২. বোজ্ঝঙ্গসংযুত্তং

১. পব্বতৰগ্গো

১.হিমৰন্তসুত্তৰণ্ণনা

১৮২. বুজ্ঝতি চতুসচ্চং অরিযসাৰকো এতাযাতি বোধং, ধম্মসামগ্গী, অরিযসাৰকো পন চতুসচ্চং বুজ্ঝতীতি বোধি. অঙ্গাতি কারণা. যায ধম্মসামগ্গিযাতি সম্বন্ধো. তণ্হাৰসেন পতিট্ঠানং, দিট্ঠিৰসেন আযূহনা. সস্সতদিট্ঠিযা পতিট্ঠানং, উচ্ছেদদিট্ঠিযা আযূহনা. লীনৰসেন পতিট্ঠানং, উদ্ধচ্চৰসেন আযূহনা. কামসুখানুযোগৰসেন পতিট্ঠানং, অত্তকিলমথানুযোগৰসেন আযূহনা. ওঘতরণসুত্তৰণ্ণনাযং (সং. নি. ১.১) –

‘‘কিলেসৰসেন পতিট্ঠানং, অভিসঙ্খারৰসেন আযূহনা. তণ্হাদিট্ঠীহি পতিট্ঠানং, অৰসেসকিলেসাভিসঙ্খারেহি আযূহনা, সব্বাকুসলাভিসঙ্খারৰসেন পতিট্ঠানং, সব্বলোকিযকুসলাভিসঙ্খারৰসেন আযূহনা’’তি –

ৰুত্তেসু পকারেসু ইধ অৰুত্তানং ৰসেন ৰেদিতব্বো. কিলেসসন্তাননিদ্দায উট্ঠহতীতি এতেন সিখাপত্তৰিপস্সনাসহগতানম্পি সতিআদীনং বোজ্ঝঙ্গভাৰং দস্সেতি. চত্তারীতিআদিনা মগ্গফলেন সহগতানং. সত্তহি বোজ্ঝঙ্গেহি ভাৰিতেহি সচ্চপটিৰেধো হোতীতি কথমিদং জানিতব্বন্তি চোদনং সন্ধাযাহ ‘‘যথাহা’’তিআদি. ঝানঙ্গমগ্গঙ্গাদযো ৰিযাতি এতেন বোধিবোজ্ঝঙ্গসদ্দানং সমুদাযাৰযৰৰিসযতং দস্সেতি. সেনঙ্গরথঙ্গাদযো ৰিযাতি এতেন পুগ্গলপঞ্ঞত্তিযা অৰিজ্জমানপঞ্ঞত্তিভাৰং দস্সেতি.

বোধায সংৰত্তন্তীতি বোজ্ঝঙ্গাতি ৰুত্তং ‘‘কারণত্থো অঙ্গসদ্দো’’তি. বুজ্ঝতীতি বোধি, বোধিযা এৰ অঙ্গাতি বোজ্ঝঙ্গাতি ৰুত্তং ‘‘বুজ্ঝন্তীতি বোজ্ঝঙ্গা’’তি. ৰিপস্সনাদীনং কারণানং বুজ্ঝিতব্বানং সচ্চানং অনুরূপং পচ্চক্খভাৰেন পটিমুখং অৰিপরীতং সম্মা বুজ্ঝন্তীতি এৰং ৰত্থুৰিসেসদীপকেহি উপরিমগ্গেহি অনুবুজ্ঝন্তীতিআদিনা ৰুত্তবোধিসদ্দেহি নিপ্পদেসেন ৰুত্তং ‘‘বুজ্ঝনতাসামঞ্ঞেন সঙ্গণ্হাতী’’তি. এত্থ চ লীনপতিট্ঠান-কামসুখল্লিকানুযোগ-উচ্ছেদাভিনিৰেসানং ধম্মৰিচয-ৰীরিযপীতিপধান-ধম্মসামগ্গী পটিপক্খো. উদ্ধচ্চাযূহনঅত্তকিলমথানুযোগ-সস্সতাভিনিৰেসানং পস্সদ্ধিসমাধি-উপেক্খাপধান-ধম্মসামগ্গী পটিপক্খো. সতি পন উভযত্থাপি ইচ্ছিতব্বা. তথা হি সা সব্বত্থিকা ৰুত্তা.

সং-সদ্দো পসংসাযং. পুনদেৰ সুন্দরো চ অত্থোপীতি আহ ‘‘পসত্থো সুন্দরো চ বোজ্ঝঙ্গো’’তি. অভিনিব্বত্তেতীতি অভিৰিসিট্ঠভাৰেন নিব্বত্তেতি সৰিসেসভাৰং ৰদতি. ‘‘একে ৰণ্ণযন্তী’’তি ৰত্ৰা তত্থ যথাৰুত্তৰিৰেকত্তযতো অঞ্ঞং ৰিৰেকদ্ৰযং উদ্ধরিত্ৰা দস্সেতুং ‘‘তে হী’’তিআদি ৰুত্তং. তত্থ ঝানক্খণে তাৰ কিচ্চতো ৰিক্খম্ভনৰিৰেকনিস্সিতং, ৰিপস্সনাক্খণে অজ্ঝাসযতো পটিপ্পস্সদ্ধিৰিৰেকনিস্সিতং ভাৰেতীতি. তেনাহ – ‘‘অনুত্তরং ৰিমোক্খং উপসম্পজ্জ ৰিহরিস্সামী’’তি. তত্থ তত্থ নিচ্ছযতায কসিণজ্ঝানগ্গহণেন অনুপ্পাদানম্পি গহণং দট্ঠব্বং.

হিমৰন্তসুত্তৰণ্ণনা নিট্ঠিতা.

২. কাযসুত্তৰণ্ণনা

১৮৩. তিট্ঠন্তি এতেনাতি ঠিতি, কারণং. কম্মউতুচিত্তাহারসঞ্ঞিতো চতুব্বিধো পচ্চযো ঠিতি এতস্সাতি পচ্চযট্ঠিতিকো. আহারপচ্চযসদ্দা হি একত্থা. সুভম্পীতি কামচ্ছন্দো পচ্চযো, অসুভে সুভাকারেন পৰত্তনতো সুভন্তি ৰুচ্চতি. তেন কারণেন পৰত্তনকস্স অঞ্ঞস্স কামচ্ছন্দস্স নিমিত্তত্তা সুভনিমিত্তন্তি. সুভস্সাতি যথাৰুত্তস্স সুভস্স. আরম্মণম্পীতি সুভাকারেন, ইট্ঠাকারেন ৰা গয্হমানং রূপাদিআরম্মণম্পি সুভনিমিত্তং ৰুত্তাকারেন. অনুপাযমনসিকারোতি আকঙ্খিতস্স হিতসুখস্স অনুপাযভূতো মনসিকারো, ততো এৰ উপ্পথমনসিকারোতি অযোনিসোমনসিকারো. তস্মিন্তি যথানিদ্ধারিতে কামচ্ছন্দভূতে তদারম্মণভূতে চ দুৰিধেপি সুভনিমিত্তে. অট্ঠকথাযং পন ‘‘সুভারম্মণে’’ইচ্চেৰ ৰুত্তং. অত্থি, ভিক্খৰে, সুভনিমিত্তন্তিআদীতি আদি-সদ্দেন কামচ্ছন্দনীৰরণস্স আহারদস্সনপাল়ি উত্তানাতি কত্ৰা ৰুত্তং – ‘‘এৰং সব্বনীৰরণেসু যোজনা ৰেদিতব্বা’’তি.

পটিঘোপি পটিঘনিমিত্তং পুরিমুপ্পন্নস্স পচ্ছা উপ্পজ্জনকস্স নিমিত্তভাৰতো. পটিঘারম্মণং নাম একূনৰীসতি আঘাতৰত্থুভূতা সত্তসঙ্খারা. অরতীতি পন্তসেনাসনাদীসু অরমণং. উক্কণ্ঠিতাতি উক্কণ্ঠভাৰো. পন্তেসূতি দূরেসু, ৰিৰিত্তেসু ৰা. অধিকুসলেসূতি সমথৰিপস্সনাধম্মেসু. অরতি রতিপটিপক্খো. অরতিতাতি অরমণাকারো. অনভিরতীতি অনভিরতভাৰো. অনভিরমণাতি অনভিরমণাকারো. উক্কণ্ঠিতাতি উক্কণ্ঠনাকারো. পরিতস্সিতাতি উক্কণ্ঠনৰসেনেৰ পরিতস্সনা.

আগন্তুকং, ন সভাৰসিদ্ধং. কাযালসিযন্তি নামকাযে অলসভাৰো. সম্মোহৰিনোদনিযং পন ‘‘তন্দীতি জাতিআলসিয’’ন্তি ৰুত্তং. ৰদতীতি এতেন অতিসীতাদিপচ্চযা সঙ্কোচাপত্তিং দস্সেতি. যং সন্ধায ৰুত্তং কিলেসৰত্থুৰিভঙ্গে (ৰিভ. অট্ঠ. ৮৫৭). তন্দীতি জাতিআলসিযং. তন্দিযনাতি তন্দিযনাকারো. তন্দিমনকতাতি তন্দিযা অভিভূতচিত্ততা. অলসস্স ভাৰো আলস্যং. আলস্যাযনাকারো আলস্যাযনা. আলস্যাযিতস্স ভাৰো আলস্যাযিতত্তং. ইতি সব্বেহিপি ইমেহি পদেহি কিলেসৰসেন কাযালসিযং কথিতং.

কিলেসৰসেনাতি সম্মোহৰসেন. কাযৰিনমনাতি কাযস্স ৰিরূপতো নমনা. জম্ভনাতি ফন্দনা. পুনপ্পুনং জম্ভনা ৰিজম্ভনা. আনমনাতি পুরতো নমনা. ৰিনমনাতি পচ্ছতো নমনা. সন্নমনাতি সমন্ততো নমনা. পণমনাতি যথা হি তন্ততো উট্ঠিতপেসকারো কিঞ্চিদেৰ উপরিট্ঠিতং গহেত্ৰা উজুং কাযং উস্সাপেতি, এৰং কাযস্স উদ্ধং ঠপনা. ব্যাধিযকন্তি উপ্পন্নব্যাধিতা. ইতি সব্বেহিপি ইমেহি পদেহি কিলেসৰসেন কাযফন্দনমেৰ কথিতং (ৰিভ. অট্ঠ. ৮৫৮).

ভত্তপরিল়াহোতি ভত্তৰসেন পরিল়াহুপ্পত্তি. ভুত্তাৰিস্সাতি ভুত্তৰতো. ভত্তমুচ্ছাতি ভত্তগেলঞ্ঞং. অতিভুত্তপচ্চযা হি মুচ্ছাপত্তো ৰিয হোতি. ভত্তকিলমথোতি ভুত্তপচ্চযা কিলন্তভাৰো. ভত্তপরিল়াহোতি ভত্তদরথো. কুচ্ছিপূরং ভুত্তৰতো হি পরিল়াহুপ্পত্তিযা উপহতিন্দ্রিযো ৰিয হোতি, কাযো খিজ্জতি. কাযদুট্ঠুল্লন্তি ভুত্তভত্তং নিস্সায কাযস্স অকম্মঞ্ঞতা.

চিত্তস্স লীযনাকারোতি আরম্মণে চিত্তস্স সঙ্কোচপ্পত্তি. চিত্তস্স অকল্যতাতি চিত্তস্স গিলানভাৰো. গিলানোতি অকল্লকো ৰুচ্চতি. তথা চাহ ‘‘নাহং, ভন্তে, অকল্লকো’’তি. অকম্মঞ্ঞতাতি চিত্তগেলঞ্ঞসঙ্খাতো অকম্মঞ্ঞনাকারো. ওলীযনাতি ওলীযনাকারো. ইরিযাপথিকম্পি চিত্তং যস্স ৰসেন ইরিযাপথং সন্ধারেতুং অসক্কোন্তো ওলীযতি, তস্স তং আকারং সন্ধায ৰুত্তং ‘‘ওলীযনা’’তি. দুতিযপদং উপসগ্গেন ৰড্ঢিতং. লীনন্তি অৰিপ্ফারিকতায সঙ্কোচপ্পত্তং. ইতরে দ্ৰে আকারনিদ্দেসা. থিনন্তি অৰিপ্ফারিকতায অনুস্সাহনা অসঙ্গহনসঙ্গহনং. থিযনাকারো থিযনা. থিযিতত্তন্তি থিযিতস্স আকারো, অৰিপ্ফারিকতাতি অত্থো.

চেতসো অৰূপসমোতি চিত্তস্স অৰূপসন্ততা অসন্নিসিন্নভাৰো. তেনাহ – ‘‘অৰূপসন্তাকারো’’তি. অত্থতো পনেতন্তি স্ৰাযং অৰূপসন্তাকারো ৰিক্খেপসভাৰত্তা ৰিক্খেপহেতুতায চ অত্থতো এতং উদ্ধচ্চকুক্কুচ্চমেৰ.

ৰিচিকিচ্ছায আরম্মণধম্মা নাম ‘‘বুদ্ধে কঙ্খতী’’তিআদিনা আগতঅট্ঠকঙ্খাৰত্থুভূতা ধম্মা. যস্মা ৰিচিকিচ্ছা ব্যাপাদাদযো ৰিয অনু অনু উগ্গহণপচ্চযা উপ্পজ্জতি, তস্মা কঙ্খাট্ঠানীযং আরম্মণমেৰ দস্সিতং ‘‘ৰিচিকিচ্ছায আরম্মণধম্মা’’তি. যস্মা পুরিমুপ্পন্না ৰিচিকিচ্ছা পচ্ছা ৰিচিকিচ্ছায পচ্চযো হোতি, তস্মা ৰিচিকিচ্ছাপি ৰিচিকিচ্ছাট্ঠানীযধম্মা ৰেদিতব্বা. তত্রাযং ৰচনত্থো – তিট্ঠন্তি পৰত্তন্তি এত্থাতি ঠানীযা, ৰিচিকিচ্ছা এৰ ঠানীযা ৰিচিকিচ্ছাট্ঠানীযা. অট্ঠকথাযং পন আরম্মণস্সপি তত্থ ৰিসেসপচ্চযতং উপাদায ‘‘কামচ্ছন্দো ৰিচিকিচ্ছাতি ইমে দ্ৰে ধম্মা আরম্মণেন কথিতা’’তি ৰুত্তং. সুভনিমিত্তস্স হি পচ্চযভাৰমত্তং সন্ধাযেতং ৰুত্তং, তথাপি যথা ‘‘পটিঘম্পি পটিঘনিমিত্ত’’ন্তি কত্ৰা ‘‘ব্যাপাদো উপনিস্সযেন কথিতো’’তি ৰুত্তং, এৰং সুভম্পি সুভনিমিত্তন্তি কত্ৰা কামচ্ছন্দো উপনিস্সযেন কথিতোতি সক্কা ৰিঞ্ঞাতুং. সেসা থিনমিদ্ধউদ্ধচ্চকুক্কুচ্চানি. তত্থ থিনমিদ্ধং অঞ্ঞমঞ্ঞং সহজাতাদিৰসেন পচ্চযো, তথা উদ্ধচ্চকুক্কুচ্চন্তি. উভযেসম্পি উপনিস্সযকোটিযা পচ্চযভাৰে ৰত্তব্বমেৰ নত্থীতি আহ ‘‘সহজাতেন চ উপনিস্সযেন চা’’তি.

যস্মা সতি নাম ‘‘চত্তারো সতিপট্ঠানা’’তিআদিনা তেসং তেসং ধম্মানং অনুস্সরণৰসেন ৰত্ততি, তস্মা তে ধম্মা সতিসম্বোজ্ঝঙ্গট্ঠানীযা নাম. লোকুত্তরধম্মে চ অনুস্সৰাদিৰসেন গহেত্ৰা তথা পৰত্ততেৰ. তেন ৰুত্তং ‘‘সতিযা’’তিআদি.

কোসল্লং ৰুচ্চতি পঞ্ঞা, ততো উপ্পন্না কোসল্লসম্ভূতা. অনৰজ্জসুখৰিপাকাতি অনৰজ্জা হুত্ৰা সুখৰিপাকা ৰিপচ্চনকা. পদদ্ৰযেন পচ্চযতো সভাৰতো কিচ্চতো ফলতো কুসলধম্মং দস্সেতি. অকুসলনিদ্দেসেপি এসেৰ নযো. সাৰজ্জাতি গারয্হা. অনৰজ্জাতি অগারয্হা. হীনা লামকা. পণীতা সেট্ঠা. কণ্হা কাল়কা অসুদ্ধা. সুক্কা ওদাতা সুদ্ধা. পটিভাগ-সদ্দো পঠমে ৰিকপ্পে সদিসকোট্ঠাসত্থো, দুতিযে পটিপক্খকোট্ঠাসত্থো, ততিযে নিগ্গহেতব্বপটিপক্খকোট্ঠাসত্থো দট্ঠব্বো.

কুসলকিরিযায আদিকম্মভাৰেন পৰত্তৰীরিযং ধিতিসভাৰতায ধাতূতি ৰুত্তন্তি আহ ‘‘আরম্ভধাতূতি পঠমারম্ভৰীরিয’’ন্তি. লদ্ধাসেৰনং ৰীরিযং বলপ্পত্তং হুত্ৰা পটিপক্খং ৰিধমতীতি আহ – ‘‘নিক্কমধাতূতি কোসজ্জতো নিক্খন্তত্তা ততো বলৰতর’’ন্তি. অধিমত্তাধিমত্ততরানং পটিপক্খধম্মানং ৰিধমনসমত্থং পটুপটুতরাদিভাৰপ্পত্তং হোতীতি আহ – ‘‘পরক্কমধাতূতি পরং পরং ঠানং অক্কমনতায ততোপি বলৰতর’’ন্তি.

তিট্ঠতি পৰত্ততি এত্থাতি ঠানীযা. আরম্মণধম্মা, পীতিসম্বোজ্ঝঙ্গস্স ঠানীযাতি পীতিসম্বোজ্ঝঙ্গট্ঠানীযাতি ‘‘পীতিযা আরম্মণধম্মা’’তি ৰুত্তং. যস্মা অপরাপরুপ্পত্তিযা পীতিপি তথা ৰত্তব্বতং লভতীতি ৰুত্তং ৰিসুদ্ধিমগ্গে ‘‘পীতিযা এৰ তং নাম’’ন্তি. দরথপস্সদ্ধীতি দরথো কিলেসপরিল়াহো, সো পস্সম্ভতি এতাযাতি দরথপস্সদ্ধি, কাযপস্সদ্ধিযা ৰেদনাদিখন্ধত্তযস্স ৰিয রূপকাযস্সপি পস্সম্ভনং হোতি, চিত্তপস্সদ্ধিযা চিত্তস্সেৰ পস্সম্ভনং, ততো এৰেত্থ ভগৰতা লহুতাদীনং ৰিয দুৰিধতা ৰুত্তা. তথা সমাহিতাকারং সল্লক্খেত্ৰা গয্হমানো সমথোৰ সমথনিমিত্তং, তস্স আরম্মণভূতং পটিভাগনিমিত্তম্পি. ৰিৰিধং অগ্গং এতস্সাতি ব্যগ্গো, ৰিক্খেপো. তথা হি সো অনৰট্ঠানরসো ভন্ততাপচ্চুপট্ঠানো ৰুত্তো. একগ্গভাৰতো ব্যগ্গপটিপক্খোতি অব্যগ্গো, সমাধি, সো এৰ নিমিত্তন্তি পুব্বে ৰিয ৰত্তব্বং. তেনাহ ‘‘তস্সেৰ ৰেৰচন’’ন্তি.

যো আরম্মণে ইট্ঠানিট্ঠাকারং অনাদিযিত্ৰা গহেতব্বো মজ্ঝত্তাকারো, যো চ পুব্বে উপেক্খাসম্বোজ্ঝঙ্গস্স ভাৰনাৰসেন উপ্পন্নো মজ্ঝত্তাকারো, দুৰিধোপি সো উপেক্খায আরম্মণধম্মোতি অধিপ্পেতোতি আহ – ‘‘অত্থতো পন মজ্ঝত্তাকারো উপেক্খাট্ঠানীযা ধম্মাতি ৰেদিতব্বো’’তি. আরম্মণেন কথিতা আরম্মণস্সেৰ তেসং ৰিসেসপচ্চযভাৰতো. সেসাতি ৰীরিযাদযো চত্তারো ধম্মা. তেসঞ্হি উপনিস্সযোৰ সাতিসযো ইচ্ছিতব্বোতি.

কাযসুত্তৰণ্ণনা নিট্ঠিতা.

৩. সীলসুত্তৰণ্ণনা

১৮৪. খীণাসৰস্স লোকুত্তরং সীলং নাম মগ্গফলপরিযাপন্না সম্মাৰাচাকম্মন্তাজীৰা সীললক্খণপ্পত্তা তদঞ্ঞে চেতনাদযো. লোকিযং পন কিরিযাব্যাকতচিত্তপরিযাপন্নং চারিত্তসীলং, ৰারিত্তসীলস্স পন সম্ভৰো এৰ নত্থি ৰিরমণৰসেন পৰত্তিযা অভাৰতো. ‘‘পুব্বভাগসীলং লোকিযসীল’’ন্তি কেচি.

চক্খুদস্সনন্তি চক্খূহি দস্সনং. লক্খণস্স দস্সনন্তি সভাৰধম্মানং সঙ্খতানং পচ্চত্তলক্খণস্স ঞাতপরিঞ্ঞায, অনিচ্চাদিসামঞ্ঞলক্খণস্স তীরণপরিঞ্ঞায দস্সনং. পজহন্তোপি হি তে পহাতব্বাকারতো পস্সতি নাম. নিব্বানস্স তথলক্খণং মগ্গফলেহি দস্সনং, তং পন পটিৰিজ্ঝনং. ঝানেন পথৰীকসিণাদীনং, অভিঞ্ঞাহি রূপানং দস্সনম্পি ঞাণদস্সনমেৰ. চক্খুদস্সনং অধিপ্পেতং সৰনপযিরুপাসনানং পরতো গহিতত্তা. পঞ্হপযিরুপাসনন্তি পঞ্হপুচ্ছনৰসেন পযিরুপাসনং অঞ্ঞকম্মত্থায উপসঙ্কমনস্স কেৰলং উপসঙ্কমনেনেৰ জোতিতত্তা.

অরিযানং অনুস্সতি নাম গুণৰসেন, তত্থাপি লদ্ধওৰাদাৰজ্জনমুখেন যথাভূতসীলাদিগুণানুস্সরণন্তি দস্সেতুং ‘‘ঝানৰিপস্সনা’’তিআদি ৰুত্তং. অঞ্ঞেসংযেৰ সন্তিকেতি অরিযেহি অঞ্ঞেসং সাসনিকানংযেৰ সন্তিকে. তেনাহ – ‘‘অনুপব্বজ্জা নামা’’তি. অঞ্ঞেসূতি সাসনিকেহি অঞ্ঞেসু তাপসপরিব্বাজকাদীসু. তত্থ হি পব্বজ্জা অরিযানং অনুপব্বজ্জা নাম ন হোতীতি ৰুত্তং.

সতসহস্সমত্তা অহেসুং সমন্তপাসাদিকত্তা মহাথেরস্স. লঙ্কাদীপেতি নিস্সযসীসেন নিস্সিতসল্লক্খণং. ন হি পব্বজ্জা দীপপটিলদ্ধা, অথ খো দীপনিৰাসিআচরিযপটিলদ্ধা. মহিন্দ…পে… পব্বজন্তি নাম তস্স পরিৰারতায পব্বজ্জাযাতি.

সরতীতি তং ওৰাদানুসাসনিধম্মং চিন্তেতি চিত্তে করোতি. ৰিতক্কাহতং করোতীতি পুনপ্পুনং পরিৰিতক্কনেন তদত্থং ৰিতক্কনিপ্ফাদিতং করোতি. আরদ্ধো হোতীতি সম্পাদিতো হোতি. তং পন সম্পাদনং পারিপূরি এৰাতি আহ ‘‘পরিপুণ্ণো হোতী’’তি. তত্থাতি যথাৰুত্তে ধম্মে. ঞাণচারৰসেনাতি ঞাণস্স পৰত্তনৰসেন. তেসং তেসং ধম্মানন্তি তস্মিং তস্মিং ওৰাদধম্মে আগতানং রূপারূপধম্মানং. লক্খণন্তি ৰিসেসলক্খণং সামঞ্ঞলক্খণঞ্চ. পৰিচিনতীতি ‘‘ইদং রূপং এত্তকং রূপ’’ন্তিআদিনা ৰিচযং আপজ্জতি. ঞাণঞ্চ রোপেতীতি ‘‘অনিচ্চং চলং পলোকং পভঙ্গূ’’তিআদিনা ঞাণং পৰত্তেতি. ৰীমংসনং…পে… আপজ্জতীতি রূপসত্তকারূপসত্তকক্কমেন ৰিপস্সনং পচ্চক্খতো ৰিয অনিচ্চতাদীনং দস্সনং সম্মসনং আপজ্জতি.

উভযম্পেতন্তি ফলানিসংসাতি ৰুত্তদ্ৰযং. অত্থতো একং পরিযাযসদ্দত্তা. পটিকচ্চাতি পগেৰ. মরণকালেতি মরণকালসমীপে. সমীপত্থে হি ইদং ভুম্মন্তি আহ ‘‘মরণস্স আসন্নকালে’’তি.

সো তিৰিধো হোতি ঞাণস্স তিক্খমজ্ঝমুদুভাৰেন. তেনাহ ‘‘কপ্পসহস্সাযুকেসূ’’তিআদি. উপহচ্চপরিনিব্বাযী নাম আযুৰেমজ্ঝং অতিক্কমিত্ৰা পরিনিব্বাযনতো. যত্থ কত্থচীতি অৰিহাদীসু যত্থ কত্থচি. সপ্পযোগেনাতি ৰিপস্সনাঞাণসঙ্খারসঙ্খাতেন পযোগেন, সহ ৰিপস্সনাপযোগেনাতি অত্থো. সুদ্ধাৰাসভূমিযং উদ্ধংযেৰ মগ্গসোতো এতস্সাতি উদ্ধংসোতো. পটিসন্ধিৰসেন অকনিট্ঠভৰং গচ্ছতীতি অকনিট্ঠগামী.

অৰিহাদীসু ৰত্তমানোপি একংসতো উদ্ধংগমনারহো পুগ্গলো অকনিট্ঠগামী এৰ নামাতি ৰুত্তং ‘‘একো উদ্ধংসোতো অকনিট্ঠগামীতি পঞ্চ হোন্তী’’তি. তেসন্তি নিদ্ধারণে সামিৰচনং. উদ্ধংসোতভাৰতো যদিপি হেট্ঠিমাদীসুপি অরিযভূমি নিব্বত্ততেৰ, তথাপি তত্থ ভূমীসু আযুং অগ্গহেত্ৰা অকনিট্ঠভৰে আযুৰসেনেৰ সোল়সকপ্পসহস্সাযুকতা দট্ঠব্বা. ‘‘সত্ত ফলা সত্তানিসংসা পাটিকঙ্খা’’তি ৰুত্তত্তা ‘‘অরহত্তমগ্গস্স পুব্বভাগৰিপস্সনা বোজ্ঝঙ্গা কথিতা’’তি ৰুত্তং. সত্তন্নম্পি সহভাৰো লব্ভতীতি ‘‘অপুব্বং অচরিমং একচিত্তক্খণিকা’’তি ৰুত্তং. তযিদং পাল়িযং তত্থ তত্থ ‘‘তস্মিং সমযে’’তি আগতৰচনেন ৰিঞ্ঞাযতি, বোজ্ঝঙ্গানং পন নানাসভাৰত্তা ‘‘নানালক্খণা’’তি ৰুত্তং.

সীলসুত্তৰণ্ণনা নিট্ঠিতা.

৪. ৰত্থসুত্তৰণ্ণনা

১৮৫. ‘‘সতিসম্বোজ্ঝঙ্গো’’তি এৰং চে ময্হং হোতীতি সতিসম্বোজ্ঝঙ্গো নাম সেট্ঠো উত্তমো পৰরো, তস্মাহং সতিসম্বোজ্ঝঙ্গসীসেন ফলসমাপত্তিং অপ্পেত্ৰা ৰিহরিস্সামীতি এৰং চে ময্হং পুব্বভাগে হোতীতি অত্থো. ‘‘অপ্পমাণো’’তি এৰং ময্হং হোতীতি স্ৰাযং সতিসম্বোজ্ঝঙ্গো, সব্বসো পমাণকরকিলেসাভাৰতো অপ্পমাণধম্মারম্মণতো চ অপ্পমাণোতি এৰং ময্হং অন্তোসমাপত্তিযং অসম্মোহৰসেন হোতি. সুপরিপুণ্ণোতি ভাৰনাপারিপূরিযা সুট্ঠু পরিপুণ্ণোতি এৰং ময্হং অন্তোসমাপত্তিযং অসম্মোহৰসেন হোতীতি. তিট্ঠতীতি যথাকালপরিচ্ছেদসমাপত্তিযা অৰট্ঠানেন তপ্পরিযাপন্নতায সতিসম্বোজ্ঝঙ্গো তিট্ঠতি পটিবন্ধৰসেন. উপ্পাদং অনাৰজ্জিতত্তাতি উপ্পাদস্স অনাৰজ্জনেন অসমন্নাহারেন. উপ্পাদসীসেন চেত্থ উপ্পাদৰন্তোৰ সঙ্খারা গহিতা. অনুপ্পাদন্তি নিব্বানং উপ্পাদাভাৰতো উপ্পাদৰন্তেহি চ ৰিনিস্সটত্তা. পৰত্তন্তি ৰিপাকপ্পৰত্তং. অপ্পৰত্তন্তি নিব্বানং তপ্পটিক্খেপতো. নিমিত্তন্তি সব্বসঙ্খারনিমিত্তং. অনিমিত্তন্তি নিব্বানং. সঙ্খারেতি উপ্পাদাদিঅনামসনেন কেৰলমেৰ সঙ্খারগহণং. ৰিসঙ্খারন্তি নিব্বানং. আৰজ্জিতত্তা আৰজ্জিতকালতো পট্ঠায আরব্ভ পৰত্তিযা সতিসম্বোজ্ঝঙ্গো তিট্ঠতি. অট্ঠহাকারেহীতি অট্ঠহি কারণেহি. জানাতীতি সমাপত্তিতো ৰুট্ঠিতকালে পজানাতি. অট্ঠহাকারেহীতি উপ্পাদাৰজ্জনাদীহি চেৰ অনুপ্পাদাৰজ্জনাদীহি চ ৰুত্তাকারৰিপরীতেহি অট্ঠহি আকারেহি চৰন্তং সমাপত্তিৰসেন অনৰট্ঠানতোপি গচ্ছন্তং চৰতীতি থেরো পজানাতীতি.

ফলবোজ্ঝঙ্গাতি ফলসমাপত্তিপরিযাপন্না বোজ্ঝঙ্গা. কিং পন তে ৰিসুং ৰিসুং পৰত্তন্তীতি আহ ‘‘যদা হী’’তিআদি. সীসং কত্ৰাতি পধানং সেট্ঠং কত্ৰা. তদন্ৰযাতি তদনুগতা সতিসম্বোজ্ঝঙ্গং অনুগচ্ছনকা. তঞ্চ খো তথা কত্ৰা ধম্মং পচ্চৰেক্খণৰসেন. কেচি পন ‘‘তং পচ্চৰেক্খণাদিকং কত্ৰা’’তি ৰদন্তি.

ৰত্থসুত্তৰণ্ণনা নিট্ঠিতা.

৫. ভিক্খুসুত্তৰণ্ণনা

১৮৬. বোধাযাতি এত্থ বোধো নাম বুজ্ঝনং, তং পন কিস্স কেনাতি পুচ্ছন্তো ‘‘কিং বুজ্ঝনত্থাযা’’তি ৰত্ৰা তং দস্সেন্তো ‘‘মগ্গেনা’’তিআদিমাহ. মগ্গেন নিব্বানং বুজ্ঝনত্থায সংৰত্তন্তি, পচ্চৰেক্খণায কতকিচ্চতং বুজ্ঝনত্থায সংৰত্তন্তি, পঠমৰিকপ্পে সচ্ছিকিরিযাভিসমযো এৰ দস্সিতোতি তেন অতুট্ঠে ‘‘মগ্গেন ৰা’’তি দুতিযৰিকপ্পমাহ. ৰিৰেকনিস্সিতং ৰিরাগনিস্সিতন্তি পদেহি সব্বং মগ্গকিচ্চং তস্স ফলঞ্চ দস্সিতং. নিরোধনিস্সিতন্তি ইমিনা নিব্বানসচ্ছিকিরিযা. কামাসৰাপি চিত্তং ৰিমুচ্চতীতিআদিনা কিলেসপ্পহানং. ৰিমুত্তস্মিং ৰিমুত্তমিতি ঞাণং হোতীতিআদিনা পচ্চৰেক্খণা দস্সিতা.

ভিক্খুসুত্তৰণ্ণনা নিট্ঠিতা.

৬-৭. কুণ্ডলিযসুত্তাদিৰণ্ণনা

১৮৭-১৮৮. নিবদ্ধৰাসৰসেন আরামে নিসীদনসীলোতি আরামনিসাদী. পরিসং ওগাল়্হো হুত্ৰা চরতীতি পরিসাৰচরোতি আহ – ‘‘যো পনা’’তিআদি. এৰন্তি ইমিনাকারেন. গহণন্তি নিগ্গহণং. তেন পুচ্ছাপদস্স অত্থং ৰিৰরতি. নিব্বেঠনন্তি নিগ্গহনিব্বেঠনং. তেন ৰিস্সজ্জনপদস্স অত্থং ৰিৰরতি. ইমিনা নযেনাতি এতেন ‘‘ইতিৰাদো’’তি এত্থ ইতি-সদ্দস্স অত্থং দস্সেতি. উপারম্ভাধিপ্পাযো ৰদতি এতেনাতি ৰাদো, দোসো. ইতিৰাদো হোতীতি এৰং ইমস্স উপরি ৰাদারোপনং হোতি. ইতিৰাদপ্পমোক্খোতি এৰং ততো পমোক্খো হোতি. এৰং ৰাদপ্পমোক্খানিসংসং পরেহি আরোপিতদোসস্স নিব্বেঠনৰসেন দস্সেত্ৰা ইদানি দোসপৰেদনৰসেন দস্সেতুং ‘‘অযং পুচ্ছায দোসো’’তিআদি ৰুত্তং.

এত্তকং ঠানন্তিআদিতো পট্ঠায যাৰ ‘‘তীণি সুচরিতানী’’তি এত্তকং ঠানং. ইমং দেসনন্তি ‘‘ইন্দ্রিযসংৰরো খো’’তিআদিনযপ্পৰত্তং ইমং দেসনং. নাভিজ্ঝাযতীতি ন অভিজ্ঝাযতি. নাভিহংসতীতি ন অভিতুস্সতি. গোচরজ্ঝত্তে ঠিতং হোতীতি কম্মট্ঠানারম্মণে সমাধানৰসেন ঠিতং হোতি অৰট্ঠিতং. তেনাহ ‘‘সুসণ্ঠিত’’ন্তি. সুসণ্ঠিতন্তি সম্মা অৰিক্খেপৰসেন ঠিতং. কম্মট্ঠানৰিমুত্তিযাতি কম্মট্ঠানানুযুঞ্জনৰসেন পটিপক্খতো নীৰরণতো ৰিমুত্তিযা. সুট্ঠু ৰিমুত্তন্তি সুৰিমুত্তং. তস্মিং অমনাপরূপদস্সনে ন মঙ্কু ৰিলক্খো ন হোতি. কিলেসৰসেন দোসৰসেন. অট্ঠিতচিত্তো অথদ্ধচিত্তো. কোৰেসেন হি চিত্তং থদ্ধং হোতি, ন মুদুকং. অদীনমানসোতি দোমনস্সৰসেন যো দীনভাৰো, তদভাৰেন নিদ্দোসমানসো. অপূতিচিত্তোতি ব্যাপজ্জাভাৰেন সীতিভূতচিত্তো.

ইমেসু ছসু দ্ৰারেসু অট্ঠারস দুচ্চরিতানি হোন্তি পচ্চেকং কাযৰচীমনোদুচ্চরিতভেদেন. তানি ৰিভাগেন দস্সেতুং ‘‘কথ’’ন্তিআদি ৰুত্তং. তত্থ ইট্ঠারম্মণে আপাথগতেতি নযদানমত্তমেতং. তেন ‘‘অনিট্ঠারম্মণে আপাথগতে দোসং উপ্পাদেন্তস্সা’’তিআদিনা তিৰিধদুচ্চরিতং নীহরিত্ৰা ৰত্তব্বং, তথা ‘‘মজ্ঝত্তারম্মণে মোহং উপ্পাদেন্তস্সা’’তিআদিনা চ. মনোদুচ্চরিতাদিসামঞ্ঞেন পন তীণিযেৰ দুচ্চরিতানি হোন্তীতি ৰেদিতব্বং.

পঞ্ঞত্তিৰসেনাতি ৰত্থুং অনামসিত্ৰা পিণ্ডগহণমুখেন কেৰলং পঞ্ঞত্তিৰসেনেৰ. ভাৰনাপটিসঙ্খানেতি ভাৰনাসিদ্ধে পটিসঙ্খানে, ভাৰনায পটিসঙ্খানে ৰাতি অত্থো. ইমানীতি যথাৰুত্তানি ছদ্ৰারারম্মণানি. দুচ্চরিতানীতি দুচ্চরিতকারণানি. অপ্পটিসঙ্খানে ঠিতস্স দুচ্চরিতানি সুচরিতানি কত্ৰা. পরিণামেতীতি পরিৰত্তেতি দুচ্চরিতানি তত্থ অনুপ্পাদেত্ৰা সুচরিতানি উপ্পাদেন্তো. এৰন্তি ৰুত্তপ্পকারেন. ইন্দ্রিযসংৰরো…পে… ৰেদিতব্বো ইন্দ্রিযসংৰরসম্পাদনৰসেন তিণ্ণং সুচরিতানং সিজ্ঝনতো. তেনাহ ‘‘এত্তাৰতা’’তিআদি. এত্তাৰতাতি আদিতো পট্ঠায যাৰ ‘‘তীণি সুচরিতানি পরিপূরেন্তী’’তি পদং, এত্তাৰতা. সীলানুরক্খকং ইন্দ্রিযসংৰরসীলন্তি চতুপারিসুদ্ধিসীলস্স অনুরক্খকং ইন্দ্রিযসংৰরসীলং কথিকং. কথং পন তদেৰ তস্স অনুরক্খকং হোতীতি? অপরাপরুপ্পত্তিযা উপনিস্সযভাৰতো.

তীণি সীলানীতি ইন্দ্রিযসংৰর-আজীৰপারিসুদ্ধি-পচ্চযসন্নিস্সিত-সীলানি. লোকুত্তরমিস্সকাতি লোকিযাপি লোকুত্তরাপি হোন্তীতি অত্থো. সত্তন্নং বোজ্ঝঙ্গানন্তি লোকুত্তরানং সত্তন্নং বোজ্ঝঙ্গানং. মূলভূতা সতিপট্ঠানা পুব্বভাগা, তে সন্ধায ৰুত্তং ‘‘চত্তারো খো, কুণ্ডলিয, সতিপট্ঠানা ভাৰিতা বহুলীকতা সত্ত বোজ্ঝঙ্গে পরিপূরেন্তী’’তি. তেপীতি যথাৰুত্তসতিপট্ঠানা. সতিপট্ঠানমূলকা বোজ্ঝঙ্গাতি লোকিযসতিপট্ঠানমূলকা বোজ্ঝঙ্গাৰ. পুব্বভাগাৰাতি এত্থ কেচি ‘‘পুব্বভাগা চা’’তি পাঠং কত্ৰা ‘‘পুব্বেৰ লোকুত্তরা পুব্বভাগা চা’’তি অত্থং ৰদন্তি. ৰিজ্জাৰিমুত্তিমূলকাতি ‘‘সত্ত খো, কুণ্ডলিয, বোজ্ঝঙ্গা ভাৰিতা বহুলীকতা ৰিজ্জাৰিমুত্তিং পরিপূরেন্তী’’তি এৰং ৰুত্তা বোজ্ঝঙ্গা লোকুত্তরাৰ ৰিজ্জাৰিমুত্তিসহগতভাৰতো.

কুণ্ডলিযসুত্তাদিৰণ্ণনা নিট্ঠিতা.

৮. উপৰানসুত্তৰণ্ণনা

১৮৯. পচ্চত্তন্তি করণনিদ্দেসো অযন্তি আহ – ‘‘অত্তনাৰা’’তি. কুরুমানোযেৰাতি উপ্পাদেন্তো এৰ. কম্মট্ঠানৰিমুত্তিযা সুট্ঠু ৰিমুত্তন্তি কম্মট্ঠানমনসিকারেন নীৰরণানং দূরীভাৰতো তেহি সুট্ঠু ৰিমুত্তং. অত্থং করিত্ৰাতি ভাৰনামনসিকারং উত্তমং কত্ৰা. ‘‘মহা ৰত মে অযং অত্থো উপ্পন্নো’’তি অত্থিকো হুত্ৰা.

৯. পঠমউপ্পন্নসুত্তৰণ্ণনা

১৯০. তথাগতস্স পাতুভাৰাতিআদিনা বুদ্ধুপ্পাদকালে এৰ বোজ্ঝঙ্গরতনপটিলাভোতি দস্সেতি.

পব্বতৰগ্গৰণ্ণনা নিট্ঠিতা.

২. গিলানৰগ্গো

১-৩. পাণসুত্তাদিৰণ্ণনা

১৯২-১৯৪. যেসন্তি যেসং সত্তানং. চত্তারো ইরিযাপথা অত্থি লব্ভন্তি তদুপগসরীরাৰযৰলাভেন. এতন্তি ‘‘চত্তারো ইরিযাপথে কপ্পেন্তী’’তি এতং ৰচনং. ‘‘ৰিৰেকনিস্সিত’’ন্তিআদিৰচনতো ‘‘সহৰিপস্সনকে মগ্গবোজ্ঝঙ্গে’’ইচ্চেৰ ৰুত্তং. দুতিযততিযানি উত্তানত্থানেৰ হেট্ঠা ৰুত্তনযত্তা.

৪-১০. পঠমগিলানসুত্তাদিৰণ্ণনা

১৯৫-২০১. ৰিসুদ্ধং অহোসি ৰিসভাগধাতুক্খোভং ৰূপসমেন্তং. তেনাহ – ‘‘পোক্খরপত্তে …পে… ৰিনিৰত্তিত্ৰা গতো’’তি. এসেৰ নযো পাল়িতো অত্থতো চ চতুত্থেন পঞ্চমছট্ঠানং সমানত্তা. ৰিসরুক্খৰাতসম্ফস্সেনাতি ৰিসরুক্খসন্নিস্সিতৰাতসম্ফস্সেন. মন্দসীতজরোতি মুদুকো সীতজরো. সেসন্তি ৰুত্তাৰসেসং. সব্বত্থাতি সত্তমাদীসু চতূসু.

গিলানৰগ্গৰণ্ণনা নিট্ঠিতা.

৩. উদাযিৰগ্গো

১-২. বোধাযসুত্তাদিৰণ্ণনা

২০২-২০৩. কিত্তকেন নু খো কারণেন বুজ্ঝনকঅঙ্গা নাম ৰুচ্চন্তি বুজ্ঝনকস্স পুগ্গলস্স অঙ্গাতি ৰত্তব্বতং লভন্তি. মিস্সকবোজ্ঝঙ্গা কথিতা সহৰিপস্সনা মগ্গবোজ্ঝঙ্গা কথিতাতি কত্ৰা. ধম্মপরিচ্ছেদো কথিতো গণনামত্তেন পরিচ্ছিন্দিত্ৰা ৰুত্তত্তা ন ভূমন্তরপরিচ্ছেদো, ৰিপস্সনাদিপরিচ্ছেদো ৰা.

৩-৫. ঠানিযসুত্তাদিৰণ্ণনা

২০৪-২০৬. কামরাগেন গধিতব্বট্ঠানভূতা কামরাগট্ঠানিযাতি আহ ‘‘আরম্মণধম্মান’’ন্তি. ‘‘মনসিকারবহুলীকারা’’তি ৰুত্তত্তা ‘‘আরম্মণেনেৰ কথিত’’ন্তি ৰুত্তং. ৰুত্তপরিচ্ছেদোতি এতেন ন কেৰলং আরম্মণৰসেনেৰ, অথ খো উপনিস্সযৰসেনপেত্থ অত্থো লব্ভতীতি দস্সেতি. পঠমৰগ্গস্স হি দুতিযে সুত্তে উপনিস্সযৰসেনেৰ অত্থো দস্সিতো. মিস্সকবোজ্ঝঙ্গা কথিতা অৰিভাগেনেৰ কথিতত্তা. অপরিহানিযেতি তীহি সিক্খাহি অপরিহানাৰহে.

৬-৭. তণ্হক্খযসুত্তাদিৰণ্ণনা

২০৭-২০৮. ‘‘সো মং পুচ্ছিস্সতী’’তি অধিপ্পাযেন ভগৰতা ওসাপিতদেসনং. পত্থটত্তা ভাৰনাপারিপূরিযা ৰিত্থারিতং গতত্তা. মহন্তভাৰন্তি ভাৰনাৰসেনেৰ মহত্তং গতত্তা. ততো এৰ ৰড্ঢিপ্পমাণা. নীৰরণৰিগমে সম্ভৰতো পচ্চযতো ব্যাপাদো ৰিগতো হোতীতি আহ – ‘‘নীৰরণানং দূরীভাৰেন ব্যাপাদৰিরহিতত্তা’’তি. তণ্হামূলকন্তি তণ্হাপচ্চযং. যঞ্হি তণ্হাসহগতং অসহগতম্পি তণ্হং উপনিস্সায নিপ্ফন্নং, সব্বং তং তণ্হামূলকং. পহীযতি অনুপ্পাদপ্পহানেন. তণ্হাদীনংযেৰ খযা, ন তেসং সঙ্খারানং খযা. এতেহি তণ্হক্খযাদিপদেহি.

৮. নিব্বেধভাগিযসুত্তৰণ্ণনা

২০৯. নিব্বিজ্ঝন্তীতি নিব্বেধা, নিব্বিজ্ঝনধম্মা ধম্মৰিনযাদযো, তপ্পরিযাপন্নতায নিব্বেধভাগে গতো নিব্বেধভাগিযো, তং নিব্বেধভাগিযং. তেনাহ ‘‘নিব্বিজ্ঝনকোট্ঠাসিয’’ন্তি. ভাৰেত্ৰা ঠিতেন চিত্তেন. ৰিপস্সনামগ্গম্পি গহেত্ৰা ‘‘মগ্গবোজ্ঝঙ্গা মিস্সকা’’তি ৰুত্তা. তেহীতি বোজ্ঝঙ্গেহি ভাৰিতং চিত্তং. তে ৰা বোজ্ঝঙ্গে ভাৰেত্ৰা ঠিতং চিত্তং নাম ফলচিত্তং, তস্মা নিব্বত্তিতলোকুত্তরমেৰ. তম্পীতি ফলচিত্তম্পি মগ্গানন্তরতায মগ্গনিস্সিতং কত্ৰা মিস্সকমেৰ কথেতুং ৰট্টতি ‘‘বোধায সংৰত্তন্তী’’তি ৰুত্তত্তা.

৯. একধম্মসুত্তৰণ্ণনা

২১০. সংযোজনসঙ্খাতা ৰিনিবন্ধাতি কামরাগাদিসংযোজনসঞ্ঞিতা বন্ধনা. পরিনিট্ঠপেত্ৰা গহণাতি গিলিত্ৰা ৰিয পরিনিট্ঠপেত্ৰা গহণাকারা.

১০. উদাযিসুত্তৰণ্ণনা

২১১. বহুকতং ৰুচ্চতি বহুকারো বহুমানো, নত্থি এতস্স বহুকতন্তি অবহুকতো, অকতবহুমানো. ধম্মো উপ্পজ্জমানো উক্কুজ্জন্তো ৰিয নিরুজ্ঝমানো অৰকুজ্জন্তো ৰিয হোতীতি ৰুত্তং ‘‘উক্কুজ্জং ৰুচ্চতি উদযো, অৰকুজ্জং ৰযো’’তি. পরিৰত্তেন্তোতি অনিচ্চাতিপি দুক্খাতিপি অনত্তাতিপি. ‘‘এসো হি তে উদাযি মগ্গো পটিলদ্ধো, যো তে…পে… তথত্তায উপনেস্সতী’’তি পরিযোসানে ভগৰতো ৰচনঞ্চেত্থ সাধকং দট্ঠব্বং. তেন তেনাকারেন ৰিহরন্তন্তি যেন সম্মসনাকারেন ৰিপস্সনাৰিহারেন ৰিহরন্তং. তথাভাৰাযাতি খীণাসৰভাৰপচ্চৰেক্খণায. তেনাহ – ‘‘খীণা জাতীতি…পে… তং দস্সেন্তো এৰমাহা’’তি.

উদাযিৰগ্গৰণ্ণনা নিট্ঠিতা.

৪. নীৰরণৰগ্গো

৩-৪. উপক্কিলেসসুত্তাদিৰণ্ণনা

২১৪-২১৫. ন চ পভাৰন্তন্তি ন চ পভাসম্পন্নং. পভিজ্জনসভাৰন্তি তাপেত্ৰা তালনে পভঙ্গুতং. অৰসেসং লোহন্তি ৰুত্তাৰসেসং জাতিলোহং, ৰিজাতিলোহং, কিত্তিমলোহন্তি পভেদং সব্বম্পি লোহং. উপ্পজ্জিতুং অপ্পদানেনাতি এত্থ ননু লোকিযকুসলচিত্তস্সপি সুৰিসুদ্ধস্স উপ্পজ্জিতুং অপ্পদানেন উপক্কিলেসতাতি? সচ্চমেতং, যস্মিং পন সন্তানে নীৰরণানি লদ্ধপতিট্ঠানি, তত্থ মহগ্গতকুসলস্সপি অসম্ভৰো, পগেৰ লোকুত্তরকুসলস্স, পরিত্তকুসলং পন যথাপচ্চযং উপ্পজ্জতি. নীৰরণে হি ৰূপসন্তে সন্তানে উপ্পত্তিযা অপরিসুদ্ধং হোতি, উপক্কিলিট্ঠং নাম হোতি, অপরিসুদ্ধদীপকপল্লিকৰট্ঠিতেলাদিসন্নিস্সযো দীপো ৰিয, অপিচ নিপ্পরিযাযতো উপ্পজ্জিতুং অপ্পদানেনেৰ তেসং উপক্কিলেসতাতি দস্সেন্তো ‘‘যদগ্গেন হী’’তিআদিমাহ. আরম্মণে ৰিক্খিত্তপ্পত্তিৰসেন চুণ্ণৰিচুণ্ণতা ৰেদিতব্বা. ন আৰরন্তীতি কুসলধম্মে উপ্পজ্জিতুং অপ্পদানৰসেন ন আৰরন্তি, অথ খো তেসং উপ্পত্তিযা হোন্তি. ন পটিচ্ছাদেন্তীতি ন ৰিনন্ধন্তি. চতুভূমকচিত্তস্সাতি চতুত্থভূমককুসলচিত্তস্স অনুপক্কিলেসা, তেহি অকিলিস্সনতো.

৮. আৰরণনীৰরণসুত্তৰণ্ণনা

২১৯. পঞ্ঞা দুব্বলা হোতি, ন বলৰতী পটিপক্খেন উপক্কিলিট্ঠভাৰতো. তেনাহ ‘‘মন্দা অৰিসদা’’তি.

পঞ্চ নীৰরণা দূরে হোন্তি আৰরণাভাৰতো. তমেৰ পীতিন্তি সপ্পাযধম্মসৰনে উপ্পন্নং পীতিং. তস্সা তদা উপ্পন্নাকারসল্লক্খণেন অৰিজহন্তো পুনপ্পুনং তস্সা নিব্বত্তনেন. তেনাহ ‘‘পঞ্চ নীৰরণে ৰিক্খম্ভেত্ৰা’’তি. ইদং সন্ধাযাতি এত্তকে দিৰসেপি ন ৰিনস্সন্তি, সা ধম্মপীতি লদ্ধপচ্চযা হুত্ৰা ৰিসেসাৰহাতি ইমমত্থং সন্ধায এতং ‘‘ইমস্স পঞ্চ নীৰরণা তস্মিং সমযে ন হোন্তী’’তিআদি ৰুত্তং. পীতিপামোজ্জপক্খিযাতি পীতিপামোজ্জপচ্চযা. নস্সন্তীতি নিরোধপচ্চযৰসেন পৰত্তনতো নস্সন্তি. সভাগপচ্চযৰসেন পুন উপ্পজ্জন্তাপি…পে… ৰুচ্চতি কিচ্চসাধনৰসেন পৰত্তনতো.

৯. রুক্খসুত্তৰণ্ণনা

২২০. অভিরুহনকাতি সমীপরুক্খে অভিভৰিত্ৰা রুহনকা. অট্ঠিকচ্ছকোতি অট্ঠিবহুলকচ্ছকো. কপিথনসদিসফলত্তা কপিত্থনোতি লদ্ধনামো.

১০. নীৰরণসুত্তৰণ্ণনা

২২১. অন্ধভাৰকরণা পঞ্ঞাচক্খুস্স ৰিবন্ধনতো. তথা হি তে ‘‘অচক্খুকরণা পঞ্ঞানিরোধিকা’’তি ৰুত্তা. ৰিহনতি ৰিবাধতীতি ৰিঘাতো, দুক্খন্তি আহ ‘‘ৰিঘাতপক্খিযাতি দুক্খপক্খিকা’’তি. নিব্বানত্থায ন সংৰত্তন্তীতি অনিব্বানসংৰত্তনিকা. মিস্সকবোজ্ঝঙ্গাৰ কথিতা পুব্বভাগিকানং কথিতত্তা.

নীৰরণৰগ্গৰণ্ণনা নিট্ঠিতা.

৫. চক্কৰত্তিৰগ্গো

১. ৰিধাসুত্তৰণ্ণনা

২২২. ৰিধীযন্তীতি ৰিধা, মানাদিভাগা কোট্ঠাসাতি আহ ‘‘তযো মানকোট্ঠাসা’’তি. তথা তথা ৰিদহনতোতি ‘‘সেয্যোহমস্মী’’তিআদিনা তেন তেনাকারেন ৰিদহনতো ঠপনতো, ঠপেতব্বতো ৰা.

২. চক্কৰত্তিসুত্তৰণ্ণনা

২২৩. সিরিসম্পত্তিযা রাজতি দিপ্পতি সোভতীতি রাজা, দানপিযৰচনঅত্থচরিযাসমানত্ততাসঙ্খাতেহি চতূহি সঙ্গহৰত্থূহি. রঞ্জেতীতি রমেতি. অব্ভুগ্গতাযাতি উদীরিতা নিব্বত্তিতো তত্থ তত্থ গচ্ছনতো. চক্কং ৰত্তেতীতি চক্করতনং পৰত্তেতি. দেৰট্ঠানন্তি পূজনীযদেৰট্ঠানং. চিত্তীকতট্ঠেনাতি পূজনীযভাৰেন. অগ্ঘো নত্থি চিরকালসম্ভৰপুঞ্ঞানুভাৰসিদ্ধরতনসব্ভাৰতো. অঞ্ঞেহি চক্কৰত্তিনো পরিগ্গহভূতরতনেহি. লোকেতি মনুস্সলোকে. তেন তদঞ্ঞলোকং নিৰত্তেতি. ৰিজ্জমানগ্গহণেন অতীতানাগতং নিৰত্তেতি. বুদ্ধা চ কদাচি করহচি উপ্পজ্জন্তি চক্কৰত্তিনোপি যেভুয্যেন তস্মিংযেৰ উপ্পজ্জনতোতি অধিপ্পাযো. অনোমস্সাতি অলামকস্স উক্কট্ঠস্স. সেসানি রতনানি.

তত্রাতি ৰাক্যোপঞ্ঞাসনে নিপাতো, তস্মিং পাতুভাৰৰচনে. ‘‘অযুত্ত’’ন্তি ৰত্ৰা তত্থ অধিপ্পাযং ৰিৰরন্তো ‘‘উপ্পন্নং হী’’তিআদিমাহ. তেহি রতনেহি চক্কৰত্তননিযমাপেক্খতায চক্কৰত্তিৰচনস্স. নিযমেনাতি একন্তেন. ৰত্তব্বতং আপজ্জতি ভাৰিনি ভূতে ৰিয উপচারোতি যথা – ‘‘অগমা রাজগহং বুদ্ধো’’তি (সু. নি. ৪১০). লদ্ধনামস্সাতি চক্কৰত্তীতি লোকে লদ্ধসমঞ্ঞস্স পত্থনীযস্স পুরিসৰিসেসস্স. মূলুপ্পত্তিৰচনতোপীতি ‘‘চক্কৰত্তিস্স পাতুভাৰা’’তি এতস্স পঠমুপ্পত্তিযা ৰচনতোপি. ইদানি তমত্থং ৰিৰরন্তো ‘‘যো হী’’তিআদিমাহ. যো হি চক্কৰত্তিরাজা, তস্স উপ্পত্তিযা চক্করতনস্স উপ্পজ্জনতো চক্কৰত্তীতি এৰং নামং উপ্পজ্জতি. ‘‘চক্কং ৰত্তেস্সতী’’তি ইদং পন নিযামং অনপেক্খিত্ৰা তস্স উপ্পজ্জতীতি রতনানুপ্পত্তিং গহেত্ৰা ৰুত্তনযতো সঞ্ঞা উপ্পজ্জতি ‘‘চক্কৰত্তী’’তি. একমেৰাতি চক্করতনমেৰ পঠমং পাতুভৰতি. যস্মিং ভূতে রঞ্ঞো চক্কৰত্তিসমঞ্ঞা, অথ পচ্ছা রতনানি পাতুভৰন্তীতি বহূনং পাতুভাৰং উপাদায বহুলৰচনতোপি এতং ‘‘চক্কৰত্তিস্স পাতুভাৰা রতনানং পাতুভাৰো’’তি ৰুত্তং. অযং হেতুকত্তুসঞ্ঞিতো অত্থভেদো. পাতুভাৰাতি পাতুভাৰতো. পুঞ্ঞসম্ভারো ভিন্নসন্তানতায রতনানম্পি পরিযাযেন উপনিস্সযহেতূতি ৰুত্তং. যুত্তমেৰেতং যথাৰুত্তযুত্তিযুত্তত্তা.

ৰত্তব্বভূতো অধিপ্পাযো এতস্স অত্থীতি অধিপ্পাযো, অত্থনিদ্দেসো, সঙ্খেপতো অধিপ্পাযো সঙ্খেপাধিপ্পাযো. চক্করতনানুভাৰেন চক্কৰত্তিস্সরিযস্স সিজ্ঝনতো ‘‘দাতুং সমত্থস্সা’’তি ৰুত্তং. যোজনপ্পমাণে পদেসে পৰত্তত্তা যোজনপ্পমাণং অন্ধকারং. অতিদীঘাতিরস্সতাদিং ছব্বিধং দোসং ৰিৰজ্জেত্ৰা ঠিতস্সাতি ৰচনসেসো.

সব্বেসং চতুভূমকধম্মানং পুরেচরং কুসলানং ধম্মানং গতিযো সমন্ৰেসনৰসেন পৰত্তনতো. বুদ্ধাদীহিপি অপ্পহানীযতায মহন্তধম্মসভাৰত্তা ধম্মকাযে চ জেট্ঠকট্ঠেন ধম্মকাযূপপন্নং. পঞ্ঞাপাসাদতায চস্স উপরিগতট্ঠেন অচ্চুগ্গতং. ৰিত্থতট্ঠেন ৰিপুলং. মহন্ততায মহন্তং. অনাদিকালভাৰিতস্স কিলেসসন্তানস্স খণেনেৰ ৰিদ্ধংসনতো সীঘং লহু জৰন্তি পরিযাযা. বোজ্ঝঙ্গধম্মপরিযাপন্নত্তা হি ৰুত্তং ‘‘একন্ত-কুসলত্তা’’তি. সম্পযুত্তৰসেন পীতিযা আলোকৰিদ্ধংসনভাৰৰসেনাতি ৰুত্তং ‘‘সহজাতপচ্চযাদী’’তিআদি. সব্বসঙ্গাহিকধম্মপরিচ্ছেদোতি চতুভূমকত্তা সব্বসঙ্গাহকো বোজ্ঝঙ্গধম্মপরিচ্ছেদো কথিতো.

৪-১০. দুপ্পঞ্ঞসুত্তাদিৰণ্ণনা

২২৫-২৩১. এল়ং ৰুচ্চতি দোসো, এল়েন মূগো ৰিযাতি এল়মূগোতি ইমমত্থং দস্সেন্তো ‘‘মুখেন ৰাচ’’ন্তিআদিমাহ.

চক্কৰত্তিৰগ্গৰণ্ণনা নিট্ঠিতা.

৬. সাকচ্ছৰগ্গো

১. আহারসুত্তৰণ্ণনা

২৩২. পুরিমনযতোতি ‘‘সতিসম্বোজ্ঝঙ্গট্ঠানীযানং ধম্মান’’ন্তিআদিনা আগতনযতো. এৰন্তি ইদানি ৰুচ্চমানাকারেন. সতি চ সম্পজঞ্ঞঞ্চ সতিসম্পজঞ্ঞং. সতিপধানং ৰা অভিক্কন্তাদীসু সত্থকভাৰপরিগ্গণ্হকঞাণং সতিসম্পজঞ্ঞং. তং সব্বত্থ সতোকারীভাৰাৰহত্তা সতিসম্বোজ্ঝঙ্গস্স উপ্পাদায সংৰত্ততি. যথা চ পচ্চনীকধম্মপ্পহানং অনুরূপধম্মদেসনা চ অনুপ্পন্নানং কুসলানং ধম্মানং উপ্পাদায হোতি, এৰং সতিরহিতপুগ্গলৰজ্জনা সতোকারীপুগ্গলসেৰনা চ তত্থ চ যুত্তপযুত্ততা সতিসম্বোজ্ঝঙ্গস্স উপ্পাদায হোতীতি ইমমত্থং দস্সেতি ‘‘সতিসম্পজঞ্ঞ’’ন্তিআদিনা. অরহত্তমগ্গেন ভাৰনাপারিপূরী হোতি. তথা হি অরহাৰ ‘‘সতিৰেপুল্লপ্পত্তো’’তি ৰুচ্চতি.

ধম্মানং, ধম্মেসু ৰা ৰিচযো, সো এৰ হেট্ঠা ৰুত্তনযেন সম্বোজ্ঝঙ্গো, তস্স ধম্মৰিচযসম্বোজ্ঝঙ্গস্স. পরিপুচ্ছকতাতি আচরিযং পযিরুপাসিত্ৰা পঞ্চপি নিকাযে সহট্ঠকথায পরিযোগাহেত্ৰা যং যং তত্থ গণ্ঠিট্ঠানং, তস্স তস্স ‘‘ইদং, ভন্তে, কথং ইমস্স কো অত্থো’’তি এৰং খন্ধাদীসু অত্থপুচ্ছকভাৰো. তেনাহ ‘‘খন্ধ…পে… বহুলতা’’তি.

ৰত্থুৰিসদকিরিযাতি চিত্তচেতসিকানং পৰত্তিট্ঠানভাৰতো সরীরং তপ্পটিবদ্ধানি চ চীৰরাদীনি ইধ ‘‘ৰত্থূনী’’তি অধিপ্পেতানি, তানি যথা চিত্তস্স সুখাৰহানি হোন্তি, তথা করণং তেসং ৰিসদভাৰকরণং. তেন ৰুত্তং ‘‘অজ্ঝত্তিকবাহিরান’’ন্তিআদি. উস্সন্নদোসন্তি ৰাতাদিউস্সন্নদোসং. সেদমলমক্খিতন্তি সেদেন চেৰ জল্লিকাসঙ্খাতেন সরীরমলেন চ মক্খিতং. চ-সদ্দেন অঞ্ঞম্পি সরীরস্স চ চিত্তস্স চ পীল়াৰহং সঙ্গণ্হাতি. সেনাসনং ৰাতি ৰা-সদ্দেন পত্তাদীনং সঙ্গহো দট্ঠব্বো. অৰিসদে সতি, ৰিসযভূতে ৰা. কথং ভাৰনমনুযুত্তস্স তানি ৰিসযোতি? অন্তরন্তরা পৰত্তনকচিত্তুপ্পাদৰসেন এৰং ৰুত্তং. তে হি চিত্তুপ্পাদা চিত্তেকগ্গতায ইজ্ঝন্তিযাপি অপরিসুদ্ধভাৰায সংৰত্তন্তি. চিত্তচেতসিকেসু নিস্সযাদিপচ্চযভূতেসু. ঞাণম্পীতি পি-সদ্দো সম্পিণ্ডনে. তেন ন কেৰলং তং ৰত্থুযেৰ, অথ খো তস্মিং অপরিসুদ্ধে ঞাণম্পি অপরিসুদ্ধং হোতীতি নিস্সযাপরিসুদ্ধিযা নিস্সিতাপরিসুদ্ধি ৰিয ৰিসযস্স অপরিসুদ্ধতায ৰিসযীনং অপরিসুদ্ধিং দস্সেতি অন্ৰযতো ব্যতিরেকতো চ.

সমভাৰকরণং কিচ্চতো অনূনাধিকভাৰকরণং. যথাপচ্চযং সদ্ধেয্যৰত্থুস্মিং অধিমোক্খকিচ্চস্স পটুতরভাৰেন পঞ্ঞায অৰিসদতায ৰীরিযাদীনঞ্চ অনুবলপ্পদানসিথিলতাদিনা সদ্ধিন্দ্রিযং বলৰং হোতি. তেনাহ ‘‘ইতরানি মন্দানী’’তি. ততোতি তস্মা সদ্ধিন্দ্রিযস্স বলৰভাৰতো ইতরেসঞ্চ মন্দত্তা. কোসজ্জপক্খে পতিতুং অদত্ৰা সম্পযুত্তধম্মানং পগ্গণ্হনং অনুবলপ্পদানং পগ্গহো, পগ্গহকিচ্চং কাতুং ন সক্কোতীতি সম্বন্ধিতব্বং. আরম্মণং উপগন্ত্ৰা ঠানং, অনিস্সজ্জনং ৰা উপট্ঠানং, ৰিক্খেপপটিপক্খো. যেন ৰা সম্পযুত্তা অৰিক্খিত্তা হোন্তি, সো অৰিক্খেপো. রূপগতং ৰিয চক্খুনা যেন যাথাৰতো ৰিসযসভাৰং পস্সতি, তং দস্সনকিচ্চং কাতুং ন সক্কোতি বলৰতা সদ্ধিন্দ্রিযেন অভিভূতত্তা. সহজাতধম্মেসু হি ইন্দট্ঠং করোন্তানং সহ পৰত্তমানানং ধম্মানং একরসতাৰসেনেৰ অত্থসিদ্ধি, ন অঞ্ঞথা. তস্মাতি ৰুত্তমেৰত্থং কারণভাৰেন পচ্চামসতি. তন্তি সদ্ধিন্দ্রিযং.

ধম্মসভাৰপচ্চৰেক্খণেনাতি যস্স সদ্ধেয্যৰত্থুনো উল়ারতাদিগুণে অধিমুচ্চনস্স সাতিসযপ্পৰত্তিযা সদ্ধিন্দ্রিযং বলৰং জাতং, তস্স পচ্চযপচ্চযুপ্পন্নতাদিৰিভাগতো যাথাৰতো ৰীমংসনেন. এৰঞ্হি এৰংধম্মতানযেন সভাৰসরসতো পরিগ্গয্হমানে সৰিপ্ফারো অধিমোক্খো ন হোতি – ‘‘অযং ইমেসং ধম্মানং সভাৰো’’তি পঞ্ঞাব্যাপারস্স সাতিসযত্তা. ধুরিযধম্মেসু হি যথা সদ্ধায বলৰভাৰে পঞ্ঞায মন্দভাৰো হোতি, এৰং পঞ্ঞায বলৰভাৰে সদ্ধায মন্দভাৰো হোতি. তেন ৰুত্তং – ‘‘তং ধম্মসভাৰপচ্চৰেক্খণেন…পে… হাপেতব্ব’’ন্তি. তথা অমনসিকরণেনাতি যেনাকারেন ভাৰনমনুযুঞ্জন্তস্স সদ্ধিন্দ্রিযং বলৰং জাতং, তেনাকারেন ভাৰনং নানুযুঞ্জনেনাতি ৰুত্তং হোতি. ইধ দুৰিধেন সদ্ধিন্দ্রিযস্স বলৰভাৰো অত্তনো ৰা পচ্চযৰিসেসেন কিচ্চুত্তরিযতো ৰীরিযাদীনং ৰা মন্দকিচ্চতায. তত্থ পঠমৰিকপ্পে হাপনৰিধি দস্সিতো, দুতিযৰিকপ্পে পন যথা মনসিকরোতো ৰীরিযাদীনং মন্দকিচ্চতায সদ্ধিন্দ্রিযং বলৰং জাতং, তথা অমনসিকারেন ৰীরিযাদীনং পটুতরভাৰাৰহেন মনসিকারেন সদ্ধিন্দ্রিযং তেহি সমতং করোন্তেন হাপেতব্বং. ইমিনা নযেন সেসিন্দ্রিযেসুপি হাপনৰিধি ৰেদিতব্বো.

ৰক্কলিত্থেরৰত্থূতি সো হি আযস্মা সদ্ধাধিমুত্তো তত্থ চ কতাধিকারো সত্থু রূপকাযদস্সনে পসুতো এৰ হুত্ৰা ৰিহরন্তো সত্থারা – ‘‘কিং তে, ৰক্কলি, ইমিনা পূতিকাযেন দিট্ঠেন, যো খো, ৰক্কলি, ধম্মং পস্সতি, সো মং পস্সতী’’তিআদিনা (সং. নি. ৩.৮৭) ওৰদিযমানো কম্মট্ঠানে নিযোজিতোপি তং অননুযুঞ্জন্তো পণামিতো অত্তানং ৰিনিপাতেতুং পপাতট্ঠানং অভিরুহি. অথ নং সত্থা যথানিসিন্নোৰ ওভাসৰিস্সজ্জনেন অত্তানং দস্সেত্ৰা –

‘‘পামোজ্জবহুলো ভিক্খু, পসন্নো বুদ্ধসাসনে;

অধিগচ্ছে পদং সন্তং, সঙ্খারূপসমং সুখ’’ন্তি. (ধ. প. ৩৮১) –

গাথং ৰত্ৰা ‘‘এহি, ৰক্কলী’’তি আহ. সো তেন ৰচনেন অমতেনেৰ অভিসিত্তো হট্ঠতুট্ঠো হুত্ৰা ৰিপস্সনং পট্ঠপেসি, সদ্ধায বহুলভাৰতো ৰিপস্সনাৰীথিং নারোহতি. তং ঞত্ৰা ভগৰা ইন্দ্রিযসমত্তপটিপাদনায কম্মট্ঠানং সোধেত্ৰা অদাসি. সো সত্থারা দিন্ননযেন ৰিপস্সনং উস্সুক্কাপেত্ৰা মগ্গপটিপাটিযা অরহত্তং পাপুণি. তেন ৰুত্তং – ‘‘ৰক্কলিত্থেরৰত্থু চেত্থ নিদস্সন’’ন্তি. এত্থাতি সদ্ধিন্দ্রিযস্স অধিমত্তভাৰে সেসিন্দ্রিযানং সকিচ্চাকরণে.

ইতরকিচ্চভেদন্তি উপট্ঠানাদিকিচ্চৰিসেসং. পস্সদ্ধাদীতি আদি-সদ্দেন সমাধিউপেক্খাসম্বোজ্ঝঙ্গানং সঙ্গহো দট্ঠব্বো. হাপেতব্বন্তি যথা সদ্ধিন্দ্রিযস্স বলৰভাৰো ধম্মসভাৰপচ্চৰেক্খণেন হাযতি, এৰং ৰীরিযিন্দ্রিযস্স অধিমত্ততা পস্সদ্ধিযাদিভাৰনায হাযতি সমাধিপক্খিকত্তা তস্সা. তথা হি সমাধিন্দ্রিযস্স অধিমত্ততং কোসজ্জপাততো রক্খন্তী ৰীরিযাদিভাৰনা ৰিয ৰীরিযিন্দ্রিযস্স অধিমত্ততং উদ্ধচ্চপাততো রক্খন্তী একংসতো হাপেতি. তেন ৰুত্তং ‘‘পস্সদ্ধাদিভাৰনায হাপেতব্ব’’ন্তি. সোণত্থেরস্স ৰত্থূতি সুকুমারসোণত্থেরস্স ৰত্থু. সো হি আযস্মাপি সত্থু সন্তিকা কম্মট্ঠানং গহেত্ৰা সীতৰনে ৰিহরন্তো – ‘‘মম সরীরং সুখুমালং, ন চ সক্কা সুখেনেৰ সুখং অধিগন্তুং, কাযং কিলমেত্ৰাপি সমণধম্মো কাতব্বো’’তি ঠানচঙ্কমনমেৰ অধিট্ঠায পধানমনুযুঞ্জন্তো পাদতলেসু ফোটেসু উট্ঠিতেসুপি ৰেদনং অজ্ঝুপেক্খিত্ৰা দল়্হৰীরিযং করোন্তো অচ্চারদ্ধৰীরিযতায ৰিসেসং পৰত্তেতুং নাসক্খি. সত্থা তত্থ গন্ত্ৰা ৰীণোপমোৰাদেন ওৰদিত্ৰা ৰীরিযসমতাযোজনৰিধিং দস্সেন্তো কম্মট্ঠানং সোধেত্ৰা গিজ্ঝকূটং গতো. থেরোপি সত্থারা দিন্ননযেন ৰীরিযসমতং যাজেত্ৰা ভাৰেন্তো ৰিপস্সনং উস্সুক্কাপেত্ৰা অরহত্তেৰ পতিট্ঠাসি. তেন ৰুত্তং ‘‘সোণত্থেরস্স ৰত্থু দস্সেতব্ব’’ন্তি. সেসেসুপীতি সতিসমাধিপঞ্ঞিন্দ্রিযেসুপি.

সমতন্তি সদ্ধাপঞ্ঞানং অঞ্ঞমঞ্ঞং অনূনাধিকভাৰং, তথা সমাধিৰীরিযানঞ্চ. যথা হি সদ্ধাপঞ্ঞানং ৰিসুং ৰিসুং ধুরিযধম্মভূতানং কিচ্চতো অঞ্ঞমঞ্ঞনাতিৰত্তনং ৰিসেসতো ইচ্ছিতব্বং. যতো তেসং সমধুরতায অপ্পনা সম্পজ্জতি, এৰং সমাধিৰীরিযানং কোসজ্জুদ্ধচ্চপক্খিকানং সমতায সতি অঞ্ঞমঞ্ঞুপত্থম্ভনতো সম্পযুত্তধম্মানং অন্তদ্ৰযপাতাভাৰেন সম্মদেৰ অপ্পনা ইজ্ঝতীতি. বলৰসদ্ধোতিআদি ৰুত্তস্সেৰ অত্থস্স ব্যতিরেকমুখেন সমত্থনং. তস্সত্থো – যো বলৰতিযা সদ্ধায সমন্নাগতো অৰিসদঞাণো, সো মুধপ্পসন্নো হোতি, ন অৰেচ্চপ্পসন্নো. তথা হি সো অৰত্থুস্মিং পসীদতি, সেয্যথাপি তিত্থিযসাৰকা. কেরাটিকপক্খন্তি সাঠেয্যপক্খং ভজতি. সদ্ধাহীনায পঞ্ঞায অতিধাৰন্তো ‘‘দেয্যৰত্থুপরিচ্চাগেন ৰিনা চিত্তুপ্পাদমত্তেনপি দানমযং পুঞ্ঞং হোতী’’তিআদীনি পরিকপ্পেতি হেতুপতিরূপকেহি ৰঞ্চিতো, এৰংভূতো চ লূখতক্কৰিলুত্তচিত্তো পণ্ডিতানং ৰচনং নাদিযতি, সঞ্ঞত্তিং ন গচ্ছতি. তেনাহ ‘‘ভেসজ্জসমুট্ঠিতো ৰিয রোগো অতেকিচ্ছো হোতী’’তি. যথা চেত্থ সদ্ধাপঞ্ঞানং অঞ্ঞমঞ্ঞং সমভাৰো অত্থাৰহো, ৰিসমভাৰো অনত্থাৰহো, এৰং সমাধিৰীরিযানং অঞ্ঞমঞ্ঞং সমভাৰো অত্থাৰহো, ইতরো অনত্থাৰহো, তথা সমভাৰো অৰিক্খেপাৰহো, ইতরো ৰিক্খেপাৰহো. কোসজ্জং অভিভৰতি, তেন অপ্পনং ন পাপুণাতীতি অধিপ্পাযো. এস নযো উদ্ধচ্চং অভিভৰতীতি এত্থাপি. তদুভযন্তি সদ্ধাপঞ্ঞাদ্ৰযং সমাধিৰীরিযদ্ৰযঞ্চ. সমং কাতব্বন্তি সমতং কাতব্বং.

সমাধিকম্মিকস্সাতি সমথকম্মট্ঠানিকস্স. এৰন্তি এৰং সন্তে, সদ্ধায থোকং বলৰভাৰে সতীতি অত্থো. সদ্দহন্তোতি ‘‘পথৰী পথৰীতি মনসিকারমত্তেন কথং ঝানুপ্পত্তী’’তি অচিন্তেত্ৰা ‘‘অদ্ধা সম্বুদ্ধেন ৰুত্তৰিধি ইজ্ঝতী’’তি সদ্দহন্তো সদ্ধং জনেন্তো. ওকপ্পেন্তোতি আরম্মণং অনুপৰিসিত্ৰা ৰিয অধিমুচ্চনৰসেন অৰকপ্পেন্তো পক্খন্দন্তো. একগ্গতা বলৰতী ৰট্টতি সমাধিপধানত্তা ঝানস্স. উভিন্নন্তি সমাধিপঞ্ঞানং. সমাধিকম্মিকস্স সমাধিনো অধিমত্ততায পঞ্ঞায অধিমত্ততাপি ইচ্ছিতব্বাতি আহ ‘‘সমতাযপী’’তি, সমভাৰেনাপীতি অত্থো. অপ্পনাতি লোকিযঅপ্পনা. তথা হি ‘‘হোতিযেৰা’’তি সাসঙ্কং ৰদতি, লোকুত্তরপ্পনা পন তেসং সমভাৰেনেৰ ইচ্ছিতা. যথাহ ‘‘সমথৰিপস্সনং যুগনদ্ধং ভাৰেতী’’তি (অ. নি. ৪.১৭০). যদি ৰিসেসতো সদ্ধাপঞ্ঞানং সমাধিৰীরিযানঞ্চ সমানতং ইচ্ছতি, কথং সতীতি আহ – ‘‘সতি পন সব্বত্থ বলৰতী ৰট্টতী’’তি. সব্বত্থাতি লীনুদ্ধচ্চপক্খিকেসু পঞ্চিন্দ্রিযেসু. উদ্ধচ্চপক্খিকেকদেসে গণ্হন্তো ‘‘সদ্ধাৰীরিযপঞ্ঞান’’ন্তি আহ. অঞ্ঞথা পীতি চ গহেতব্বা সিযা. তথা হি ‘‘কোসজ্জপক্খিকেন সমাধিনা’’ইচ্চেৰ ৰুত্তং, ন চ ‘‘পস্সদ্ধিসমাধিউপেক্খাহী’’তি. সাতি সতি. সব্বেসু রাজকম্মেসু নিযুত্তোতি সব্বকম্মিকো. তেনাতি যেন কারণেন সব্বত্থ ইচ্ছিতব্বা, তেন আহ অট্ঠকথাযং. সব্বত্থ নিযুত্তা সব্বত্থিকা, সব্বেন ৰা লীনুদ্ধচ্চপক্খিকেন বোজ্ঝঙ্গেন অত্থেতব্বা সব্বত্থিযা, সব্বত্থিযাৰ সব্বত্থিকা. চিত্তন্তি কুসলচিত্তং. তস্স হি সতিপটিসরণং পরাযণং অপ্পত্তস্স পত্তিযা অনধিগতস্স অধিগমায. তেনাহ – ‘‘আরক্খপচ্চুপট্ঠানা’’তিআদি.

খন্ধাদিভেদে অনোগাল়্হপঞ্ঞানন্তি পরিযত্তিবাহুসচ্চৰসেনপি খন্ধাযতনাদীসু অপ্পতিট্ঠিতবুদ্ধীনং. বহুস্সুতসেৰনা হি সুতমযঞাণাৰহা. তরুণৰিপস্সনাসমঙ্গীপি ভাৰনামযঞাণে ঠিতত্তা একংসতো পঞ্ঞৰা এৰ নাম হোতীতি আহ – ‘‘সমপঞ্ঞাস…পে… পুগ্গলসেৰনা’’তি. ঞেয্যধম্মস্স গম্ভীরভাৰৰসেন তপ্পরিচ্ছেদকঞাণস্স গম্ভীরভাৰগহণন্তি আহ – ‘‘গম্ভীরেসু খন্ধাদীসু পৰত্তায গম্ভীরপঞ্ঞাযা’’তি. তঞ্হি ঞেয্যং তাদিসায পঞ্ঞায চরিতব্বতো গম্ভীরঞাণচরিযং, তস্সা ৰা পঞ্ঞায তত্থ পভেদতো পৰত্তি গম্ভীরঞাণচরিযা, তস্সা পচ্চৰেক্খণাতি আহ ‘‘গম্ভীরপঞ্ঞায পভেদপচ্চৰেক্খণা’’তি. যথা সতিৰেপুল্লপ্পত্তো নাম অরহা এৰ, এৰং সো এৰ পঞ্ঞাৰেপুল্লপ্পত্তোপীতি আহ ‘‘অরহত্তমগ্গেন ভাৰনাপারিপূরী হোতী’’তি. ৰীরিযাদীসুপি এসেৰ নযোতি.

‘‘তত্তং অযোখিলং হত্থে গমেন্তী’’তিআদিনা ৰুত্তপঞ্চৰিধবন্ধনকম্মকারণা নিরযে নিব্বত্তসত্তস্স সব্বপঠমং করোন্তীতি দেৰদূতসুত্তাদীসু (ম. নি. ৩.২৫০), তস্সা আদিতো ৰুত্তত্তা চ আহ – ‘‘পঞ্চৰিধবন্ধনকম্মকারণতো পট্ঠাযা’’তি. সকটৰহনাদিকালেতি আদি-সদ্দেন তদঞ্ঞমনুস্সেহি তিরচ্ছানেহি চ ৰিবাধনীযকালং সঙ্গণ্হাতি. একং বুদ্ধন্তরন্তি ইদং অপরাপরং পেতেসু এৰ উপ্পজ্জনকসত্তৰসেন ৰুত্তং, একচ্চানং ৰা পেতানং, একচ্চতিরচ্ছানানং ৰিয তথা দীঘাযুকতাপি সিযাতি তথা ৰুত্তং. তথা হি কালো নাগরাজা চতুন্নং বুদ্ধানং রূপদস্সাৰী.

এৰং আনিসংসদস্সাৰিনোতি ‘‘ৰীরিযাযত্তো এৰ সকললোকিযলোকুত্তরৰিসেসাধিগমো’’তি এৰং আনিসংসদস্সনসীলস্স. গমনৰীথিন্তি সপুব্বভাগং নিব্বানগামিনিং পটিপদং. সহ ৰিপস্সনায অরিযমগ্গপটিপাটি, সত্তৰিসুদ্ধিপরম্পরা ৰা. সা হি ৰট্টতো নিয্যানায গন্তব্বা পটিপদাতি কত্ৰা গমনৰীথি নাম.

কাযদল়্হীবহুলোতি কাযস্স পোসনপসুতো. পিণ্ডন্তি রট্ঠপিণ্ডং. পচ্চযদাযকানং অত্তনি কারস্স অত্তনো সম্মাপটিপত্তিযা মহপ্ফলভাৰস্স করণেন পিণ্ডায ভিক্খায পটিপূজনা পিণ্ডাপচাযনা. নীহরন্তোতি পত্তত্থৰিকতো নীহরন্তো. তং সদ্দং সুত্ৰাতি তং উপাসিকায ৰচনং পণ্ণসালদ্ৰারে ঠিতোৰ পঞ্চাভিঞ্ঞতায দিব্বসোতেন সুত্ৰাতি ৰদন্তি. মনুস্সসম্পত্তি, দিব্বসম্পত্তি, অন্তে নিব্বানসম্পত্তীতি তিস্সো সম্পত্তিযো. সিতং করোন্তোৰাতি ‘‘অকিচ্ছেনেৰ মযা ৰট্টদুক্খং সমতিক্কন্ত’’ন্তি পচ্চৰেক্খণাৰসানে সঞ্জাতপামোজ্জৰসেন সিতং করোন্তো এৰ.

অলসানং ভাৰনায নামমত্তম্পি অজানন্তানং কাযস্স পোসনবহুলানং যাৰদত্থং পরিভুঞ্জিত্ৰা সেয্যসুখাদিং অনুযুঞ্জন্তানং তিরচ্ছানকথিকানং দূরতোৰ ৰজ্জনং কুসীতপুগ্গলপরিৰজ্জনা. ‘‘দিৰসং চঙ্কমেন নিসজ্জাযা’’তিআদিনা ভাৰনারম্ভৰসেন আরদ্ধৰীরিযানং দল়্হপরক্কমানং কালেনকালং উপসঙ্কমনা আরদ্ধৰীরিযপুগ্গলসেৰনা. তেনাহ ‘‘কুচ্ছিং পূরেত্ৰা’’তিআদি.

ৰিসুদ্ধিমগ্গে পন ‘‘জাতিমহত্তপচ্চৰেক্খণা, সব্রহ্মচারিমহত্তপচ্চৰেক্খণা’’তি ইদং দ্ৰযং ন গহিতং, ‘‘থিনমিদ্ধৰিনোদনতা, সম্মপ্পধানপচ্চৰেক্খণা’’তি ইদং দ্ৰযং গহিতং. তত্থ আনিসংসদস্সাৰিতায এৰ সম্মপ্পধানপচ্চৰেক্খণা গহিতা লোকিযলোকুত্তরৰিসেসাধিগমস্স ৰীরিযাযত্ততাদস্সনভাৰতো. থিনমিদ্ধৰিনোদনং তদধিমুত্ততায গহিতং, ৰীরিযুপ্পাদনে যুত্তপযুত্তস্স থিনমিদ্ধৰিনোদনং অত্থতো সিদ্ধমেৰ. তত্থ থিনমিদ্ধৰিনোদনং কুসীতপুগ্গলপরিৰজ্জন-আরদ্ধৰীরিযপুগ্গল-সেৰন- তদধিমুত্ততাপটিপক্খৰিধমন-পচ্চযূপসংহারৰসেন, অপাযভযপচ্চৰেক্খণাদযো সমুত্তেজনৰসেন ৰীরিযসম্বোজ্ঝঙ্গস্স উপ্পাদকাতি দট্ঠব্বা.

বুদ্ধানুস্সতিযা উপচারসমাধিনিট্ঠত্তা ৰুত্তং ‘‘যাৰ উপচারা’’তি. সকলসরীরং ফরমানোতি পীতিসমুট্ঠানেহি পণীতরূপেহি সকলসরীরং ফরমানো. ধম্মসঙ্ঘগুণে অনুস্সরন্তস্সপি যাৰ উপচারা সকলসরীরং ফরমানো পীতিসম্বোজ্ঝঙ্গো উপ্পজ্জতীতি যোজনা. এৰং সেসঅনুস্সতীসু পসাদনীযসুত্তন্তপচ্চৰেক্খণায চ যোজেতব্বং তস্সাপি ৰিমুত্তাযতনভাৰেন তগ্গতিকত্তা. এৰরূপে কালেতি দুব্ভিক্খভযাদীসূতি ৰুত্তকালে. সমাপত্তিযা…পে… ন সমুদাচরন্তীতি ইদং উপসমানুস্সতিযা ৰসেন ৰুত্তং. সঙ্খারানঞ্হি সপ্পদেসৰূপসমেপি নিপ্পদেসৰূপসমে ৰিয তত্থ সপঞ্ঞায পৰত্তনতো ভাৰনামনসিকারো কিলেসৰিক্খম্ভনসমত্থো হুত্ৰা উপচারসমাধিং আৰহন্তো তথারূপপীতিসোমনস্সসমন্নাগতো পীতিসম্বোজ্ঝঙ্গস্স উপ্পাদায হোতীতি. পসাদনীযেসু ঠানেসু পসাদসিনেহাভাৰেন সংসূচিতহদযতা লূখতা. সা চ তত্থ আদরগারৰাকরণেন ৰিঞ্ঞাযতীতি আহ ‘‘অসক্কচ্চকিরিযায সংসূচিতলূখভাৰে’’তি.

কাযচিত্তদরথৰূপসমলক্খণা পস্সদ্ধি এৰ যথাৰুত্তবোধিঅঙ্গভূতো পস্সদ্ধিসম্বোজ্ঝঙ্গো, তস্স পস্সদ্ধিসম্বোজ্ঝঙ্গস্স. পণীতভোজনসেৰনতাতি পণীতসপ্পাযভোজনসেৰনতা. উতুইরিযাপথসুখগ্গহণেহি সপ্পাযউতুইরিযাপথং গহিতন্তি দট্ঠব্বং. তঞ্হি তিৰিধম্পি সপ্পাযং সেৰিযমানং কাযস্স কল্লতাপাদনৰসেন চিত্তস্স কল্লতং আৰহন্তং দুৰিধাযপি পস্সদ্ধিযা কারণং হোতি. সত্তেসু লব্ভমানং সুখদুক্খং অহেতুকন্তি অযমেকো অন্তো, ইস্সরাদিৰিসমহেতুকন্তি অযং দুতিযো, এতে উভো অন্তে অনুপগম্ম যথাসকং কম্মুনা হোতীতি অযং মজ্ঝিমা পটিপত্তি. মজ্ঝত্তো পযোগো যস্স সো মজ্ঝত্তপযোগো, তস্স ভাৰো মজ্ঝত্তপযোগতা. অযঞ্হি পহানসারদ্ধকাযতা-সঙ্খাতপস্সদ্ধকাযতায কারণং হোন্তী পস্সদ্ধিদ্ৰযং আৰহতি. এতেনেৰ সারদ্ধকাযপুগ্গলপরিৰজ্জন-পস্সদ্ধকাযপুগ্গলসেৰনানং তদাৰহনতা সংৰণ্ণিতাতি দট্ঠব্বং.

ৰত্থুৰিসদকিরিযা ইন্দ্রিযসমত্তপটিপাদনা চ ‘‘পঞ্ঞাৰহা’’তি ৰুত্তা. সমথাৰহাপি তা হোন্তি সমথাৰহভাৰেনেৰ পঞ্ঞাৰহত্তাতি ৰুত্তং ‘‘ৰত্থুৰিসদ…পে… ৰেদিতব্বা’’তি.

করণকোসল্লভাৰনাকোসল্লানং নানন্তরিযভাৰতো রক্খণকোসল্লস্স চ তংমূলকত্তা ‘‘নিমিত্তকুসলতা নাম কসিণনিমিত্তস্স উগ্গহণকুসলতা’’ইচ্চেৰ ৰুত্তং. অতিসিথিলৰীরিযতাদীহীতি আদি-সদ্দেন পঞ্ঞাপযোগমন্দতং অপ্পমাদৰেকল্লঞ্চ সঙ্গণ্হাতি. তস্স পগ্গণ্হনন্তি তস্স লীনস্স চিত্তস্স ধম্মৰিচযসম্বোজ্ঝঙ্গাদিসমুট্ঠাপনেন লযাপত্তিতো সমুট্ঠাপনং. ৰুত্তঞ্হেতং ভগৰতা –

‘‘যস্মিঞ্চ খো, ভিক্খৰে, সমযে লীনং চিত্তং হোতি, কালো তস্মিং সমযে ধম্মৰিচযসম্বোজ্ঝঙ্গস্স ভাৰনায, কালো ৰীরিযসম্বোজ্ঝঙ্গস্স ভাৰনায, কালো পীতিসম্বোজ্ঝঙ্গস্স ভাৰনায. তং কিস্স হেতু? লীনং, ভিক্খৰে, চিত্তং, তং এতেহি ধম্মেহি সুসমুট্ঠাপযং হোতি. সেয্যথাপি, ভিক্খৰে, পুরিসো পরিত্তং অগ্গিং উজ্জালেতুকামো অস্স, সো তত্থ সুক্খানি চেৰ তিণানি পক্খিপেয্য, সুক্খানি গোমযানি পক্খিপেয্য, সুক্খানি কট্ঠানি পক্খিপেয্য, মুখৰাতঞ্চ দদেয্য, ন চ পংসুকেন ওকিরেয্য, ভব্বো নু খো সো পুরিসো পরিত্তং অগ্গিং উজ্জালেতুন্তি. এৰং, ভন্তে’’তি (সং. নি. ৫.২৩৪).

এত্থ চ যথাসকং আহারৰসেন ধম্মৰিচযসম্বোজ্ঝঙ্গাদীনং ভাৰনা সমুট্ঠাপনাতি ৰেদিতব্বা, সা অনন্তরং ৰিভাৰিতা এৰ.

অচ্চারদ্ধৰীরিযতাদীহীতি আদি-সদ্দেন পঞ্ঞাপযোগবলৰতং পমোদুপ্পিলাৰনঞ্চ সঙ্গণ্হাতি. তস্স নিগ্গণ্হনন্তি তস্স উদ্ধতস্স চিত্তস্স সমাধিসম্বোজ্ঝঙ্গাদিসমুট্ঠাপনেন উদ্ধতাপত্তিতো নিসেধনং. ৰুত্তম্পি চেতং ভগৰতা –

‘‘যস্মিঞ্চ খো, ভিক্খৰে, সমযে উদ্ধতং চিত্তং হোতি, কালো তস্মিং সমযে পস্সদ্ধিসম্বোজ্ঝঙ্গস্স ভাৰনায, কালো সমাধিসম্বোজ্ঝঙ্গস্স ভাৰনায, কালো উপেক্খাসম্বোজ্ঝঙ্গস্স ভাৰনায. তং কিস্স হেতু? উদ্ধতং, ভিক্খৰে, চিত্তং, তং এতেহি ধম্মেহি সুৰূপসমযং হোতি. সেয্যথাপি, ভিক্খৰে, পুরিসো মহন্তং অগ্গিক্খন্ধং নিব্বাপেতুকামো অস্স, সো তত্থ অল্লানি চেৰ তিণানি….পে… পংসুকেন চ ওকিরেয্য, ভব্বো নু খো সো পুরিসো মহন্তং অগ্গিক্খন্ধং নিব্বাপেতুন্তি. এৰং, ভন্তে’’তি (সং. নি. ৫.২৩৪).

এত্থাপি যথাসকং আহারৰসেন পস্সদ্ধিসম্বোজ্ঝঙ্গাদীনং ভাৰনা সমুট্ঠাপনাতি ৰেদিতব্বা. তত্থ পস্সদ্ধিসম্বোজ্ঝঙ্গস্স ভাৰনা ৰুত্তা এৰ, সমাধিসম্বোজ্ঝঙ্গস্স ৰুচ্চমানা, ইতরস্স অনন্তরং ৰক্খতি. পঞ্ঞাপযোগমন্দতাযাতি পঞ্ঞাব্যাপারস্স অপ্পভাৰেন. যথা হি দানং অলোভপ্পধানং, সীলং অদোসপ্পধানং, এৰং ভাৰনা অমোহপ্পধানা. তত্থ যদা পঞ্ঞা ন বলৰতী হোতি, তদা ভাৰনা পুব্বেনাপরং ৰিসেসাৰহা ন হোতি, অনভিসঙ্খতো ৰিয আহারো পুরিসস্স যোগিনো চিত্তস্স অভিরুচিং ন উপ্পাদেতি, তেন তং নিরস্সাদং হোতি. তথা ভাৰনায সম্মদেৰ ৰীথিপটিপত্তিযা অভাৰেন উপসমসুখং ন ৰিন্দতি, তেনপি চিত্তং নিরস্সাদং হোতি. তেন ৰুত্তং ‘‘পঞ্ঞাপযোগ…পে… নিরস্সাদং হোতী’’তি.

তস্স সংৰেগুপ্পাদনঞ্চ পসাদুপ্পাদনঞ্চ তিকিচ্ছনন্তি তং দস্সেন্তো ‘‘অট্ঠ সংৰেগৰত্থূনী’’তিআদিমাহ. তত্থ জাতিজরাব্যাধিমরণানি যথারহং সুগতিযং দুগ্গতিযঞ্চ হোন্তীতি তদঞ্ঞমেৰ পঞ্চৰিধবন্ধনাদিখুপ্পিপাসাদিঅঞ্ঞমঞ্ঞৰিবাধনাদিহেতুকং অপাযদুক্খং দট্ঠব্বং. তযিদং সব্বং তেসং তেসং সত্তানং পচ্চুপ্পন্নভৰনিস্সিতং গহিতন্তি অতীতে অনাগতে চ কালে ৰট্টমূলকদুক্খানি ৰিসুং গহিতানিযেৰ. যে পন সত্তা আহারূপজীৰিনো তত্থ চ উট্ঠানফলূপজীৰিনো, তেসং অঞ্ঞেহি অসাধারণং জীৰিকদুক্খং অট্ঠমং সংৰেগৰত্থু গহিতন্তি দট্ঠব্বং. অযং ৰুচ্চতি সমযে সম্পহংসনাতি অযং সম্পহংসিতব্বসমযে ৰুত্তনযেন সংৰেগজননৰসেন চেৰ পসাদুপ্পাদনৰসেন চ সম্মদেৰ পহংসনা, সংৰেগজননপুব্বকপসাদুপ্পাদনেন ভাৰনাচিত্তস্স তোসনাতিঅত্থো.

সম্মাপটিপত্তিং আগম্মাতি লীনুদ্ধচ্চৰিরহেন সমথৰীথিপটিপত্তিযা চ সম্মদেৰ ভাৰনাপটিপত্তিং আগম্ম.

অলীনন্তিআদীসু কোসজ্জপক্খিকানং ধম্মানং অনধিমত্ততায অলীনং, উদ্ধচ্চপক্খিকানং অনধিমত্ততায অনুদ্ধতং, পঞ্ঞাপযোগসম্পত্তিযা উপসমসুখাধিগমেন চ অনিরস্সাদং, ততো এৰ আরম্মণে সমপ্পৰত্তং সমথৰীথিপটিপন্নঞ্চ. তত্থ অলীনতায পগ্গহে, অনুদ্ধতায চ নিগ্গহে, অনিরস্সাদতায সম্পহংসনে ন ব্যাপারং আপজ্জতি. অলীনানুদ্ধচ্চতাহি আরম্মণে সমপ্পৰত্তং, অনিরস্সাদতায সমথৰীথিপটিপন্নং, সমপ্পৰত্তিযা ৰা অলীনং অনুদ্ধতং, সমথৰীথিপটিপত্তিযা অনিরস্সাদন্তি দট্ঠব্বং. অযং ৰুচ্চতি সমযে অজ্ঝুপেক্খনতাতি অযং অজ্ঝুপেক্খিতব্বসমযে চিত্তস্স পগ্গহনিগ্গহসম্পহংসনেসু ব্যাৰটতাসঙ্খাতং পটিপক্খং অভিভুয্য উপেক্খনা ৰুচ্চতি. এসাতি সমাধিবোজ্ঝঙ্গো অনুপ্পন্নো উপ্পজ্জতি. অরহত্তমগ্গেন ভাৰনাপারিপূরী হোতীতি এতেন নিপ্পরিযাযতো সমাধিৰেপুল্লপ্পত্তোপি অরহা এৰাতি দস্সেতি.

অনুরোধৰিরোধপহানৰসেন মজ্ঝত্তভাৰো উপেক্খাসম্বোজ্ঝঙ্গস্স কারণং তস্মিং সতি সিজ্ঝনতো, অসতি চ অসিজ্ঝনতো, সো চ মজ্ঝত্তভাৰো ৰিসযৰসেন দুৰিধোতি আহ ‘‘সত্তমজ্ঝত্ততা সঙ্খারমজ্ঝত্ততা’’তি. তদুভযৰসেন চস্স ৰিরুজ্ঝনং পস্সদ্ধিসম্বোজ্ঝঙ্গস্স ভাৰনায এৰ দূরীকতন্তি অনুরুজ্ঝনস্সেৰ পহানৰিধিং দস্সেন্তো ‘‘সত্তমজ্ঝত্ততা’’তিআদিমাহ. তথা হিস্স সত্তসঙ্খারকেলাযনপুগ্গলপরিৰজ্জনং ‘‘উপ্পত্তিযা কারণ’’ন্তি ৰুচ্চতি. উপেক্খায হি ৰিসেসতো রাগো পটিপক্খো, ততো রাগবহুলস্স পুগ্গলস্স উপেক্খা ‘‘ৰিসুদ্ধিমগ্গো’’তি ৰুচ্চতি. দ্ৰীহাকারেহীতি কম্মস্সকতাপচ্চৰেক্খণং অত্তসুঞ্ঞতাপচ্চৰেক্খণন্তি ইমেহি দ্ৰীহি কারণেহি. দ্ৰীহেৰাতি অৰধারণং সঙ্খারসহিতায সঙ্খ্যাসমানতায দস্সনত্থং. সঙ্খ্যা এৰ হেত্থ সমানং, ন সঙ্খ্যেয্যং সব্বথা সমানন্তি. অস্সামিকভাৰো অনত্তনিযতা. সতি হি অত্তনি তস্স কিঞ্চনভাৰেন চীৰরং অঞ্ঞং ৰা কিঞ্চি অত্তনিযং নাম সিযা, সো পন কোচি নত্থেৰাতি অধিপ্পাযো. অনদ্ধনিযন্তি, ন অদ্ধানক্খমং, ন চিরট্ঠাযি ইত্তরং অনিচ্চন্তি অত্থো. তাৰকালিকন্তি তস্সেৰ ৰেৰচনং.

মমাযতীতি মমত্তং করোতি. মমাতি তণ্হায পরিগ্গয্হ তিট্ঠতি. ধনাযন্তাতি ধনং দব্বং করোন্তা. অস্সাতি উপেক্খাসম্বোজ্ঝঙ্গস্স অরহত্তমগ্গেন ভাৰনাপারিপূরী হোতি. তথা হি অরহতো এৰ ছল়ঙ্গুপেক্খানিপ্ফত্তি.

অসুভারম্মণা ধম্মাতি অসুভপ্পকারা অসুভঝানস্স আরম্মণভূতা ধম্মা. কামং ইন্দ্রিযবদ্ধাপি কেসাদযো অসুভপ্পকারা এৰ, ৰিসেসতো পন জিগুচ্ছিতব্বে জিগুচ্ছাৰহে গণ্হন্তো ‘‘দসা’’তি আহ. যথা মনসিকরোতো সভাৰসরসতো তত্থ অসুভসঞ্ঞা সন্তিট্ঠতি, তথা পৰত্তো মনসিকারো উপাযমনসিকারো. অসুভে অসুভপটিক্কূলাকারস্স উগ্গণ্হনং, যথা ৰা তত্থ উগ্গহনিমিত্তং উপ্পজ্জতি, তথা মনসিকারো অসুভনিমিত্তস্স উগ্গহো. উপচারপ্পনাৰহায অসুভভাৰনায অনুযুঞ্জনা অসুভভাৰনানুযোগো.

মনচ্ছট্ঠানং ইন্দ্রিযানং সুট্ঠু সুসংৰরণে সতি অৰসরং অলভন্তো কামচ্ছন্দো পহীযতেৰ, তথা ভোজনে মত্তঞ্ঞুনো মিতাহারস্স থিনমিদ্ধাভিভৰাভাৰা ওতারং অলভমানো কামচ্ছন্দো পহীযতি. যো পন আহারে পটিক্কূলসঞ্ঞং তব্বিপরিণামস্স তদাধারস্স তস্স চ উদরিযভূতস্স অতিৰিয জেগুচ্ছতং, কাযস্স চ আহারতিট্ঠকতং সম্মদেৰ জানাতি, সো সব্বসো ভোজনে পমাণস্স জাননেন ৰিসেসতো ভোজনে মত্তঞ্ঞূ নাম. তস্স কামচ্ছন্দো পহীযতেৰ, অট্ঠকথাযং পন অপ্পাহারতংযেৰ দস্সেতুং ‘‘চতুন্ন’’ন্তিআদি ৰুত্তং. অসুভকম্মিকতিস্সত্থেরো দন্তট্ঠিদস্সাৰী. পহীনস্সাতি ৰিক্খম্ভনৰসেন পহীনস্স. অভিধম্মপরিযাযেন সব্বোপি লোভো কামচ্ছন্দনীৰরণন্তি ‘‘অরহত্তমগ্গেন আযতিং অনুপ্পাদো’’তি ৰুত্তং.

মেজ্জতি হিতফরণৰসেন সিনিয্হতীতি মিত্তো, হিতেসী পুগ্গলো, তস্মিং মিত্তে ভৰা, মিত্তস্স ৰা এসাতি মেত্তা, হিতেসিতা. সা এৰ পটিপক্খতো চেতসো ৰিমুত্তীতি মেত্তাচেতোৰিমুত্তি. তত্থ মেত্তাযনস্স সত্তেসু হিতফরণস্স উপ্পাদনং পৰত্তনং মেত্তানিমিত্তস্স উগ্গহো. তেনাহ ‘‘ওদিস্সকা’’তিআদি.

তত্থ অত্তপিযসহাযমজ্ঝত্তৰেরিৰসেন ওদিস্সকতা. সীমাসম্ভেদে কতে অনোদিস্সকতা. একাদিদিসাফরণৰসেন দিসাফরণতা মেত্তায উগ্গণ্হনে ৰেদিতব্বা. উগ্গহো যাৰ উপচারা দট্ঠব্বো. উগ্গহিতায আসেৰনা ভাৰনা, সব্বা ইত্থিযো পুরিসা অরিযা অনরিযা দেৰা মনুস্সা ৰিনিপাতিকাতি সত্তোধিকরণৰসেন পৰত্তা সত্তৰিধা, অট্ঠৰীসতিৰিধা ৰা, দসহি দিসাহি দিসোধিকরণৰসেন পৰত্তা দসৰিধা, একেকায দিসায সত্তাদিইত্থাদিঅৰেরাদিভেদেন অসীতাধিকচতুসতপ্পভেদা চ ওধিসোফরণমেত্তা. সব্বে সত্তা, পাণা, ভূতা, পুগ্গলা, অত্তভাৰপরিযাপন্নাতি এতেসং ৰসেন পঞ্চৰিধা. একেকস্মিং অৰেরা হোন্তু, অব্যাপজ্জা, অনীঘা, সুখী অত্তানং পরিহরন্তূতি চতুধা পৰত্তিযা ৰীসতিৰিধা অনোধিসোফরণমেত্তা, তং সন্ধাযাহ – ‘‘ওধিসো…পে… ভাৰেন্তস্সপী’’তি. ত্ৰং এতস্সাতিআদিনা কম্মস্সকতাপচ্চৰেক্খণং দস্সেতি. পটিসঙ্খানে ঠিতস্সাতি কোধে যথাৰুত্তস্স আদীনৰস্স তপ্পটিপক্খতো অকোধে মেত্তায আনিসংসস্স চ পটিসঙ্খানে সম্মদেৰ জাননে. সেৰন্তস্সাতি ভজন্তস্স ব্যাপাদো পহীযতি.

অতিভোজনে নিমিত্তগ্গাহোতি আহারস্স অধিকভোজনে থিনমিদ্ধস্স নিমিত্তগ্গাহো, ‘‘এত্তকে ভুত্তে থিনমিদ্ধং উপ্পজ্জতি, এত্তকে নো’’তি থিনমিদ্ধস্স কারণাকারণগ্গাহোতি অত্থো. দিৰা সূরিযালোকন্তি দিৰা গহিতনিমিত্তং সূরিযালোকং, রত্তিযং মনসিকরোন্তস্সপীতি এৰমেত্থ অত্থো ৰেদিতব্বো. ধুতঙ্গানং ৰীরিযনিস্সিতত্তা ৰুত্তং ‘‘ধুতঙ্গনিস্সিতসপ্পাযকথাযপী’’তি.

কুক্কুচ্চম্পি কতাকতানুসোচনৰসেন পৰত্তমানং চেতসো অৰূপসমাৰহতায উদ্ধচ্চেন সমানলক্খণমেৰাতি তদুভযস্স পহানকারণং দস্সেন্তো ভগৰা – ‘‘অত্থি, ভিক্খৰে, চেতসো ৰূপসমো’’তিআদিমাহ. তস্মা বাহুসচ্চাদি তস্স পহানকারণন্তি দস্সেতুং ‘‘অপিচ ছ ধম্মা’’তিআদিমাহ. তত্থ বহুস্সুতস্স গন্থতো, অত্থতো ধম্মং ৰিচারেন্তস্স অত্তৰেদাদিপটিলাভসম্ভৰতো ৰিক্খেপো ন হোতি. যথাৰিহিতপটিপত্তিযা যথাধম্মপটিকারপ্পত্তিযা চ ৰিপ্পটিসারো অনৰসরোৰাতি ‘‘বাহুসচ্চেনপি…পে… উদ্ধচ্চকুক্কুচ্চং পহীযতী’’তি ৰুত্তং. যদগ্গেন বহুস্সুতস্স পটিসঙ্খানৰতো উদ্ধচ্চকুক্কুচ্চং পহীযতি, তদগ্গেন পরিপুচ্ছকতাৰিনযপকতঞ্ঞুতাহিপি তং পহীযতীতি দট্ঠব্বং. ৰুদ্ধসেৰিতা চ ৰুদ্ধসীলিতং আৰহতীতি চেতসো ৰূপসমকরত্তা উদ্ধচ্চকুক্কুচ্চস্স পহানকারী ৰুত্তা, ৰুদ্ধভাৰং পন অনপেক্খিত্ৰা ৰিনযধরা কুক্কুচ্চৰিনোদকা কল্যাণমিত্তাতি দট্ঠব্বা. ৰিক্খেপো চ ভিক্খূনং যেভুয্যেন কুক্কুচ্চহেতুকো হোতীতি ‘‘কপ্পিযাকপ্পিযপরিপুচ্ছাবহুলস্সা’’তিআদিনা ৰিনযনযেনেৰ পরিপুচ্ছকতাদযো নিদ্দিট্ঠা. পহীনে উদ্ধচ্চকুক্কুচ্চেতি নিদ্ধারণে ভুম্মং. কুক্কুচ্চস্স দোমনস্সসহগতত্তা অনাগামিমগ্গেন আযতিং অনুপ্পাদো ৰুত্তো.

কুসলাকুসলা ধম্মাতিআদীসু যং ৰত্তব্বং, তং হেট্ঠা ৰুত্তমেৰ. কামং বাহুসচ্চপরিপুচ্ছকতাহি অট্ঠৰত্থুকাপি ৰিচিকিচ্ছা পহীযতি, তথাপি রতনত্তযৰিচিকিচ্ছামূলিকা সেসৰিচিকিচ্ছাতি কত্ৰা ৰুত্তং ‘‘তীণি রতনানি আরব্ভা’’তিআদি. ৰিনযে পকতঞ্ঞুতায চ সতি সিক্খায কঙ্খায অসম্ভৰো এৰ, তথা রতনত্তযগুণাৰবোধে সতি পুব্বন্তাদীসু সংসযস্সাতি আহ – ‘‘ৰিনযে’’তিআদি. ওকপ্পনীযসদ্ধা সদ্ধেয্যৰত্থুং অনুপৰিসিত্ৰা ৰিয অধিমুচ্চনং, তঞ্চ তথা অধিমোক্খুপ্পাদনমেৰ. সদ্ধায নিন্নপোণপব্ভারতা অধিমুত্তি. অরহত্তেন কূটং গণ্হি সত্তপি বোজ্ঝঙ্গে ৰিত্থারেত্ৰা দেসনায ওসাপিতত্তা.

আহারসুত্তৰণ্ণনা নিট্ঠিতা.

২. পরিযাযসুত্তৰণ্ণনা

২৩৩. সম্বহুলাতি ৰুচ্চন্তি সঙ্ঘসমঞ্ঞায অভাৰতো. ততো পরন্তি তিণ্ণং জনানং উপরি সঙ্ঘো চতুৰগ্গকরণীযাদিসঙ্ঘকম্মৰসেন কম্মপ্পত্তত্তা. পৰিসিংসূতি ভাৰিনি পৰিসনে ভূতে ৰিয কত্ৰা উপচারেন ৰুত্তন্তি আহ – ‘‘পৰিট্ঠা’’তি. ভাৰিনি হি ভূতে ৰিয উপচারো. তেনাহ – ‘‘তে পনা’’তিআদি, তে পন ভিক্খূতি অত্থো. পুন তে পনাতি তিত্থিযা তিত্থিযসাৰকা চ.

ইমস্মিং পঞ্ঞাপনেতি ‘‘পঞ্চ নীৰরণে পহাযা’’তিআদিনযপ্পৰত্তে ইমস্মিং পকারে অত্থপঞ্ঞাপনে. ৰিসিস্সতি অঞ্ঞমঞ্ঞতো পভিজ্জতীতি ৰিসেসো, ভেদো. স্ৰাযং ইধ অন্তোগধাধিকভাৰো অধিপ্পেতোতি আহ – ‘‘কো ৰিসেসোতি কিং অধিক’’ন্তি. অধিকং পযসনং পযুঞ্জনন্তি অধিপ্পযাসো, অধিকপ্পযোগো. নানা করীযতি এতেনাতি নানাকরণং, ভেদোতি আহ – ‘‘কিং নানত্ত’’ন্তি. দুতিযপদেতি ‘‘অনুসাসনিযা ৰা অনুসাসনি’’ন্তি এতস্মিং পদে. এসেৰ নযোতি যথা পঠমস্মিং পদে অত্থযোজনা, এৰং দুতিযপদেপি যোজেতব্বা.

তীণি ঠানানীতি দেৰমারব্রহ্মট্ঠানানি তীণি ‘‘সদেৰকে লোকে’’তিআদিনা লোকে পক্খিপিত্ৰা. ‘‘সস্সমণব্রাহ্মণিযা পজায সদেৰমনুস্সাযা’’তি দ্ৰে ঠানানি. ‘‘পজাযা’’তি এত্থ পক্খিপিত্ৰা ইতি পঞ্চহি পদেহি. উদ্দেসন্তি উদ্দিসিতব্বতং. গণনন্তি একো কামচ্ছন্দোতি গহেতব্বতং গচ্ছতি. অত্তনো হত্থপাদাদীসূতি নিদস্সনমত্তং দট্ঠব্বং সমুদাযং আরব্ভ পটিঘস্স উপ্পজ্জনতো. অত্তনো খন্ধেসু ৰিমতি ‘‘অহং নু খোস্মী’’তিআদিনা.

কিঞ্চাপি সব্বং ৰীরিযং চেতসিকমেৰ, যং পন কাযকম্মাধিট্ঠানাদিৰসেন মনসি কাযিকপযোগসমুট্ঠাপনং ৰীরিযং কাযিকন্তি লদ্ধপরিযাযন্তি ততো ৰিসেসেত্ৰা চেতসিকন্তি যথাধিপ্পেতদুতিযতাদস্সনত্থং. যদিপি যথাকপ্পিতইরিযাপথসন্ধারণৰসেন পৰত্তমানং ৰীরিযং কাযস্স তথাপৰত্তস্স পচ্চযভূতন্তি ন সক্কা ৰত্তুং, তথাপি ন তাদিসো কাযপযোগো, তদা পৰত্তো নত্থীতি ৰুত্তং ‘‘কাযপযোগং ৰিনা উপ্পন্নৰীরিয’’ন্তি. সতিসম্বোজ্ঝঙ্গসদিসো ৰাতি ইমিনা অজ্ঝত্তিকে সঙ্খারে অজ্ঝুপেক্খনৰসেন পৰত্তা অজ্ঝত্তধম্মেসু উপেক্খাতিআদিনযং অতিদিসতি.

‘‘মিস্সকবোজ্ঝঙ্গা কথিতা’’তি ৰত্ৰা তমত্থং ৰিভাৰেতুং ‘‘এতেসূ’’তিআদি ৰুত্তং. চঙ্কমন্তেনপি অরিযমগ্গং অধিগন্তুং সক্কাতি কত্ৰা ৰুত্তং ‘‘মগ্গং অপত্তং কাযিকৰীরিয’’ন্তি. বোজ্ঝঙ্গা ন লব্ভন্তীতি নিপ্পরিযাযবোজ্ঝঙ্গা ন লব্ভন্তী. বোজ্ঝঙ্গে উদ্ধরন্তি পরিযাযতোতি অধিপ্পাযো. সেসাতি বহিদ্ধাধম্মেসু সতি-ধম্মৰিচয-উপেক্খা-চেতসিক-ৰীরিয-সৰিতক্ক-সৰিচার-পীতি-সমাধী দ্ৰে পস্সদ্ধিযো চ. অযং পন নযো পচুরপ্পৰত্তিৰসেন অট্ঠকথানযেনেৰ ৰুত্তো. থেরৰাদৰসেন পন অৰিতক্কঅৰিচারমত্তা পীতিসমাধিসম্বোজ্ঝঙ্গা রূপাৰচরাপি অত্থীতি তেপি গহেত্ৰা দস মিস্সকাৰ হোন্তীতি ৰত্তব্বং সিযাতি.

পরিযাযসুত্তৰণ্ণনা নিট্ঠিতা.

৩. অগ্গিসুত্তৰণ্ণনা

২৩৪. লোণধূপনন্তি লোণঞ্চ ধূপনঞ্চ লোণধূপনং. যোধকম্মন্তি যোধপুগ্গলেন কত্তব্বং কম্মং. মন্তকম্মন্তি রাজকিচ্চমন্তনং. পটিহারকম্মন্তি রঞ্ঞো সন্তিকং আগতানং ৰচনং রঞ্ঞো নিৰেদেত্ৰা ততো নেসং পটিহরণকম্মং. তস্মাতি সব্বত্থিকত্তা সতিযা. এৰং ‘‘সতিঞ্চ খ্ৰাহ’’ন্তিআদিকং অৰোচ. পুব্বভাগৰিপস্সনা বোজ্ঝঙ্গাৰ কথিতা পগ্গহনিগ্গহৰিনোদিতত্তা.

অগ্গিসুত্তৰণ্ণনা নিট্ঠিতা.

৪. মেত্তাসহগতসুত্তৰণ্ণনা

২৩৫. কীদিসা গতি নিব্বত্তি এতিস্সাতি কিংগতিকা, কিংনিট্ঠাতি ৰুত্তং হোতি. কীদিসী পরমা উত্তমা কোটি এতিস্সাতি কিংপরমা. কীদিসং ফলং আনিসংসং উদযো এতিস্সাতি কিংফলা. সংসট্ঠং সম্পযুত্তন্তি ইদং সহগত-সদ্দস্স অত্থদস্সনমত্তং, ইধ পন মেত্তাঝানং পাদকং কত্ৰা ৰিপস্সনাপুব্বভাগবোজ্ঝঙ্গা চ ‘‘মেত্তাসহগতং সতিসম্বোজ্ঝঙ্গ’’ন্তিআদিনা ৰুত্তাতি ৰেদিতব্বং. সব্বত্থাতি সব্বেসু বোজ্ঝঙ্গেসু সব্বেসু চ ব্রহ্মৰিহারেসু.

পটিকূলেতি ৰিরজ্জতীতি পটিকূলং, অনিট্ঠং. ন পটিকূলং অপ্পটিকূলং, ইট্ঠং. তেনাহ ‘‘ইট্ঠে ৰত্থুস্মি’’ন্তি. এত্থাতি অপ্পটিকূলৰত্থুস্মিং. এৰন্তি পটিকূলসঞ্ঞী. সত্তে অপ্পটিকূলে অসুভফরণং, সঙ্খারে অপ্পটিকূলে অনিচ্চন্তি মনসিকারং করোন্তো. অসুভাযাতি অসুভসঞ্ঞায. অনিচ্চতো ৰা উপসংহরতীতি অনিচ্চন্তি মনসিকারং পৰত্তেতি. ‘‘এসেৰ নযো’’তি সঙ্খেপতো ৰুত্তমত্থং ৰিৰরিতুং ‘‘অপ্পটিকূলপটিকূলেসূ’’তিআদি ৰুত্তং. ছল়ঙ্গুপেক্খন্তি ছসু আরম্মণেসু পহীনানুরোধস্স উপ্পত্তিযা ছল়ঙ্গৰন্তং উপেক্খং.