নাম – ‘‘ইমে সত্তা কম্মৰসেন সুখদুক্খং পচ্চনুভৰন্তি, তং পন কম্মং ইস্সরস্স ইচ্ছাৰসেন ব্রহ্মা নিম্মিনাতী’’তিআদিনা মিচ্ছাপকপ্পনং. কেচি পন ‘‘নত্থি দিন্নন্তিআদিনা নযেন পৰত্তি, তস্স ৰা ঞাণস্স অপ্পৰত্তী’’তি ৰদন্তি. মগ্গভাৰনাযাতি এত্থাপি মিচ্ছামগ্গস্স পৰত্তনং, অরিযমগ্গস্স ৰা অপ্পৰত্তনং মিচ্ছাঠপনং. তেনাহ ‘‘অপ্পৰত্তিতত্তা’’তি. অৰিজ্জং ভিন্দিস্সতীতি অৰিজ্জং সমুচ্ছিন্দিস্সতি. মগ্গনিস্সিতং কত্ৰা মগ্গে এৰ পক্খিপিত্ৰা. তঞ্হি ঞাণং মগ্গস্স মূলকারণং মগ্গে সিদ্ধে তস্স কিচ্চস্স মত্থকপ্পত্তিতো. ‘‘সম্মাপণিহিতায দিট্ঠিযা সম্মাপণিহিতায মগ্গভাৰনাযা’’তি ৰুত্তত্তা মিস্সকমগ্গো কথিতো. ছৰিভেদসদিসো চেত্থ অৰিজ্জাভেদো, লোহিতুপ্পাদসদিসো লোকুত্তরমগ্গভাৰো দট্ঠব্বো.

সূকসুত্তৰণ্ণনা নিট্ঠিতা.

১০. নন্দিযসুত্তৰণ্ণনা

১০. ছন্নপরিব্বাজকো ৰত্থচ্ছাদিযা ছন্নঙ্গপরিব্বাজকো, ন নগ্গপরিব্বাজকো.

অৰিজ্জাৰগ্গৰণ্ণনা নিট্ঠিতা.

২. ৰিহারৰগ্গো

১. পঠমৰিহারসুত্তৰণ্ণনা

১১. অড্ঢমাসন্তি অচ্চন্তসংযোগে উপযোগৰচনং. পটিসল্লীযিতুন্তি যথাৰুত্তং কালং পটি দিৰসে দিৰসে সমাপত্তিযং ধম্মচিন্তাযং চিত্তং নিলীযিতুং. ৰিনেতব্বোতি সমুচ্ছেদৰিনযেন ৰিনেতব্বো অরিযমগ্গাধিগন্তব্বো. তন্তি দিট্ঠানুগতিআপজ্জনং. অস্সাতি জনতায. অপগচ্ছতীতি সত্থু সন্তিকতো অপেতি. সূতি নিপাতমত্তং.

পদেসেনাতি একদেসেন. সহ পদেসেনাতি সপদেসো. স্ৰাযং সপদেসো যস্মা ৰেদনাৰসেনেৰ পাল়িযং আগতো, তস্মা পরমত্থধম্মকোট্ঠাসে ৰেদনা অনৰসেসতো লব্ভতি, তে গণ্হন্তো ‘‘খন্ধপদেসো’’তিআদিমাহ. তং সব্বন্তি খন্ধপদেসাদিকং সব্বম্পি. ‘‘সম্মসন্তো’’তি পদস্স অত্থদস্সনৰসেন ‘‘পচ্চৰেক্খন্তো’’তি আহ. পচ্চৰেক্খণা ইধ সম্মসনং নাম, ন ৰিপস্সনা. ৰিপস্সনাসম্মসনং পন ভগৰতো ৰিসাখপুণ্ণমাযং এৰ নিপ্ফন্নং, তস্মা ভগৰতো অঞ্ঞভূমিকাপি ৰেদনা অঞ্ঞভূমিকানং সত্তানং ৰিরুদ্ধা উপ্পজ্জতেৰাতি ৰুত্তং ‘‘যাৰ ভৰগ্গা পৰত্তা সুখা ৰেদনা’’তি. সব্বাকারেনাতি সরূপতো সমুদযতো অত্থঙ্গমতো অস্সাদাদিতোতি সব্বাকারেন. পরিগ্গণ্হন্তো উপপরিক্খন্তো.

নিপ্পদেসানেৰ অনৰসেসানেৰ. ইন্দ্রিযসতিপট্ঠানপদেসো সুৰিঞ্ঞেয্যোতি অনুদ্ধতো. অস্সাতি ভগৰতো. ঠানেতি তস্মিং তস্মিং পচ্চৰেক্খিতব্বসঙ্খাতে ওকাসে. সা সা চ ৰিহারসমাপত্তীতি খন্ধৰসেন আযতনাদিৰসেন চ পৰত্তিত্ৰা তেসং একদেসভূতং ৰেদনংযেৰ পরিগ্গহেত্ৰা তং সম্মসিত্ৰা অনুক্কমেন সমাপন্না ঝানসমাপত্তি ফলসমাপত্তি চ. ফলসমাপত্তি হি তথা সম্মসিত্ৰা পুনপ্পুনং সমাপজ্জনৰসেন অত্থতো অভিন্নাপি অধিট্ঠানভূতধম্মভেদেন ভিন্না ৰিয ৰুচ্চতি, যতো চতুৰীসতিকোটিসতসহস্সভেদা দেৰসিকং ৰল়ঞ্জনসমাপত্তিযো অট্ঠকথাযং ৰুত্তা. কামং অঞ্ঞধম্মৰসেনপি জাতা এৰ, ৰেদনাৰসেন পনেত্থ অভিনিৰেসো কতো ৰেদনানুভাৰেন জাতা. কস্মা এৰং জাতাতি? বুদ্ধানং ঞাণপদস্স অন্তরৰিভাগত্তা. তথা হি ভগৰা সকলম্পি অড্ঢমাসং ৰেদনাৰসেনেৰ সম্মসনং পৰত্তেতি, তদনুসারেন চ তা ৰিহারসমাপত্তিযো সমাপজ্জি. তযিদং অচ্ছরিযং অনঞ্ঞসাধারণং ভিক্খূ পৰেদেন্তো সত্থা – ‘‘যেন স্ৰাহ’’ন্তিআদিমৰোচ.

অকুসলাৰাতি পাণাতিপাত-অদিন্নাদান-কামেসুমিচ্ছাচার-মুসাৰাদ-পিসুণৰাচাসম্ফপ্পলাপ-অভিজ্ঝা-ব্যাপাদৰসেন তংতংমিচ্ছাদস্সনৰসেন চ অকুসলা ৰেদনা এৰ হোতি. ব্রহ্মলোকাদীসু উপ্পজ্জিত্ৰা তত্থ নিচ্চা ধুৰা ভৰিস্সামাতি এৰং দিট্ঠিং উপনিস্সাযাতি যোজেতব্বং. দেৰকুলাদীসু দেৰপূজত্থং, সব্বজনপরিভোগত্থং ৰা মালাৰচ্ছং রোপেন্তি. ৰধবন্ধনাদীনীতি আদি-সদ্দেন অদিন্নাদান-মিচ্ছাচার-মুসাৰাদ-পিসুণৰাচা-সম্ফপ্পলাপাদীনং সঙ্গহো দট্ঠব্বো. দিট্ঠধম্মৰিপাকস্স অপচুরত্তা অপাকটত্তা চ ‘‘ভৰন্তরগতান’’ন্তি ৰুত্তং.

ইতি নেসন্তি এত্থ ইতি-সদ্দো আদিঅত্থো, পকারত্থো ৰা. তেন যথা ফরুসৰাচাৰসেন, এৰং তদঞ্ঞেসম্পি অকুসলকম্মানং ৰসেন সম্মাদিট্ঠিপচ্চযা অকুসলৰেদনাপ্পৰত্তি যথারহং নীহরিত্ৰা ৰত্তব্বা. এসেৰ নযোতি ইমিনা যথা মিচ্ছাদিট্ঠিপচ্চযা সম্মাদিট্ঠিপচ্চযা চ কুসলাকুসলৰিপাকৰেদনা সহজাতকোটিযা উপনিস্সযকোটিযা চ ৰসেন যথারহং যোজেত্ৰা দস্সিতা, এৰং মিচ্ছাসঙ্কপ্পপচ্চযাদীসুপি যথারহং যোজেত্ৰা দস্সেতব্বাতি ইমমত্থং অতিদিসতি. ছন্দপচ্চযাতি এত্থ তণ্হাছন্দসহিতো কত্তুকামতাছন্দো অধিপ্পেতোতি আহ ‘‘ছন্দপচ্চযাতিআদীসু পন ছন্দপচ্চযা অট্ঠলোভসহগতচিত্তসম্পযুত্তা ৰেদনা ৰেদিতব্বা’’তি. ৰিতক্কপচ্চযাতি এত্থ অপ্পনাপ্পত্তোৰ ৰিতক্কো অধিপ্পেতোতি ৰুত্তং ‘‘ৰিতক্কপচ্চযা পঠমজ্ঝানৰেদনাৰা’’তি. ৰিতক্কপচ্চযা পঠমজ্ঝানৰেদনায গহিতত্তা ‘‘ঠপেত্ৰা পঠমজ্ঝান’’ন্তি. উপরি তিস্সো রূপাৰচরা, হেট্ঠা তিস্সো অরূপাৰচরা এৰং সেসা ছ সঞ্ঞাসমাপত্তিৰেদনা.

তিণ্ণন্তি ছন্দৰিতক্কসঞ্ঞানং. অৰূপসমেতি পটিপক্খেন অৰূপসমিতে. তিণ্ণঞ্হি তেসং সহভাৰেন পচ্চযতা অট্ঠলোভসহগতচিত্তেসু এৰ. তত্থ যং ৰত্তব্বং তং ৰুত্তমেৰ. ছন্দমত্তস্সাতি তেসু তীসু ছন্দমত্তস্স. ৰূপসমে পঠমজ্ঝানৰেদনাৰ অপ্পনাপ্পত্তস্স অধিপ্পেতত্তা. ছন্দৰিতক্কানং ৰূপসমে দুতিযজ্ঝানাদিৰেদনা অধিপ্পেতা সঞ্ঞায অৰূপসন্তত্তা. দুতিযজ্ঝানাদিৰেদনাগহণেন হি সব্বা সঞ্ঞাসমাপত্তিযো চ গহিতাৰ হোন্তি. তিণ্ণম্পি ৰূপসমেতি ছন্দৰিতক্কসঞ্ঞানং ৰূপসমে নেৰসঞ্ঞানাসঞ্ঞাযতনৰেদনা অধিপ্পেতা. ভৰগ্গপ্পত্তসঞ্ঞা হি ৰূপসমন্তি ছন্দসঙ্কপ্পানং অচ্চন্তসুখুমভাৰপ্পত্তিযা. হেট্ঠা ‘‘সম্মাদিট্ঠিপচ্চযা’’তি এত্থ সম্মাদিট্ঠিগ্গহণেন হেট্ঠিমমগ্গসম্মাদিট্ঠিপি গহিতাৰ হোতীতি আহ – ‘‘অপ্পত্তস্স পত্তিযাতি অরহত্তফলস্স পত্তত্থাযা’’তি. অথ ৰা হেট্ঠিমমগ্গাধিগমেন ৰিনা অগ্গমগ্গো নত্থীতি হেট্ঠিমমগ্গাধিগমং অত্থাপন্নং কত্ৰা ‘‘অরহত্তফলস্স পত্তত্থাযা’’তি ৰুত্তং. আযমেতি ফলেন মিস্সিতো হোতি এতেনাতি আযামো, সম্মাৰাযামোতি আহ ‘‘অত্থি আযামন্তি অত্থি ৰীরিয’’ন্তি. তস্স ৰীরিযারম্ভস্সাতি অঞ্ঞাধিগমকারণস্স সম্মাৰাযামস্স ৰসেন. পাল়িযং ঠান-সদ্দো কারণপরিযাযোতি আহ – ‘‘অরহত্তফলস্স কারণে’’তি. তপ্পচ্চযাতি এত্থ তং-সদ্দেন ‘‘ঠানে’’তি ৰুত্তকারণমেৰ পচ্চামট্ঠন্তি আহ – ‘‘অরহত্তস্স ঠানপচ্চযা’’তি. চতুমগ্গসহজাতাতি এতেন ‘‘অরহত্তফলস্স পত্তত্থাযা’’তি এত্থ হেট্ঠিমমগ্গানং অত্থাপত্তিৰসেন গহিতভাৰমেৰ জোতেতি. কেচি পন ‘‘চতুমগ্গসহজাতাতি ৰত্ৰা নিব্বত্তিতলোকুত্তরৰেদনাতি ভূতকথনং ৰিসেসনং. নিব্বত্তিতলোকুত্তরৰেদনাতি পঠমং অপেক্খিতব্বং, পচ্ছা চতুমগ্গসহজাতা’’তি ৰদন্তি.

পঠমৰিহারসুত্তৰণ্ণনা নিট্ঠিতা.

২. দুতিযৰিহারসুত্তৰণ্ণনা

১২. মিচ্ছাদিট্ঠি ৰূপসমতি সব্বসো পহীযতি এতেনাতি মিচ্ছাদিট্ঠিৰূপসমো. ‘‘মিচ্ছাদিট্ঠিৰূপসমো নাম সম্মাদিট্ঠি. ভৰন্তরে উপ্পজ্জন্তো অতিদূরেতি মঞ্ঞমানো ৰিপাকৰেদনং ন গণ্হাতী’’তি অট্ঠকথাযং ৰুত্তং. ‘‘ইমিনা নযেনা’’তি অতিদিসিত্ৰাপি তমত্থং পাকটতরং কাতুং ‘‘যস্স যস্সা’’তিআদিং ৰত্ৰা এৰ সামঞ্ঞৰসেন ৰুত্তমত্থং পচ্ছিমেসু তীসু পদেসু সরূপতোৰ দস্সেতুং ‘‘ছন্দৰূপসমপচ্চযা’’তিআদিমাহ, তং সুৰিঞ্ঞেয্যমেৰ. ৰুত্তত্থানেৰ অনন্তরসুত্তে.

দুতিযৰিহারসুত্তৰণ্ণনা নিট্ঠিতা.

৩-৭. সেক্খসুত্তাদিৰণ্ণনা

১৩-১৭. তিস্সন্নম্পি সিক্খানং সিক্খনং সীলং এতস্সাতি সিক্খনসীলো. সিক্খতীতিপি ৰা সেক্খো. ৰুত্তঞ্হেতং ‘‘সিক্খতীতি খো, ভিক্খৰে, তস্মা সেক্খোতি ৰুচ্চতি. কিঞ্চ সিক্খতি? অধিসীলম্পি সিক্খতী’’তিআদি (অ. নি. ৩.৮৬). তীহি ফলেহি হেট্ঠা. সাপি চতুত্থমগ্গেন সদ্ধিং উপ্পন্নসিক্খাপি. মগ্গক্খণে হি সিক্খাকিচ্চং ন নিট্ঠিতং ৰিপ্পকতভাৰতো, ফলক্খণে পন নিট্ঠিতং নাম. উত্তানত্থানেৰ হেট্ঠা ৰুত্তনযত্তা.

সেক্খসুত্তাদিৰণ্ণনা নিট্ঠিতা.

ৰিহারৰগ্গৰণ্ণনা নিট্ঠিতা.

৩. মিচ্ছত্তৰগ্গৰণ্ণনা

২১-৩০. মিচ্ছাসভাৰন্তি অযাথাৰসভাৰং অনিয্যানিকসভাৰং. সম্মাসভাৰন্তি যাথাৰসভাৰং নিয্যানিকসভাৰং. মিচ্ছাপটিপত্তাধিকরণহেতূতি এত্থ অধি-সদ্দো অনত্থকোতি আহ – ‘‘মিচ্ছাপটিপত্তিকরণহেতূ’’তি. ঞাযতি পটিৰিদ্ধৰসেন নিব্বানং গচ্ছতীতি ঞাযো. সো এৰ তংসমঙ্গীনং ৰট্টদুক্খপাততো ধারণট্ঠেন ধম্মোতি আহ – ‘‘ঞাযং ধম্মন্তি অরিযমগ্গধম্ম’’ন্তি. ঞাণস্স মিচ্ছাসভাৰো নাম নত্থীতি ৰিঞ্ঞাণমেৰেত্থ পচ্চৰেক্খণৰসেন পৰত্তং ঞাণ-সদ্দেন ৰুচ্চতীতি আহ ‘‘মিচ্ছাৰিঞ্ঞাণো’’তি. মিচ্ছাপচ্চৰেক্খণোতি কিঞ্চি পাপং কত্ৰা ‘‘অহো মযা কতং সুকত’’ন্তি এৰং পৰত্তো মিচ্ছাপচ্চৰেক্খণো. গোসীলগোৰতাদিপূরণং মুত্তীতি এৰং গণ্হতো মিচ্ছাৰিমুত্তি নাম. মিচ্ছাপটিপদাদীহি ৰিৰট্টন্তি এৰং ৰট্টৰিৰট্টং কথিতং. পুগ্গলো পুচ্ছিতোতি নিগমিতো চ ‘‘অযং ৰুচ্চতি, ভিক্খৰে, অসপ্পুরিসো’’তিআদিনা. কিঞ্চাপি ‘‘মিচ্ছাদিট্ঠিকো হোতী’’তিআদিনা পুগ্গলোৰ নিদ্দিট্ঠো, তথাপি পুগ্গলসীসেনাযং ধম্মদেসনাতি আহ ‘‘ধম্মো ৰিভত্তো’’তি. তেনেৰাহ ‘‘ধম্মেন পুগ্গলো দস্সিতো’’তি. ধম্মেনাতি মিচ্ছাদিট্ঠিআদিকেন ধম্মেন. কল্যাণপুথুজ্জনতো পট্ঠায সব্বসো সপ্পুরিসা নাম, খীণাসৰো সপ্পুরিসতরো. সুপ্পৰত্তনিযোতি সুখেন পৰত্তেতুং সক্কুণেয্যো. ধাৰতীতি গচ্ছতি. পচ্চযুপ্পন্নেন উপেচ্চ নিস্সিতব্বতো উপনিসা, পচ্চযো, একস্স স-কারস্স লোপং কত্ৰা ৰাতি আহ – ‘‘সউপনিসং সপচ্চয’’ন্তি. পরিকরণতো পরিক্খারো, পরিৰারোতি আহ – ‘‘সপরিক্খারং সপরিৰার’’ন্তি. সহজাতৰসেন উপনিস্সযৰসেন চ সপচ্চযতা কিচ্চসাধনে নিপ্ফাদনে সহাযভাৰূপগমনে চ সপরিৰারতা দট্ঠব্বা.

মিচ্ছত্তৰগ্গৰণ্ণনা নিট্ঠিতা.

৪. পটিপত্তিৰগ্গৰণ্ণনা

৩১-৪০. অযাথাৰপটিপত্তি, ন যথাপটিপত্তি, হেতুম্হিপি ফলেপি অযাথাৰৰত্থুসাধনতো. একং সুত্তং ধম্মৰসেন কথিতং পটিপত্তিৰসেন. একং সুত্তং পুগ্গলৰসেন কথিতং পটিপন্নকৰসেন. সংসারমহোঘস্স পরতীরভাৰতো যো নং অধিগচ্ছতি, তং পারেতি গমেতীতি পারং, নিব্বানং, তব্বিধুরতায নত্থি এত্থ পারন্তি অপারং, সংসারোতি ৰুত্তং – ‘‘অপারাপারন্তি ৰট্টতো নিব্বান’’ন্তি. পারঙ্গতাতি অসেক্খে সন্ধায. যেপি গচ্ছন্তীতি সেক্খে. যেপি গমিস্সন্তীতি কল্যাণপুথুজ্জনে. পারগামিনোতি এত্থ কিত-সদ্দো তিকালৰাচীতি এৰং ৰুত্তং.

তীরন্তি ওরিমতীরমাহ. তেন ৰুত্তং ‘‘ৰট্টমেৰ অনুধাৰতী’’তি. একন্তকাল়কত্তা চিত্তস্স অপভস্সরভাৰকরণতো কণ্হাভিজাতিহেতুতো চ ৰুত্তং ‘‘কণ্হন্তি অকুসলধম্ম’’ন্তি. ৰোদানভাৰতো চিত্তস্স পভস্সরভাৰকরণতো সুক্কাভিজাতিহেতুতো চ ৰুত্তং – ‘‘সুক্কন্তি কুসলধম্ম’’ন্তি. কিলেসমার-অভিসঙ্খারমার-মচ্চুমারানং পৰত্তিট্ঠানতায ওকং ৰুচ্চতি ৰট্টং, তব্বিধুরতায অনোকন্তি নিব্বানন্তি আহ – ‘‘ওকা অনোকন্তি ৰট্টতো নিব্বান’’ন্তি.

পরমত্থতো সমণা ৰুচ্চন্তি অরিযা, সমণানং ভাৰো সামঞ্ঞং, অরিযমগ্গো, তেন অরণীযতো উপগন্তব্বতো সামঞ্ঞত্থো নিব্বানন্তি আহ – ‘‘সামঞ্ঞত্থন্তি নিব্বানং, তং হী’’তিআদি. ব্রহ্মঞ্ঞত্থন্তি এত্থাপি ইমিনা নযেন অত্থো ৰেদিতব্বো. ব্রহ্মঞ্ঞেন অরিযমগ্গেন. রাগক্খযোতি এত্থ ইতি-সদ্দো আদিসদ্দত্থো. তেন ‘‘দোসক্খযো মোহক্খযো’’তি পদদ্ৰযং সঙ্গণ্হাতি. ৰট্টতিযেৰাতি ৰদন্তি ‘‘রাগক্খযো’’তি. পরিযাযেন হি অরহত্তস্স ৰত্তব্বত্তাতি.

পটিপত্তিৰগ্গৰণ্ণনা নিট্ঠিতা.

৫. অঞ্ঞতিত্থিযপেয্যালৰগ্গৰণ্ণনা

৪১-৪৮. অপরাপরং পরিৰত্তমানেন ৰত্তসম্পন্নেন সংসারদ্ধানপরিঞ্ঞাৰসেনেৰ নিব্বানস্স পত্তব্বত্তা ৰুত্তং – ‘‘নিব্বানং পত্ৰা পরিঞ্ঞাতং নাম হোতী’’তি. নিব্বানং পত্ৰাতি নিব্বানপ্পত্তিহেতু. হেতুঅত্থো হি অযং ত্ৰা-সদ্দো যথা – ‘‘ঘতং পিৰিত্ৰা বলং হোতি, সীহং দিস্ৰা ভযং হোতী’’তি. তস্মাতি যস্মা অপরিঞ্ঞেয্যপরিজাননকিচ্চেন নিব্বানস্স পত্তিযা অদ্ধানপরিঞ্ঞাসিদ্ধি ঞাযতি, তস্মা উপচারৰসেন নিব্বানং ‘‘অদ্ধানপরিঞ্ঞা’’তি ৰুচ্চতি যথা ‘‘হিমসন্তি সূরিযং উগ্গমেতী’’তি. ৰিজ্জাৰিমুত্তিফলসচ্ছিকিরিযত্থন্তি এত্থ ৰিজ্জাতি অগ্গমগ্গৰিজ্জা. ৰিমুত্তীতি অগ্গমগ্গসমাধি অধিপ্পেতো. তেসং ফলং অঞ্ঞাতি আহ – ‘‘ৰিজ্জাৰিমুত্তিফলেন অরহত্তং কথিত’’ন্তি. যাথাৰতো জাননতো পচ্চক্খতো দস্সনতো চ ঞাণদস্সনন্তি ইধ ফলনিব্বানপচ্চৰেক্খণা অধিপ্পেতাতি আহ – ‘‘ঞাণদস্সনেন পচ্চৰেক্খণা কথিতা’’তি. সেসেহীতি রাগ-ৰিরাগ-সংযোজনপ্পহান-অনুসযসমুগ্ঘাত-অদ্ধানপরিঞ্ঞা- আসৰক্খয-ৰিজ্জা-ৰিমুত্তি-ফলসচ্ছিকিরিযা-ঞাণদস্সন-অনুপাদাপরিনিব্বানপদেহি.

অঞ্ঞতিত্থিযপেয্যালৰগ্গৰণ্ণনা নিট্ঠিতা.

৬. সূরিযপেয্যালৰগ্গৰণ্ণনা

৪৯-৬২. যথা অরুণুগ্গং সূরিযুগ্গমনস্স একন্তিকং পুব্বনিমিত্তং, এৰং কল্যাণমিত্ততা অরিযমগ্গপাতুভাৰস্সাতি সদিসূপমা অরুণুগ্গং কল্যাণমিত্ততায. কল্যাণমিত্তোতি চেত্থ অরিযো, অরিযমগ্গো ৰা দট্ঠব্বো সূরিযপাতুভাৰো ৰিয তেন ৰিধূপনীযন্ধকারৰিধমনতো. কুসলকত্তুকম্যতাছন্দো ছন্দসম্পদা ইতরছন্দতো সম্পন্নত্তা. কারাপকঅপ্পমাদস্সাতি সচ্চপটিৰেধস্স কারাপকস্স. এৰং সব্বত্থেৰ সম্পদাসদ্দা ৰিসেসাধিগমহেতুতায ৰেদিতব্বা. অঞ্ঞেনপি আকারেনাতি ‘‘ৰিৰেকনিস্সিত’’ন্তিআদিআকারতো অঞ্ঞেন ‘‘রাগৰিনযপরিযোসান’’ন্তিআদিনা আকারেন.

সূরিযপেয্যালৰগ্গৰণ্ণনা নিট্ঠিতা.

৭. একধম্মপেয্যালৰগ্গাদিৰণ্ণনা

৬৩-১৩৮. তথা তথা ৰুত্তে বুজ্ঝনকানং অজ্ঝাসযৰসেন কথিতো, তস্মা ‘‘ৰুত্তো এৰ অত্থো, কস্মা পুন ৰুত্তো’’তি ন চোদেতব্বং.

একধম্মপেয্যালৰগ্গাদিৰণ্ণনা নিট্ঠিতা.

৮. অপ্পমাদপেয্যালৰগ্গো

১. তথাগতসুত্তৰণ্ণনা

১৩৯. কারাপকঅপ্পমাদো নাম ‘‘ইমে অকুসলা ধম্মা পহাতব্বা, ইমে কুসলা ধম্মা উপ্পাদেতব্বা’’তি ৰুত্তৰজ্জেতব্বৰজ্জনসম্পাদেতব্বসম্পাদনৰসেন পৰত্তো অপ্পমাদো. এসাতি অপ্পমাদো. লোকিযোৰ. ন লোকুত্তরো. অযন্তি এসাতি চ অপ্পমাদমেৰ ৰদতি. তেসন্তি চতুভূমকধম্মানং. পটিলাভকট্ঠেনাতি পটিলাভাপনট্ঠেন.

তথাগতসুত্তৰণ্ণনা নিট্ঠিতা.

২. পদসুত্তৰণ্ণনা

১৪০. জঙ্গলানন্তি জঙ্গলৰাসীনং. জঙ্গল-সদ্দো চেত্থ থদ্ধভাৰসামঞ্ঞেন পথৰীপরিযাযো, ন অনুপট্ঠানৰিদূরদেসৰাচী. তেনাহ – ‘‘পথৰীতলৰাসীন’’ন্তি. পদানং ৰুচ্চমানত্তা ‘‘সপাদকপাণান’’ন্তি ৰিসেসেত্ৰা ৰুত্তং. সমোধানন্তি অন্তোগধভাৰং. তেনাহ – ‘‘ওধানং উপক্খেপ’’ন্তি, উপনেত্ৰা পক্খিপিতব্বন্তি অত্থো.

পদসুত্তৰণ্ণনা নিট্ঠিতা.

৩-১০. কূটসুত্তাদিৰণ্ণনা

১৪১-১৪৮. ৰস্সিকায পুপ্ফং ৰস্সিকং যথা ‘‘আমলকিযা ফলং আমলক’’ন্তি. মহাতলস্মিন্তি উপরিপাসাদে. ‘‘যানি কানিচী’’তি পদেহি ইতরানি সমানাধিকরণানি ভৰিতুং যুত্তানীতি ‘‘পচ্চত্তে সামিৰচন’’ন্তি ৰত্ৰা তথা ৰিভত্তিৰিপরিণামো কতো. ‘‘তন্তাৰুতান’’ন্তি পদং নিদ্ধারণে সামিৰচনন্তি তত্থ ‘‘ৰত্থানী’’তি ৰচনসেসেন অত্থং দস্সেতুং ‘‘অথ ৰা’’তিআদি ৰুত্তং.

কূটসুত্তাদিৰণ্ণনা নিট্ঠিতা.

অপ্পমাদৰগ্গৰণ্ণনা নিট্ঠিতা.

৯. বলকরণীযৰগ্গো

১. বলসুত্তৰণ্ণনা

১৪৯. কম্মানিযেৰ কম্মন্তা যথা সুত্তন্তা. অরিযং অট্ঠঙ্গিকং মগ্গন্তি এত্থ নানন্তরিযকতায ৰিপস্সনাপি গহিতা এৰ হোতীতি ৰুত্তং ‘‘সহৰিপস্সন’’ন্তি.

২. বীজসুত্তৰণ্ণনা

১৫০. পঞ্চৰিধম্পি সমূহট্ঠেন বীজগামো নাম. তদেৰাতি মূলবীজাদি এৰ. সম্পন্নন্তি সহজাতমূলৰন্তং. নীলভাৰতো পট্ঠাযাতি নীলভাৰাপত্তিতো পট্ঠায.

৩. নাগসুত্তৰণ্ণনা

১৫১. বলং গাহেন্তীতি অত্তনো সরীরবলং গাহেন্তি. তং পন নাগানং বলপ্পত্তি এৰাতি আহ – ‘‘বলং গণ্হন্তী’’তি. সম্ভেজ্জমুখদ্ৰারন্তি মহাসমুদ্দেন সম্ভেদগতমহানদীনং মুখদ্ৰারং. নাগা কাযং ৰড্ঢেন্তীতিআদি যস্মা চ ভগৰতা উপমাৰসেন আভতং, তস্মা এৰমেৰ খোতি এত্থাতিআদিনা উপমং সংসন্দতি. আগতেসূতিআদীসু তীসু পদেসু ভাৰেনভাৰলক্খণে.

৫. কুম্ভসুত্তৰণ্ণনা

১৫৩. ন পতিআৰমতীতি চ নিকুজ্জিতভাৰেন উদকৰমনো ঘটো, ন তং পুন মুখেন গণ্হাতি. তেনাহ ‘‘ন অন্তো পৰেসেতী’’তি.

৭. আকাসসুত্তৰণ্ণনা

১৫৫. তেনেতং ৰুত্তন্তি তেন অরিযমগ্গস্স ইজ্ঝনেন এতেসং সব্বেসং বোধিপক্খিযধম্মানং ইজ্ঝনং ৰুত্তং.

৮-৯-১০. পঠমমেঘসুত্তাদিৰণ্ণনা

১৫৬-১৫৮. পংসুরজোজল্লন্তি ভূমিরেণুসহজাতমলং. ৰাণিজকোপমেতি ৰাণিজকোপমপঠমসুত্তে চাপি.

১১-১২. আগন্তুকসুত্তাদিৰণ্ণনা

১৫৯-১৬০. সহৰিপস্সনস্স অরিযমগ্গস্স ভাৰনায ইজ্ঝনেন এতং অভিঞ্ঞাপরিঞ্ঞেয্যাদিধম্মানং অভিঞ্ঞাপরিজাননাদীনং ইজ্ঝনং ৰুত্তং খত্তিযাদীনং ৰিসযআদিকং করোন্তস্স কথায সজ্জিতত্তা.

বলকরণীযৰগ্গৰণ্ণনা নিট্ঠিতা.

১০. এসনাৰগ্গো

১. এসনাসুত্তৰণ্ণনা

১৬১. কামানন্তি ৰত্থুকামকিলেসকামানং. কিলেসকামোপি হি কামিতন্তি পরিকপ্পিতেন ৰিধিনা চ অধিকরাগেহি এসনীযো. ভৰানন্তি তিণ্ণং গতীনং. দিট্ঠিগতিকপরিকপ্পিতস্স ব্রহ্মচরিযস্স নিমিত্তভাৰতো মিচ্ছাদিট্ঠি ‘‘ব্রহ্মচরিয’’ন্তি অধিপ্পেতা.

২-১১. ৰিধাসুত্তাদিৰণ্ণনা

১৬২-১৭১. সেয্যোহমস্মীতিআদিনা তংতংৰিভাগেন ধীযন্তি ৰিধীযন্তীতি ৰিধা, মানকোট্ঠাসা, মানট্ঠপনা ৰা. নীহনন্তীতি ৰিবাধেন্তি.

এসনাৰগ্গৰণ্ণনা নিট্ঠিতা.

১১. ওঘৰগ্গো

১-২. ওঘসুত্তাদিৰণ্ণনা

১৭২-১৭৩. ৰট্টে ওহনন্তি ওসীদাপেন্তীতি ওঘা. রূপারূপভৰেতি রূপভৰে চ অরূপভৰে চ রূপারূপতণ্হোপনিস্সযা রূপারূপাৰচরকম্মনিব্বত্তা খন্ধা. যোজনট্ঠেন যোগো.

৩-৪. উপাদানসুত্তাদিৰণ্ণনা

১৭৪-১৭৫. কামনৰসেন উপাদিযনতো কামুপাদানং. তেনাহ ‘‘কামগ্গহণ’’ন্তি. নামকাযস্সাতি ৰেদনাদীনং চতুন্নং অরূপক্খন্ধানং. ঘটনপবন্ধনকিলেসোতি হেতুনা ফলস্স কম্মৰট্টস্স ৰিপাকৰট্টেন দুক্খপ্পবন্ধসঞ্ঞিতস্স ঘটনস্স সম্বজ্ঝনস্স নিব্বত্তককিলেসো. অন্তগ্গাহিকদিট্ঠি সস্সতুচ্ছেদগাহো.

উপাদানসুত্তাদিৰণ্ণনা নিট্ঠিতা.

৫-১০. অনুসযসুত্তাদিৰণ্ণনা

১৭৬-১৮১. থামগতট্ঠেনাতি সত্তসন্তানে থিরভাৰূপগমনভাৰেন. থামগতন্তি চ অঞ্ঞেহি অসাধারণো কামরাগাদীনংযেৰ আৰেণিকো সভাৰো দট্ঠব্বো. কামরাগোৰাতি কামরাগো এৰ অপ্পহীনো. সো সতি পচ্চযলাভে উপ্পজ্জনারহতায সন্তানে অনুসেতীতি অনুসযো. সেসেসুপীতি পটিঘানুসযাদীসু. ওরম্ভাগো ৰুচ্চতি কামধাতু রূপারূপভাৰতো হেট্ঠাভূতত্তা. তত্থ পৰত্তিযা পচ্চযভাৰতো ওরম্ভাগিযানি যথা ‘‘পচ্ছিযো গোদুহকো’’তি. সংযোজেন্তীতি সংযোজনানি, হেট্ঠা ৰিয অত্থো ৰত্তব্বো. উদ্ধম্ভাগো মহগ্গতভাগো, তস্স হিতানীতি সব্বং হেট্ঠা ৰুত্তনযত্তা ন ৰুত্তন্তি অধিপ্পাযো.

অনুসযসুত্তাদিৰণ্ণনা নিট্ঠিতা.

ওঘৰগ্গৰণ্ণনা নিট্ঠিতা.

মগ্গসংযুত্তৰণ্ণনা নিট্ঠিতা.

২. বোজ্ঝঙ্গসংযুত্তং

১. পব্বতৰগ্গো

১.হিমৰন্তসুত্তৰণ্ণনা

১৮২. বুজ্ঝতি চতুসচ্চং অরিযসাৰকো এতাযাতি বোধং, ধম্মসামগ্গী, অরিযসাৰকো পন চতুসচ্চং বুজ্ঝতীতি বোধি. অঙ্গাতি কারণা. যায ধম্মসামগ্গিযাতি সম্বন্ধো. তণ্হাৰসেন পতিট্ঠানং, দিট্ঠিৰসেন আযূহনা. সস্সতদিট্ঠিযা পতিট্ঠানং, উচ্ছেদদিট্ঠিযা আযূহনা. লীনৰসেন পতিট্ঠানং, উদ্ধচ্চৰসেন আযূহনা. কামসুখানুযোগৰসেন পতিট্ঠানং, অত্তকিলমথানুযোগৰসেন আযূহনা. ওঘতরণসুত্তৰণ্ণনাযং (সং. নি. ১.১) –

‘‘কিলেসৰসেন পতিট্ঠানং, অভিসঙ্খারৰসেন আযূহনা. তণ্হাদিট্ঠীহি পতিট্ঠানং, অৰসেসকিলেসাভিসঙ্খারেহি আযূহনা, সব্বাকুসলাভিসঙ্খারৰসেন পতিট্ঠানং, সব্বলোকিযকুসলাভিসঙ্খারৰসেন আযূহনা’’তি –

ৰুত্তেসু পকারেসু ইধ অৰুত্তানং ৰসেন ৰেদিতব্বো. কিলেসসন্তাননিদ্দায উট্ঠহতীতি এতেন সিখাপত্তৰিপস্সনাসহগতানম্পি সতিআদীনং বোজ্ঝঙ্গভাৰং দস্সেতি. চত্তারীতিআদিনা মগ্গফলেন সহগতানং. সত্তহি বোজ্ঝঙ্গেহি ভাৰিতেহি সচ্চপটিৰেধো হোতীতি কথমিদং জানিতব্বন্তি চোদনং সন্ধাযাহ ‘‘যথাহা’’তিআদি. ঝানঙ্গমগ্গঙ্গাদযো ৰিযাতি এতেন বোধিবোজ্ঝঙ্গসদ্দানং সমুদাযাৰযৰৰিসযতং দস্সেতি. সেনঙ্গরথঙ্গাদযো ৰিযাতি এতেন পুগ্গলপঞ্ঞত্তিযা অৰিজ্জমানপঞ্ঞত্তিভাৰং দস্সেতি.

বোধায সংৰত্তন্তীতি বোজ্ঝঙ্গাতি ৰুত্তং ‘‘কারণত্থো অঙ্গসদ্দো’’তি. বুজ্ঝতীতি বোধি, বোধিযা এৰ অঙ্গাতি বোজ্ঝঙ্গাতি ৰুত্তং ‘‘বুজ্ঝন্তীতি বোজ্ঝঙ্গা’’তি. ৰিপস্সনাদীনং কারণানং বুজ্ঝিতব্বানং সচ্চানং অনুরূপং পচ্চক্খভাৰেন পটিমুখং অৰিপরীতং সম্মা বুজ্ঝন্তীতি এৰং ৰত্থুৰিসেসদীপকেহি উপরিমগ্গেহি অনুবুজ্ঝন্তীতিআদিনা ৰুত্তবোধিসদ্দেহি নিপ্পদেসেন ৰুত্তং ‘‘বুজ্ঝনতাসামঞ্ঞেন সঙ্গণ্হাতী’’তি. এত্থ চ লীনপতিট্ঠান-কামসুখল্লিকানুযোগ-উচ্ছেদাভিনিৰেসানং ধম্মৰিচয-ৰীরিযপীতিপধান-ধম্মসামগ্গী পটিপক্খো. উদ্ধচ্চাযূহনঅত্তকিলমথানুযোগ-সস্সতাভিনিৰেসানং পস্সদ্ধিসমাধি-উপেক্খাপধান-ধম্মসামগ্গী পটিপক্খো. সতি পন উভযত্থাপি ইচ্ছিতব্বা. তথা হি সা সব্বত্থিকা ৰুত্তা.

সং-সদ্দো পসংসাযং. পুনদেৰ সুন্দরো চ অত্থোপীতি আহ ‘‘পসত্থো সুন্দরো চ বোজ্ঝঙ্গো’’তি. অভিনিব্বত্তেতীতি অভিৰিসিট্ঠভাৰেন নিব্বত্তেতি সৰিসেসভাৰং ৰদতি. ‘‘একে ৰণ্ণযন্তী’’তি ৰত্ৰা তত্থ যথাৰুত্তৰিৰেকত্তযতো অঞ্ঞং ৰিৰেকদ্ৰযং উদ্ধরিত্ৰা দস্সেতুং ‘‘তে হী’’তিআদি ৰুত্তং. তত্থ ঝানক্খণে তাৰ কিচ্চতো ৰিক্খম্ভনৰিৰেকনিস্সিতং, ৰিপস্সনাক্খণে অজ্ঝাসযতো পটিপ্পস্সদ্ধিৰিৰেকনিস্সিতং ভাৰেতীতি. তেনাহ – ‘‘অনুত্তরং ৰিমোক্খং উপসম্পজ্জ ৰিহরিস্সামী’’তি. তত্থ তত্থ নিচ্ছযতায কসিণজ্ঝানগ্গহণেন অনুপ্পাদানম্পি গহণং দট্ঠব্বং.

হিমৰন্তসুত্তৰণ্ণনা নিট্ঠিতা.

২. কাযসুত্তৰণ্ণনা

১৮৩. তিট্ঠন্তি এতেনাতি ঠিতি, কারণং. কম্মউতুচিত্তাহারসঞ্ঞিতো চতুব্বিধো পচ্চযো ঠিতি এতস্সাতি পচ্চযট্ঠিতিকো. আহারপচ্চযসদ্দা হি একত্থা. সুভম্পীতি কামচ্ছন্দো পচ্চযো, অসুভে সুভাকারেন পৰত্তনতো সুভন্তি ৰুচ্চতি. তেন কারণেন পৰত্তনকস্স অঞ্ঞস্স কামচ্ছন্দস্স নিমিত্তত্তা সুভনিমিত্তন্তি. সুভস্সাতি যথাৰুত্তস্স সুভস্স. আরম্মণম্পীতি সুভাকারেন, ইট্ঠাকারেন ৰা গয্হমানং রূপাদিআরম্মণম্পি সুভনিমিত্তং ৰুত্তাকারেন. অনুপাযমনসিকারোতি আকঙ্খিতস্স হিতসুখস্স অনুপাযভূতো মনসিকারো, ততো এৰ উপ্পথমনসিকারোতি অযোনিসোমনসিকারো. তস্মিন্তি যথানিদ্ধারিতে কামচ্ছন্দভূতে তদারম্মণভূতে চ দুৰিধেপি সুভনিমিত্তে. অট্ঠকথাযং পন ‘‘সুভারম্মণে’’ইচ্চেৰ ৰুত্তং. অত্থি, ভিক্খৰে, সুভনিমিত্তন্তিআদীতি আদি-সদ্দেন কামচ্ছন্দনীৰরণস্স আহারদস্সনপাল়ি উত্তানাতি কত্ৰা ৰুত্তং – ‘‘এৰং সব্বনীৰরণেসু যোজনা ৰেদিতব্বা’’তি.

পটিঘোপি পটিঘনিমিত্তং পুরিমুপ্পন্নস্স পচ্ছা উপ্পজ্জনকস্স নিমিত্তভাৰতো. পটিঘারম্মণং নাম একূনৰীসতি আঘাতৰত্থুভূতা সত্তসঙ্খারা. অরতীতি পন্তসেনাসনাদীসু অরমণং. উক্কণ্ঠিতাতি উক্কণ্ঠভাৰো. পন্তেসূতি দূরেসু, ৰিৰিত্তেসু ৰা. অধিকুসলেসূতি সমথৰিপস্সনাধম্মেসু. অরতি রতিপটিপক্খো. অরতিতাতি অরমণাকারো. অনভিরতীতি অনভিরতভাৰো. অনভিরমণাতি অনভিরমণাকারো. উক্কণ্ঠিতাতি উক্কণ্ঠনাকারো. পরিতস্সিতাতি উক্কণ্ঠনৰসেনেৰ পরিতস্সনা.

আগন্তুকং, ন সভাৰসিদ্ধং. কাযালসিযন্তি নামকাযে অলসভাৰো. সম্মোহৰিনোদনিযং পন ‘‘তন্দীতি জাতিআলসিয’’ন্তি ৰুত্তং. ৰদতীতি এতেন অতিসীতাদিপচ্চযা সঙ্কোচাপত্তিং দস্সেতি. যং সন্ধায ৰুত্তং কিলেসৰত্থুৰিভঙ্গে (ৰিভ. অট্ঠ. ৮৫৭). তন্দীতি জাতিআলসিযং. তন্দিযনাতি তন্দিযনাকারো. তন্দিমনকতাতি তন্দিযা অভিভূতচিত্ততা. অলসস্স ভাৰো আলস্যং. আলস্যাযনাকারো আলস্যাযনা. আলস্যাযিতস্স ভাৰো আলস্যাযিতত্তং. ইতি সব্বেহিপি ইমেহি পদেহি কিলেসৰসেন কাযালসিযং কথিতং.

কিলেসৰসেনাতি সম্মোহৰসেন. কাযৰিনমনাতি কাযস্স ৰিরূপতো নমনা. জম্ভনাতি ফন্দনা. পুনপ্পুনং জম্ভনা ৰিজম্ভনা. আনমনাতি পুরতো নমনা. ৰিনমনাতি পচ্ছতো নমনা. সন্নমনাতি সমন্ততো নমনা. পণমনাতি যথা হি তন্ততো উট্ঠিতপেসকারো কিঞ্চিদেৰ উপরিট্ঠিতং গহেত্ৰা উজুং কাযং উস্সাপেতি, এৰং কাযস্স উদ্ধং ঠপনা. ব্যাধিযকন্তি উপ্পন্নব্যাধিতা. ইতি সব্বেহিপি ইমেহি পদেহি কিলেসৰসেন কাযফন্দনমেৰ কথিতং (ৰিভ. অট্ঠ. ৮৫৮).

ভত্তপরিল়াহোতি ভত্তৰসেন পরিল়াহুপ্পত্তি. ভুত্তাৰিস্সাতি ভুত্তৰতো. ভত্তমুচ্ছাতি ভত্তগেলঞ্ঞং. অতিভুত্তপচ্চযা হি মুচ্ছাপত্তো ৰিয হোতি. ভত্তকিলমথোতি ভুত্তপচ্চযা কিলন্তভাৰো. ভত্তপরিল়াহোতি ভত্তদরথো. কুচ্ছিপূরং ভুত্তৰতো হি পরিল়াহুপ্পত্তিযা উপহতিন্দ্রিযো ৰিয হোতি, কাযো খিজ্জতি. কাযদুট্ঠুল্লন্তি ভুত্তভত্তং নিস্সায কাযস্স অকম্মঞ্ঞতা.

চিত্তস্স লীযনাকারোতি আরম্মণে চিত্তস্স সঙ্কোচপ্পত্তি. চিত্তস্স অকল্যতাতি চিত্তস্স গিলানভাৰো. গিলানোতি অকল্লকো ৰুচ্চতি. তথা চাহ ‘‘নাহং, ভন্তে, অকল্লকো’’তি. অকম্মঞ্ঞতাতি চিত্তগেলঞ্ঞসঙ্খাতো অকম্মঞ্ঞনাকারো. ওলীযনাতি ওলীযনাকারো. ইরিযাপথিকম্পি চিত্তং যস্স ৰসেন ইরিযাপথং সন্ধারেতুং অসক্কোন্তো ওলীযতি, তস্স তং আকারং সন্ধায ৰুত্তং ‘‘ওলীযনা’’তি. দুতিযপদং উপসগ্গেন ৰড্ঢিতং. লীনন্তি অৰিপ্ফারিকতায সঙ্কোচপ্পত্তং. ইতরে দ্ৰে আকারনিদ্দেসা. থিনন্তি অৰিপ্ফারিকতায অনুস্সাহনা অসঙ্গহনসঙ্গহনং. থিযনাকারো থিযনা. থিযিতত্তন্তি থিযিতস্স আকারো, অৰিপ্ফারিকতাতি অত্থো.

চেতসো অৰূপসমোতি চিত্তস্স অৰূপসন্ততা অসন্নিসিন্নভাৰো. তেনাহ – ‘‘অৰূপসন্তাকারো’’তি. অত্থতো পনেতন্তি স্ৰাযং অৰূপসন্তাকারো ৰিক্খেপসভাৰত্তা ৰিক্খেপহেতুতায চ অত্থতো এতং উদ্ধচ্চকুক্কুচ্চমেৰ.

ৰিচিকিচ্ছায আরম্মণধম্মা নাম ‘‘বুদ্ধে কঙ্খতী’’তিআদিনা আগতঅট্ঠকঙ্খাৰত্থুভূতা ধম্মা. যস্মা ৰিচিকিচ্ছা ব্যাপাদাদযো ৰিয অনু অনু উগ্গহণপচ্চযা উপ্পজ্জতি, তস্মা কঙ্খাট্ঠানীযং আরম্মণমেৰ দস্সিতং ‘‘ৰিচিকিচ্ছায আরম্মণধম্মা’’তি. যস্মা পুরিমুপ্পন্না ৰিচিকিচ্ছা পচ্ছা ৰিচিকিচ্ছায পচ্চযো হোতি, তস্মা ৰিচিকিচ্ছাপি ৰিচিকিচ্ছাট্ঠানীযধম্মা ৰেদিতব্বা. তত্রাযং ৰচনত্থো – তিট্ঠন্তি পৰত্তন্তি এত্থাতি ঠানীযা, ৰিচিকিচ্ছা এৰ ঠানীযা ৰিচিকিচ্ছাট্ঠানীযা. অট্ঠকথাযং পন আরম্মণস্সপি তত্থ ৰিসেসপচ্চযতং উপাদায ‘‘কামচ্ছন্দো ৰিচিকিচ্ছাতি ইমে দ্ৰে ধম্মা আরম্মণেন কথিতা’’তি ৰুত্তং. সুভনিমিত্তস্স হি পচ্চযভাৰমত্তং সন্ধাযেতং ৰুত্তং, তথাপি যথা ‘‘পটিঘম্পি পটিঘনিমিত্ত’’ন্তি কত্ৰা ‘‘ব্যাপাদো উপনিস্সযেন কথিতো’’তি ৰুত্তং, এৰং সুভম্পি সুভনিমিত্তন্তি কত্ৰা কামচ্ছন্দো উপনিস্সযেন কথিতোতি সক্কা ৰিঞ্ঞাতুং. সেসা থিনমিদ্ধউদ্ধচ্চকুক্কুচ্চানি. তত্থ থিনমিদ্ধং অঞ্ঞমঞ্ঞং সহজাতাদিৰসেন পচ্চযো, তথা উদ্ধচ্চকুক্কুচ্চন্তি. উভযেসম্পি উপনিস্সযকোটিযা পচ্চযভাৰে ৰত্তব্বমেৰ নত্থীতি আহ ‘‘সহজাতেন চ উপনিস্সযেন চা’’তি.

যস্মা সতি নাম ‘‘চত্তারো সতিপট্ঠানা’’তিআদিনা তেসং তেসং ধম্মানং অনুস্সরণৰসেন ৰত্ততি, তস্মা তে ধম্মা সতিসম্বোজ্ঝঙ্গট্ঠানীযা নাম. লোকুত্তরধম্মে চ অনুস্সৰাদিৰসেন গহেত্ৰা তথা পৰত্ততেৰ. তেন ৰুত্তং ‘‘সতিযা’’তিআদি.

কোসল্লং ৰুচ্চতি পঞ্ঞা, ততো উপ্পন্না কোসল্লসম্ভূতা. অনৰজ্জসুখৰিপাকাতি অনৰজ্জা হুত্ৰা সুখৰিপাকা ৰিপচ্চনকা. পদদ্ৰযেন পচ্চযতো সভাৰতো কিচ্চতো ফলতো কুসলধম্মং দস্সেতি. অকুসলনিদ্দেসেপি এসেৰ নযো. সাৰজ্জাতি গারয্হা. অনৰজ্জাতি অগারয্হা. হীনা লামকা. পণীতা সেট্ঠা. কণ্হা কাল়কা অসুদ্ধা. সুক্কা ওদাতা সুদ্ধা. পটিভাগ-সদ্দো পঠমে ৰিকপ্পে সদিসকোট্ঠাসত্থো, দুতিযে পটিপক্খকোট্ঠাসত্থো, ততিযে নিগ্গহেতব্বপটিপক্খকোট্ঠাসত্থো দট্ঠব্বো.

কুসলকিরিযায আদিকম্মভাৰেন পৰত্তৰীরিযং ধিতিসভাৰতায ধাতূতি ৰুত্তন্তি আহ ‘‘আরম্ভধাতূতি পঠমারম্ভৰীরিয’’ন্তি. লদ্ধাসেৰনং ৰীরিযং বলপ্পত্তং হুত্ৰা পটিপক্খং ৰিধমতীতি আহ – ‘‘নিক্কমধাতূতি কোসজ্জতো নিক্খন্তত্তা ততো বলৰতর’’ন্তি. অধিমত্তাধিমত্ততরানং পটিপক্খধম্মানং ৰিধমনসমত্থং পটুপটুতরাদিভাৰপ্পত্তং হোতীতি আহ – ‘‘পরক্কমধাতূতি পরং পরং ঠানং অক্কমনতায ততোপি বলৰতর’’ন্তি.

তিট্ঠতি পৰত্ততি এত্থাতি ঠানীযা. আরম্মণধম্মা, পীতিসম্বোজ্ঝঙ্গস্স ঠানীযাতি পীতিসম্বোজ্ঝঙ্গট্ঠানীযাতি ‘‘পীতিযা আরম্মণধম্মা’’তি ৰুত্তং. যস্মা অপরাপরুপ্পত্তিযা পীতিপি তথা ৰত্তব্বতং লভতীতি ৰুত্তং ৰিসুদ্ধিমগ্গে ‘‘পীতিযা এৰ তং নাম’’ন্তি. দরথপস্সদ্ধীতি দরথো কিলেসপরিল়াহো, সো পস্সম্ভতি এতাযাতি দরথপস্সদ্ধি, কাযপস্সদ্ধিযা ৰেদনাদিখন্ধত্তযস্স ৰিয রূপকাযস্সপি পস্সম্ভনং হোতি, চিত্তপস্সদ্ধিযা চিত্তস্সেৰ পস্সম্ভনং, ততো এৰেত্থ ভগৰতা লহুতাদীনং ৰিয দুৰিধতা ৰুত্তা. তথা সমাহিতাকারং সল্লক্খেত্ৰা গয্হমানো সমথোৰ সমথনিমিত্তং, তস্স আরম্মণভূতং পটিভাগনিমিত্তম্পি. ৰিৰিধং অগ্গং এতস্সাতি ব্যগ্গো, ৰিক্খেপো. তথা হি সো অনৰট্ঠানরসো ভন্ততাপচ্চুপট্ঠানো ৰুত্তো. একগ্গভাৰতো ব্যগ্গপটিপক্খোতি অব্যগ্গো, সমাধি, সো এৰ নিমিত্তন্তি পুব্বে ৰিয ৰত্তব্বং. তেনাহ ‘‘তস্সেৰ ৰেৰচন’’ন্তি.

যো আরম্মণে ইট্ঠানিট্ঠাকারং অনাদিযিত্ৰা গহেতব্বো মজ্ঝত্তাকারো, যো চ পুব্বে উপেক্খাসম্বোজ্ঝঙ্গস্স ভাৰনাৰসেন উপ্পন্নো মজ্ঝত্তাকারো, দুৰিধোপি সো উপেক্খায আরম্মণধম্মোতি অধিপ্পেতোতি আহ – ‘‘অত্থতো পন মজ্ঝত্তাকারো উপেক্খাট্ঠানীযা ধম্মাতি ৰেদিতব্বো’’তি. আরম্মণেন কথিতা আরম্মণস্সেৰ তেসং ৰিসেসপচ্চযভাৰতো. সেসাতি ৰীরিযাদযো চত্তারো ধম্মা. তেসঞ্হি উপনিস্সযোৰ সাতিসযো ইচ্ছিতব্বোতি.

কাযসুত্তৰণ্ণনা নিট্ঠিতা.