৫. দুতিযঅপরিজাননসুত্তৰণ্ণনা

২৭. চক্খুৰিঞ্ঞাণৰিঞ্ঞাতব্বধম্মো নাম রূপাযতনমেৰাতি আহ ‘‘হেট্ঠা গহিতরূপমেৰা’’তি. ইধ অনাপাথগতং ‘‘চক্খুৰিঞ্ঞাণৰিঞ্ঞাতব্বা ধম্মা’’তি ৰুত্তত্তা. হেট্ঠা আপাথগতম্পি অনাপাথগতম্পি গহিতমেৰ ‘‘যে চ রূপা’’তি অনৰসেসতো ৰুত্তত্তা. তে হি ৰেদনাসঞ্ঞাসঙ্খারক্খন্ধা সহ চক্খুৰিঞ্ঞাণেন ৰিঞ্ঞাতব্বত্তা. তথা হি চক্খুৰিঞ্ঞাণং তেহি একুপ্পাদং একৰত্থুকং একনিরোধং একারম্মণমেৰ. সেসপদেসূতি সেসেসু ‘‘যঞ্চ সোতং যে চ সদ্দা’’তিআদিনা আগতেসু কণ্হপক্খে পঞ্চসু, সুক্কপক্খে ছসুপি পদেসু. এসেৰ নযোতি য্ৰাযং ‘‘হেট্ঠা গহিতরূপমেৰ গণ্হিত্ৰা’’তি অত্থো ৰুত্তো. এসো এৰ তত্থপি অত্থৰণ্ণনানযো.

দুতিযঅপরিজাননসুত্তৰণ্ণনা নিট্ঠিতা.