৩-১০. পঠমআনন্দসুত্তাদিৰণ্ণনা

৯৮৯-৯৯৬. অনিচ্চাদিৰসেনাতি অনিচ্চদুক্খানত্তৰসেন. পৰিচিনতি পকারেহি ৰিচিনতি. নিক্কিলেসাতি অপগতকিলেসা ৰিক্খম্ভিতকিলেসা. পীতিসম্বোজ্ঝঙ্গো, পস্সদ্ধিসম্বোজ্ঝঙ্গোতি পাঠো.

যায অনোসক্কনং অনতিৰত্তনঞ্চ হোতি, অযং তত্রমজ্ঝত্তুপেক্খা মজ্ঝত্তাকারোতি ৰুত্তা. একচিত্তক্খণিকাতি একচিত্তুপ্পাদপরিযাপন্নত্তা.

চত্তুন্নং চতুক্কানং ৰসেন সোল়সক্খত্তুকা. আনাপানসন্নিস্সযেন পৰত্তত্তা আরম্মণৰসেন পৰত্তা আনাপানারম্মণাপি অপরভাগে সতি আনাপানস্সতীতি পরিযাযেন ৰত্তব্বতং অরহতীতি ‘‘আনাপানস্সতি মিস্সকা কথিতা’’তি ৰুত্তং. আনাপানমূলকাতি আনাপানসন্নিস্সযেন পৰত্তা সতিপট্ঠানা. তেসং মূলভূতাতি তেসং সতিপট্ঠানানং মূলকারণভূতা. বোজ্ঝঙ্গমূলকাতি বোজ্ঝঙ্গপচ্চযভূতা. তেপি বোজ্ঝঙ্গাতি এতে ৰীসতি সতিপট্ঠানহেতুকা বোজ্ঝঙ্গা. ৰিজ্জাৰিমুত্তিপূরকাতি ততিযৰিজ্জায তস্স ফলস্স চ পরিপূরণৰসেন পৰত্তা বোজ্ঝঙ্গা. ফলসম্পযুত্তাতি চতুত্থফলসম্পযুত্তা, চতুব্বিধফলসম্পযুত্তা ৰা.

দুতিযৰগ্গৰণ্ণনা নিট্ঠিতা.

আনাপানসংযুত্তৰণ্ণনা নিট্ঠিতা.