৮. বীজগামসুত্তৰণ্ণনা

১১৪৮. ‘‘মূলবীজ’’ন্তিআদীসু মূলমেৰ বীজন্তি মূলবীজং, মূলবীজং এতস্সাতিপি মূলবীজং. তত্থ পুরিমেন বীজগামো ৰুত্তো ‘‘বীজানং সমূহো’’তি কত্ৰা, দুতিযেন ভূতগামো. দুৰিধোপেসো সামঞ্ঞনিদ্দেসেন, ‘‘মূলবীজঞ্চ মূলবীজঞ্চ মূলবীজ’’ন্তি একসেসনযেন ৰা বীজত্থো ৰেদিতব্বো. এস নযো সেসেসুপি. ফল়ুবীজন্তি পব্ববীজং. বাহিরপচ্চযন্তরসমৰাযে সদিসফলুপ্পত্তিযা ৰিসেসকারণভাৰতো ৰিরুহনসমত্থে সারফলে নিরুল়্হো বীজ-সদ্দো. তদত্থসিদ্ধিযা মূলাদীসুপি কেসুচি পৰত্ততীতি ততো নিৰত্তনত্থং একেন বীজ-সদ্দেন ৰিসেসেত্ৰা ৰুত্তং ‘‘বীজবীজ’’ন্তি ‘‘রূপরূপং, দুক্খদুক্খ’’ন্তি (সং. নি. ৪.৩২৭) চ যথা. নীলতিণরুক্খাদিকস্সাতি অল্লতিণস্স চেৰ অল্লরুক্খাদিকস্স চ. আদি-সদ্দেন ওসধিগচ্ছলতাদীনং গহণং.